ܡܠܺܝܠܽܘܬܳܐ ܦܫܺܝܛܬܳܐ ܕܢܰܦܫܳܐ

ܡܠܺܝܠܽܘܬܳܐ ܦܫܺܝܛܬܳܐ ܕܢܰܦܫܳܐ

 

ܡܠܺܝܠܽܘܬܳܐ ܦܫܺܝܛܬܳܐ ܕܢܰܦܫܐ ܐܺܝܬܶܝܗ̇: ܢܽܘܗܪܳܐ ܡܶܬܝܰܕܥܳܢܳܐ ܕܡܶܢ ܐܰܠܳܗܳܐ ܐܶܬܺܝܗܶܒ ܒܛܰܝܒܽܘ ܠܰܟܝܳܢܳܐ ܕܡܰܠܰܐܟ̈ܶܐ ܘܰܕܢܰܦ̈ܫܳܬܳܐ. ܡܠܺܝܠܽܘܬܳܐ ܡܪܰܟܰܒܬܳܐ ܐܺܝܬܶܝܗ̇ ܩܽܘܛܳܪܳܐ ܘܪܽܘܟܳܒܳܐ ܐܽܘܡܳܢܳܝܳܐ ܕܡܶܠܬܳܐ: ܕܡܶܬܪܰܟܒܳܐ ܘܡܶܫܬܰܠܛܳܐ ܒܝܰܕ ܡܰܪܕܽܘܬܳܐ ܕܝܽܘܠܦܳܢܳܐ: ܘܡܶܨܛܰܒܬܳܐ ܕܶܝܢ ܒܟܽܘܪܶܗ ܕܡܰܕܥܳܐ ܒܝܰܕ ܣܰܕܳܢܳܐ ܕܗܰܘܢܳܐ. ܐܰܪܙܰܦܬܳܐ ܕܣܽܘܟܳܠܳܐ: ܟܰܠܒܬܳܐ ܕܥܽܘܗܕܳܢܳܐ: ܢܽܘܪܳܐ ܕܥܰܡ̈ܠܶܐ. ܘܩܰܝ̈ܣܶܐ ܕܦܽܘܠܚܳܢܳܐ: ܒܕܽܘܪܳܫܳܐ ܘܢܽܘܦܳܩܳܐ ܕܒܶܐܣܟܽܘܠܺܐ ܟܣܺܝܬܳܐ ܕܢܰܦܫܳܐ ܢܶܒܥܳܐ ܕܡܶܠܬܳܐ ܦܫܺܝܛܬܳܐ ܕܰܠܓܰܘ܉ ܕܠܳܐ ܡܪܰܟܒܳܐ ܥܰܡ ܩܳܠܳܐ ܐܺܝܬܰܘܗܝ ܚܰܝܠܳܐ ܝܰܕܽܘܥܬܳܢܳܐ ܕܰܢܨܺܝܒ ܒܢܰܦܫܳܐ ܘܢܳܨܶܦ ܐܰܡܺܝܢܳܐܝܬ̥. ܒܰܕܡܽܘܬܳܐ ܕܗܘܠܐ ܦܫܺܝܛܬܳܐ: ܘܠܳܐ ܡܬܰܩܰܢܬܳܐ ܘܠܳܐ ܡܨܰܒܰܬܬܐ: ܡܶܬܪܰܟܒܳܐ ܕܶܝܢ ܘܡܶܨܛܰܒܬܳܐ ܗܺܝ ܡܶܠܬܳܐ ܒܝܰܕ ܢܽܘܗܪܐ ܕܰܡܠܺܝܠܽܘܬܳܐ: ܢܳܦܩܳܐ ܕܶܝܢ ܠܣܳܥܽܘܪܽܘܬܳܐ ܒܡܶܨܥܳܝܽܘܬܳܐ ܕܩܴ̈ܠܶܐ ܘܪ̈ܶܓܫܶܐ. ܐܽܘܡܳܢܳܐ ܗܳܟܺܝܠ ܟܽܠ ܨܒܽܘܬܳܐ ܕܒܳܥܶܐ ܠܡܬܩܢܘ: ܠܽܘܩܕܰܡ ܡܶܬܛܰܒܥܳܐ ܒܥܽܘܗܕܳܢܶܗ ܡܳܢܳܝܽܘܬܳܗ̇ ܘܰܐܝܟܰܢܳܝܽܘܬܳܗ̇ ܘܰܟܡܳܝܽܘܬ̥ܳܗ̇. ܘܡܰܥܶܠ ܠܳܗ̇ ܠܟܽܘܪܶܗ ܕܡܰܕܥܳܐ. ܘܨܳܪܶܦ ܠܳܗ̇ ܒܰܐܪܙܰܦܬܳܐ ܕܣܽܘܟܳܠܳܐ. ܘܒܳܚܰܪ ܠܳܗ̇ ܥܰܠ ܣܰܕܳܢܳܐ ܕܗܰܘܢܳܐ. ܘܚܳܐܰܪ ܒܳܗ̇ ܒܢܽܘܗܪܳܐ ܕܰܡܠܺܝܠܽܘܬ̥ܳܗ̇܉ ܘܡܶܬܒܰܝܰܢ ܒܳܗ̇ ܘܦܳܪܶܫ ܐܶܢ ܣܳܦܶܩ ܠܰܡܪܰܟܳܒܽܘܬܳܗ̇ ܘܩܝܡܐ ܠܘܳܬܗ̇ ܐܰܘ ܠܳܐ. ܘܡܶܬܬܦܺܝܣ ܨܶܒܝܳܢܳܐ ܘܰܡܩܰܒܠܳܐ ܠܳܗ̇ ܬܺܐܪܬܳܐ ܡܶܢ ܠܓܰܘ܉ ܘܗܳܝܕܶܝܢ ܡܰܦܶܩ ܕܡܽܘܬ̥ܳܗ̇ ܠܰܥܒܳܕܳܐ. ܟܰܕ ܠܳܐ ܪܓܺܝܫ ܐܽܘܡܳܢܳܐ ܒܗܳܕܶܐ ܐܶܣܟܽܘܠܺܐ ܕܰܠܓܰܘ: ܡܚܰܦܝܳܐ ܓܶܝܪ ܡܶܢܶܗ ܬܚܶܝܬ ܬܰܚܦܺܝܬܳܐ ܕܚܰܫ̈ܶܐ. ܒܗܳܢܳܐ ܛܽܘܦܣܐ ܐܶܣܬܰܟܠ ܠܺܝ: ܐܳܦ ܥܠ ܫܪܳܪܳܐ ܘܛܽܘܥܝܰܝ ܘܕܽܘܡܝܳܐ: ܕܰܒܝܰܕ ܚܽܘ̈ܫܳܒܶܐ ܘܡܷ̈ܠܶܐ ܘܣܽܘܥܪ̈ܳܢܶܐ ܡܶܬܦܰܠܚܺܝܢܢ ܡܶܢܰܢ. ܙܰܠܺܝ̈ܩܶܐ ܓܶܝܪ ܕܡܰܕܥܳܐ ܕܰܒܝܰܕ ܗܶܓܓ̈ܐ ܕܡܶܠܬܳܐ ܡܶܬ̥ܰܐܫܕܺܝܢ ܠܒܰܪ: ܘܡܶܬܛܰܥܡܺܝܢ ܡܶܢ ܦܳܪ̈ܽܘܫܶܐ. ܛܶܠܴ̈ܠܶܐ ܐܶܢܽܘܢ ܕܨܽܘܪ̈ܳܬܳܐ ܕܛܳܒ̈ܳܬܳܐ ܘܒܺܝ̈ܫܳܬܳܐ ܕܓܠܺܝ̈ܦܳܢ ܥܰܠ ܡܰܚܙܺܝܬܶܗ ܕܡܰܕܥܳܐ. ܘܰܒܝܰܕ ܡܶܠܬܳܐ ܛܳܒ̈ܥܳܢ ܠܟܽܠ ܕܢܳܦ̈ܠܳܢ ܥܠܰܝܗܽܘܢ. ܘܡܰܘ̈ܕܥܳܢ ܠܰܒܪ̈ܰܝܳܐ ܫܽܘܦܪܳܐ ܐܰܘ ܣܰܢܝܽܘܬܳܐ ܕܡܳܢܳܝܽܘܼܬܳܐ ܕܰܓܠܺܝܦ ܥܰܠ ܡܰܕܥܳܐ ܕܠܶܒܳܐ.

 

ܐܶܢ ܪ̈ܶܓܫܶܐ ܕܰܠܒܰܪ: ܟܳܬܽܘ̈ܒܶܐ ܐܶܢܽܘܢ ܕܰܟܬܳܒܶܗ ܕܠܶܒܳܐ: ܐܰܨܰܚܬܳܐ ܕܶܝܢ ܕܡܶܢܳܗ̇ ܟܳܬܒܺܝܢ. ܡܠܽܘܐܐ ܡܶܢ ܨܶܒ̈ܘܳܬܶܗ ܕܥܳܠܡܳܐ ܫܳܩܠܺܝܢ܇ ܒܝܰܕ ܦܶܓ̈ܥܶܐ ܡܰܘܬܪ̈ܳܢܶܐ ܘܡܰܚܣܪ̈ܳܢܶܐ ܕܰܐܝܠܶܝܢ ܕܥܳܡܰܪ ܒܰܝܢܳܬܗܽܘܢ ܐܺܝܬܰܘܗܝ.

 

ܐܶܢܕܶܝܢ ܪ̈ܶܓܫܶܐ ܕܰܠܒܰܪ: ܐܰܟܳܪ̈ܶܐ ܐܶܢܽܘܢ ܕܙܳܪܥܺܝܢ ܠܰܐܪܥ ܠܶܒܳܐ. ܝܺܕܺܝܥܳܐ ܕܡܶܢ ܡܠܽܘܐܐ ܕܙܰܪܥܳܐ ܕܡܶܫܟܚܺܝܢ ܒܩܰܪ̈ܺܝܒܰܝܗܽܘܢ ܙܳܪܥܺܝܢ ܠܶܗ܇ ܐܶܢ ܙܺܝ̈ܙܳܢܶܐ ܘܶܐܢ ܚ̈ܛܳܗܶܐ. ܗܰܘ ܡܳܐ ܕܙܳܪܰܥ ܒܰܪܢܳܫܳܐ܆ ܗܰܘ ܗܽܘ ܚܳܨܶܕ.

ܐܶܢܕܶܝܢ ܪ̈ܶܓܫܶܐ ܢܰܗܪ̈ܰܘܳܬܳܐ ܐܶܢܽܘܢ ܕܡܰܫܩܶܝܢ ܠܰܐܪܰܥ ܠܶܒܳܐ܆ ܐܰܢܰܢܩܺܝ ܕܰܠܦܽܘܬ ܡܠܽܘܐܐ ܕܡܰܝ̈ܳܐ܆ ܕܡܶܢ ܠܒܰܪ ܢܳܣܒܺܝܢ ܒܢܰܗܪ̈ܰܘܳܬܐ ܕܪ̈ܶܓܫܶܐ ܡܰܫܩܶܝܢ ܠܠܶܒܳܐ܇ ܐܶܢ ܕܠܺܝ̈ܚܶܐ ܘܶܐܢ ܫܦܰܝ̈ܳܐ. ܘܶܐܢ ܚܠܰܝ̈ܳܐ ܘܶܐܢ ܡܰܪܺܝܪ̈ܶܐ. ܘܠܰܝܬ ܠܡܶܬܚܰܪܳܪܽܘ ܡܶܢ ܥܳܠܡܳܐ ܘܨܶܒ̈ܘܳܬܶܗ ܘܦܶܓܥܰܘ̈ܗܝ܆ ܐܶܠܳܐ ܐܶܢ ܒܡܰܘܬܳܐ. ܐܶܢ ܦܫܺܝܛܳܐ ܕܡܶܢ ܐܰܢܰܢܩܺܝ ܘܶܐܢ ܡܶܬܝܰܕܥܳܢܳܐ ܕܡܶܢ ܚܺܐܪܽܘܬ ܨܶܒܝܳܢܳܐ. ܥܽܘܗܕܳܢܳܐ ܓܺܝܙܰܒܪܰܐ ܗ̱ܘ ܕܠܶܒܳܐ. ܕܰܡܩܰܒܶܠ ܡܶܢ ܣܺܝ̈ܡܳܬܶܗ ܛܳܒ̈ܳܬܳܐ ܘܒܺܝ̈ܫܳܬܳܐ. ܘܗܳܦܶܟ ܡܰܥܗܶܕ ܠܶܗ ܥܠܰܝܗܶܝܢ ܒܝܰܕ ܗܶܪܓܳܐ. ܚܽܘ̈ܫܳܒܶܐ ܕܠܳܐ ܒܽܘܝܳܢ؟ ܢܳܒܥܺܝܢ ܡܶܢ ܟܽܘ̈ܠܝܳܬܳܐ ܒܰܕܡܽܘܬ ܥܶܛܪܳܐ ܡܶܕܶܡ. ܘܰܡܩܰܒܠܺܝܢ ܪܽܘܫܡܳܐ ܘܨܽܘܪ̈ܳܬܳܐ ܡܶܢ ܠܶܒܳܐ ܐܰܝܟ ܥܶܛܪܳܐ ܕܺܝܠܶܗ ܕܰܒܗܰܘ ܥܶܕܳܢܳܐ. ܐܶܢ ܠܝܰܡܺܝܢܳܐ ܘܶܐܢ ܠܣܶܡܳܠܳܐ. ܡܶܢ ܥܶܛܪܳܐ ܕܥܺܝܪܽܘܬܳܐ ܕܚܽܘ̈ܫܳܒܶܐ ܡܶܬܝܰܠܕܺܝܢ܉ ܘܡܶܢ ܥܶܛܪܳܐ ܝܰܚ̈ܛܶܐ ܕܫܶܢܬܳܐ ܚܶܠ̈ܡܶܐ. ܘܰܐܝܟܰܢܳܐ ܕܰܦܩܺܝܕܺܝܢܰܢ ܒܺܐܝܡܳܡܳܐ ܠܰܡܙܰܗܳܝܽܘ ܕܽܘܒܳܪ̈ܰܝܢ܇ ܕܢܶܗܘܽܘܢ ܕܟܶܝܢ ܚܽܘ̈ܫܳܒܰܝܢ܆ ܗܳܟܰܢܳܐ ܦܩܺܝܕܺܝܢܰܢ ܒܠܺܠܝܳܐ ܠܰܡܩܰܕܳܫܽܘ ܦܰܓܪ̈ܰܝܢ ܘܢܰܦܫܴ̈ܬܰܢ ܒܰܨܠܽܘܬܳܐ ܕܢܶܬܚܰܪܰܪ ܡܶܢ ܚܶܠ̈ܡܶܐ ܡܫܰܟܪ̈ܶܐ. ܐܳܦ ܫܺܐܕ̈ܶܐ ܡܙܺܝܥܺܝܢ ܦܽܘܪ̈ܣܰܝܗܽܘܢ ܘܛܳܒܥܺܝܢ ܦܳܪܽܘܫܽܘܬܐ ܛܳܒܬܳܐ ܕܰܒܠܶܒܳܐ. ܟܽܠܡܳܐ ܕܗܳܪܓܳܐ ܒܺܝܫܳܐܝܬ ܟܳܬܶܒ ܥܰܠ ܟܬܳܒܶܗ ܕܠܶܒܳܐ. ܡܶܢ ܐܰܨܰܚܬܳܐ ܕܪ̈ܶܓܫܶܐ ܘܥܽܘܗܕܳܢܳܐ܆ ܠܳܚܝܳܐ ܘܥܳܛܝܳܐ ܠܗܽܘܢ ܕܠܳܐ ܢܶܦܩܽܘܢ ܠܰܥܒܳܕܳܐ. ܬܺܐܪܬܳܐ ܛܳܒܬܳܐ ܒܟܽܠܙܒܰܢ ܕܳܝܢܳܐ ܘܡܰܟܣܳܐ ܠܰܡܠܺܝܠܽܘܬܳܐ܆ ܕܠܳܐ ܬܶܟܬܽܘܒ ܒܺܝܫܳܐܝܬ. ܘܰܠܪ̈ܶܓܫܶܐ ܘܥܽܘܗܕܳܢܳܐ ܡܰܟܣܳܐ ܕܠܳܐ ܢܶܬܠܽܘܢ ܡܠܽܘܐܐ ܒܺܝܫܳܐ. ܘܰܡܥܺܝܪܳܐ ܠܦܳܪܽܘܫܽܘܬܳܐ ܕܳܐܦܶܢ ܐܶܬܟܬܶܒ ܒܺܝܫܳܐܝܬ܆ ܬܶܠܚܶܐ ܕܠܳܐ ܢܶܦܩܽܘܢ ܠܰܥܒܳܕܳܐ.

 

ܪܶܥܝܳܢܳܐ ܘܒܽܘܝܳܢܳܐ ܘܗܰܘܢܳܐ ܡܛܰܟ̈ܣܳܢܶܐ ܐܶܢܽܘܢ ܘܰܫܪܳܓܳܐ ܕܟܽܠܶܗ ܒܰܝܬܳܐ ܕܠܶܒܳܐ. ܠܶܫܳܢܳܐ ܟܢܰܥܢܳܝܳܐ: ܓܳܢܶܒ ܣܺܝ̈ܡܳܬܶܗ ܕܠܶܒܳܐ. ܘܰܡܦܰܪܣܶܐ ܠܢܰܦܫܳܐ ܘܰܡܡܰܣܟܶܢ ܠܗܽܘܢ. ܛܰܝܒܽܘܬܳܐ ܗܳܟܺܝܠ ܠܟܽܠ ܡܰܢ ܕܓܳܒܶܐ ܠܶܗ ܛܳܒܬܳܐ ܕܰܡܣܰܝܥܳܐ ܠܶܗ. ܘܰܐܝܢܳܐ ܕܓܳܒܶܐ ܠܶܗ ܒܺܝܫܬܳܐ܆ ܢܳܦܶܠ ܡܶܢ ܛܰܝܒܽܘܬܳܐ. ܘܰܡܥܰܕܰܪ ܠܶܗ ܣܳܛܳܢܳܐ ܠܰܐܒܕܳܢܶܗ.

 

ܚܰܕ ܚܰܕ ܡܶܢܰܢ ܒܰܟܡܳܝܽܘܬܐ ܕܣܳܟܰܪ ܟܰܘ̈ܶܐ ܕܪ̈ܶܓܫܶܐ ܘܢܳܛܰܪ ܠܗܽܘܢ ܡܶܢ ܦܶܓ̈ܥܶܐ ܕܠܳܐ ܢܶܥܠܽܘܢ ܡܰܝ̈ܳܐ ܕܠܺܝ̈ܚܶܐ ܠܓܰܘ܆ ܘܰܢܙܺܝܥܽܘܢ ܥܽܘܗ̈ܕܳܢܶܐ ܢܽܘܟܪ̈ܳܝܶܐ ܘܰܢܛܰܡܐܘܢ ܠܒܰܝܬܶܗ ܕܠܶܒܳܐ. ܗܳܟܘܳܬ ܢܳܗܰܪ ܒܰܨܠܽܘܬܳܐ ܡܳܐ ܕܶܐܬܥܩܰܪܘ ܚܰܫ̈ܶܐ ܒܝܰܕ ܦܽܘܩ̈ܕܳܢܶܐ. ܘܶܐܬܩܦܶܠ ܥܰܡܛܳܢܳܐ ܕܚܶܫܟܳܐ ܕܛܽܘܥܝܰܝ ܒܝܰܕ ܥܰܡ̈ܠܶܐ. ܘܠܰܝܬ ܛܶܠܳܠܳܐ ܕܚܰܫ̈ܶܐ ܥܰܠ ܢܰܦܫܳܐ. ܘܩܳܡ ܟܝܳܢܳܐ ܒܫܽܘܒܚܳܐ ܕܰܟܝܳܢ ܒܪܺܝܬܶܗ ܒܛܰܝܒܽܘܬܳܐ. ܚܳܙܶܐ ܗܽܘ ܠܶܗ ܒܢܽܘܗܪܳܐ ܕܠܳܐ ܚܳܫܽܘܫܽܘܬܳܐ. ܘܦܳܪܶܫ ܫܪܳܪܳܐ ܡܶܢ ܕܽܘܡܝܳܐ ܘܛܽܘܥܝܰܝ ܘܡܰܦܶܩ ܠܰܥܒܳܕܳܐ ܚܽܘ̈ܫܳܒܶܐ ܘܡܷ̈ܠܶܐ ܘܣܽܘܥܪ̈ܳܢܶܐ ܕܠܳܐ ܒܽܘܠܒܳܠ.

 

ܐܶܡܰܬܝ ܕܠܰܝܬ ܒܰܐܦܱ̈ܝ ܡܰܕܥܳܐ ܚܰܫ̈ܶܐ ܘܛܰܒ̈ܥܶܐ ܕܗܽܘ̈ܠܐ ܕܥܳܠܡܳܐ ܡܶܬܪܰܓܫܳܢܳܐ. ܠܳܐ ܒܝܰܕ ܥܽܘܗܕܳܢܳܐ ܘܗܶܪܓܳܐ ܘܠܳܐ ܒܝܰܕ ܚܽܘ̈ܫܳܒܶܐ. ܗܳܝܕܶܝܢ ܗ̱ܘ̣ ܡܨܶܐ ܗܰܘܢܳܐ ܕܢܶܬܚܰܪܰܪ ܡܶܢ ܨܶܦܬܳܐ ܘܥܳܩܴ̈ܬܳܐ ܝܰܨܪܳܐ ܘܰܛܢܳܢܳܐ. ܥܰܝ̈ܛܶܐ ܘܦܽܘܪ̈ܣܶܐ ܡܨܰܥܪ̈ܳܢܰܘܗܝ ܕܒܰܪܢܳܫܳܐ. ܘܢܶܙܪܽܘܥ ܒܓܰܘ ܠܶܒܳܐ ܫܰܝܢܳܐ ܪܽܘܚܳܢܳܐ ܘܚܰܕܽܘܬܳܐ ܕܒܶܝܬ ܡܳܪܰܢ ܐܶܢ ܒܡܰܠܟܽܘܬܶܗ ܕܰܐܠܳܗܳܐ ܠܰܝܬ ܕܽܘܘܳܕܳܐ ܘܰܕܠܽܘܚܝܳܐ ܥܳܩܬܳܐ ܘܟܰܪܝܽܘܬܳܐ. ܬܘܳܬ̥ܳܐ ܘܥܶܨܝܳܢܳܐ ܕܶܚܠܬܳܐ ܘܫܽܘܢܳܩܳܐ. ܝܺܕܺܝܥܳܐ ܕܳܐܦ ܗܳܟܰܢܳܐ ܕܡܺܝܬ̥ ܡܶܬܝܰܕܥܳܢܳܐܝܬ ܠܰܚܛܺܝܬܳܐ܆ ܘܶܐܬܢܰܚܰܡ ܒܪܽܘܚ ܠܙܰܕܺܝܩܽܘܬܳܐ. ܐܶܬܚܰܪܰܪ ܠܶܗ ܡܶܢ ܬܘܳܬܳܐ ܘܥܳܩܬܐ ܘܕܶܚܠܬܳܐ. ܘܰܐܡܠܶܟ ܒܶܗ ܫܰܝܢܳܐ ܘܚܽܘܒܳܐ ܘܚܰܕܽܘܬܳܐ ܒܪܽܘܚܳܐ ܕܩܽܘܕܫܳܐ. ܚܙܺܝ ܠܳܐ ܬܶܛܥܶܐ ܘܰܬܚܰܠܶܦ ܫܰܝܢܳܐ ܒܫܰܝܢܳܐ܇ ܘܚܰܕܽܘܬܳܐ ܒܚܰܕܽܘܬܳܐ. ܘܒܽܘܝܳܐܐ ܒܒܽܘܝܳܐܐ ܘܫܰܪܟܳܐ. ܫܰܝܢܳܐ ܓܶܝܪ ܘܚܰܕܽܘܬܳܐ ܕܡܶܢ ܥܶܠܬܳܐ ܡܶܬܝܰܠܕܺܝܢ܇ ܠܳܐ ܩܳܝܡܺܝܢ ܠܝܳܬܗܽܘܢ ܡܶܛܽܠ ܕܥܶܠܬܳܐ ܡܶܢ ܥܳܠܡܳܐ ܐܺܝܬܶܝܗ̇. ܘܥܳܠܡܳܐ ܡܶܨܛܰܠܝܳܢܰܐ ܗ̱ܘ. ܘܰܐܬ̥ܰܪ ܕܠܰܝܬ ܚܺܐܪܽܘܬܳܐ ܕܰܫܪܳܪܳܐ ܕܰܡܚܰܪܪܳܐ ܡܶܢ ܡܶܨܛܰܠܝܳܢܽܘܬܳܐ ܕܚܰܫܳܐ. ܠܰܝܬ ܫܰܝܢܳܐ ܘܚܰܕܽܘܬܳܐ ܕܰܫܪܪܐ.

 

ܡܣܰܝܒܪܳܢܽܘܬܳܐ ܘܰܡܚܰܡܣܢܳܢܽܘܬܳܐ܆ ܒ̈ܢܳܬ̥ܳܐ ܐܶܢܶܝܢ ܕܥܶܨܝܳܢܳܐ. ܢܰܓܺܝܪܽܘܬ ܪܽܘܚܳܐ ܕܶܝܢ ܘܰܪܘܺܝܚܽܘܬ ܢܰܦܫܳܐ ܘܰܒܗܺܝܠܽܘܬܳܐ܆ ܒ̈ܢܳܬܳܐ ܐܶܢܶܝܢ ܕܚܺܐܪܽܘܬܐ. ܡܳܕܶܝܢ ܒܝܰܕ ܨܠܰܘ̈ܳܬܳܐ ܚܦܺܝ̈ܛܳܬܳܐ ܘܕܶܡ̈ܥܶܐ ܚܢܺܝ̈ܓܳܬܳܐ܆ ܘܬܰܟܫܶܦܬܳܐ ܘܒܳܥܽܘܬܳܐ. ܘܓܽܘܪ̈ܓܳܚܶܐ ܐܰܡܺܝ̈ܢܶܐ. ܘܣܽܘܘܳܚܳܐ ܕܠܶܒܳܐ ܕܚܰܫܺܝܫ ܒܰܐܠܳܗܳܐ ܘܡܰܟܺܝܟ̥ ܘܰܬܒܺܝܪ ܒܰܬܘܳܬ̥ܳܐ܆ ܢܣܰܝܒܰܪ ܘܰܢܣܰܟܶܐ ܟܽܠܫܳܥ ܠܡܰܥܒܕܳܢܽܘܬܳܐ ܕܛܰܝܒܽܘܬܳܐ. ܟܰܕ ܝܳܬܒܺܝܢܰܢ ܒܫܶܠܝܳܐ ܬܚܶܝܬ ܣܶܬܳܪܶܗ ܕܰܡܪܰܝܡܳܐ܉ ܕܢܶܫܬܘܶܐ ܒܛܰܝܒܽܘ ܠܗܰܘ ܫܰܝܢܳܐ ܘܒܽܘܝܳܐܐ܆ ܕܥܰܝܢܳܐ ܠܳܐ ܚܙܳܬ̥. ܘܶܐܕܢܳܐ ܠܳܐ ܫܶܡܥܰܬ̥. ܘܥܰܠ ܠܶܒܳܐ ܕܒܰܪܢܳܫܳܐ ܠܳܐ ܣܠܶܩ.

 

ܟܡܳܐ ܕܰܠܓܰܘ ܡܶܢܰܢ ܐܺܝܬ ܚܰܫܳܐ. ܕܗܺܝ ܢܰܦܫܳܐ ܨܶܒܝܳܢܳܐܝܬ ܐܰܣܺܝܪܳܐ ܒܚܽܘܒܶܗ܆ ܠܳܐ ܡܰܥܒܕܳܐ ܒܰܢ ܪܽܘܚܳܐ ܓܶܠ̈ܝܳܢܰܘܗܝ ܫܒܺܝ̈ܚܶܐ. ܐܶܢܕܶܝܢ ܡܰܥܒܕܳܐ ܒܰܙܒܰܢ܆ ܠܓܽܘܪܳܓ̥ܳܐ ܘܒܽܘܝܳܐܐ ܕܰܦܫܺܝܛܳܐ ܡܰܥܒܕܳܐ. ܐ̱ܚܪܺܢܳܐ ܐܺܝܬܰܘܗܝ ܚܰܝܠܳܐ ܕܰܡܝܰܬܪܽܘܬܳܐ܆ ܕܡܶܬܦܰܠܚܳܐ ܡܶܢܰܢ ܥܶܨܝܳܢܳܐܝܬ ܒܰܕܡܽܘܬ̥ ܥܰܒ̈ܕܶܐ. ܡܶܢ ܩܛܺܝܪܳܐ ܕܢܳܡܽܘܣܳܐ ܘܩܳܢܽܘ̈ܢܶܐ ܚܪ̈ܺܝܩܶܐ. ܘܰܐ̱ܚܪܺܢܳܐ ܚܰܝܠܳܐ ܕܰܡܝܰܬܪܽܘܬܳܐ ܕܡܶܬܦܰܠܚܳܐ ܨܶܒܝܳܢܳܐܝܬ ܒܚܺܐܪܽܘܬܐ ܕܨܶܒܝܳܢܳܐ ܕܰܒ̈ܢܰܝܳܐ܇ ܡܶܢ ܪܶܬ̥ܚܳܐ ܕܚܽܘܒܳܐ܉ ܒܫܰܝܢܳܐ ܘܚܰܕܽܘܬܳܐ ܕܒܶܝܬ ܡܳܪܰܢ ܗ̱ܝ̣ ܕܰܥܒܰܪ ܡܶܢ ܒܺܝܫܬܳܐ. ܡܝܰܬܪܽܘܬܐ ܐܺܝܬܶܝܗ̇ ܕܕܽܘܒܳܪܳܐ ܩܛܺܝܪܳܝܳܐ ܕܢܳܡܽܘܣܳܐ. ܡܰܘܠܳܕܳܐ ܕܶܝܢ ܕܙܰܕܺܝܩܽܘܬܳܐ ܕܥܶܨܝܳܢܳܐ. ܗܝ ܕܶܝܢ ܕܰܥܒܕ ܛܳܒܬܳܐ܇ ܡܝܰܬܪܽܘܬܳܐ ܐܺܝܬܶܝܗ̇ ܕܕܽܘܒܳܪܳܐ ܚܰܕܬ̥ܳܐ ܕܰܣܒܰܪܬܳܐ ܕܨܶܒܝܳܢܳܐܝܬ ܡܶܬܦܰܠܚܳܐ ܒܚܺܐܪܽܘܬܳܐ ܕܰܒ̈ܢܰܝܳܐ. ܡܫܰܘܬܦܳܐ ܠܰܢ ܓܶܝܪ ܒܪܽܘܚܳܐ ܩܰܕܺܝܫܳܐ. ܘܰܡܩܰܕܫܳܐ ܠܢܰܦܫܳܐ ܘܡܳܠܝܳܐ ܠܳܗ̇ ܫܰܝܢܳܐ ܘܒܽܘܝܳܐܐ ܘܚܰܕܽܘܬܳܐ. ܒܕܽܘܒܳܪ̈ܶܐ ܡܝܰܬܪ̈ܶܐ ܕܥܶܨܝܳܢܳܐܝܬ ܡܶܬܦܰܠܚܺܝܢ܇ ܡܶܛܽܠ ܩܛܺܝܪܳܐ ܘܠܰܘ ܡܶܛܽܠ ܣܰܒܪܳܐ ܕܰܥܬܺܝܕ: ܠܰܝܬ ܒܗܽܘܢ ܚܰܕܽܘܬܳܐ ܕܰܫܪܳܪܳܐ. ܘܠܳܐ ܫܰܝܢܳܐ ܘܚܽܘܒܳܐ ܪܽܘܚܳܢܳܐ ܕܰܒܟܽܠ ܚܳܕܶܐ ܘܟܽܠ ܡܣܰܝܒܰܪ. ܐܶܠܳܐ ܙܰܕܺܝܩܽܘܬܳܐ ܐܺܝܬܶܝܗ̇ ܥܶܨܝܳܢܳܐ܇ ܘܡܶܛܽܠ ܕܶܚܠܬܳܐ ܕܡܶܢ ܡܣܳܡ ܒܪܺܝܫܳܐ ܘܫܽܘܢܳܩܳܐ ܒܕܽܘܒܳܪ̈ܶܐ ܕܶܝܢ ܡܝܰܬܪ̈ܶܐ ܕܨܶܒܝܳܢܳܐܝܬ ܡܶܬܦܰܠܚܺܝܢ ܒܚܽܘܒܳܐ ܐܰܠܳܗܳܝܳܐ ܠܰܝܬ ܩܛܺܝܪܳܐ. ܕܬܳܒܰܥ ܘܪܳܫܶܐ ܘܓܳܙܶܡ. ܐܶܠܳܐ ܗܺܝ ܢܰܦܫܳܐ ܐܰܣܺܝܪܳܐ ܒܚܽܘܒܳܐ ܐܰܠܳܗܳܝܳܐ. ܒܣܰܒܪܳܐ ܕܰܥܬܺܝܕ. ܘܡܰܠܝܳܐ ܚܰܕܽܘܬܳܐ ܕܪܽܘܚܳܐ.

 

ܢܽܘܼܗܳܪܳܐ: ܠܩܺܝܼܛ ܘܰܩܛܺܝܼܦ ܦܳܣܽܘܿܩܳܐ ܗܳܢܳܐ ܡܶܢ ܟܬܳܒܐ ܕ Vat. Sir. 562  ܒܝܰܕ ܡܰܠܦܳܢܳܐ ܥܺܝܼܣܰܐ ܕܶܡܺܝܼܪ ܗܳܢܳܐ ܕܚܳܝܶܐ ܒܰܐܘܣܛܽܘܪܝܰܐ. ܬܰܘܕܺܝ ܠܥܰܡܠܳܐ ܘܡܰܟܣܳܪܳܐ ܗܳܢܳܐ ܡܰܪܕܽܘܼܬܳܢܳܝܳܐ..

 

ܦܪܘܿܣܐ ܝܘܣܦ ܒܓܬܫ