ܬܺܐܪܬܳܐ ܐ̱ܢܳܫܳܝܬܳܐ

ܬܺܐܪܬܳܐ ܐ̱ܢܳܫܳܝܬܳܐ

ܬܺܐܪܬܳܐ: ܐܺܝܬܶܝܗ̇ ܗܰܘ ܙܰܘܥܳܐ ܐܰܘܟܺܝܬ ܪܶܓܫܳܐ ܓܰܘܳܝܳܐ ܕܢܳܒܰܗ ܡܶܢ ܚܺܐܪܽܘܬ ܪܶܥܝܳܢܶܗ ܕܒܰܪܢܳܫܳܐ ܘܫܳܠܡܽܘܬܶܗ ܨܶܒܝܳܢܳܝܬܳܐ ܘܒܶܗ ܦܳܪܶܫ ܗܰܘ ܕܛܳܒ ܡܶܢ ܗܰܘ ܕܒܺܝܫ. ܘܰܡܚܰܦܛܳܐ ܘܕܳܒܪܳܐ ܠܶܗ ܠܘܳܬ ܣܳܥܽܘܪܽܘܬ ܛܳܒ̈ܳܬܳܐ. ܘܙܳܓܪܳܐ ܘܟܳܠܝܳܐ ܠܶܗ ܡܶܢ ܒܺܝܫ̈ܳܬܳܐ.

ܘܝܺܕܺܝܥܳܐ ܗܳܝ ܗܳܕܶܐ: ܡܶܢ ܗܳܝ ܕܟܰܕ ܩܳܕܶܡ ܒܰܪܢܳܫܳܐ ܥܰܠ ܣܽܘܥܪܳܢܳܐ ܡܶܕܶܡ ܨܶܒܝܳܢܳܝܳܐ܆ ܡܰܪܓܶܫ ܒܢܶܒܗܳܐ ܡܶܕܶܡ ܓܰܘܳܝܳܐ ܕܰܡܠܰܒܶܒ ܘܰܡܓܰܪܶܓ ܠܶܗ ܥܰܠ ܣܳܥܽܘܪܽܘܬܶܗ ܐܶܢ ܠܛܳܒܬܳܐ ܗ̱ܰܘ ܘܰܡܙܰܗܰܪ ܘܟܳܠܶܐ ܠܶܗ ܡܶܢ ܥܳܒܽܘܕܽܘܬܶܗ ܐܶܢ ܠܒܺܝܫܬܳܐ ܗ̱ܰܘ. ܘܡܳܐ ܕܶܝܢ ܕܐܶܫܬܰܡܠܺܝ ܗܳܢܳܐ ܣܽܘܥܪܳܢܳܐ ܕܣܺܝܡ܇ ܐܶܢ ܛܳܒܳܐ ܗ̱ܰܘ܇ ܡܰܪܓܶܫ ܣܳܥܽܘܪܶܗ ܒܚܰܕܽܘܬܳܐ ܘܰܒܢܺܝܚܽܘܬ ܠܶܒܳܐ. ܐܶܢ ܕܶܝܢ ܒܺܝܫܳܐ ܗ̱ܰܘ܇ ܡܶܬܬܘܶܐ ܘܡܰܪܓܶܫ ܒܟܽܘܘܳܢܳܐ ܘܰܒܕܺܝܢܽܘܬ ܬܺܐܪܬܳܐ.

ܗܳܝ ܕܶܝܢ ܗܳܕܶܐ ܬܺܐܪܬܳܐ: ܐܰܝܟ ܟܽܠܗܽܘܢ ܚܰܫ̈ܶܐ ܟܝܳܢܳܝ̈ܶܐ ܐܰܘ ܙܰܘܥ̈ܶܐ ܢܰܦܫܳܢܳܝ̈ܶܐ. ܡܟܳܢ ܕܚܰܣܺܝܢܳܐ ܬܶܗܘܶܐ ܐܰܘ ܟܪܺܝܗܳܐ. ܪܳܒܝܳܐ ܕܶܝܢ ܘܡܶܬܥܰܫܢܳܐ ܒܝܰܕ ܬܰܪܒܺܝܬܳܐ ܚܠܺܝܡܬܳܐ ܘܰܡܨܰܝܒܳܢܽܘܬܳܐ ܬܪܺܝܨܬܳܐ. ܘܢܳܚܒܳܐ ܘܡܶܬܪܰܦܝܳܐ ܒܥܶܠܰܬ ܡܰܗܡܝܳܢܽܘܬܳܐ ܐܰܘ ܡܩܳܡܽܘܬ ܒܨܶܒܝܳܢܳܐ ܐܰܘ ܚܰܒܪܽܘܬܳܐ ܕܒܺܝܫ̈ܰܝ ܝܰܨܪܳܐ. ܡܶܟܳܐ܇ ܬܠܳܬܳܐ ܐܺܝܬ ܠܳܗ̇ ܕܰܪ̈ܓܶܐ. ܕܰܚܽܘܠܬܳܢ̈ܶܐ ܘܥܳܠܽܘܒ̈ܶܐ ܘܰܓܡܺܝܪ̈ܶܐ.

ܕܰܚܽܘܠܬܳܢ̈ܶܐ ܡܰܢ܇ ܐܺܝܬܰܝܗܽܘܢ ܗܳܢܽܘܢ ܐ̱ܢܳܫܳܐ ܕܬܐܺܪ̈ܳܬܗܽܘܢ ܠܳܐ ܡܶܬܬܙܺܝܥ̈ܳܢ ܠܣܳܥܽܘܪܽܘܬ ܛܳܒܬܳܐ܇ ܠܕܶܚܠܰܬ ܗܳܝ ܕܠܳܐ ܢܶܬܚܰܝܒܽܘܢ ܠܰܪܘܳܙܳܐ ܕܐ̱ܰܚܪ̈ܳܢܶܐ. ܠܰܡܣܳܡܒܪܺܝܫܳܐ ܕܟܺܐܢܽܘܬܳܐ ܐܰܘ ܠܕܺܝܢܳܐ ܟܺܐܢܳܐ ܕܰܐܠܗܳܐ. ܐܰܝܟ ܐܰܝܬܳܐ ܠܡܺܐܡܰܪ܇ ܐܺܝܬ ܣܰܓܺܝ ܬܰܓܳܪ̈ܶܐ ܕܠܳܐ ܢܳܟܠܺܝܢ ܒܙܽܘܒܳܢܳܐ ܠܕܶܚܠܰܬ ܗܳܝ ܕܠܳܐ ܢܶܚܣܪܽܘܢ ܠܙܳܒܽܘܢ̈ܶܐ. ܘܣܰܓܺܝ ܐܺܝܬ ܠܶܣܛܳܝ̈ܶܐ ܕܠܳܐ ܩܳܕܡܺܝܢ ܥܰܠ ܓܳܢܳܘܿܒ̈ܘܳܬܳܐ ܠܕܶܚܠܰܬ ܗܳܝ ܕܠܳܐ ܒܰܚܒܽܘܫܝ̈ܶܐ ܢܶܬܪܡܽܘܢ ܘܣܰܓܺܝ ܐܺܝܬ ܡܨܰܠܝܳܢ̈ܶܐ ܕܠܳܐ ܡܰܨܠܶܝܢ ܐܶܠܳܐ ܐܶܢ ܠܕܶܚܠܰܬ ܗܳܝ ܕܠܳܐ ܢܶܬܚܰܝܒܽܘܢ ܠܬܰܫܢܺܝܼܩܳܐ ܕܓܺܗܰܢܳܐ. ܬܐܺܪܬܳܐ ܗܳܟܺܝܠ ܟܪܺܝܼܗܬܳܐ ܕܐܰܝܟ ܗܳܕܶܐ. ܠܳܐ ܫܟܺܝܼܚܳܐ ܐܶܠܳܐ ܐܶܢ ܠܘܳܬ ܡܰܣܟܠܳܢ̈ܶܐ ܐܰܘ ܛܳܥܰܝ̈ܳܐ ܐܰܘ ܩܽܘܛܢܳܐ ܕܰܒܪܺܝܪ̈ܶܐ. ܗܳܠܶܝܢ ܕܰܒܟܽܠܙܒܰܢ ܢܩܶܝܢ ܠܡܶܦܰܠ ܒܪ̈ܽܘܫܥܶܐ ܘܒܺܝܫ̈ܳܬܳܐ܇ ܐܶܢ ܐܶܫܬܰܪܰܪܘ ܕܰܒܫܰܝܢܳܐ ܐܶܢܽܘܢ. ܟܶܐܡܰܬ ܪ̈ܰܚܺܝܩܺܝܢ ܡܶܢ ܚܶܙܘܳܐ ܕܐ̱ܢܳܫ̈ܳܐ ܐܰܘ ܦܰܠܺܝܛܺܝܢ ܡܶܢ ܐܺܝܕܳܐ ܕܟܺܐܢܽܘܬܳܐ.

ܥܳܠܽܘܿܒ̈ܶܐ ܕܶܝܢ܇ ܐܺܝܼܬܰܝܗܽܘܢ ܗܿܰܘ ܟܶܢܫܳܐ ܕܠܳܐ ܢܳܒܗܳܐ ܒܬܐܺܪ̈ܳܬܗܽܘܢ ܣܳܥܽܘܪܽܘܬ ܛܳܒ̈ܳܬܳܐ ܐܶܠܳܐ ܐܶܢ ܠܪܶܓܰܬ ܡܩܰܕܝܳܢܽܘܼܬ ܝܽܘܼܬܪܳܢܳܐ. ܐܰܘ ܐܺܝܼܩܳܪܳܐ ܐܰܘ ܦܽܘܼܪܥܳܢܳܐ. ܐܺܝܼܬ ܓܶܝܪ ܣܰܓܺܝ ܬܰܓܳܪ̈ܶܐ ܕܟܺܐܢܳܐܺܝܬ ܡܶܬܗܰܦܟܺܝܢ. ܟܐܶܡܰܬ ܕܰܫܡܳܐ ܛܳܒܳܐ ܢܶܩܢܽܘܢ ܘܢܐܺܪܬܽܘܢ. ܘܐܺܝܬ ܣܰܓܺܝ ܒܽܘܼܕ̈ܶܐ ܘܫܳܛܽܘܿܪ̈ܶܐ܇ ܕܰܒܣܽܘܥܪ̈ܳܢܶܐ ܪܰܘܪ̈ܒܶܐ ܫܺܝܼܥܳܐܺܝܬ ܩܳܝܡܺܝܢ. ܐܰܝܟܰܢܳܐ ܕܡܶܢ ܐ̱ܢܳܫ̈ܳܐ ܢܶܫܬܰܒܚܽܘܢ. ܘܐܺܝܬ ܣܰܓܺܝ ܗܶܕܝܽܘ̈ܛܶܐ ܕܚܰܨܺܝܦܳܐܺܝܬ ܡܨܰܠܶܝܢ ܐܰܟܡܰܢ ܕܰܠܡܰܠܟܽܘܬܳܐ ܕܰܫܡܰܝܳܐ ܢܐܺܪܬܽܘܢ. ܘܗܳܠܶܝܢ ܕܶܝܢ ܦܫܺܝ̈ܛܶܐ ܐܶܢܽܘܢ ܘܒܽܘܼܪ̈ܶܐ ܘܡܼܶܢ ܫܽܘܼܘܫܳܛܳܐ ܪܽܘܼܚܳܢܳܝܳܐ ܪ̈ܰܚܺܝܩܺܝܢ.

ܓܡܺܝܼܪ̈ܶܐ ܬܘܽܒ܇ ܐܺܝܬܰܝܗܽܘܢ ܗܰܘ ܬܶܓܡܳܐ ܛܳܒܳܐ ܕܓܰܢ̱ܒܳܪ̈ܶܐ ܕܰܫܡܳܗ̈ܳܬܳܐ ܘܰܡܗܰܕ̈ܝܰܝ ܠܘܳܬ ܛܳܒ̈ܳܬܳܐ. ܗܳܠܶܝܢ ܕܰܟܝܳܢܳܐܺܝܬ ܬܐܺܪ̈ܳܬܗܽܘܢ ܡܰܪ̈ܓܫܳܢ ܒܐܳܠܨܝܽܘܬ ܦܽܘܪܥܳܢ ܙܶܕ̈ܩܶܐ. ܘܢܳܛܽܘܪܽܘܬ ܢܳܡܽܘܿܣ̈ܶܐ ܕܟܺܐܢܽܘܼܬܳܐ ܘܰܕܩܽܘܼܫܬܳܐ. ܟܰܕ ܠܰܘ ܠܕܶܚܠܰܬ ܕܺܝܢܳܐ. ܐܳܦܠܳܐ ܠܪܶܓܰܬ ܦܽܘܼܪܥܳܢܳܐ ܗܽܘܼܠܳܢܳܝܳܐ ܐܰܘ ܣܽܘܼܟܳܠܳܝܳܐ. ܒܪܰܡ ܒܙܰܘܥܳܐ ܢܰܦܫܳܢܳܝܳܐ ܛܳܒܳܐ ܕܰܩܛܺܝܼܪܳܐܺܝܬ ܕܳܒܰܪ ܠܗܽܘܢ ܠܘܳܬ ܩܽܘܼܫܬܳܐ ܘܟܺܐܢܽܘܼܬܳܐ. ܒܰܥܨܳܬ ܟܽܠ ܙܢ̈ܰܝ ܐܰܘ ܥܰܣ̈ܩܳܢ ܐܰܘ ܣܰܩܽܘܼ̈ܒܠܳܝܳܢ ܕܒܐܰܦܰܝ̈ܗܽܘܢ ܩܳܝ̈ܡܳܢ. ܐܰܘ ܒܐܽܘܼܪܚܳܐ ܕܡܰܟܫܪܳܢܽܘܼܬ ܢܺܝܼܫܰܝ̈ܗܽܘܢ ܣܪ̈ܺܝܼܓܳܢ. ܟܽܠܶܗ ܕܶܝܢ ܗܳܢܳܐ ܚܰܨܺܝ̈ܦܺܝܢ ܐܰܝܟܰܢܳܐ ܕܥܰܠ ܐܰܦ̈ܰܝ ܫܽܘܼܪܳܪ ܬܰܪ̈ܡܝܳܬܗܽܘܢ. ܐܰܘ ܫܽܘܼܡܠܳܝ ܛܳܒ̈ܶܐ ܢܺܝܼܫܰܝ̈ܗܽܘܢ ܢܰܦܫ̈ܳܬܗܽܘܢ ܡܛܰܝܒܳܐܺܝܬ ܢܢܰܩܘܽܢ.

ܡܶܢ ܡܐܺܡܪ̈ܶܐ ܕܶܝܢ ܕܗܳܠܶܝܢ ܓܡܺܝܪ̈ܶܐ ܕܐܳܡܪܺܝܼܢ܇ ܩܳܢܽܘܢ̈ܶܐ ܠܰܡ ܘܢܳܡܽܘܣ̈ܶܐ ܡܕܺܝܢܳܝ̈ܶܐ܇ ܠܳܐ ܐܶܬܬܣܺܝܡܘ ܐܶܠܳܐ ܠܰܟܪ̈ܺܝܗܰܝ ܬܐܺܪ̈ܳܬܳܐ. ܐܰܝܟܰܢܳܐ ܕܰܒܟܽܠܙܒܰܢ ܒܐܶܕܢ̈ܰܝܗܽܘܢ ܢܶܩܫܽܘܢ. ܘܰܢܥܺܝܪܽܘܢ ܐܶܢܽܘܢ ܥܰܠ ܙܶܕ̈ܩܶܐ ܕܰܥܠܰܝܗܽܘܢ ܡܬܰܚܡ̈ܺܝܢ.

ܒܰܪܢܳܫܳܐ ܕܬܐܺܪܬܶܗ ܠܳܐ ܡܶܬܚܰܫܒܳܐ ܒܙܶܕ̈ܩܶܐ ܕܰܠܗܰܠ ܡܶܢ ܗܳܢܽܘܢ ܕܰܠܩܳܢܽܘܢ̈ܶܐ ܡܕ̈ܺܝܢܳܝܶܐ ܡܬܰܚܡܺܝܢ܆ ܘܠܳܐ ܡܶܫܬܰܘܫܰܛ ܠܰܕܝܰܬܺܝܪ. ܐܰܘܟܺܝܬ ܠܳܐ ܒܛܺܝܠ ܠܶܗ ܕܰܢܩܽܘܡ ܒܰܣܛܰܪ ܡܶܢ ܙܶܕ̈ܩܶܐ ܟܢܽܘܫܝܳܢ̈ܳܝܶܐ. ܠܳܐ ܫܳܘܶܐ ܕܰܒܓܽܘܫܡܳܐ ܕܕܶܒܽܘܪܺܝܬܳܐ ܢܺܚܶܐ. ܐܰܘ ܥܰܡ ܫܽܘܫܡܳܢܳܐ ܢܶܥܡܰܪ.

ܬܐܺܪܬܳܐ: ܩܳܠܳܐ ܗ̱ܳܝ ܫܡܰܝܳܢܳܐ܇ ܙܳܐܶܡ ܒܥܽܘܡܩ̈ܶܐ ܕܢܰܦܫ̈ܳܬܰܢ. ܘܙܳܓܰܪ ܠܰܢ ܡܶܢ ܒܺܝܫ̈ܳܬܳܐ. ܘܕܳܒܰܪ ܠܰܢ ܠܘܳܬ ܛܳܒ̈ܳܬܳܐ.

ܬܐܺܪܬܳܐ ܕܨܰܕܝܳܐ ܘܰܣܦܺܝܼܩܳܐ ܡܶܢ ܥܽܘܼܗܕܳܢܳܐ ܕܰܐܳܠܗܳܐ ܕܳܡܝܳܐ ܠܒܶܝܬ ܕܺܝܼܢܳܐ ܕܰܣܦܺܝܼܩ ܕܺܝܼܢܳܐ. 

 

ܢܘܼܗܳܪܳܐ:

ܡܠܽܘܼܐܳܐ ܗܳܢܳܐ ܢܣܺܝܼܒ ܡܼܶܢ ܟܬܳܒܳܐ ܬܡܺܝܼܢܳܝܳܐ ܕܗܶܪ̈ܓܶܐ ܕܩܶܪܝܳܢܳܐ ܕܰܡܢܳܚܳܐ ܡܰܠܦܳܢܳܐ ܥܒܶܕ ܡܫܺܝܼܚܳܐ ܕܩܰܪܗܰܒܰܫ ) 9031– 1983 (.