ܩܶܪܝܳܢܳܐ ܫܰܪܺܝܼܪܳܐ

ܩܶܪܝܳܢܳܐ ܫܰܪܺܝܼܪܳܐ

ܩܶܪܝܳܢܳܐ ܫܰܪܺܝܼܪܳܐ ܗܿܰܘ ܗ̱ܽܘܼ ܕܕܳܚܶܩ ܠܰܚܙܽܘܼܩܝܳܐ ܓܰܘܳܝܳܐ ܘܰܡܒܰܕܰܪ ܚܽܘܼ̈ܫܳܒܶܐ ܒܺܝܼ̈ܫܶܐ ܒܰܢܗܘܿܪ ܒܽܘܼܝܳܢܳܐ ܥܰܡܺܝܼܩܳܐ ܘܰܪܘܺܝܼܚܳܐ ܒܺܝܕܰܥܬܳܐ ܚܕܰܬܳܐ.

ܐܰܪܰܐ ܡܰܨܝܳܐ ܟܰܝ ܕܢܺܐܪܰܒ ܘܢܶܪܘܰܚ ܘܢܶܥܡܰܩ ܒܽܘܼܝܳܢܳܐ ܒܶܠܥܰܕ ܩܶܪܝܳܢܳܐ ܫܰܪܺܝܼܪܳܐ ܘܝܕܰܥܬܳܐ ܬܪܺܝܼܨܬܳܐ ؟

ܐܰܪܰܐ ܐܺܝܼܬ ܠܰܢ ܨܶܦܬܳܐ ܒܰܒܥܳܬܐ ܗܳܕܶܐ؟

ܐܰܪܰܐ ܒܳܥܶܝܢܰܢ ܩܶܪܝܳܢܳܐ ܫܰܪܺܝܼܪܳܐ ܕܢܳܩܶܠ ܐܽܘܼܪܰܚ ܡܶܣܬܰܟܠܳܢܽܘܼܬܳܐ؟

ܐܰܪܳܐ ܝܳܕܥܺܝܼܢܰܢ ܕܩܶܪܝܳܢܳܐ ܫܰܪܺܝܼܪܳܐ ܠܳܐ ܡܶܫܬܰܡܠܶܐ ܒܰܩܦܳܣܳܐ ܘܰܚܡܳܠܐ  ܕܺܝܕܰܥܬܳܐ ܒܰܠܚܽܘܿܕ؟

 ܐܰܪܰܐ ܨܳܒܶܝܢܰܢ ܕܢܶܦܽܘܼܩ ܡܼܶܢ ܩܶܠܳܝܬܳܐ ܕܨܰܘܬܰܢ ܘܢܶܗܦܽܘܟ ܠܢܰܦܫܰܢ ܫܰܪܺܝܼܪܬܳܐ ܐܰܝܟܰܢܳܐ ܕܢܶܬܦܠܰܚ ܘܢܶܬܬܰܫܩܶܐ ܘܢܶܣܬܰܝܒܰܪ ܘܢܶܬܥܰܡܰܩ ܘܢܶܫܬܰܓܢܶܐ ܘܢܶܫܬܰܟܠܰܠ ܒܰܪܢܳܫܰܢ ܓܰܘܳܝܳܐ ܒܺܝܼܕܰܥܬܳܐ ܗܿܳܝ ܕܩܳܦܶܠ ܘܡܳܐܶܨ ܘܡܳܬܶܩ ܡܼܶܢ ܩܶܪܝܳܢܳܐ ܫܰܪܺܝܼܪܳܐ...؟

ܐܰܪܰܐ ܟܡܳܐ ܙܰܒܢ̈ܺܝܼܢ ܫܬܶܩܢܰܢ ܒܶܝܬ ܠܰܢ ܘܰܠܢܰܦܫܰܢ ܒܫܶܡܥܳܐ ܕܩܳܠ ܫܪܳܪܳܐ ܘܩܽܘܼܫܬܳܐ ܒܰܝܢܳܬ ܚܰܘ̈ܩܶܐ ܕܣܶܦܪ̈ܶܐ ܘܰܟ̈ܬܳܒܶܐ؟

ܐܰܪܰܐ ܟܡܳܐ ܙܰܒܢܺܝܼ̈ܢ ܦܰܢܺܝܼܢܰܢ ܘܐܶܡܰܪܢܰܢ «ܠܳܐ ܝܳܕܥܺܝܼܢܰܢ» ܢܰܨܺܝܼܚܳܐܝܼܬ ܒܶܠܥܰܕ ܒܶܗܬܬܳܐ ܘܟܽܘܼܚܳܕܳܐ؟

ܘܚܰܫܺܝܼܫ ܐ̱ܢܳܐ ܠܡܺܐܡܰܪ: ܒܰܨܒܽܘܼܬܳܐ ܗܳܕܶܐ ܡܰܪܫܽܘܼܬܳܐ ܪܰܒܬܳܐ ܨܳܝܒܳܐ ܘܩܳܝܡܳܐ ܠܘܳܬܰܢ.

ܒܰܕ ܩܶܪܝܳܢܳܐ ܫܰܪܝܼܪܳܐ ܠܰܝܬܰܘܗܝ ܐܰܩܡܳܐ ܐܰܘ ܕܰܪܓܳܐ ܪܰܒܳܐ. ܐܶܠܳܐ ܨܰܘܬܳܐ ܓܰܘܳܝܳܐ ܕܙܳܐܶܡ ܒܗܳܠܶܝܢ ܕܰܡܫܰܐܠܽܘܼܬܳܐ ܘܰܒܛܺܝܼܠܽܘܼܬܳܐ ܕܒܰܪܢܳܫܳܐ.

ܐܰܪܳܐ ܫܟܺܝܼܚ ܗ̱ܽܘܼ ܥܰܠ ܐܰܦ̈ܰܝ ܐܰܪܥܳܐ ܕܰܪܓܳܐ ܡܶܕܶܡ ܐܰܘ ܕܰܪܓܳܝܳܐ ܐ̱ܢܳܫ ܕܠܳܐ ܣܢܺܝܼܩ ܠܨܰܘܬܳܐ ܕܰܚܙܽܘܼܩܝܳܐ ܗܳܢܳܐ...؟

ܐܰܪܰܐ ܐܰܝܟܰܢ ܡܶܫܬܰܡܠܶܝܢ ܒܽܘܼܨܳܪ̈ܶܐ ܘܐܰܝܟܰܢ ܡܶܬܚܰܝܕܺܝܼܢ ܦܽܘܼ̈ܠܳܓܶܐ ܘܐܰܝܟܰܢ ܡܶܬܬܚܺܝܼܛܺܝܼܢ ܣܶܕ̈ܩܶܐ ܪ̈ܶܥܝܳܢܳܝܶܐ ܕܗܿܰܘ ܐܰܝܢܳܐ ܕܠܳܐ ܢܳܦܶܩ ܨܶܒܝܳܢܳܐܝܼܬ ܠܰܚܙܽܘܼܩܝܳܐ ܗܳܢܳܐ؟

ܐܰܪܰܐ ܣܳܦܩܳܐ ܕܢܶܩܢܶܐ ܫܶܡ ܡܦܰܪܢܣܳܢܳܐ ... ܡܕܰܒܪܳܢܳܐ... ܘܡܰܠܦܳܢܳܐ...

ܟܰܕ ܚܢܰܢ ܠܰܝܬ ܠܰܢ ܢܰܚ̈ܬܶܐ ܕܝܕܰܥܬܳܐ ܘܐܳܦܠܳܐ ܡܦܳܣܺܝܼܢܰܢ ܒܣܽܘܼܟܳܠܳܐ ܪܰܒܳܐ ܕܡܰܠܳܚܽܘܼܬܳܐ ܘܡܳܠܽܘܿܟܽܘܼܬܳܐ ܕܬܶܫܡܶܫܬܰܢ: ܬܶܐܓܽܘܼܪܬܳܢܳܝܬܳܐ ܘܐܰܡܢܳܝܬܳܐ ܘܣܶܦܪܳܝܬܳܐ ܘܰܟܢܽܘܼܫܝܳܝܬܳܐ ܘܦܽܘܿܠܺܝܼܛܺܝܩܳܝܬܳܐ ܘܥܺܕܬܳܢܳܝܬܳܐ ܘܰܡܕܺܝܼܢܳܝܬܳܐ؟

ܦܰܐܝܳܐ ܕܢܶܕܰܥ: ܩܶܪܝܳܢܳܐ ܫܰܪܺܝܼܪܳܐ ܠܳܐ ܚܳܢܶܐ ܠܢܺܝܼܫܳܐ ܐܶܠܳܐ ܒܡܶܣܬܰܟܠܳܢܽܘܼܬܳܐ ܗܿܳܝ ܕܪܳܚܩܳܐ ܡܼܶܢ ܕܽܘܼܒܳܪ̈ܰܝ ܫܽܘܼܥܠܳܝܳܐ. ܕܐܰܝܟ ܫܽܘܼܦܰܪܕܺܝܼܩܽܘܼܬܳܐ ܘܫܰܦܽܘܼܪܬܳܢܽܘܼܬܳܐ ܘܡܶܬܚܙܰܘܙܝܳܢܽܘܼܬܳܐ ܘܰܣܛܰܪ...

ܘܡܶܬܥܰܪܩܰܠ ܒܰܙܒܰܢ ܩܳܪܽܘܿܝܳܐ ܕܦܽܘܼܪܫܳܢܳܐ ܘܡܶܬܕܒܶܩ ܒܛܶܟܢܳܐ ܐܰܘ ܦܶܬܓܳܡܳܐ ܡܶܕܶܡ ܕܢܳܬܶܦ ܡܰܕܥܳܐ. ܘܰܡܙܺܝܼܥ ܘܢܳܦܶܨ ܡܰܚܫܰܒܬܳܐ. ܘܰܟܡܳܐ ܕܡܶܬܬܙܺܝܼܥ ܘܡܶܬܢܰܦܰܨ ܝܰܬܝܪ ܫܳܠܶܐ ܘܫܳܟܶܬ ܘܒܳܗܶܠ ܘܫܳܬܶܩ ܩܳܪܽܘܿܝܳܐ ܕܦܽܘܼܪܫܳܢܳܐ. ܒܰܕ ܡܶܢܗܽܘܿܢ ܕܣܽܘܼ̈ܟܳܠܐ ܐܰܘ ܟܬܳܒ̈ܐ ܝܰܬܺܝܼܪ ܡܼܶܢ ܡܰܡܠܠܳܐ ܓܳܪܦܺܝܢ ܠܫܶܬܩܳܐ. ܘܕܳܚܩܺܝܼܢ ܠܗܶܕܣܳܐ ܥܰܡܺܝܼܩܳܐ. ܘܡܶܢܗܽܘܿܢ ܕܣܶܪ̈ܛܶܐ ܘܦܶܬܓ̈ܳܡܶܐ ܘܚܰܘ̈ܩܶܐ ܡܥܰܙܙܺܝܼܢ ܘܰܡܠܰܒܒܺܝܼܢ ܘܡܳܠܶܝܢ ܠܶܒܳܐ ܘܥܰܝܢܳܐ ܕܡܰܚܫܰܒܬܳܐ. ܒܪܰܡ ܣܽܘܼܓܐܳܐ ܕܙܰܒܢ̈ܺܝܼܢ ܐܰܝܟ ܕܰܠܨܶܒܬܳܐ ܡܪܰܥܝܳܢܳܐ ܘܡܶܐܚܰܕ ܥܰܝܢܳܐ ܡܶܬܬܣܺܝܼܡܺܝܼܢ ܘܡܶܣܬܰܕܪܺܝܼܢ ܣܶܦܪ̈ܶܐ ܘܰܟ̈ܬܒܶܐ ܒܪ̈ܰܦܶܐ ܕܦܰܪ̈ܕܺܝܼܣܩܶܐ.

ܒܰܕ ܛܰܥܝܳܐ ܘܐܰܒܺܝܼܕܳܐ ܗܿܳܝ ܕܐܳܡܪܳܐ: ܩܶܪܝܳܢܳܐ ܫܰܪܺܝܼܪܳܐ ܠܰܝܬܰܘܗܝ ܐܶܠܳܐ ܫܰܗܪܳܐ ܕܡܶܫܬܰܡܠܶܐ ܒܥܽܘܼܙܳܝܳܐ ܕܫܶܬܩܳܐ ܘܚܽܘܼܡܣܳܢܳܐ ܕܬܰܡܺܝܼܡܽܘܼܬܳܐ ܘܰܬܪܺܝܼܨܽܘܼܬܳܐ ܘܡܰܟܺܝܼܟܽܘܼܬܳܐ ܡܶܛܽܠ ܬܰܩܢܽܘܼܬ ܣܽܘܟܳܠܐ ܘܝܕܰܥܬܳܐ ܕܽܘܼܒܳܪܳܝܬܳܐ.

ܐܰܪܰܐ ܟܡܳܐ ܣܶܦܪ̈ܶܐ ܦܰܠܺܝܼܢܰܢ ܐܰܝܟܰܢܳܐ ܕܢܶܦܨܽܘܢ ܡܼܶܢܰܢ ܐܰܒܩܳܐ ܕܡܰܗܡܝܳܢܽܘܼܬܳܐ ܘܝܽܘܼܩܪܳܐ ܕܡܰܕܫܳܢܽܘܼܬܐ؟

ܘܐܰܪܰܐ ܟܡܳܐ ܟܬܳܒ̈ܶܐ ܩܪܰܝܢܰܢ ܒܢܺܝܼܫ ܫܽܘܼܚܠܳܦܳܐ ܘܬܽܘܼܪܳܨܳܐ ܘܬܽܘܼܩܳܢܳܐ ܘܫܽܘܼܓܢܳܝܳܐ ܕܒܰܪܢܳܫܰܢ ܓܰܘܳܝܳܐ؟

ܠܰܝܬ ܐ̱ܢܳܫ ܕܰܡܢܰܟܪܰܝ ܡܼܶܢ ܨܰܘܪ̈ܳܢܶܐ. ܘܠܰܝܬ ܒܽܘܼܝܳܢܳܐ ܕܠܐ ܚܰܣܺܝܼܪ ܘܰܒܨܺܝܼܪ.

ܐܰܪܰܐ ܠܒܰܪ ܡܼܶܢ ܓܺܝܓܠܳܐ ܗܳܕܶܐ ܐܺܝܼܬܰܝܢ ܚܢܰܢ ܗܿܳܢܽܘܢ ܕܛܳܥܢܺܝܼܢܢ ܕܰܪܓܳܐ ܘܐܺܝܼܩܳܪܳܐ ܒܰܝܢܳܬ ܓܰܘܳܐ؟

 ܐܰܪܰܐ ܒܶܠܥܳܕ ܡܽܘܼ̈ܡܶܐ ܒܽܘܼܨܳܪ̈ܶܐ ܚܳܫܒܺܝܼܢܰܢ ܢܰܦܫܰܢ؟

ܘܶܐܢ ܠܳܐ܆ ܐܰܪܰܐ ܟܡܳܐ ܘܰܪ̈ܩܶܐ ܘܰܟܡܳܐ ܕܰܦ̈ܶܐ ܕܰܚܩܽܘܿܢ ܠܣܽܘܼܩܒܳܠܐ ܘܓܽܘܼܢܳܝܳܐ ܝܳܬܳܢܳܝܳܐ ܘܩܽܘܼܒܳܠܐ ܡܰܟܺܝܼܟܳܐ ܕܡܰܘܕܶܐ ܒܒܽܘܼܨܳܪ̈ܐ ܘܡܽܘܼ̈ܡܶܐ ܡܶܛܽܠ ܒܰܩܝܽܘܼܬܳܐ ܬܺܐܪܬܳܢܳܝܬܳܐ ܘܫܽܘܼܘܫܳܛܳܐ ܦܰܪܨܽܘܼܦܳܝܳܐ ܘܓܰܘܳܢܳܝܳܐ؟

ܐܰܪܰܐ ܟܡܳܐ ܟܬܳܒ̈ܶܐ ܓܫܰܦܘ ܒܬܰܪܥܺܝܼܬܰܢ ܟܰܕ ܓܳܪܦܺܝܼܢ ܠܰܢ ܠܫܶܬܩܳܐ ܒܰܣܺܝܼܡܳܐ ܕܡܶܬܒܰܩܝܳܢܘܼܬܳܐ ܪܽܘܼܚܳܢܳܝܬܳܐ؟

ܗܳܢܰܘ ܟܰܝܠܳܐ ܩܰܕܡܳܝܳܐ ܘܡܰܬܩܳܠܐ ܪܺܝܼܫܳܝܳܐ ܕܩܶܪܝܳܢܳܐ ܘܣܽܘܼܟܳܠܳܐ ܫܰܪܺܝܼܪܳܐ. ܗܳܢܳܐ ܕܕܳܚܶܩ ܘܪܳܕܶܦ ܠܫܽܘܼܥܠܳܝܳܐ ܘܡܰܫܩܶܐ ܘܡܰܘܪܶܒ ܠܫܽܘܼܡܠܳܝܳܐ ܒܬܰܨܒܺܝ̈ܬܶܐ ܕܬܰܪܥܺܝܼܬܳܐ ܡܰܟܺܝܼܟܬܳܐ. ܒܰܕ ܟܡܳܐ ܕܩܳܪܶܐ ܘܰܟܡܳܐ ܕܝܳܠܶܦ ܒܰܪܢܳܫܳܐ ܠܐ ܚܳܟܶܡ ܐܶܠܳܐ ܠܗܳܝ «ܕܠܳܐ ܝܳܕܰܥ ܡܶܕܶܡ.»

ܘܟܽܠܡܰܢ ܕܡܶܬܬܠܺܝܼܫ ܘܚܳܡܰܥ ܒܰܚܡܺܝܼܪܳܐ ܕܫܪܳܪܳܐ ܗܳܢܳܐ܆ ܠܳܐ ܡܶܬܪܰܘܪܒ ܘܐܳܦܠܐ ܡܶܫܬܰܥܠܐ. ܒܰܕ ܡܦܳܣ ܕܟܽܠܡܶܕܶܡ ܕܺܝܼܗܺܝܼܒ ܠܶܗ (ܝܕܰܥܬܳܐ ܘܕܰܪܓܳܐ ܘܡܳܡܽܘܼܢܳܐ ܘܰܣܛܰܪ) ܠܰܝܬܰܘܗܝ ܐܶܠܳܐ ܓܽܘܼܥܠܳܢܳܐ ܕܒܶܗ ܢܺܚܶܐ ܘܢܰܚܶܐ ܠܐܚܪ̈ܳܢܶܐ ܚܶܟܼܡܳܬܢܳܐܝܼܬ ܡܶܛܽܠ ܩܽܘܼܝܳܡܳܐ ܘܬܽܘܼܩܳܢܳܐ.  

ܗܿܝ ܓܝܪ ܕܠܳܐ ܢܶܕܰܥ ܒܰܪܢܳܫܳܐ ܟܝܳܢܳܝܬܳܐ ܗ̱ܳܝ. ܒܪܰܡ ܡܶܣܬܟܰܪ ܬܪܰܥ ܝܕܰܥܬܳܐ ܟܰܕ ܠܳܐ ܥܳܡܶܩ ܘܰܡܟܰܬܰܪ ܒܰܪܢܳܫܳܐ ܒܦܰܘܫܳܐ ܕܛܰܝܽܘܼܦܽܘܼܬܐ.

ܠܳܐ ܡܶܣܬܰܟܠܳܢܽܘܼܬܳܐ ܡܿܰܢ ܠܰܝܬܶܝܗܿ ܒܨܺܝܪܽܘܼܬܳܐ. ܒܪܰܡ ܡܰܛܥܝܳܢܽܘܼܬܐ ܘܰܡܫܰܕܠܳܢܽܘܼܬܳܐ ܡܶܬܚܫܶܒ ܗܽܘܼܦܳܟܳܐ ܕܒܰܪܢܳܫܳܐ ܗܿܰܘ ܐܰܝܢܳܐ ܕܐܶܣܟܺܡܬܳܢܳܐܝܼܬ ܡܶܬܗܰܦܰܟ ܐܰܝܟ ܡܶܣܬܰܟܠܳܢܳܐ..

ܡܶܟܐ ܚܰܩܠܳܐ ܣܢܺܝܼܩܳܐ ܠܣܽܘܼܥܪܳܢܳܐ ܕܦܰܪ̈ܨܽܘܼܦܶܐ ܥܰܡܽܘܼ̈ܠܬܳܢܶܐ ܗܿܳܢܽܘܢ ܕܰܪܘܺܝܼܚܳܐܝܼܬ ܪܳܢܶܝܢ ܘܥܳܡܠܺܝܼܢ... ܝܰܬܺܝܼܪ ܡܼܶܢ ܡܰܡܠܠܳܐ ܕܫܽܘܼܩܳܐ.

ܡܶܛܠܗܳܕܶܐ ܙܳܕܶܩ ܕܢܶܩܪܶܐ ܘܢܺܐܠܰܦ. ܐܰܝܟܰܢܳܐ ܕܢܶܬܡܰܕܰܥ ܝܰܬܺܝܼܪ... ܘܝܰܬܺܝܼܪ... ܘܢܶܫܬܰܚܠܦܰ ܘܢܶܫܬܰܘܫܰܛ ܘܢܶܬܥܰܡܰܩ...

ܡܳܕܶܝܢ ܓܶܕ ܢܶܩܪܶܐ ܣܶܦܪ̈ܶܐ ܘܰܟܬܳܒ̈ܐ ܕܬܳܒܪܺܝܼܢ ܓܠܺܝܼܕܳܐ ܕܰܒܓܰܘܰܢ. ܘܢܶܒܥܶܐ ܫܽܘܼܓܢܳܝܳܐ ܘܬܽܘܼܩܳܢܳܐ ܐܺܝܼܬܺܝܼܩܳܝܳܐ. ܒܕ ܠܰܝܬ ܐܘܼܪܚܳܐ ܐ̱ܚܪܺܬܳܐ ܣܛܰܪ ܡܼܶܢ ܗܿܳܕܐ ܕܒܳܥܝܳܐ ܕܢܶܩܪܶܐ ܘܢܺܐܠܰܦ ܒܪܽܘܼܚܳܐ ܘܒܰܫܪܳܪܳܐ. ܘܢܶܬܥܢܶܐ ܘܰܢܡܰܠܶܠ ܬܰܡܺܝܼܡܳܐܝܼܬ ܘܡܰܟܺܝܼܟܳܐܝܼܬ ܘܢܶܬܒܰܩܶܐ ܘܢܶܬܚܰܫܰܒ ܪܘܺܝܼܚܳܐܝܼܬ. ܐܰܝܟܰܢܳܐ ܕܢܶܩܢܶܐ ܚܰܝܠܳܐ ܝܕܰܥܬܳܢܳܝܳܐ ܣܳܦܩܳܐ ܠܰܡܕܰܒܳܪܘܼ ܪ̈ܶܓܫܶܐ ܒܠܺܝ̈ܠܶܐ ܘܰܠܡܶܦܓܰܕ ܚܰܫ̈ܶܐ ܫܓܺܝܼ̈ܫܶܐ ܪܰܕܝܳܐܝܼܬ. ܗܺܝܼ ܗܳܕܶܐ ܙܳܕܶܩ ܕܢܶܥܒܶܕ ܡܶܛܽܠ ܡܶܣܬܰܟܠܳܢܽܘܼܬܳܐ ܘܠܰܘ ܠܡܶܬܚܙܰܘܙܝܳܢܽܘܼܬܳܐ.  

ܕܐܳܡܰܪ ܡܰܠܦܳܢܰܢ ܪܰܒܳܐ ܡܳܪܝ ܝܰܥܩܽܘܒ ܕܰܣܪܽܘܓ (451-521): «ܐܳܘ ܦܳܪܘܿܫܳܐ ܠܦܰܓܪܳܐ ܗܰܒ ܠܶܗ ܡܰܝ̈ܳܐ ܢܶܫܬܶܐ. ܘܗܰܒ ܠܳܗܿ ܠܢܰܦܫܳܐ ܟܬܳܒܳܐ ܕܬܶܩܪܶܐ ܘܬܶܬܒܰܣܰܡ ܒܶܗ. ܢܰܦܫܳܐ ܨܗܺܝܼܬܳܐ ܥܰܠ ܡܰܒܘܼܥܳܐ ܕܐܺܝܼܬ ܒܰܟܬܳܒ̈ܐ. ܣܳܝܡܳܐ ܦܽܘܼܡܳܗܿ ܘܫܳܬܝܳܐ ܡܶܢܗܽܘܿܢ ܚܰܝ̈ܶܐ ܟܽܠ ܝܽܘܿܡ.»

 

ܝܘܣܦ ܒܓܬܫ