ܝܘܼܠܦܳܢܳܐ: ܡܳܪܝ ܝܰܥܩܽܘܒ ܡܰܠܦܳܢܳܐ

ܝܘܼܠܦܳܢܳܐ: ܡܳܪܝ ܝܰܥܩܽܘܒ ܡܰܠܦܳܢܳܐ

 

ܐ: ܩܽܘܡ ܝܽܘܠܦܳܢܳܐ ܡܙܽܘܓ̥ ܠܰܢ ܚܰܡܪܳܟ ܕܰܚܠܶܐ ܛܰܥܡܶܗ.
ܕܣܰܓܺܝ ܒܰܣܺܝܡ ܠܰܐܝܢܳܐ ܕܒܳܥܶܐ ܕܢܶܫܬܶܐ ܡܶܢܶܗ܀
ܒ: ܒܚܰܡܪܳܐ ܕܓܽܘܦܢ̈ܶܐ ܢܰܦܫܰܢ ܡܶܕܶܡ ܠܳܐ ܐܶܬ̥ܗܰܢܝܰܬ̥.
ܡܶܢ ܗܰܘ ܕܺܝܠܳܟ ܗܰܒ ܠܳܗ̇ ܕܬܶܫܬܶܐ ܘܣܳܒܥܳܐ ܡܶܢܶܗ.
ܣܒܰܥܢܰܢ ܠܰܚܡܳܐ ܘܠܳܟ ܟܰܦܢܺܝܢܰܢ ܗܳܐ ܝܽܘܠܦܳܢܳܐ.
ܢܶܚܕܶܐ ܠܶܒܰܢ ܒܰܛܥܳܡܴ̈ܬܳܟ ܫܰܦܺܝܪ̈ܳܬܳܐ܀
ܓ: ܡܶܢ ܡܶܐܟܽܘܠܬܳܐ ܝܳܩܶܕ ܦܰܓܪܳܐ ܘܚܳܫܟ̥ܳܐ ܢܰܦܫܳܐ.
ܘܡܶܢ ܥܶܢܝܳܢܳܟ ܕܺܝܠܳܟ ܢܽܘܗܪܳܐ ܘܚܰܝ̈ܶܐ ܘܛܽܘ̈ܒܶܐ.
ܠܰܘ ܡܶܐܟܽܘܠܬܳܐ ܝܳܗܒܳܐ ܚܰܝ̈ܶܐ ܠܰܒ̈ܢܰܝ ܐ̱ܢܳܫܳܐ.
ܒܡܶܠܬܶܗ ܕܡܳܪܝܳܐ ܬܰܘ ܢܶܬܒܰܣܰܡ ܪܽܘܚܳܢܳܐܺܝܬ̥܀
ܕ: ܢܶܐܟܽܘܠ ܠܰܚܡܳܐ ܥܰܠ ܕܰܟܝܳܢܳܐ ܕܺܝܠܶܗ ܬܳܒܰܥ.
ܠܳܐ ܓܶܝܪ ..... ܐܳܟܽܘܠܽܘܬܳܐ ܕܠܰܘ ܕܰܟܝܳܢܳܐ ܗ̱ܝ܀
ܗ: ܨܶܒܝܳܢܳܐ ܓܶܝܪ ܗܽܘܝܽܘ ܫܰܠܺܝܛ ܥܰܠ ܡܶܐܟܽܘܠܬܳܐ.
ܘܰܟܡܳܐ ܕܒܳܥܶܐ ܡܰܣܓܶܐ ܘܡܰܙܥܰܪ ܐܰܝܟ ܦܳܩܽܘܕܳܐ܀
ܘ: ܘܶܐܢ ܠܰܟܝܳܢܳܐ ܢܶܬܶܠ ܩܰܠܺܝܠ ܣܳܦܶܩ ܗ̱ܘ̣ ܠܶܗ.
ܘܶܐܢ ܡܰܣܓܶܐ (ܢܰܣܓܶܐ) ܠܶܗ ܝܰܬܺܝܪ̈ܳܬܳܐ ܡܩܰܒܶܠ ܗܽܘ ܠܶܗ.
ܘܰܕܢܶܐܟܽܘܠ ܐ̱ܢܳܫ ܠܶܗ ܠܰܟܝܳܢܳܐ ܡܡܰܠܶܐ ܕܺܝܠܶܗ.
ܐܶܢܕܶܝܢ ܡܰܣܓܶܐ ܐܰܘ ܡܶܬܝܰܥܰܢ ܡܶܢ ܕܺܝܠܶܗ ܗܺܝ܀
ܙ: ܗܽܘ ܨܶܒܝܳܢܳܐ ܡܦܰܪܢܶܣ ܠܗܶܝܢ ܠܰܛܥܳܡܴ̈ܬܳܐ.
ܘܺܐܝܬ ܠܶܗ ܬܰܪܬܶܝܢ ܥܳܢܘܳܝܽܘܬܳܐ ܘܳܐܣܽܘܛܽܘܬܳܐ܀
ܚ: ܗܳܟܰܢܳܐ ܬܽܘܒ ܐܺܝܬ ܠܰܟܝܳܢܳܐ ܕܢܶܫܬܶܐ ܚܰܡܪܳܐ.
ܘܰܕܢܶܪܘܶܐ ܒܶܗ ܘܢܶܛܥܶܐ ܢܰܦܫܶܗ ܡܶܢ ܨܶܒܝܳܢܳܐ ܗ̱ܝ܀
ܛ: ܥܝܳܕܳܐ ܪܰܦܝܳܐ ܣܽܘܛܡܰܐ ܗ̱ܘ ܚܺܝܨܳܐ ܠܰܕܩܳܢܶܐ ܠܶܗ.
ܘܰܡܫܰܥܒܶܕ ܠܶܗ ܕܢܶܗܘܶܐ ܢܰܦܺܝܠ ܡܶܢ ܚܺܐܪܽܘܬܳܐ܀
ܝ: ܐܰܝܟ ܐܳܣܝܽܘܬܳܐ ܕܦܰܓܪܐ ܐܝܬܰܘܗܝ ܚܰܡܪܳܐ ܩܰܠܺܝܠ.
ܐܶܢܕܶܝܢ ܡܰܣܓܶܐ ܬܽܘܟ̈ܶܐ ܡܰܘܠܶܕ ܠܰܕܫܳܬܶܐ ܠܶܗ܀
ܝܐ: ܒܳܐܣܽܘܛܽܘܬܳܐ ܟܝܳܢܳܐ ܢܳܦܶܠ ܡܶܢ ܚܺܐܪܽܘܬܳܐ.
ܡܶܫ̈ܬܰܡܫܳܢ ܒܶܗ ܝܰܬܺܝܪ̈ܳܬܳܐ ܕܠܳܐ ܫܰܦܺܝܪ̈ܳܢ܀
ܝܒ: ܒܰܪ̈ܓܺܝܓܳܬܳܐ ܗܰܘܢܳܐ ܚܳܫܶܟ̥ ܡܶܢ ܣܽܘܟܳܠܳܐ.
ܘܰܐܝܢܳܐ ܕܒܰܨܰܪ ܡܶܢ ܡܶܐܟܽܘܠܬܳܐ ܢܗܰܪܘ ܚܽܘ̈ܫܳܒܰܘܗܝ܀
ܝܓ: ܕܡܰܣܓܶܐ ܐܳܟܶܠ ܐܰܚܬܳܗ̇ ܠܢܰܦܫܶܗ ܕܬܶܗܘܶܐ ܦܰܓܪܳܐ.
ܘܶܐܢܗܽܘ ܕܡܰܙܥܰܪ ܠܦܰܓܪܳܐ ܡܓܰܪܶܓ̥ ܢܶܗܘܶܐ ܪܽܘܚܳܐ܀
ܝܕ: ܦܰܓܪܳܐ ܥܰܒܕܰܐ ܗ̱ܘ ܘܰܟܡܳܐ ܕܬܶܒܥܶܐ ܡܫܰܥܒܰܕ ܗ̱ܘ̣ ܠܳܟ.
ܘܶܐܢ ܬܶܬܶܠ ܠܶܗ ܝܰܬܺܝܪ̈ܳܬܳܐ ܡܪܰܕ ܠܶܗ ܡܶܢܳܟ܀
ܝܗ: ܥܝܳܕܳܐ ܬܳܒܰܥ ܠܳܐ ܬܶܬܶܠ ܠܶܗ ܥܝܳܕ̈ܶܐ ܒܺܝ̈ܫܶܐ.
ܘܶܐܠܳܐ ܥܳܫܶܢ ܘܶܐܢ ܬܶܩܪܶܐ ܠܶܗ ܠܳܐ ܫܳܡܰܥ ܠܳܟ܀
ܝܘ: ܡܫܽܘܚܬܳܐ ܥܒܶܕ ܠܶܗ ܘܰܠܡܶܐܟܽܘܠܬܶܗ ܘܰܠܫܳܩܽܘܬܶܗ.
ܘܰܕܠܳܐ ܡܫܽܘܚܬܳܐ ܠܳܐ ܬܶܥܒܶܕ ܠܶܗ ܥܝܳܕܳܐ ܡܶܡܬܽܘܡ܀
ܝܙ: ܪܶܒܽܘ ܛܽܘ̈ܒܺܝܢ ܐܶܢ ܡܶܣܬܰܕܪܺܝܢ ܥܰܠ ܦܳܬܽܘܪܳܟ.
ܡܶܣܰܬ̥ ܟܰܦܢܳܟ̥ ܣܰܒ ܡܶܐܟܽܘܠܬܳܐ ܘܬܽܘܒ ܠܳܐ ܡܶܕܶܡ܀
ܝܚ: ܐܶܢ ܡܶܐܟܽܘܠܬܳܐ ܕܫܽܘܒܚܳܐ ܬܺܐܬ̥ܰܪ ܥܰܠ ܦܳܬܽܘܪܳܐ.
ܡܳܐ ܕܠܳܐ ܟܰܦܢܰܬ[1] ܐܰܪܚܶܩ ܡܶܢܳܗ̇ ܘܠܳܐ ܬܶܩܪܽܘܒ ܠܳܗ̇.
ܐܳܦܶܢ ܐܳܒܕܳܐ ܦܰܩܳܚ ܬܺܐܒܰܕ ܟܰܕ ܪܰܚܺܝܩ ܐܰܢ̱ܬ.
ܘܰܐܢ̱ܬ ܠܳܐ ܬܶܦܶܠ ܒܳܐܣܽܘܛܽܘܬܳܐ ܕܣܰܓܺܝ ܣܰܢܝܳܐ܀
ܝܛ: ܠܳܐ ܬܰܘܒܶܕ ܐܰܢ̱ܬ ܥܝܳܕ̈ܶܐ ܕܫܽܘܒܚܳܐ ܘܰܕܚܺܐܪܽܘܬܳܐ.
ܟܰܕ ܝܳܨܶܦ ܐܰܢ̱ܬ ܥܰܠ ܡܶܐܟܽܘܠܬܳܐ ܕܗܺܝ ܠܳܐ ܬܺܐܒܰܕ܀
ܟ: ܡܳܐ ܕܶܐܟܰܠܬܳܗ̇ ܗܳܐ ܠܬܰܕܟܺܝܬܳܐ ܫܳܪܟ̥ܳܐ ܟܽܠܳܗ̇.
ܘܡܺܐܒܰܕ ܐܳܒܕܳܐ ܠܳܐ ܓܶܝܪ ܢܳܛܪܳܐ ܦܪܺܝܫܳܐ ܫܽܘܦܪܳܐ܀
ܟܐ: ܐܰܢ̱ܬ ܫܰܦܺܝܪ ܐܰܢ̱ܬ ܐܶܢ ܠܳܐ ܬܶܚܒܽܘܨ ܥܰܠ ܝܰܬܺܝܪܳܐ.
ܐܰܢ̱ܬ ܚܰܟܺܝܡ ܐܰܢ̱ܬ ܐܶܢ ܠܰܥܝܳܕ̈ܶܐ ܣܢܰܝ̈ܳܐ ܬܰܪܦܶܐ܀
ܟܒ: ܐܰܢ̱ܬ ܪܰܒܳܐ ܐܰܢ̱ܬ ܐܶܢ ܒܰܡܫܽܘܚܬܳܐ ܠܟܰܪܣܳܐ ܬܶܬܶܠ.
ܚܙܺܝ ܠܳܐ ܬܶܣܪܽܘܚ ܗܳܠܶܝܢ ܕܺܝܠܳܟ ܫܰܦܺܝܪ̈ܳܬܳܐ܀
ܟܓ: ܠܳܐ ܟܰܕ ܬܺܐܨܰܦ ܥܰܠ ܡܶܐܟܽܘܠܬܳܐ ܕܠܳܐ ܬܶܬܚܰܒܰܠ.
ܬܚܰܒܶܠ ܐܶܢܽܘܢ ܠܗܳܠܶܝܢ ܫܽܘܦܪ̈ܶܐ ܕܣܰܓܺܝܐܝܢ ܒܳܟ܀
ܟܕ: ܟܝܳܢܳܐ ܕܰܗܒܰܐ ܗ̱ܘ ܘܰܟܡܳܐ ܕܡܶܬܬܒܰܥ ܐܺܝܬ ܒܶܗ ܫܽܘܦܪ̈ܶܐ.
ܬܒܽܘܥܳܝܗܝ ܢܶܣܢܶܐ ܐܳܣܽܘܛܽܘܬܳܐ ܕܠܳܐ ܫܰܦܺܝܪܳܐ܀
ܟܗ: ܚܙܺܝ ܠܳܐ ܬܶܪܫܶܐ ܡܳܐ ܕܥܳܐܠܴ̈ܢ ܠܳܟ ܣܰܝܒܪ̈ܳܬܳܐ.
ܘܬܶܗܘܶܐ ܛܳܥܶܡ ܕܶܐܢ ܡܰܠܺܝ̈ܚܳܢ ܘܶܐܢ ܦܰܟܺܝ̈ܗܳܢ.
ܚܽܘܒܶܗ ܕܡܳܪܝܳܐ ܢܶܗܘܶܐ ܣܺܝܡ ܠܳܟ ܥܰܠ ܦܳܬܽܘܪܳܐ.
ܘܒܶܗ ܦܳܪܽܘܫܳܐ ܡܰܕܶܟ̥ ܐܰܢܶܝܢ ܠܰܛܥܳܡܴ̈ܬܳܟ.
ܐܶܢ ܐܺܝܬ ܚܽܘܒܳܐ ܡܳܐ ܕܦܰܟܺܝ̈ܗܳܢ ܣܰܝܒܪ̈ܳܬܳܐ.
ܡܡܰܕܶܟ̥ ܗܽܘ ܠܗܶܝܢ ܕܳܐܦ ܗܽܘ ܡܶܠܚܰܐ ܗ̱ܘ ܠܰܕܦܳܪ̈ܽܘܫܺܝܢ܀
ܟܘ: ܐܶܢ ܐܳܬܶܐ ܠܳܟ ܐܳܕܫܳܐ ܕܡܰܠܺܝܚ ܘܰܕܠܳܐ ܒܰܣܺܝܡ.
ܐܰܪܡܳܐ ܚܽܘܒܳܐ ܘܗܽܘ ܡܰܬܩܶܢ ܠܶܗ ܐܰܝܟ ܦܰܛܒܳܓܐ܀
ܟܙ: ܠܳܐ ܕܡܶܐܟܽܘܠܬܳܐ ܬܶܗܘܶܐ ܝܳܨܶܦ ܠܰܡܙܰܛܳܡܽܘ.
ܐܶܠܳܐ ܐܰܚܨܶܦ ܕܢܶܗܘܶܐ ܚܽܘܒܳܐ ܨܶܝܕ ܕܰܣܡܺܝܟ̥ܺܝܢ܀
ܟܚ: ܠܳܐ ܬܶܚܽܘܪ ܒܶܗ ܒܚܰܡܪܳܐ ܕܓܽܘܦܢ̈ܶܐ ܐܶܢܗܽܘ ܕܰܕܠܺܝܚ.
ܕܚܰܡܪܳܐ ܕܠܺܝܚܳܐ ܚܽܘܒܳܐ ܫܰܦܝܳܐ ܠܳܐ ܕܳܠܰܚ ܠܶܗ܀
ܟܛ: ܐܰܢ̱ܬ ܐܶܫܬܰܦܳܐ ܘܰܗܘܺܝ ܡܳܐܢܳܐ ܕܰܡܠܶܐ ܫܰܝܢܳܐ.
ܘܢܶܫܬܰܦܽܘܢ ܒܳܟ ܟܽܠ ܕܰܕܠܺܝܚܺܝܢ ܡܶܛܽܠ ܫܰܝܢܳܟ܀
ܠ: ܥܰܠ ܡܶܐܟܽܘܠܬܳܐ ܙܥܽܘܪܬܳܐ ܐܰܙܺܝܥ ܫܽܘܒܚܳܐ ܪܰܒܳܐ.
ܘܰܒܬܰܘܕܺܝܬܳܐ ܗܘܺܝ ܦܳܪܽܘܫܳܐ ܚܠܳܦ ܐܳܟܽܘܠܳܐ܀
ܠܐ: ܒܥܺܝܪܐ ܗܘ ܐܳܟܠܳܐ ܟܡܳܐ ܕܬܶܬܶܠ ܠܳܗ̇ ܕܠܳܐ ܦܽܘܪܫܳܢܳܐ.
ܘܰܕܠܳܐ ܣܶܒܥܰܬ̥ ܠܳܐ ܡܶܫܬܰܐܠܳܐ ܡܶܢ ܡܶܐܟܽܘܠܬܳܐ܀
ܠܒ: ܒܰܪܢܳܫܐ ܓܶܝܪ ܕܰܡܠܶܐ ܗܰܘܢܳܐ ܘܦܳܪܽܘܫܽܘܬܳܐ.
ܝܳܕܰܥ ܢܶܒܨܽܘܪ ܡܶܢ ܡܶܐܟ̈ܠܳܬܳܐ ܕܠܳܐ ܢܺܐܩܰܪ ܠܶܗ.
ܘܰܕܠܳܐ ܢܶܦܶܠ ܒܳܐܣܽܘܛܽܘܬܳܐ ܕܣܰܓܺܝ ܣܰܢܝܳܐ.
ܘܰܕܠܳܐ ܒܩܰܠܺܝܠ ܩܰܠܺܝܠ ܢܺܐܬ̥ܶܐ ܨܶܝܕ ܠܰܥܒܽܘܬܳܐ܀
ܠܓ: ܡܶܛܽܠ ܗܳܢܳܐ ܡܫܽܘܚܬܳܐ ܥܒܶܕ ܠܶܗ ܘܰܠܡܶܐܟܽܘܠܬܶܗ.
ܘܰܠܫܳܩܽܘܬܶܗ ܒܗܰܘܢܳܐ ܕܰܡܠܶܐ ܚܰܟܺܝܡܽܘܬܳܐ.
ܘܰܒܬܰܘܕܺܝܬܳܐ ܘܰܒܬܶܫܒܽܘܚܬܳܐ ܘܰܒܒܽܘܪ̈ܟܳܬܳܐ.
ܟܽܠ ܦܳܪܽܘܫܳܐ ܡܡܰܕܶܟ̥ ܠܗܶܝܢ ܠܰܛܥܳܡܴ̈ܬܶܗ܀
ܠܕ: ܫܰܦܺܝܪ ܫܽܘܒܚܳܐ ܕܗܳܘܶܐ ܣܳܠܶܩ ܡܶܢ ܦܳܬܽܘܪܳܐ.
 ܘܡܶܠܰܬ̥ ܚܰܝ̈ܶܐ ܡܳܐ ܕܡܶܙܕܰܡܪܳܐ ܒܶܝܬ ܦܳܪ̈ܽܘܫܶܐ܀
ܠܗ: ܕܠܳܐ ܢܶܛܥܶܐ ܠܶܗ ܐܰܝܢܳܐ ܕܳܐܟܶܠ ܕܡܰܢܽܘ ܝܰܗܒ ܠܶܗ.
ܗܳܠܶܝܢ ܛܽܘܒ̈ܐ ܘܗܳܠܶܝܢ ܐܳܕܫ̈ܶܐ ܕܰܣܕܺܝܪܺܝܢ ܠܶܗ.
ܐܶܠܳܐ ܒܫܽܘܒܚܳܐ ܘܰܒܬܰܘܕܺܝܬܳܐ ܡܳܪܝܳܐ ܢܺܐܪܰܒ.
ܕܰܐܣܓܺܝ ܘܰܣܕܰܪ ܟܽܠ ܒܽܘܣܳܡܻ̈ܝܢ ܥܰܠ ܦܳܬܽܘܪܳܟ܀
ܠܘ: ܐܰܝܟ ܡܰܕܰܐܬ̥ܳܐ ܚܰܝܳܒ ܢܶܬܶܠ ܐܰܝܢܳܐ ܕܳܐܙܶܠ.
ܫܽܘܒܚܳܐ ܠܡܳܪܶܗ ܕܝܰܗܒ ܠܶܗ ܢܶܣܒܰܥ ܡܶܢ ܛܳܒ̈ܳܬܶܗ܀
ܠܙ: ܘܶܐܠܳܐ ܡܫܰܒܰܚ ܡܶܢ ܟܺܐܢܽܘܬܳܐ ܒܢܶܓ̈ܕܶܐ ܦܳܪܰܥ.
ܡܶܕܶܡ ܕܰܛܠܰܡ ܟܰܕ ܐܳܟܶܠ ܗ̱ܘܳܐ ܘܠܳܐ ܡܰܘܕܶܐ ܗ̱ܘܳܐ܀
ܠܚ: ܢܶܦܪܽܘܥ ܡܳܕܶܝܢ ܥܰܕܠܳܐ ܢܶܒܠܰܥ ܡܶܢ ܟܺܐܢܽܘܬܳܐ.
ܢܶܬܶܠ ܫܽܘܒܚܳܐ ܕܠܳܐ ܢܶܬܢܰܓܰܕ ܡܶܢ ܕܰܝܳܢܳܐ܀
ܠܛ: ܦܽܘܡܳܐ ܕܩܰܒܶܠ ܘܰܚܡܰܠ ܘܰܐܥܶܠ ܣܰܝܒܪ̈ܳܬܳܐ.
ܢܰܦܶܩ ܢܶܬܶܠ ܢܶܦܪܽܘܥ ܫܽܘܒܚܳܐ ܚܠܳܦ ܡܶܐܟܽܘܠܬܳܐ܀
ܡ: ܠܳܟ ܬܶܫܒܽܘܚܬܳܐ ܡܳܪܝܳܐ ܕܙܳܐܶܢ ܥܰܒ̈ܕܶܐ ܒܺܝ̈ܫܶܐ.
ܘܟܰܕ ܛܳܠܡܺܝܢ ܠܶܗ ܡܡܰܠܶܐ ܟܽܠ ܝܽܘܡ ܣܽܘܢ̈ܩܳܢܰܝܗܽܘܢ.
ܠܳܟ ܬܰܘܕܺܝܬܳܐ ܕܰܠܦܽܘܪܥܳܢܳܐ ܠܳܐ ܚܳܐܰܪ ܐܰܢ̱ܬ.
ܐܶܠܳܐ ܡܰܓܳܢ ܣܳܒܥܺܝܢ ܥܳܠ̈ܡܶܐ ܡܶܢ ܛܳܒ̈ܳܬܳܟ܀
ܡܐ: ܠܳܟ ܢܶܬ̊ܬܙܺܝܥܽܘܢ ܟܽܠܗܽܘܢ ܦܽܘܡ̈ܶܐ ܠܰܡܫܰܒܳܚܽܘ.
ܒܬܶܗܪܳܐ ܪܰܒܳܐ ܟܰܕ ܠܳܐ ܣܳܦܩܺܝܢ ܠܳܟ ܬܶܫܒܽܘܚܬܳܐ܀

ܡܪܝ ܝܥܩܘܒ ܡܠܦܢܐ

 

ܢܽܘܼܗܳܪܳܐ: ܠܩܺܝܼܛ ܘܰܩܛܺܝܼܦ ܡܺܐܡܪܳܐ ܗܳܢܳܐ ܡܶܢ ܟܬܳܒܳܐ ܕVat. Sir. 562. ܒܝܕ ܡܰܠܦܳܢܳܐ ܥܺܝܼܣܰܐ ܕܶܡܺܝܼܪ ܗܳܢܳܐ ܕܚܳܝܶܐ ܒܐܰܘܣܛܽܘܼܪܝܳܐ. ܬܰܘܕܺܝ ܣܰܓܺܝ ܠܡܰܕܥܶܗ ܦܳܪܽܘܿܫܳܐ ܘܰܛܢܳܢܶܗ ܠܶܫܳܢܳܝܳܐ ܘܥܰܡܠܶܗ ܣܳܦܪܽܘܼܬܳܢܳܝܐ.

 

ܦܳܪܽܘܿܣܳܐ ܝܰܘܣܶܦ ܒܶܓܬܰܫ

 

 

 

 

 

[1] ܐܰܘܟܺܝܬ: ܟܰܦܢܳܐ ܐܰܢ̱ܬ؟