ܨܰܠܡܳܐ ܕܓܶܠܝ̈ܳܢܰܘܗܝ ܕܡܳܪܝܳܐ ܨܺܝܼܪܺܝܼܢ ܘܰܨܪܺܝܼܪܺܝܼܢ ܒܬܽܘܼܩܳܢܶܗ ܕܥܳܠܡܳܐ. ܘܙܳܥܶܩ ܫܪܳܪܳܐ ܗܳܢܳܐ ܐܠܗܳܝܳܐ ܒܰܥܡܽܘܿܩ ܗܰܝܡܳܢܽܘܼܬܳܐ ܘܐܳܡܰܪ: ܠܳܐ ܡܰܨܝܳܐ ܕܬܶܫܶܟܚܽܘܿܢ ܢܽܘܼܗܪܳܐ ܕܐܺܝܼܬܽܘܼܬܝ ܗܳܪܟܳܐ ܘܬܰܡܳܢ ܐܶܠܰܐ ܒܛܳܒ̈ܳܬܳܐ ܘܒܽܘܼܪ̈ܟܳܬܳܐ ܕܰܦܪ̈ܺܝܼܣܳܢ ܥܠܰܝܟܽܘܿܢ. ܘܢܳܛܪ̈ܳܢ ܘܰܡܚ̈ܰܣܢܳܢ ܐܺܝܼܬܽܘܼܬܳܟܽܘܿܢ ܒܚܰܝ̈ܐ ܬܢܳܢ̈ܝܶܐ. ܡܶܟܳܐ ܠܳܐ ܦܰܐܝܳܐ ܕܰܬܫܰܚܠܦܽܘܿܢ ܡܰܘܗ̈ܒܳܬܟܽܘܿܢ ܡܼܶܢ ܕܡܽܘܼ ܠܰܕܡܽܘܼ ܘܰܬܦܰܬܟܽܘܿܢ ܐܶܢܶܝܢ ܒܰܕܡܽܘܼܬ ܨܰܠܡ̈ܶܐ ܘܰܦܬܰܟܪ̈ܶܐ ܣܪ̈ܺܝܼܩܶܐ.
ܝܰܘܣܶܦ ܒܶܓܬܰܫ
ܒܶܣܬܰܪ ܣܽܘܼ̈ܟܳܠܐ܆ ܐܺܝܼܬ ܗ̱ܽܘ ܡܰܢ ܕܢܳܦܰܚ ܚܰܝܠܳܐ ܒܙܰܘܥܳܐ ܘܪܶܗܛܳܐ ܕܗܳܢܳܐ ܟܽܠ. ܘܟܰܕ ܡܶܬܓܰܠܓܳܐ ܬܰܚܦܺܝܼܬܐ ܕܣܽܘܼ̈ܟܳܠܐ܆ ܗܳܝܕܶܝܟ ܕܰܪܓܳܐ ܘܐܰܩܡܳܐ ܘܫܰܗܪܳܐ܆ ܠܐ ܨܳܒܶܝܢ ܐܶܠܳܐ ܒܙܰܗܪ̈ܶܐ ܘܐܰܡ̈ܢܶܐ ܡܰܪ̈ܕܽܘܼܬܳܢܳܝܶܐ ܡܶܛܽܠ ܡܰܝܬܝܽܘܼܬ ܦܺܐܪ̈ܶܐ ܡܰܘܬܪ̈ܳܢܶܐ. ܒܰܕ ܣܽܘܼ̈ܟܳܠܐ ܡܩܰܘ̈ܝܳܢܶܐ ܕܚܰܝ̈ܶܐ ܡܠܺܝܼ̈ܠܐ ܠܐ ܓܳܡܪܺܝܼܢ ܘܐܳܦܠܳܐ ܡܶܫܬܰܪܪܺܝܼܢ ܐܶܠܳܐ ܕܗܽܘܼ ܒܰܪܢܳܫܳܐ ܢܶܫܟܰܚ ܟܰܟܪܳܐ ܕܡܰܘܗܰܒܬܶܗ ܒܥܳܠܡܶܗ ܓܰܘܳܝܳܐ. ܘܢܺܝܼܫܳܐ ܕܶܝܢ ܕܣܽܘܼ̈ܟܳܠܐ ܡܩܰܘ̈ܝܳܢܶܐ ܠܰܝܬܰܘܗܝ ܐܶܠܳܐ ܕܗܽܘܼ ܒܰܪܢܳܫܳܐ ܢܰܦܠܰܚ ܘܰܢܫܰܘܫܶܛ ܟܰܟܪܶܗ ܠܬܶܫܡܶܫܬܳܐ ܕܰܒܢ̈ܰܝ ܓܶܢܣܶܗ ܘܰܒܢ̈ܰܝ ܒܶܣܪܶܗ ܒܐܝܼܩܳܪܳܐ ܘܰܚܢܳܢܳܐ ܘܚܰܘܣܳܢܳܐ. ܘܪܺܝܼܫܽܘܼܬܳܐ ܗܳܕܶܐ ܐܳܣܪܳܐ ܘܟܳܕܢܳܐ ܟܽܠܰܢ ܘܟܽܠ ܕܰܪܓܳܝܳܐ ܬܚܽܘܿܬ ܢܺܝܼܪܳܗܿ ܘܥܰܡܠܳܗܿ ܠܳܐ ܡܶܬܦܰܠܥܳܢܳܐ ܒܕܽܘܼܪ̈ܳܓܶܐ ܕܫܽܘܼܡܠܳܝܳܐ ܘܩܽܘܼܝܳܡܳܐ ܘܫܽܘܼܘܫܳܛܳܐ.
ܝܰܘܣܶܦ ܒܶܓܬܰܫ
ܥܳܠܡܳܐ ܗܳܢܳܐ ܠܰܝܬܰܘܗܝ ܐܶܠܳܐ ܐܶܣܛܰܕܝܽܘܿܢ ܐܰܘܟܺܝܬ ܒܶܝܬ ܕܰܪܳܐ ܕܣܽܘܼ̈ܟܳܠܐ ܡܫܰܒ̈ܠܳܢܶܐ ܘܣܽܘܼ̈ܟܳܠܐ ܡܚܰܒ̈ܠܳܢܶܐ. ܘܣܽܘܼ̈ܟܳܠܐ ܡܫܰܒ̈ܠܳܢܶܐ ܡܩܰܘ̈ܝܳܢܶܐ ܘܰܡܢܺܝܼ̈ܚܳܢܶܐ ܐܶܢܽܘܢ. ܘܗܿܳܢܽܘܿܢ ܡܚܰܒ̈ܠܳܢܶܐ ܥܳܒܽܘܿܪ̈ܶܐ ܘܰܡܢܰܘ̈ܠܳܢܶܐ ܐܶܢܽܘܿܢ. ܘܗܽܘܼ ܒܰܪܢܳܫܳܐ ܡܼܶܢ ܠܓܰܘ ܘܡܼܶܢ ܠܒܰܪ ܩܳܐܶܡ ܒܓܰܘܶܗ ܕܬܰܟܬܽܘܼܫܳܐ ܗܳܢܳܐ ܩܰܫܝܳܐ. ܘܠܳܐ ܡܰܨܝܳܐ ܕܢܶܡܛܶܐ ܠܫܰܝܢܳܐ ܡܢܺܝܼܚܳܢܳܐ ܐܶܠܳܐ ܐܶܢ ܕܰܢܛܰܟܶܣ ܪ̈ܓܺܝܼܓܳܬܗ ܘܕܽܘܼܒܳܪ̈ܰܘܗܝ ܒܠܺܝܼ̈ܠܐ. ܘܢܶܣܬܰܪܰܟ ܒܕܽܘܼܒܳܪ̈ܶܐ ܡܝܰܬܪ̈ܐ. ܘܠܳܐ ܢܶܬܛܦܺܝܼܣ ܠܚܽܘܼܬܚ̈ܳܬܶܐ ܕܣܽܘܼ̈ܟܳܠܐ ܡܚܰܒ̈ܠܳܢܶܐ ܘܥܳܒܽܘܿܪ̈ܶܐ. ܟܶܐܡܰܬ ܠܳܐ ܢܶܛܥܶܐ ܢܰܘܚܳܐ ܒܰܩܝܳܐ ܕܬܰܩܢ̈ܳܬܳܐ ܕܰܠܡܺܐܢܳܐ ܟܰܕ ܗܽܘܼ ܡܶܬܢܰܘܰܠ ܘܡܶܬܛܰܪܰܦ ܒܡܰܚܫܽܘܼ̈ܠܐ ܙܩܽܝܼ̈ܦܶܐ ܕܝܰܡܳܐ ܫܓܺܝܼܫܳܐ ܕܥܳܠܡܳܐ.
ܝܰܘܣܶܦ ܒܶܓܬܰܫ
ܒܰܪܢܳܫܳܐ ܡܿܢ ܪܘܼܚܳܐ ܐܝܼܬܰܘܗܝ ܕܰܠܒܺܝܼܫ ܦܰܓܪܳܐ. ܘܐܺܝܬܝܰܐ ܗ̱ܘ ܪܘܼܚܳܢܳܐ ܕܡܶܬܢܰܣܶܐ ܘܡܬܢܰܦܰܩ ܒܗܳܠܶܝܢ ܕܐ̱ܢܳܫܽܘܼܬܳܐ. ܗܿܳܝ ܕܠܳܐ ܩܳܝܡܳܐ ܘܐܳܦܠܐ ܕܳܢܚܳܐ ܐܶܠܐ ܒܫܽܘܼܡܠܳܝ ܥܒ̈ܳܕܶܐ ܘܕܽܘܼܒܳܪ̈ܶܐ ܡܝܰܬܪ̈ܶܐ ܕܪܘܼܚܳܢܳܝܘܼܬܐ ܬܪܺܝܼܨܬܳܐ ܘܫܰܪܺܝܼܪܬܳܐ.
ܝܰܘܣܶܦ ܒܶܓܬܰܫ
ܚܽܘܼܫ̈ܳܒܶܐ ܣܢ̈ܰܝܳܐ ܘܚܰܫ̈ܶܐ ܢܰܦܫ̈ܳܢܳܝܶܐ ܒܰܕܡܽܘܼܬ ܛܺܝܼܢܳܐ ܐܶܢܽܘܿܢ ܝܰܒܺܝܼܫܳܐ. ܘܫܳܝܥܺܝܼܢ ܡܰܦܽܘܼ̈ܚܶܐ ܘܡܰܣܽܘܼ̈ܟܶܐ ܕܪܽܘܼܚܳܐ ܗܿܳܝ ܕܐܺܝܼܬܶܝܗܿ ܡܰܒܽܘܼܥܳܐ ܕܟܽܠ ܛܳܒ̈ܳܢ ܘܒܽܘܼܪ̈ܟܳܢ. ܡܶܟܳܐ ܟܰܪ ܕܠܰܝܬ ܣܽܘܼ̈ܟܳܠܶܐ ܫܰܚ̈ܝܼܢܶܐ ܕܪܽܘܼܚܳܐ ܐܳܦ ܐ̱ܢܳܫܽܘܼܬܳܐ ܩܰܪܺܝܼܪܳܐ ܗ̱ܝ ܬܰܡܳܢ.
ܝܰܘܣܶܦ ܒܶܓܬܰܫ
ܒܰܪܢܳܫܳܐ ܡܿܰܢ ܟܽܠܟܡܳܐ ܕܠܐ ܗܳܦܶܟ ܠܒܰܝܬܳܐ ܕܪܽܘܼܚܳܐ܆ ܦܳܐܶܫ ܪܰܡܝܳܐ ܘܫܰܕܝܳܐ ܠܒܰܪ «ܒܕܳܪܬܐ» ܟܰܕ ܬܒܺܝܼܪ ܘܰܫܚܺܝܼܩ ܘܰܕܠܺܝܼܚ. ܒܪܰܡ ܓܠܺܝܼܙܳܐ ܡܼܶܢ ܚܰܝܠܳܐ ܕܢܽܘܼܗܪܳܐ ܓܰܘܳܝܳܐ. ܘܗܳܕܶܐ ܣܳܪܚܳܐ ܘܢܳܟܝܳܐ ܕܽܘܼܒܳܪ̈ܰܘܗܝ ܘܥܰܡ̈ܠܰܘܗܝ. ܘܛܳܫܝܳܐ ܚܺܐܪܘܼܬܶܗ ܫܰܪܺܝܼܪܬܳܐ: ܫܽܘܼܡܠܳܝܳܐ ܕܨܶܒܝܳܢܶܗ ܕܡܳܪܝܳܐ ܚܘܺܝܼܚܳܐܝܼܬ. ܕܬܳܚܶܒ ܬܘܼܩܳܢܳܐ ܘܡܽܘܼܙܳܓܳܐ ܟܰܕ ܪܳܚܶܩ ܒܰܪܢܳܫܳܐ ܡܼܶܢ ܢܰܦܫܶܗ. ܘܗܳܢܳܐ ܡܶܕܶܡ ܗܳܘܶܐ ܥܶܠܬܳܐ ܕܢܶܬܒܰܠܒܰܠ ܛܘܼܟܳܣܳܐ ܓܰܘܳܝܳܐ ܘܚܰܕܘܳܐ ܘܒܰܪܳܝܳܐ.
ܝܰܘܣܶܦ ܒܶܓܬܰܫ
ܠܐ ܡܶܬܝܰܩܪܳܐ ܘܐܦܠܐ ܡܶܬܢܰܨܚܳܐ ܝܕܰܥܬܳܐ ܐܠܐ ܒܢܽܘܼܗܪܳܐ ܕܢܰܗܺܝܼܪܳܐ. ܒܪܰܡ ܝܰܬܺܝܼܪ ܡܶܬܝܰܩܪܳܐ ܘܡܶܬܢܰܨܚܳܐ ܒܢܽܘܼܗܪܳܐ ܕܡܶܣܬܰܟ̈ܠܳܢܶܐ ܟܰܕ ܡܶܬܓܰܫܡܳܐ ܒܣܽܘܼܟܳܠܐ ܡܠܺܝܼܠܳܐ ܕܩܽܘܼܝܳܡܳܐ ܘܫܽܘܼܘܫܳܛܳܐ.
ܝܰܘܣܶܦ ܒܶܓܬܰܫ
ܡܰܟܺܝܼܟܽܘܼܬܳܐ ܡܿܰܢ ܦܳܠܩܳܐ ܘܥܳܩܪܳܐ ܨܠܳܝ̈ܶܐ ܒܠܺܝܼ̈ܠܶܐ ܘܚ̈ܰܫܶܐ ܝܰܨܪ̈ܳܢܳܝܶܐ ܕܰܛܡܺܝܼܪܺܝܼܢ ܒܢܰܦܫܳܐ ܕܒܰܪܢܳܫܳܐ. ܘܚܰܝܠܳܐ ܗ̱ܝ ܡܠܺܝܼܠܳܐ ܘܠܳܐ ܡܶܬܬܰܚܡܳܢܳܐ ܕܡܶܬܩܢܶܐ ܒܨܶܒܝܳܢܳܐ ܚܺܐܪܳܐ ܘܝܕܰܥܬܳܐ ܓܡܺܝܼܪܬܳܐ. ܡܶܟܳܐ ܗܿܰܘ ܕܪܳܚܶܡ ܓܰܐܝܽܘܼܬܳܐ ܙܳܕܶܩ ܕܢܶܠܒܽܘܿܟ ܡܰܟܺܝܼܟܽܘܼܬܳܐ ܥܪܺܝܼܡܬܳܐ ܘܦܳܪܽܘܿܫܬܳܐ. ܒܰܕ ܠܰܝܬ ܣܶܒܶܠܬܳܐ ܐ̱ܚܪܺܬܳܐ ܕܡܰܣܩܳܐ ܠܐܶܓܳܪܳܐ ܕܓܰܐܝܽܘܼܬܳܐ ܣܛܰܪ ܡܼܶܢ ܗܿܳܝ ܕܡܰܟܺܝܼܟܽܘܼܬܳܐ. ܢܶܬܢܰܦܫܽܘܢ ܡܳܕܶܝܢ ܕܽܘܼܒܳܪ̈ܶܐ ܒܢܶܫ̈ܡܶܐ ܡܠܺܝܼ̈ܠܶܐ ܕܡܽܘܼܟܳܟܳܐ.
ܝܰܘܣܶܦ ܒܶܓܬܰܫ
ܡܰܪܕܽܘܼܬܳܐ ܡܿܰܢ ܒܳܨܝܳܐ ܘܓܳܠܝܳܐ ܙܰܘ̈ܥܶܐ ܢܰܦܫܳܢ̈ܳܝܶܐ ܘܕܽܘܼܒܳܪ̈ܶܐ ܐ̱ܢܳܫ̈ܳܝܶܐ. ܘܦܳܠܚܳܐ ܐܰܪܥܳܐ ܕܗܰܘܢܳܐ ܠܡܶܥܫܰܦ ܡܶܢܶܗ ܠܙܺܝܼܙ̈ܢܶܐ. ܘܨܳܪܝܳܐ ܐܰܪܥܳܐ ܕܠܶܒܳܐ ܠܡܶܫܩܰܠ ܡܶܢܶܗ ܠܣܽܘܼܪ̈ܚܳܢܶܐ. ܘܥܳܩܪܳܐ ܨܠܳܝ̈ܶܐ ܟܣ̈ܰܝܳܐ ܘܚܽܘܼ̈ܫܳܒܶܐ ܙܠܺܝܼ̈ܡܶܐ ܘܙܳܪܥܳܐ ܚܠܳܦܰܝܗܽܘܢ ܢܺܝܼ̈ܫܶܐ ܬܪ̈ܺܝܼܨܶܐ ܘܰܡܠܺܝܼ̈ܠܶܐ. ܒܨܺܝܼܪ ܗ̱ܽܘ ܚܽܘܼܒܳܐ ܕܪܰܚܺܝܼܩ ܡܼܶܢ ܫܪܳܪܳܐ. ܘܚܶܫܟܳܐ ܗ̱ܝ ܝܕܰܥܬܳܐ ܒܶܠܥܳܕ ܚܰܘܣܳܢܳܐ. ܘܫܽܘܼܚܢܳܐ ܗ̱ܝ ܡܶܠܬܳܐ ܕܠܰܝܬ ܒܳܗܿ ܚܢܳܢܳܐ. ܘܰܠܦܽܘܼܬ ܛܽܘܼܟܳܣܳܐ ܣܢܺܝܼܩܳܐ ܟܰܟܪܳܐ ܕܡܶܬܛܰܡܪܳܐ ܒܳܨܪܳܐ ܘܠܳܐ ܡܶܬܬܰܓܪܳܐ. ܘܛܰܝܒܽܘܼܬܳܐ ܕܡܶܬܟܰܫܝܳܐ ܚܳܣܪܳܐ ܘܠܳܐ ܡܶܬܩܰܢܝܳܐ. ܘܐܰܡܺܝܼܢܳܐܝܼܬ ܚܳܨܕܺܝܼܢܰܢ ܗܿܰܘ ܡܳܐ ܕܙܳܪܥܺܝܼܢܰܢ. ܘܰܒܚܰܪܬܶܗ ܕܝܰܘܡܳܐ ܡܶܬܩܰܒܪܺܝܼܢܰܢ ܒܥܰܦܪܳܐ ܕܬܺܐܪܬܰܢ.
ܝܰܘܣܶܦ ܒܶܓܬܰܫ
ܡܶܬܝܰܕܥܳܐ ܡܰܪܕܽܘܼܬܰܢ ܠܦܽܘܼܬ ܡܫܽܘܼܚܬܳܐ ܕܦܳܪܽܘܿܫܽܘܼܬܰܢ. ܘܡܶܬܦܰܪܣܳܐ ܠܦܽܘܼܬ ܡܫܽܘܼܚܬܳܐ ܕܥܺܝܼܪܽܘܼܬܰܢ. ܘܡܶܬܢܰܨܚܳܐ ܠܦܽܘܼܬ ܡܫܽܘܼܚܬܳܐ ܕܰܥܪܺܝܼܡܽܘܼܬܰܢ.
ܝܰܘܣܶܦ ܒܶܓܬܰܫ
ܠܳܐ ܟܳܫܰܪ ܘܐܳܦܠܳܐ ܢܳܨܰܚ ܩܪܳܒܳܐ ܐܺܝܼܬܽܘܼܬܳܢܳܝܳܐ ܕܒܰܪܢܳܫܳܐ ܐܠܐ ܒܢܽܘܼܗܳܪܳܐ ܕܕܰܘ̈ܩܶܐ ܓܰܘܳܝ̈ܶܐ ܘܗܽܘܼ̈ܕܳܣܶܐ ܬܺܐܪ̈ܬܳܢܳܝܶܐ ܘܣܽܘܼ̈ܟܳܠܐ ܐܶܢܰܚ̈ܢܳܝܶܐ. ܘܗܺܝܼ ܗܳܕܶܐ ܠܳܐ ܡܶܫܬܰܡܠܝܳܐ ܐܶܠܳܐ ܕܗܽܘܼ ܒܰܪܢܳܫܳܐ ܢܶܬܚܰܦܰܛ ܠܡܶܦܬܰܚ ܥܰܝܢܳܐ ܕܪܽܘܼܚܳܐ ܠܡܶܚܙܶܐ ܠܳܐ ܡܶܬܚܰܙܝܳܢܳܐ ܒܡܶܬܚܰܙ̈ܝܳܢܳܐ.
ܝܰܘܣܶܦ ܒܶܓܬܰܫ
ܠܳܐ ܡܰܨܝܳܐ ܕܢܶܬܛܰܟܰܣ ܘܢܶܫܬܰܘܫܰܛ «ܡܶܬܚܰܙܝܳܢܳܐ ܒܰܪܳܝܳܐ» ܐܶܢ ܠܳܐ ܡܶܬܬܰܪܰܨ ܘܡܶܬܬܰܩܰܢ «ܠܳܐ ܡܶܬܚܰܙܝܳܢܐ ܓܰܘܳܝܳܐ» ܒܢܽܘܼܗܪܳܐ ܕܗܰܝܡܳܢܽܘܼܬܳܐ ܘܚܽܘܼܒܳܐ ܘܺܝܼܕܰܥܬܳܐ.
ܝܰܘܣܶܦ ܒܶܓܬܰܫ
ܠܳܐ ܕܳܢܰܚ ܫܰܦܪܳܐ ܘܨܰܦܪܳܐ܆ ܘܐܳܦܠܐ ܨܳܡܰܚ ܬܪܺܝܨܳܐ ܘܢܰܗܺܝܼܪܳܐ ܐܶܠܐ ܒܬܽܘܼܩܦܳܐ ܕܬܰܪܥܺܝܼܬܳܐ ܗܿܳܝ ܕܡܶܬܢܰܨܚܳܐ ܒܕܰܟܝܽܘܼܬܐ ܕܠܶܒܳܐ. ܕܒܗܿ ܡܶܬܢܰܩܰܕ ܒܰܪܢܳܫܳܐ ܡܼܶܢ ܛܽܘܼܠܫܳܐ ܘܰܫܥܺܝܼܢܳܐ ܕܝܰܨܪ̈ܶܐ ܐܶܢ̈ܢܳܝܶܐ.
ܝܰܘܣܶܦ ܒܶܓܬܰܫ
ܠܰܝܬ ܢܰܘܚܳܐ ܐܶܠܳܐ ܒܰܗܦܳܟܬܳܐ ܠܡܰܒܽܘܼ̈ܥܶܐ ܡܠܺܝܼ̈ܠܶܐ ܕܢܰܦܫܳܐ ܪܰܒܬܳܐ. ܘܠܳܐ ܡܳܛܶܐ ܠܢܺܝܼܫܳܐ ܐܶܠܳܐ ܗܿܰܘ ܕܠܺܝܫ ܘܰܓܒܺܝܼܠ ܒܰܚܡܺܝܼܪܳܗܿ. ܘܥܶܠܰܬ ܥܽܘܼܪ̈ܩܳܠܐ ܘܥܽܘܼܪ̈ܙܳܠܐ ܠܰܝܬܰܘܗܝ ܐܶܠܐ ܫܒܽܘܼܩܝܳܐ ܕܬܰܪܒܺܝܼܬܳܗܿ ܘܬܰܪܥܺܝܼܬܳܗܿ.
ܝܰܘܣܶܦ ܒܶܓܬܰܫ
ܐܰܪܰܐ ܐܰܝܟܰܢܳܝܽܘܼܬܳܐ ܗܳܫܳܝܬܳܐ ܕܠܳܗܿ ܓܪܺܝܼܦܺܝܼܢܰܢ ܠܰܝܬܶܝܗܿ ܢܶܩܦܳܝܳܐ ܕܬܰܪܥܺܝܼܬܳܐ ܗܿܳܝ ܕܪܺܝܼܫܬܳܐ؟ ܐܰܝܟܰܢ ܡܰܨܝܳܐ ܕܢܶܬܥܰܕܰܪ ܘܰܢܥܰܕܰܪ ܘܢܺܐܬܰܪ ܘܢܰܘܬܰܪ ܘܢܶܫܬܰܘܫܰܛ ܘܰܢܫܰܘܫܶܛ ܒܰܐܡܽܘܼ̈ܡܶܐ ܘܰܬܚܘܼ̈ܡܶܐ ܕܬܰܪܥܺܝܼܬܳܐ ܗܳܕܶܐ ܕܪܺܝܼܫܬܳܐ ܐܶܢ ܠܐ ܢܳܦܩܺܝܼܢܰܢ ܠܒܰܪ ܡܼܶܢܗܽܘܿܢ ܟܕ ܡܳܝܨܺܝܼܢܰܢ ܡܠܽܘܼ̈ܐܶܐ ܙܘܼ̈ܡܳܝܶܐ ܡܼܶܢ ܣܽܘܼ̈ܟܳܠܐ ܪ̈ܰܒܶܐ ܕܡܰܪܕܽܘܼܬܰܢ ܗܿܳܝ ܕܠܳܐ ܨܳܒܝܳܐ ܒܺܝܕܰܥܬܳܐ ܡܰܚܣܪܳܢܺܝܼܬܳܐ ܘܰܥܪܺܝܼܡܽܘܼܬܳܐ ܦܽܘܼܪܣܳܢܳܝܬܳܐ؟
ܝܰܘܣܶܦ ܒܶܓܬܰܫ
ܡܚܰܛܳܐ ܫܽܘܼܚܬܳܢܺܝܼܬܳܐ ܠܳܐ ܚܳܝܛܳܐ ܦܶܪ̈ܩܶܐ. ܝܰܘܣܶܦ ܒܶܓܬܰܫ
ܩܳܠܐ ܒܰܪܳܝܳܐ ܠܰܝܬܰܘܗܝ ܐܶܠܐ ܨܰܘܬܳܐ ܕܗܿܰܘ ܓܰܘܳܝܳܐ. ܝܰܘܣܶܦ ܒܶܓܬܰܫ
ܠܳܐ ܪܳܚܶܡ ܘܐܳܦܠܳܐ ܝܳܨܶܦ ܐܶܠܳܐ ܗܿܰܘ ܕܝܳܕܥ ܘܡܶܣܬܰܟܰܠ. ܝܰܘܣܶܦ ܒܶܓܬܰܫ
ܗܿܰܘ ܕܒܶܗ ܚܳܝܪܰܬ ܐܶܢܳܐ ܐ̱ܢܳܐ. ܐܶܠܐ ܗܿܰܘ ܕܚܳܙܶܝܬ ܐܰܢ̱ܬ ܗ̱ܽܘܼ. ܝܰܘܣܶܦ ܒܶܓܬܰܫ
ܒܰܪܢܳܫܳܐ ܡܿܰܢ ܡܶܬܝܰܩܰܪ ܒܫܰܝܳܐ ܟܶܐܡܰܬ ܒܐܺܝܼܩܳܪܳܐ ܪܰܒܳܐ ܕܺܝܼܠܶܗ. ܐܶܠܳܐ ܦܪܺܝܼܫ ܗ̱ܽܘܼ ܐܺܝܼܩܳܪܳܐ ܗܿܰܘ ܐܰܝܢܳܐ ܕܡܶܬܩܰܪܰܒ ܒܰܚܢܳܢܳܐ ܘܣܽܘܼܟܳܠܐ.
ܝܰܘܣܶܦ ܒܶܓܬܰܫ
ܟܰܕ ܡܶܣܬܰܟܰܠ ܒܰܪܢܳܫܳܐ ܕܠܰܡ ܪܶܕܝܳܐ ܕܚܰܝ̈ܶܐ (ܒܟܽܠܗܽܘܿܢ ܚܰܘ̈ܩܶܐ) ܠܳܐ ܡܶܫܬܰܦܶܐ ܐܶܠܳܐ ܒܪ̈ܶܓܫܶܐ ܘܕܽܘܼܒܳܪ̈ܶܐ ܩܪ̈ܰܝܳܐ ܕܫܽܘܼܡܳܫܳܐ ܘܫܽܘܼܡܠܳܝܳܐ ܗܳܝܕܶܝܢ ܪܳܚܶܩ ܡܼܶܢ ܪ̈ܶܓܫܶܐ ܘܕܽܘܼܒܳܪ̈ܶܐ ܣܢܰܝ̈ܳܐ ܕܫܽܘܼܠܳܛܳܐ ܘܫܽܘܼܥܠܳܝܳܐ.
ܝܰܘܣܶܦ ܒܶܓܬܰܫ
ܚܳܫܽܘܿܠܳܐ ܐܺܝܼܬܰܝ ܕܢܽܘܼܦܳܫܳܐ ܘܛܽܘܼܥܳܡܳܐ ܕܠܶܫܳܢܳܐ ܘܪܶܥܝܳܢܳܐ. ܘܚܳܫܽܘܿܠܳܐ ܐܺܝܼܬܰܝ ܕܣܽܘܼܟܳܠܳܐ ܘܕܽܘܼܪܟܳܢܳܐ ܒܚܳܢܽܘܼܬܳܐ ܕܥܽܘܼܪ̈ܦܳܢܶܐ. ܘܚܳܫܶܠ ܐ̱ܢܳܐ ܙܰܘܥܳܐ ܘܡܰܚܫܽܘܼܠܳܐ ܕܣܽܘܼܟܳܠܳܐ ܠܗܶܢܝܳܢܳܐ ܕܒܽܘܼܝܳܢܳܐ ܘܨܶܒܝܳܢܳܐ. ܒܰܕ ܣܽܘܼܟܳܠܳܐ ܠܳܐ ܡܰܩܢܶܐ ܣܰܟܽܘܼܠܬܳܢܽܘܼܬܳܐ ܐܶܠܳܐ ܠܰܕܚܳܟܶܡ ܣܽܘܼܟܳܠܳܐ ܘܗܳܕܶܣ ܒܣܽܘܼܟܳܠܐ. ܠܳܐ ܢܶܛܥܶܐ: ܢܳܝܚܺܝܼܢܰܢ ܘܒܳܣܡܺܝܼܢܰܢ ܟܰܕ ܡܰܕܪܟܺܝܼܢܰܢ ܣܽܘܼܟܳܠܐ. ܘܫܳܦܪܺܝܼܢܰܢ ܘܢܳܨܚܺܝܼܢܰܢ ܟܰܕ ܢܳܗܪܺܝܼܢܰܢ ܒܚܽܘܼ̈ܟܳܡܶܐ ܕܣܽܘܼܟܳܠܳܐ.
ܝܰܘܣܶܦ ܒܶܓܬܰܫ
ܛܶܟ̈ܢܶܐ ܘܰܒܢ̈ܳܬ ܩ̈ܳܠܐ ܕܠܶܫܳܢܳܐ ܩܠܺܝܼܕܳܐ ܐܶܢܽܘܿܢ ܕܦܳܬܚܺܝܼܢ ܬܪܰܥ ܪܘܼܒܳܝܳܐ ܪܽܘܼܚܳܢܳܝܳܐ ܘܩܽܘܼܝܳܡܳܐ ܐ̱ܢܳܫܳܝܳܐ ܘܚܽܘܼܝܳܕܳܐ ܐܘܼܡܬܳܢܳܝܳܐ ܘܫܽܘܼܘܫܳܛܳܐ ܡܕܺܝܼܢܳܝܳܐ.
ܝܰܘܣܶܦ ܒܶܓܬܰܫ
ܟܫܳܪܳܐ ܡܿܰܢ ܐܽܘܼܡܬܳܢܳܝܳܐ ܣܢܺܝܼܩ ܗ̱ܽܘܼ ܕܢܶܬܡܙܶܓ ܒܫܰܪܺܝܼܪܽܘܼܬܳܐ ܘܰܩܪܺܝܼܚܽܘܼܬܳܐ ܣܽܘܼܟܳܠܳܝܬܳܐ ܘܡܰܕܥܳܢܳܝܬܳܐ: ܒܳܢܝܰܬ ܓܺܫܪ̈ܶܐ ܚܠܳܦ ܫܽܘܼܪ̈ܶܐ. ܒܰܕ ܝܰܬܺܝܼܪ ܦܳܝܚܳܐ ܘܒܳܣܡܳܐ ܘܥܳܫܢܳܐ ܘܢܳܨܚܳܐ ܐܽܘܼܡܬܳܢܳܝܽܘܼܬܳܐ ܠܘܳܬܰܢ ܟܰܕ ܒܰܪܢܳܫܳܐ ܣܽܘܼܪܝܳܝܳܐ: ܐܳܬܘܼܪܳܝܳܐ ܘܐܳܪܳܡܳܝܳܐ ܘܟܰܠܕܳܝܳܐ ܕܢܶܦܪܽܘܿܫ ܘܰܢܗܰܕܰܪ ܨܶܒܝܳܢܳܐܝܼܬ ܚܽܘܼ̈ܟܳܡܶܐ ܩܰܛܺܝܼ̈ܢܶܐ ܕܐܶܢܰܚܢܳܝܽܘܼܬܳܐ ܛܳܒ ܡܶܢ ܐܶܢܳܢܳܝܽܘܼܬܳܐ. ܘܢܶܚܟܽܘܼܡ ܦܰܛܢܳܐܝܼܬ ܪܶܚܡܬܳܐ ܪܰܒܳܐ ܗ̱ܝ ܡܼܶܢ ܣܶܢܶܐܬܳܐ. ܘܬܰܪܒܺܝܼܬܳܐ ܥܶܠܳܝ ܡܼܶܢ ܕܰܪܓܳܐ ܘܐܰܩܡܳܐ ܘܒܶܚܫܳܐ. ܘܢܶܣܬܰܟܰܠ ܡܠܺܝܼܠܳܐܝܬ ܚܶܟܡܬܳܐ ܒܰܣܺܝܼܡܳܐ ܗ̱ܝ ܡܼܶܢ ܥܰܪܢܽܘܼܬܳܐ. ܘܫܽܘܼܡܠܳܝܳܐ ܡܝܰܬܰܪ ܗ̱ܽܘܼ ܡܼܶܢ ܫܽܘܼܥܠܳܝܳܐ. ܘܫܽܘܼܡܳܫܳܐ ܩܰܕܺܝܼܫ ܗ̱ܽܘܼ ܡܼܶܢ ܫܽܘܼܠܳܛܳܐ. ܘܢܶܬܡܰܕܰܥ ܕܠܰܡ ܝܕܰܥܬܳܐ ܕܽܘܼܒܳܪܳܝܬܳܐ ܕܰܚܢܳܢܳܐ ܗܳܢܳܐ ܠܳܐ ܡܶܫܬܰܟܢܳܐ ܐܶܠܳܐ ܒܦܳܪܽܘܿܫܽܘܼܬܳܐ ܕܚܰܘܣܳܢܳܐ.
ܝܰܘܣܶܦ ܒܶܓܬܰܫ
ܫܘܼ̈ܬܳܐܣܶܐ ܥܺܕܳܬܳܢ̈ܝܐ ܘܐܽܘܼܡ̈ܬܳܢܳܝܶܐ ܘܡܰܪ̈ܕܽܘܼܬܳܢܳܝܶܐ ܕܳܡܶܝܢ ܠܰܟܘܳܪ̈ܶܐ ܘܕܶܒܽܘܼܪ̈ܝܳܬܳܐ. ܘܣܺܝܼܡܺܝܼܢ ܘܰܦܩܺܝܼܕܺܝܢ ܠܡܶܥܒܰܕ ܕܶܒܫܳܐ ܘܟܰܟܳܪܺܝܼܬܳܐ: ܕܐܺܝܼܬܰܝܗܽܘܿܢ: ܛܳܒܬܳܐ ܘܝܽܘܼܬܪܳܢܳܐ ܘܫܽܘܼܘܫܳܛܳܐ ܕܰܣܪܺܝܼܩ ܘܰܣܦܺܝܼܩ ܡܼܶܢ ܢܺܝܼ̈ܫܶܐ ܟܣ̈ܰܝܳܐ ܕܫܽܘܼܥܠܳܝܳܐ ܘܐܶܢܳܢܳܝܽܘܼܬܳܐ. ܒܰܕ ܗܿܰܘ ܡܳܐ ܕܡܰܘܬܰܪ ܠܰܟܘܳܪܳܐ܆ ܡܰܘܬܰܪ ܐܳܦ ܠܕܶܒܽܘܼܪܺܝܼܬܳܐ. ܘܗܿܰܘ ܡܳܐ ܕܡܰܚܣܰܪ ܠܰܟܘܳܪܳܐ܆ ܡܰܚܣܰܪ ܐܳܦ ܠܕܶܒܽܘܼܪܺܝܼܬܳܐ. ܡܶܟܳܐ ܠܰܝܬ ܫܒܺܝܼܠܳܐ ܐ̱ܚܪܺܢܳܐ ܕܢܳܩܶܠ ܐܽܘܼܪܰܚ ܚܽܘܼܝܳܕܳܐ ܟܺܐܢܳܐ ܘܩܽܘܼܝܳܡܳܐ ܚܺܐܪܳܐ ܐܶܠܳܐ ܐܶܢ ܕܢܶܣܬܰܪܰܟ ܒܚܶܟܡܰܬ ܡܰܕܥܳܐ ܗܳܢܳܐ ܡܠܺܝܼܠܳܐ ܕܰܟܘܳܪܳܐ ܘܕܶܒܽܘܼܪܺܝܼܬܳܐ...
ܝܰܘܣܶܦ ܒܶܓܬܰܫ
ܩܽܘܼܝܳܡܳܐ ܘܚܽܘܼܝܳܕܐ ܒܳܥܶܐ ܡܶܢܰܢ ܕܢܶܗܘܶܐ ܡܰܕ̈ܠܳܢܶܐ ܘܡܰܩ̈ܠܳܢܶܐ ܘܠܰܘ ܡܰܙ̈ܠܳܢܶܐ ܘܡܰܠܙܳܢ̈ܐ.
ܝܰܘܣܶܦ ܒܶܓܬܰܫ
ܐܺܝܼܬ ܡܿܰܢ ܕܐܺܝܼܬܰܘܗܝ ܡܫܰܒܠܳܢܳܐ. ܘܐܺܝܼܬ ܐܳܦ ܡܿܰܢ ܕܐܺܝܼܬܰܘܗܝ ܡܚܰܒܠܳܢܳܐ. ܘܰܚܢܰܢ ܒܟܽܠܗܽܘܿܢ ܚܰܘ̈ܩܶܐ ܕܺܝܼܠܰܢ ܣܢܺܝܼܩܺܝܼܢܰܢ ܠܰܡܫܰܒܠܳܢܳܐ.
ܝܰܘܣܶܦ ܒܶܓܬܰܫ
You can also send us an email to karyohliso@gmail.com
Leave a Comment