ܡܓܰܕܦܳܢ̈ܶܐ ܘܡܰܟܣܳܢܽܘܬܳܐ: ܡܳܪܝ ܐܺܝܣܚܳܩ ܕܰܐܢܛܝܘܟ̥

ܡܓܰܕܦܳܢ̈ܶܐ ܘܡܰܟܣܳܢܽܘܬܳܐ: ܡܳܪܝ ܐܺܝܣܚܳܩ ܕܰܐܢܛܝܘܟ̥

 

ܐ: ܐܰܝܢܳܐ ܕܡܰܫܩܶܐ ܠܰܐ̱ܚܪ̈ܳܢܶܐ: ܢܦܰܝܶܓ̥ ܨܶܗܝܶܗ ܡܶܢ ܫܶܩܝܶܗ.
ܐܰܝܢܳܐ ܕܡܰܠܶܦ ܠܰܐ̱ܚܪ̈ܳܢܶܐ: ܠܳܐ ܢܫܽܘܛ ܡܶܠܰܘ̈ܗܝ ܒܰܥܒܴ̈ܕܰܘܗܝ.
ܕܰܥܒܺܝܕ ܚܰܘܪܳܐ ܠܰܐ̱ܚܪ̈ܳܢܶܐ: ܒܢܰܦܫܶܗ ܢܚܽܘܪ ܩܰܕܡܳܝܰܬ̥.
ܐܰܝܢܳܐ ܕܡܰܢܗܰܪ ܠܰܐ̱ܚܪ̈ܳܢܶܐ: ܒܚܶܫܟܳܐ ܕܢܶܬܶܒ ܠܳܐ ܙܳܕܶܩ[1].
ܒ: ܕܰܡܥܺܝܪ ܒܩܰܪܢܳܐ ܠܰܐ̱ܚܪ̈ܳܢܶܐ: ܠܳܐ ܢܶܫܬܒܶܐ ܡܶܢ ܫܰܒܳܝ̈ܶܐ.
ܕܰܡܙܰܗܰܪ ܡܶܢ ܢܶܟ̥̈ܝܳܢܶܐ: ܒܢܶܟ̥̈ܝܳܢܶܐ ܠܳܐ ܢܶܬܡܰܚܶܐ.
ܕܡܰܐܣܶܐ ܚܰܒܪ̈ܰܘܗܝ ܠܳܐ ܢܶܗܘܶܐ: ܫܽܘܚܢܳܐ ܟܽܠܶܗ ܒܚܺܐܪܽܘܬܶܗ.
ܕܰܥܒܺܝܕ ܕܰܘܩܳܐ ܠܰܐ̱ܚܪ̈ܳܢܶܐ: ܠܳܐ ܢܶܛܥܽܘܢ ܒܶܗ ܣܰܓܺܝ̈ܶܐܐ[2].
ܓ: ܕܪܳܕ̥ܶܐ ܒܽܐܘܪܚܳܐ ܕܡܰܠܟܽܘܬܳܐ: ܠܳܐ ܢܶܬܕܰܘܰܕ ܒܰܫ̈ܒܺܝܠܶܐ.
ܕܰܐܚܺܝܕ ܩܠܺܝܕܳܐ ܕܒܶܝܬ ܓܰܙܳܐ: ܠܳܐ ܢܗܶܐ ܣܢܺܝܩܳܐ ܘܚܳܕܽܘܪܳܐ.
ܕܩܳܐܶܡ ܒܰܬܪܰܥ ܡܰܠܟܽܘܬܳܐ: ܠܳܐ ܢܶܐܚܽܘܕ ܬܰܪܥܳܐ ܒܰܐܦܰܘ̈ܗܝ.
ܕܝܳܗܶܒ ܐܺܝܕܳܐ ܠܬܰܝܳܒ̈ܶܐ: ܠܳܐ ܢܶܦܣܽܘܩ ܣܰܒܪܳܐ ܕܢܰܦܫܶܗ.
ܕ: ܐܰܝܢܳܐ ܕܥܳܨܶܒ ܠܰܬܒܺܝܪ̈ܶܐ: ܠܳܐ ܢܩܰܘܶܐ ܗܽܘ ܒܰܬܒܳܪܶܗ.
ܐܰܝܢܳܐ ܕܡܰܦܢܶܐ ܛܳܥܰܝ̈ܳܐ: ܒܬܰܘܫܳܐ ܢܶܫܓܶܐ ܠܳܐ ܙܳܕܶܩ.
ܕܝܳܗܶܒ ܛܽܘܒܳܐ ܠܡܶܣܟܺܢ̈ܶܐ: ܢܶܗܘܶܐ ܪܳܚܶܡ ܡܶܣܟܺܢ̈ܶܐ.
ܕܰܡܒܰܪܰܟ̥ ܒܰܢܝܳܚ̈ܳܬܳܐ: ܢܶܪܚܰܡ ܐܳܦ ܗܽܘ ܙܶܕܩܴ̈ܬܳܐ.
ܗ: ܕܰܡܨܰܠܶܐ ܒܪܺܝܫܶܗ ܕܥܰܡܳܐ: ܒܚܰܘ̈ܒܰܘܗܝ ܪܺܝܫܶܗ ܠܳܐ ܢܰܪܟܶܢ.
ܕܩܳܪܶܐ ܘܰܡܦܺܝܣ ܠܰܐ̱ܚܪ̈ܳܢܶܐ: ܢܰܦܺܝܣ ܢܰܦܫܶܗ ܩܰܕܡܳܝܰܬ̥.
ܕܡܶܬ̊ܬܰܢܰܚ ܥܰܠ ܐܶܢܩܴ̈ܬܳܐ: ܢܰܪܘܰܚ ܐܳܦ ܗܽܘ ܠܰܐܠܺܝ̈ܨܶܐ.
ܐܰܝܢܳܐ ܕܡܰܟܶܣ ܛܳܠܽܘ̈ܡܶܐ: ܠܳܐ ܗܘ̣ܳܐ ܛܠܺܝܡ ܗ̱ܘ̣ ܡܶܢ ܢܰܦܫܶܗ.
ܘ: ܐܰܝܢܳܐ ܕܡܰܪܬ̊ܶܐ ܠܒܳܙܽܘ̈ܙܶܐ: ܒܶܙܬܳܐ ܠܒܰܝܬܶܗ ܠܳܐ ܬܶܥܽܘܠ.
ܐܰܝܢܳܐ ܕܰܡܨܰܠܶܐ ܠܰܐܒܳܐ: ܡܽܘܟܳܟ̥ܶܗ ܕܰܒܪܳܐ ܢܶܪܚܰܡ.
ܐܰܝܢܳܐ ܕܡܶܬ̊ܬܰܠܡܰܕ ܠܰܒܪܳܐ: ܪܽܘܚܳܐ ܪܳܡܬܳܐ ܠܳܐ ܢܶܩܢܶܐ܀
ܕܩܰܒܶܠ ܪܽܘܚܳܐ ܕܰܐܠܳܗܳܐ: ܢܩܰܕܶܫ ܢܰܦܫܶܗ ܥܰܡ ܦܰܓܪܶܗ.
ܙ: ܐܰܝܢܳܐ ܕܝܳܗܶܒ ܡܰܘܗܰܒܬܳܐ: ܐܰܓܪܶܗ ܒܚܽܘܬ̥ܪܶܗ ܠܳܐ ܢܰܘܒܶܕ.
ܐܰܝܢܳܐ ܕܨܳܐܶܡ ܠܰܐܠܳܗܳܐ: ܫܽܘܒܚܳܐ ܕܐ̱ܢܳܫܳܐ ܠܳܐ ܢܶܪܚܰܡ.
ܐܰܝܢܳܐ ܕܒܳܪܶܟ ܒܰܨܠܽܘܬܳܐ: ܫܽܘܒܗܳܪܳܐ ܢܰܪܚܶܩ ܡܶܢܶܗ.
ܐܰܝܢܳܐ ܕܚܳܐܰܪ ܒܰܩܢܽܘܡܶܗ: ܠܳܐ ܢܚܘܪ ܒܰܟ̈ܢܰܘܳܬܶܗ[3].
ܚ: ܐܰܝܢܳܐ ܕܓܳܒܶܐ ܓܽܘܙܳܝܳܐ: ܨܰܘܬܶܗ ܕܝܶܫܽܘܥ ܣܳܦܶܩ ܠܶܗ.
ܕܰܠܒܺܝܫ ܠܰܫܡܳܐ ܝܰܩܺܝܪܳܐ: ܠܳܐ ܢܶܙܕܰܠܰܠ ܒܰܥ̈ܒܳܕܶܐ.
ܫܡܳܐ ܒܰܠܚܽܘܕ ܠܳܐ ܡܰܗܢܶܐ ܠܰܢ: ܐܶܢ ܥܒܳܕܳܐ ܪܰܚܺܝܩ ܡܶܢܰܢ.
ܙܰܒܢܳܐ ܙܥܽܘܪܳܐ ܡܶܬܚܰܦܶܐ: ܙܺܐܦܳܐ ܒܰܫܡܳܐ ܚܰܒܺܝ̈ܒܰܝ.
ܛ: ܥܳܒܰܪ ܙܰܒܢܳܐ ܘܡܰܫܠܰܚ ܠܰܢ: ܘܰܡܦܰܪܣܶܐ ܐܳܦ ܟܰܣ̈ܝܳܬܰܢ܀
ܐܰܝܢܳܐ ܕܨܳܒܐ ܕܢܶܬܒܰܩܶܐ: ܒܗܰܘ ܥܳܠܡܳܐ ܚܰܬܺܝܬܳܐܝܬ̥[4].
ܢܶܚܙܶܐ ܠܡܺܝܡ̈ܣܶܐ ܕܒܰܫܥܳܬ̥ܳܐ: ܣܳܝܡܺܝܢ ܦܰܪܨܽܘܦ ܡܰܠܟܽܘܬܳܐ.
ܐܺܝܬ ܗ̱ܘ̣ ܕܥܰܒܕܰܐ ܗ̱ܘ ܒܰܟܝܳܢܶܗ: ܘܒܶܐܣܟܺܡܳܐ ܕܡܰܠܟܳܐ ܢܳܦܶܩ.
ܝ: ܐ̱ܚܪܺܢܳܐ ܕܺܐܝܬܰܘܗܝ ܗܶܕܝܽܘܛܳܐ: ܒܰܚܙܳܬܳܐ ܕܦܺܝܠܳܣܘܦܳܐ.
ܘܰܐ̱ܚܪܺܢܳܐ ܕܺܐܝܬܰܘܗܝ ܫܺܝܛܳܐ: ܒܦܰܪܨܽܘܦܳܐ ܕܰܩܪܰܒܬܳܢܳܐ.
ܡܳܐ ܕܰܫܠܺܝ ܫܶܥܝܳܐ ܣܪܺܝܩܳܐ: ܘܰܦܛܰܪ ܘܟܶܢܫ̈ܶܐ ܐܶܬܦܰܪܣܺܝܘ.
ܕܫܳܠܚܺܝܢ ܫܳܕܶܝܢ ܦܰܪ̈ܨܽܘܦܶܐ: ܫܐܺܝ̈ܠܶܐ ܕܰܠܒܶܫܘ ܠܰܚܙܳܬܳܐ.
ܝܐ: ܗܳܟܰܢ ܒܥܳܠܡܳܐ ܫܰܪܺܝܪܳܐ: ܫܳܠܚܺܝܢ ܐ̱ܢܳܫ̈ܳܐ ܠܰܫܡܳܗ̈ܶܐ.
ܘܡܶܬܓܠܶܝܢ ܥܒܴ̈ܕܶܐ ܚܰܬܺܝ̈ܬܶܐ: ܙܺܐܦܳܢ̈ܶܐ ܐܳܦ ܫܰܪܺܝܪ̈ܶܐ.
ܐܰܝܢܳܐ ܕܺܐܝܬܰܘܗܝ ܕܰܢܚܳܫܳܐ[5]: ܘܰܩܪܺܝܡ ܕܰܗܒܳܐ ܠܒܰܪ ܡܶܢܶܗ.
ܡܛܰܠܩܳܐ ܢܽܘܪܳܐ ܬܰܚܦܺܝܬܶܗ: ܘܰܡܚܰܘܝܳܐ ܠܶܗ ܐܰܝܟ ܕܺܐܝܬܰܘܗܝ.
ܝܒ: ܠܳܐ ܬܶܪܰܓ ܠܰܫܡܳܐ ܒܰܠܚܽܘܕ: ܠܳܐ ܓܶܝܪ ܡܶܫܟܰܚ ܠܳܘܶܐ ܠܳܟ.
ܟܡܳܐ ܐܺܝܬ ܫܺܝ̈ܛܶܐ ܘܡܰܣ̈ܠܰܝܳܐ: ܕܠܳܐ ܝܺܕܺܝܥܺܝܢ ܒܰܒܪܺܝܬܳܐ.
ܕܰܒܗܰܘ ܝܰܘܡܳܐ ܡܶܬܝܰܕܥܺܝܢ: ܘܡܶܬܟܰܪܙܺܝܢ ܢܶܨܚܳܢܰܝ̈ܗܽܘܢ.
ܐ̱ܚܪ̈ܳܢܶܐ ܕܰܠܒܶܫܘ ܠܰܫܡܳܗ̈ܶܐ: ܕܺܐܝܩܳܪܐ ܐܰܝܟ ܬܰܚܦܺܝܬܳܐ.
ܝܓ: ܘܰܥܒܰܪܘ ܗܶܢܽܘܢ ܘܰܫܡܳܗ̈ܶܐ: ܘܰܢܛܺܝܪ ܕܺܝܢܳܐ ܕܰܥܒܴ̈ܕܶܐ܀
ܐܶܢ ܫܰܪܺܝܪ ܠܰܢ ܐܰܠܳܗܳܐ: ܠܳܐ ܢܶܬܦܰܠܰܓ̥ ܥܰܠ ܡܶܠܰܘ̈ܗܝ.
ܕܟܽܠ ܡܶܠܳܐ ܕܢܺܐܡܰܪ ܦܽܘܡܳܐ: ܦܶܬܓܳܡܳܐ ܚܠܳܦܶܝܗ̇ ܝܳܗܶܒ.
ܢܰܪܡܶܐ ܦܓܽܘ̈ܕܶܐ ܒܠܶܫܳܢܰܢ: ܕܠܳܐ ܢܡܰܠܶܠ ܝܰܬܺܝܪ̈ܳܬܳܐ.
ܝܕ: ܕܺܝܢܳܐ ܕܡܷ̈ܠܶܐ ܬܳܒܰܥ ܠܰܢ: ܘܰܫܡܺܝܛܺܝܢ ܠܰܢ ܠܶܫܳܢܰܝ̈ܢ.
ܒܕܰܓܳܠܽܘܬܳܐ ܘܓܽܘܕܳܦܳܐ: ܐܶܬܥܰܝܰܕ ܠܶܗ ܠܶܫܳܢܰܢ.
ܘܗܳܐ ܫܒܺܝ̈ܩܳܢ ܐܳܦ ܣܶܦ̈ܘܳܬܰܢ: ܕܠܳܐ ܚܽܘܫܳܒܳܐ ܢܳܛܽܘܪܳܐ[6].
ܕܚܰܠ ܡܰܪܳܚܳܐ ܕܰܡܓܰܕܶܦ: ܠܶܫܳܢܶܗ ܥܰܠ ܒܳܪܽܘܝܶܗ.
ܝܗ: ܕܡܶܛܽܠ ܥܰܝܛܳܐ ܕܰܟܢܳܬ̥ܳܟ: ܡܳܪܶܐ ܣܪ̈ܳܦܶܐ ܡܶܨܛܰܥܰܪ.
ܟܡܳܐ ܓܽܘ̈ܕܳܦܶܐ ܒܶܝܬ ܫܽܘ̈ܩܶܐ: ܘܰܛܥܺܝܢܳܐ ܠܰܢ ܛܰܝܒܽܘܬܳܐ.
ܘܰܡܩܰܘܝܳܐ ܐܰܪܥܐ ܬܚܽܘܬ̥ܰܝܢ: ܟܰܕ ܗܰܘ ܕܪܰܩܥܳܗ̇ ܡܶܨܛܰܥܰܪ.
ܠܡܽܘܫܶܐ ܡܰܟܺܝܟܳܐ ܨܰܚܝܘܗܝ: ܩܽܘܪܳܚ ܘܕܳܐܬܳܢ ܘܰܐܒܺܝܪܰܡ[7].
ܝܘ: ܘܗܺܝ ܐܰܪܥܳܐ ܕܰܬܚܽܘܬ̥ܰܝܗܽܘܢ: ܐܶܬܦܰܬܚܰܬ̥ ܒܶܠܥܰܬ̥ ܐܶܢܽܘܢ.
ܠܥܰܒܕܳܐ ܗܳܢܽܘܢ ܨܰܥܰܪܘ ܗ̱ܘܰܘ: ܘܰܗܘܳܐ ܦܶܚܬܳܐ ܬܚܽܘܬ̥ܰܝܗܽܘܢ.
ܠܡܳܪܶܐ ܟܪ̈ܽܘܒܶܐ ܡܨܰܥܪܺܝܢܰܢ: ܘܩܰܝܳܡܳܐ ܐܰܪܥܳܐ ܬܚܽܘܬ̥ܰܝܢ.
ܒܗܰܘ ܦܽܘܡܳܐ ܕܶܐܟܰܠ ܦܰܓܪܶܗ: ܒܶܗ ܡܶܬܡܰܠܰܠ ܓܽܘܕܳܦܳܐ.
ܝܙ: ܘܣܶܦ̈ܘܳܬܳܐ ܕܶܐܫ̈ܬܺܝܝ ܠܰܕܡܶܗ: ܒܗܶܝܢ ܡܶܨܛܰܥܰܪ ܟܽܠܥܶܕܳܢ.
ܒܗܰܘ ܠܶܫܳܢܳܐ ܕܓܰܕܶܦܢܰܢ: ܥܰܠܗܳܝ ܨܶܒܥܳܐ ܕܰܓܠܰܦܬ̥ܶܗ.
ܒܶܗ ܥܳܐܠܺܝܢܰܢ ܕܰܢܨܰܠܶܐ: ܒܓܰܘ ܒܰܝܬܶܗ ܘܰܡܣܰܝܒܰܪ ܠܰܢ.
ܒܰܐܝܢܳܐ ܠܶܒܳܐ ܡܰܡܪܰܚ ܐܰܢ̱ܬ: ܐܳܘ ܕܰܡܓܰܕܶܦ ܥܰܠ ܡܳܪܶܗ.
ܝܚ: ܕܬܶܩܪܽܘܒ ܬܶܣܰܒ ܠܰܓܡܽܘܪܬܳܐ: ܕܰܣܪܳܦܳܐ ܒܟܰܠܒܬܳܐ ܠܰܒܟ̥ܳܗ̇. ܒܰܕܡܽܘܬ ܝܰܥܪܳܐ ܓܽܘܕܳܦܳܐ: ܡܠܶܐ ܠܶܫܳܢܳܟ ܡܰܪܳܚܳܐ܀
ܘܰܕܠܳܐ ܕܶܚܠܳܐ ܩܳܪܶܒ ܐܰܢ̱ܬ: ܕܬܶܣܰܒ ܢܽܘܪܳܐ ܒܣܶܦ̈ܘܳܬ̥ܳܟ.
ܘܶܐܢܗܽܘ ܕܡܰܗܡܶܐ ܐܰܝܟ ܛܳܒܳܐ: ܕܥܰܠ ܒܺܝ̈ܫܶܐ ܦܪܺܝܣܺܝܢ ܪ̈ܰܚܡܰܘܗܝ.
ܝܛ: ܐܰܢ̱ܬ ܠܳܐ ܒܳܗܬ̥ܰܬ̊ ܡܶܢ ܢܰܦܫܳܟ: ܕܗܳܢ ܟܽܠܶܗ ܡܰܓܰܪ ܪܽܘܚܶܗ.
ܒܰܐܝܠܶܝܢ ܐܰܦ̈ܶܐ ܥܳܐܶܠ ܐܰܢ̱ܬ: ܐܳܘ ܡܓܰܕܦܳܢܳܐ ܠܓܰܘ ܒܰܝܬܶܗ.
ܘܒܰܐܝܢܳܐ ܟܪܽܘܡܳܐ[8] ܫܳܐܶܠ ܐܰܢ̱ܬ: ܪ̈ܰܚܡܶܐ ܡܶܢ ܗܰܘ ܕܶܐܨܛܰܥܰܪ.
ܗܽܘ ܡܶܕܶܡ ܠܳܐ ܡܶܣܬܰܓܰܦ: ܡܶܢ ܓܽܘܕܳܦܳܟ ܐܳܘ ܕܳܘܝܳܐ܀
ܟ: ܕܶܐܢ ܬܶܫܕܶܐ ܣܝܳܢܳܐ ܒܫܶܡܫܳܐ: ܠܫܶܡܫܳܐ ܣܝܳܢܳܐ ܠܳܐ ܩܳܪܶܒ.
ܥܰܠ ܠܶܫܳܢܳܐ ܟܳܐܶܒ ܠܺܝ: ܕܡܶܬܦܰܠܦܰܠ ܡܶܢ ܓܽܘܕܳܦܳܟ.
ܕܰܚܠܳܦ ܫܽܘܒܚܳܐ ܕܚܰܝܳܒ ܐܰܢ̱ܬ: ܨܰܥܪܳܐ ܦܪܰܥܬܳܝܗܝ ܗܰܦܟܳܐܝܬ. ܩܪܽܘܒ ܐܶܫܰܐܠܳܟ ܡܰܪܳܚܳܐ: ܕܰܡܓܰܕܶܦ ܥܰܠ ܒܳܪܽܘܝܶܗ.
ܟܐ: ܘܦܽܘܩ ܠܺܝ ܪܽܘܚܳܐ ܥܰܠ ܢܰܦܫܳܟ: ܐܶܠܳܐ ܢܳܟܦܰܬ̊ ܕܰܬܡܰܠܶܠ.
ܥܰܝܛܳܐ ܠܰܡ ܕܰܟܢܳܬ̥ܝ ܐܰܠ̣ܨܰܢܝ: ܕܺܐܡܰܪ ܡܶܠܬܳܐ ܕܓܽܘܕܳܦܳܐ.
ܘܚܶܡܬܳܐ ܚܛܰܦܬ̥ܰܢܝ ܘܶܐܬܥܰܒܪܶܬ̥: ܕܰܠܡܳܪܶܐ ܟܽܠ ܐܶܨܰܚܶܐ܀
ܩܽܘܛܪܳܓ̥ܳܟ ܐܺܝܬܰܘܗܝ ܣܰܟܠܳܐ: ܡܰܦܰܩ ܒܪܽܘܚܳܐ ܕܦܰܛܥܽܘܬ̥ܳܟ.
ܟܒ: ܐܶܢܗܽܘ ܕܚܰܒܪܳܟ ܐܰܣܟܶܠ ܒܳܟ: ܡܳܪܳܐ ܕܓܰܘܳܐ ܡܳܢ ܚܰܝܳܒ. ܡܶܒܣܳܐ ܒܳܣܶܝܬ̊ ܡܰܪܳܚܳܐ: ܥܰܠ ܪ̈ܰܚܡܶܐ ܕܒܰܣܺܝܡܽܘܬܶܗ.
ܕܰܚܠܳܦ ܚܰܒܪܳܟ ܒܰܐܠܳܗܳܐ: ܡܢܺܝܚ ܐܰܢ̱ܬ ܚܶܡܬ̥ܳܐ ܕܦܰܩܪܽܘܬܳܟ.
ܒܝܰܘܡܐ ܐ̱ܚܪܳܝܳܐ ܐܶܢ ܬܳܒܰܥ: ܗܳܕܶܐ ܒܰܠܚܽܘܕ ܡܶܢ ܐܺܝ̈ܕܰܝܟ.
ܟܓ: ܡܳܢ ܦܶܬܓܳܡܳܐ ܡܶܫܟܰܚ ܐܰܢ̱ܬ: ܕܰܬܦܰܢܶܐ ܠܶܗ ܠܕܰܝܳܢܳܟ.
ܐܶܢܗܽܘ ܕܥܳܐܠܳܐ ܠܰܕܪܳܫܳܐ: ܟܺܐܢܽܘܬܶܗ ܥܰܡ ܚܰܪܡܽܘܬ̥ܳܟ.
ܐܰܝܢܐ ܦܝܳܣܳܐ ܡܪܰܟܶܒ ܐܰܢ̱ܬ: ܕܬܶܦܽܘܩ ܪܽܘܚܳܐ ܚܠܳܦ ܢܰܦܫܳܟ. ܡܶܛܽܠܡܳܢܳܐ ܡܓܰܕܶܦ ܐܰܢ̱ܬ: ܥܰܠ ܒܳܪܽܘܝܳܟ ܡܰܪܳܚܳܐ܀
ܟܕ: ܥܰܠ ܕܰܒ̣ܪܳܟ ܟܰܕ ܠܳܐ ܐܺܝܬܰܝܟ: ܘܨܳܪ ܦܽܘܡܳܟ ܟܰܕ ܠܳܐ ܩܪܰܝܬܳܝܗܝ.
ܥܰܠ ܕܢܰܛܪܳܟ ܝܰܪ̈ܚܶܐ ܬܶܫܥܳܐ: ܒܓܰܘ ܗܰܘ ܥܽܘܒܳܐ ܥܰܡܽܘܛܳܐ.
ܘܝܰܗ̱ܒ ܠܳܟ ܚܰܝ̈ܶܐ ܕܠܳܐ ܣܰܘܩܳܐ: ܒܬܶܕܡܽܘܪܬܳܐ ܒܓܰܘ ܪܰܓܝܽܘܬܳܟ.
ܥܰܠ ܕܪܰܟܶܒ ܟܽܠ ܗܰܕܳܡܰܝ̈ܟ: ܘܰܪܫܰܡ ܨܰܒܶܬ̥ ܨܽܘܪ̈ܳܬ̥ܳܟ.
ܟܗ: ܘܰܦܬܰܚ ܬܽܘܒ ܬܰܪܥܳܐ ܩܕܳܡܰܝܟ: ܕܡܶܢ ܚܶܫܟܳܐ ܠܢܽܘܗܪܳܐ ܬܶܦܽܘܩ. ܥܰܠ ܕܛܰܝܶܒ ܐܽܘܟܠܳܐ ܫܰܪܝܳܐ: ܕܰܬܕܰܝ̈ܳܐ ܠܰܣܢܺܝܩܽܘܬܳܟ.
ܘܰܡܥܺܝ̈ܢܶܐ ܕܚܰܠܒܳܐ ܬܰܪܬܶܝܢ: ܒܚܰܕܝܳܐ ܕܶܐܡܳܟ ܐܰܪܕܺܝ ܠܳܟ.
ܘܶܐܢ ܗܳܝ ܕܰܒ̣ܪܳܟ ܛܳܠܶܡ ܐܰܢ̱ܬ: ܕܡܺܝܬ ܚܠܳܦܰܝܟ ܠܳܐ ܥܳܗܶܕ ܐܰܢ̱ܬ.
ܟܘ: ܠܰܘ ܥܰܠ ܐܰܦܰܝ̈ܟ ܡܰܪܳܚܳܐ: ܠܰܙܩܺܝܦܳܐ ܣܠܶܩ ܐܰܠܳܗܳܐ.
ܘܪܽܘܩܳܐ ܘܒܶܙܚܳܐ ܩܰܒܶܠ ܗ̱ܘܳܐ: ܘܰܟܠܺܝܠ ܟܽܘ̈ܒܶܐ ܕܰܒܪܺܝܫܶܗ.
ܠܰܘ ܠܩܰܒܪܳܐ ܥ̣ܰܠ ܗ̱ܘܳܐ ܚܠܳܦܰܝܟ: ܘܰܒܪܽܘܡܚܳܐ ܒܠܰܥ ܗ̱ܘܳܐ ܒܣܶܛܪܶܗ. ܘܰܠܒܶܝܬ ܡܺܝ̈ܬܶܐ ܒܰܪ ܚܺܐܪ̈ܶܐ: ܥ̣ܰܠ ܒܳܬܪܳܟ ܕܥܰܡܶܗ ܬܶܦܽܘܩ.
ܡܶܛܽܠ ܗܳܠܶܝܢ ܡܰܪܳܚܳܐ: ܫܽܘܒܚܳܐ ܕܬܰܣܶܩ ܙܳܕܶܩ ܗ̱ܘܳܐ.
ܠܰܘ ܓܽܘܕܳܦܳܐ ܕܠܶܫܳܢܳܟ: ܠܗܰܘ ܕܶܐܬ̥ܳܐ ܘܒܰܕܡܶܗ ܦܰܪܩܳܟ܀

ܡܳܪܝ ܐܝܣܚܩ ܕܐܢܛܝܘܟ  ( 460 )

ܢܽܘܼܗܳܪܳܐ: ܠܩܺܝܼܛ ܘܰܩܛܺܝܼܦ ܡܺܐܡܪܳܐ ܗܳܢܳܐ ܡܶܢ ܟܬܳܒܳܐ ܕ Vat. Sir.119 ܒܝܕ ܡܰܠܦܳܢܳܐ ܥܺܝܼܣܰܐ ܕܶܡܺܝܼܪ ܗܳܢܳܐ ܕܚܳܝܶܐ ܒܐܰܘܣܛܽܘܼܪܝܳܐ. ܬܰܘܕܺܝ ܣܰܓܺܝ ܠܡܰܕܥܶܗ ܦܳܪܽܘܿܫܳܐ ܘܰܛܢܳܢܶܗ ܠܶܫܳܢܳܝܳܐ ܘܥܰܡܠܶܗ ܣܳܦܪܽܘܼܬܳܢܳܝܐ.

 

ܦܳܪܽܘܿܣܳܐ ܝܰܘܣܶܦ ܒܶܓܬܰܫ

 

 

 

[1] ܗܳܢܰܘ. ܠܳܐ ܢܡܰܠܶܠ ܫܰܦܺܝܪܳܐܝܬ̥ ܘܢܶܣܥܽܘܪ ܒܺܝܫܳܐܝܬ̥.

[2] ܠܪ̈ܺܝܫܳܢܶܝܗ̇ ܕܥܺܕܬܳܐ ܙܽܘܗܳܪ̈ܶܐ.

[3] ܗܳܢܰܘ ܕܚܳܐܰܪ ܒܰܚ̈ܛܳܗܰܘܗܝ܆ ܠܳܐ ܢܕܽܘܢ ܠܰܐ̱ܚܪܺܢܳܐ ܕܰܚܛܳܐ.

[4] ܬܰܚܘܺܝܬܳܐ ܡܶܛܽܠ ܥܳܠܡܐ ܕܰܥܬܺܝܕ.

[5] ܗܳܢܰܘ ܕܒܶܐܣܟܺܝܡܳܐ ܠܚܽܘܕ ܩܝܡܐ ܠܶܗ ܕܶܚܠܰܬ̥ ܐܰܠܳܗܳܐ.

[6] ܗܳܢܰܘ ܫܰܪ̈ܝܳܢ ܣܶܦ̈ܘܳܬܰܢ ܕܰܢܡܰܠܶܠ ܕܠܳܐ ܗܰܘܢܳܐ ܢܳܛܽܘܪܳܐ.

[7] ܡܶܛܽܠ ܡܓܰܕ̈ܦܳܢܶܐ.

[8] ܡܰܪܳܚܳܐ.