ܗܰܘܢܳܐ

ܗܰܘܢܳܐ

 

ܗܰܘܢܳܐ ܥܺܝܪܳܐ ܘܰܚܦܺܝܛܳܐ. ܩܪܰܒܬ̣ܳܢܳܐ ܗ̱ܘ ܥܰܡܽܘܠܬ̣ܳܢܳܐ.

ܘܥܳܒܶܕ ܕܰܪܳܐ ܚܰܣܺܝܢܳܐ. ܒܟܶܣܝܳܐ ܘܓܰܠܝܳܐ ܕܠܳܐ ܫܰܠܘܳܐ܀ 

 

ܡܰܩܪܶܒ ܒܰܙܒܰܢ ܥܰܡ ܦܰܓܪܳܐ. ܘܕܳܐܰܪ ܬܽܘܒ ܠܽܘܩܒܰܠ ܢܰܦܫܳܐ.

ܘܡܰܒܪܶܩ ܙܰܝܢܳܐ ܒܦܽܘܪ̈ܫܳܢܶܐ. ܠܽܘܩܒܰܠ ܚܰܫ̈ܶܐ ܘܚܽܘܬ̣ܚ̈ܳܬ̣ܶܐ܀

 

ܠܒܺܝ̣ܟ ܘܐܰܣܺܝܪ ܙܰܝܢܳܐ ܚܠܺܝܡܳܐ. ܕܡܽܘܬ̣ ܣܰܝܦܳܐ ܣܰܒܪܳܐ ܒܪܺܝܟܳܐ.

ܘܐܰܝܟ ܣܰܟܪܳܐ ܗܰܝܡܳܢܽܘܬܳܐ. ܘܣܰܢܘܰܪܬܳܐ ܚܽܘܒܳܐ ܕܰܟ̣ܝܳܐ܀

 

ܫܶܪܝܳܢܶܗ ܩܰܕܺܝ̣ܫܽܘܬ̣ܳܐ. ܪܽܘܟ̣ܳܒܶܗ ܩܽܘܫܬܳܐ ܘܡܽܘܟܟ̣ܳܐ.

ܢܰܝܙܟ̣ܶܗ ܨܠܺܝܒܳܐ ܗ̱ܘ ܕܰܡܫܺܝ̣ܚܳܐ. ܕܚܳܪܶܒ ܒܶܗ ܝܰܗ̈ܠܶܐ ܕܒܺܝ̣ܫܳܐ܀

 

ܗܰܘܢܳܐ ܕܰܟ̣ܝܳܐ ܘܩܰܕܺܝ̣ܫܳܐ. ܕܐܶܬ̣ܥܰܠܝ ܠܥܶܠ ܡܶܢ ܒܶܣܪܳܐ.

ܫܰܘܬܳܦܳܐ ܗܳܘܶܐ ܘܚܰܒܪܳܐ. ܠܡܰܠܰܐܟ̈ܶܐ ܥܺܝܪ̈ܰܝ ܪܰܘܡܳܐ܀

 

ܡܶܐܟ̣ܽܘܠܬܶܗ ܥܰܡ ܪ̈ܽܘܚܳܢܶܐ. ܝܺܕܰܥܬ̣ܳܐ ܕܐ̱ܪ̈ܳܙܶܐ ܓܢܺܝ̈ܙܶܐ.

ܘܫܶܩܝܶܗ ܡܶܢ ܡܰܒܽܘܥ ܚܰܝ̈ܶܐ. ܝܽܘܠܦܳܢ̈ܶܐ ܐܰܠܳܗܳܝ̈ܶܐ܀

 

ܠܒܽܘܫܳܐ ܥܛܺܝܦ ܐܰܝܟ ܬܰܟܣܺܝܬܳܐ. ܢܽܘܗܪܳܐ ܕܰܬܠܺܝܬ̣ܳܝܽܘܬ̣ܳܐ.

ܘܗܽܘܝܽܘ ܫܽܘܒܚܳܐ ܩܰܕܺܝ̣ܫܳܐ. ܕܰܥܛܺܝܦ ܗ̱ܘܳܐ ܒܛܽܘܪܳܐ ܡܫܺܝ̣ܚܳܐ܀

 

ܣܐܽܘܢܶܗ ܣܐܽܘܢܳܐ ܗ̱ܘ ܚܰܣܺܝܢܳܐ. ܛܽܘܝܳܒܳܐ ܐܶܘܰܢܓܶܠܳܝܳܐ.

ܘܰܡܗܰܠܶܟ ܐܰܝܟ ܕܥܰܠ ܐܰܪܥܳܐ. ܒܰܫܡܰܝܳܐ ܒܐ̱ܪܳܙܳܐ ܘܣܰܒܪܳܐ܀

 

ܗܰܘܢܳܐ ܕܠܳܐ ܕܟ̣ܶܐ ܡܶܢ ܚܰܫ̈ܶܐ. ܠܳܐ ܡܶܬܬܰܩܪܰܒ ܡܶܢ ܫܺܐܕ̈ܶܐ.

ܣܳܦܩܺܝܢ ܚܰܫ̈ܶܐ ܘܚܽܘܬ̣ܚ̈ܳܬ̣ܶܐ. ܕܰܢܕܰܚܠܽܘܢܶܗ ܒܰܩܪ̈ܳܒܶܐ܀

ܘܗܰܘܢܳܐ ܕܰܕܟ̣ܶܐ ܡܶܢ ܚܰܫ̈ܶܐ. ܒܶܝܬ ܨܰܘܒܰܐ ܗ̱ܘ ܕܰܫܡܰܝܳܢ̈ܶܐ.

ܘܡܳܐ ܕܡܶܬܬܰܩܪܰܒ ܡܶܢ ܕܰܝܘ̈ܶܐ. ܡܶܣܬܰܡܰܟ ܡܶܢ ܡܰܠܰܐܟ̈ܶܐ܀

 

ܩܰܕܡܳܝܳܐ ܪܳܥܶܐ ܒܩܶܛܡܳܐ ܕܪܽܘܚܳܐ ܕܫܽܘܩܪܳܐ ܘܛܳܥܝܽܘܬܳܐ.

ܘܰܬܪܰܝܳܢܳܐ ܒܛܰܝܒܽܘܬܳܐ. ܡܶܬ̣ܪܰܒܶܐ ܡܶܢ ܪܽܘܚܩܽܘܕܫܳܐ܀

 

ܠܰܬܪ̈ܰܝܗܽܘܢ ܐܺܝܬ ܦܽܘܪܥܳܢܳܐ. ܒܥܳܠܡܳܐ ܗܳܢܳܐ ܘܰܥܬܺܝܕܳܐ.

ܬܢܳܢ ܓܽܘܢܳܝܳܐ ܘܩܽܘܠܳܣܳܐ. ܠܗܰܠ ܒܽܘܣܳܡܳܐ ܘܫܽܘܢܳܩܳܐ܀

 

ܡܪܝ ܐܶܠܺܝܳܐ ܕܐܰܢܒܰܪ (922)