ܥܘܼܕܳܬܳܐ

ܥܘܼܕܳܬܳܐ

ܠܶܫܳܢܳܐܝܼܬ ܡܿܰܢ ܒܰܪܬ ܩܳܠ «ܡܰܪܕܽܘܼܬܳܐ» ܩܰܢܝܳܐ ܣܽܘܿܟܳܠ ܡܗܰܕܝܳܢܽܘܼܬܳܐ ܘܰܡܫܰܒܠܳܢܽܘܼܬܐ ܘܰܡܚܰܟܿܡܳܢܽܘܼܬܳܐ ܘܡܶܬܝܰܠܦܳܢܽܘܼܬܳܐ ܒܰܫܒܺܝܼܠܐ ܘܬܰܪܒܺܝܼܬܳܐ ܘܬܰܪܕܺܝܼܬܳܐ[1] ܕܕܽܘܼܒܳܪ̈ܶܐ ܐܺܝܼܬܺܝܼ̈ܩܳܝܶܐ ܝܕܰܥܬܳܢܳܐܝܬ. ܘܰܡܣܳܡ ܒܪܺܝܼܫܳܐ ܕܡܶܬܦܪܰܥ ܩܶܨܰܬ ܣܰܟܠܽܘܼܬܳܐ ܘܰܣܪܺܝܼܚܽܘܼܬܳܐ. ܘܡܶܬܬܰܒܥܳܢܽܘܼܬܳܐ ܕܣܘܼܪܚܳܢܳܐ ܡܶܕܶܡ ܡܰܟܝܳܢܳܐ ܒܢܺܝܼܫ ܬܽܘܼܪܳܨܳܐ ܬܰܪܕܺܝܼܬܳܢܳܝܳܐ ܘܬܰܪܒܺܝܼܬܳܢܳܝܳܐ. ܒܰܕ ܣܽܘܼܟܳܠܳܐܝܼܬ ܡܶܬܝܰܒܠܐ ܡܼܶܢ ܡܶܠܰܬ «ܪܕܳܐ» ܗܿܳܝ ܕܝܳܗܒܳܐ ܣܽܘܼܟܳܠ: ܝܺܠܶܦ ܘܚܰܟܶܡ ܘܕܰܪܶܫ ܘܗܰܠܶܟ ܘܰܚܙܰܩ ܘܣܳܡ ܒܪܺܝܼܫܳܐ. ܘܐܶܙܰܠ ܒܳܬܰܪ ܡܶܕܶܡ ܐܰܘ ܐܶܬܕܰܡܺܝ ܒܡܶܕܶܡ. ܘܐܶܬܥܢܺܝܼ ܘܐܶܬܕܪܶܫ ܘܐܶܬܢܰܣܺܝܼ ܘܐܶܬܪܰܒܺܝܼ ܘܐܶܬܗܰܕܺܝܼ ܒܡܶܕܶܡ ܢܰܟܦܳܐܝܼܬ ܘܛܳܒܳܐܝܼܬ.

ܡܶܛܠܗܳܕܶܐ ܡܰܪܕܽܘܼܬܳܐ ܡܶܬܬܰܚܡܳܐ ܘܳܠܺܝܼܬܳܐ ܓܰܘܳܢܳܝܬܳܐ ܕܐܳܣܪܳܐ ܒܰܪܢܳܫܳܐ ܒܐܰܣܽܘܼܪܳܐ ܓܰܘܳܝܳܐ ܠܡܶܥܒܰܕ ܐܰܘ ܠܡܶܫܒܰܩ ܡܶܕܶܡ ܒܫܳܠܡܽܘܼܬܳܐ ܕܨܶܒܝܳܢܳܐ ܛܳܒܳܐ ܘܰܒܬܰܨܒܺܝܼ̈ܬܶܐ ܡܗܰܕ̈ܝܳܢܶܐ ܕܐܣܟܺܝܼ̈ܡܶܐ ܐܰܡ̈ܢܳܝܶܐ ܘܐܳܕ̈ܫܶܐ ܝܕܰܥ̈ܬܳܢܳܝܶܐ. ܘܩܰܢܝܳܐ ܚܰܝܠܳܐ ܥܳܒܽܘܿܕܳܐ ܒܰܚܙܽܘܼܩܝܳܐ ܕܩܽܘܼܝܳܡܳܐ ܘܗܽܘܼܒܳܒܳܐ ܐ̱ܢܳܫܳܝܳܐ. ܕܓܳܠܝܳܐ ܘܒܳܨܝܳܐ ܙܰܘ̈ܥܶܐ ܢܰܦܫܳܢ̈ܳܝܶܐ ܘܕܽܘܼܒܳܪ̈ܶܐ ܐ̱ܢܳܫ̈ܳܝܶܐ. ܘܦܳܠܚܳܐ ܐܰܪܥܳܐ ܕܗܰܘܢܳܐ ܠܡܶܥܫܰܦ ܡܶܢܶܗ ܠܙܺܝܼܙ̈ܢܶܐ ܘܨܳܪܝܳܐ ܐܰܪܥܳܐ ܕܠܶܒܳܐ ܠܡܶܫܩܰܠ ܡܶܢܶܗ ܠܣܽܘܼܪ̈ܚܳܢܶܐ. ܘܥܳܩܪܳܐ ܨܠܳܝ̈ܶܐ ܟܣ̈ܰܝܳܐ ܘܚܽܘܼ̈ܫܳܒܶܐ ܙܠܺܝܼ̈ܡܶܐ ܘܙܳܪܥܳܐ ܢܺܝܼ̈ܫܶܐ ܬܪ̈ܺܝܼܨܶܐ ܘܰܡܠܺܝܼ̈ܠܶܐ. ܘܠܰܝܬܶܝܗܿ ܒܰܠܚܽܘܿܕ ܡܶܬܝܰܠܦܳܢܽܘܼܬܳܐ ܘܩܰܢܳܝܽܘܼܬ ܝܕܰܥܬܳܐ ܘܙܰܘ̈ܥܶܐ ܛܳܒ̈ܶܐ. ܐܶܠܳܐ ܐܳܦ ܡܬܰܪܨܳܢܺܝܼܬܐ ܘܰܡܬܰܩܢܳܢܺܝܼܬܳܐ ܕܓܰܘ̈ܳܝܳܬܐ ܘܒܰܪ̈ܳܝܳܬܳܐ ܒܬܰܪܒܺܝܼܬܳܐ ܐܺܝܼܬܺܝܩܳܝܬܳܐ ܝܕܰܥܬܳܢܳܐܝܼܬ. ܘܰܓܠܽܘܼܠܽܘܼܬܳܐ[2] ܐܺܝܼܬܶܝܗܿ ܐܠܨܳܝܬܳܐ ܕܰܡܨܰܝܒܳܐ ܒܰܪܢܳܫܳܐ ܠܰܐܦ̈ܰܝ ܬܰܩܢܽܘܼܬܐ ܕܕܽܘܼܒܳܪ̈ܶܐ ܛܳܒ̈ܶܐ ܒܐܽܘܼܪܰܚ ܢܰܦܫܳܐ ܪܰܒܬܳܐ. ܘܒܰܓܠܺܝܼܙܽܘܼܬܳܗܿ ܡܶܫܬܰܘܫܺܝܼܢ ܡܶܨ̈ܥܳܝܶܐ ܘܰܒܚܰܣܺܝܼܪܽܘܼܬܳܗܿ ܡܶܬܡܰܚܠܺܝܼܢ ܫܒܺܝ̈ܠܐ ܡܣܰܝ̈ܥܳܢܶܐ. ܘܐܰܝܟܰܢܳܝܽܘܼܬܳܐ ܗܳܕܶܐ ܡܶܬܛܰܦܣܳܐ ܒܩܽܘܿܩܬܳܐ ܢܩܺܝܼܒܬܳܐ ܕܠܳܐ ܩܳܒܝܳܐ ܡܰܝ̈ܳܐ ܕܐܳܙܠܺܝܼܢ ܠܫܼܶܩܝܳܐ.

ܘܢܰܦܫܳܐ ܪܰܒܬܳܐ ܠܳܐ ܟܳܝܢܳܐ ܐܶܠܳܐ ܒܚܽܘܼ̈ܟܳܡܶܐ ܕܡܰܪܕܽܘܼܬܳܐ ܗܿܳܝ ܕܡܶܬܥܰܫܢܳܐ ܒܚܽܘܼܕܳܬܳܐ ܘܫܽܘܼܘܫܳܛܳܐ ܕܠܶܫܳܢܳܐ ܘܪܶܥܝܳܢܳܐ. ܘܫܽܘܼܘܫܳܛܳܗܿ ܡܰܘܪܶܒ ܫܘܳܬ: ܒܰܪܢܳܫܳܐ ܘܓܰܘܳܐ. ܘܫܽܘܼܘܚܳܪܳܗܿ ܡܰܘܠܶܕ ܬܒܺܝܼܪܽܘܼܬܳܐ ܒܚܰܘ̈ܩܶܐ ܕܦܽܘܼܪ̈ܢܳܣܶܐ ܐ̱ܢܳܫ̈ܳܝܶܐ. ܘܒܰܪܢܳܫܳܐ ܗܿܰܘ ܐܰܝܢܳܐ ܕܚܳܟܶܡ ܕܺܝܼܠܳܝ̈ܳܬܳܗܿ܆ ܡܶܬܚܫܶܒ ܝܰܠܕܳܗܿ ܘܰܡܝܰܒܠܳܢܳܗܿ. ܘܬܰܪܥܺܝܼܬܶܗ ܡܶܨܛܰܒܥܳܐ ܒܓܰܘ̈ܢܶܝܗܿ ܫܰܦܺܝܼܪ̈ܶܐ. ܡܶܟܳܐ ܛܳܒ ܡܰܘܬܪܳܢܝܳܐ ܕܢܶܬܝܰܕܥܽܘܿܢ ܓܰܘ̈ܢܶܐ ܪ̈ܶܥܝܳܢܳܝܶܐ ܕܡܰܪܕܽܘܼܬܰܢ ܗܿܳܝ ܕܕܳܡܝܳܐ ܠܪܰܕܳܝܬܳܐ ܫܰܦܺܝܼܪܰܬ ܬܽܘܼܩܳܢܳܐ. ܘܢܺܝܼܚܰܬ ܡܰܪܕܺܝܼܬܳܐ. ܐܶܠܳܐ ܚܢܰܢ ܒܰܪܓܶܠ ܐܰܘ ܚܶܦܝܳܐܝܼܬ ܪܳܕܶܝܢܢ ܟܰܪ ܕܚܳܐܝܢܰܢ: ܐܶܢ ܒܰܐܬܪܳܐ ܘܐܶܢ ܒܓܳܠܽܘܼܬܐ.

ܟܰܕ ܛܳܒ ܡܰܪܕܽܘܼܬܳܢ ܫܳܩܺܝܼܬܐ ܐܺܝܼܬܶܝܗܿ ܬܪܺܝܼܥܬܳܐ ܘܰܦܪܺܝܼܬܳܐ ܠܚܰܩܠܐ ܕܒܽܘܼܝܳܪ̈ܶܐ. ܘܩܰܢܝܳܐ ܕܰܘܪܳܐ ܢܰܗܺܝܼܪܳܐ ܒܡܰܪܕܺܝܼܬܳܐ ܕܐ̱ܢܳܫܽܘܼܬܳܐ ܘܝܽܘܼܒܳܠܐ ܕܰܡܕܝܼܢܳܝܽܘܼܬܳܐ ܡܰܕܢܚܳܐܝܼܬ ܘܡܰܥܪܒܳܐܝܼܬ. ܘܐܰܝܟ ܓܺܫܪܳܐ ܣܡܺܝܼܟܳܐ܆ ܐܰܟܺܝܼܢܰܬ ܫܒܺܝܼܠܐ ܒܚܺܝܼܪܳܐ ܒܰܝܢܰܬ ܡܰܪ̈ܕܘܳܬܳܐ ܦܪ̈ܺܝܼܫܳܬܳܐ. ܗܳܢܳܐ ܕܰܡܛܳܐ ܨܰܘܬܶܗ ܗܳܪ ܬܰܡܳܢ ܥܕܰܡܳܐ ܠܣܰܘ̈ܦܶܐ ܘܦܶܢܝ̈ܬܐ ܕܥܳܠܡܳܐ ܥܰܪܒܳܝܳܐ ܘܐܘܪܝܼܦܳܝܳܐ ܥܰܬܺܝܼܩܳܐ. ܘܕܰܘܪܳܗܿ ܪܰܒ ܗ̱ܽܘ ܒܣܽܘܼܒܳܠܐ ܕܫܶܪ̈ܫܶܐ ܚܶܟܡ̈ܬܳܢܳܝܶܐ ܥܰܬܝܼ̈ܩܶܐ ܠܥܳܠܡܳܐ ܡܰܫܠܡܳܢܳܝܐ ܘܥܰܪܰܒܳܝܳܐ. ܒܰܕ ܝܰܩܪ̈ܶܐ[3] ܡܝܰܬܪ̈ܶܐ ܘܕܽܘܼܒܳܪ̈ܶܐ ܐܺܝܼܬܺܝ̈ܩܳܝܶܐ ܓܪܶܡ ܚܰܨܳܐ «ܦܳܩܰܪܬܐ»[4] ܐܶܢܽܘܢ ܕܡܰܪܕܽܘܼܬܳܐ ܣܽܘܼܪܝܳܝܬܐ ܒܡܶܣܬܰܟܠܳܢܘܼܬܐ ܕܰܡܢܰܨܚܳܐ ܐܺܝܼܩܳܪܳܐ ܪܰܒܳܐ «ܫܰܝܳܐ»[5] ܕܒܰܪܢܳܫܳܐ ܘܰܟܝܳܢܐ ܒܐܶܣܟܺܝܼܡܳܐ ܦܪܺܝܼܫܳܐ ܗܳܢܳܐ ܕܠܳܐ ܡܶܬܬܨܺܝܼܪ ܘܐܳܦܠܳܐ ܡܶܨܛܰܠܰܡ ܐܶܠܳܐ ܒܰܦܓܽܘܼܕܝܳܐ ܕܝܰܨܪ̈ܶܐ ܡܰܟܝ̈ܳܢܶܐ ܘܒܰܩܦܽܘܼܚܝܳܐ ܕܪ̈ܶܓܫܶܐ ܘܡܽܘܼ̈ܡܶܐ ܡܰܗܪ̈ܳܢܶܐ.

ܐܝܢ: ܡܰܪܕܽܘܼܬܰܢ ܛܳܒ ܥܰܬܺܝܼܩܬܳܐ ܐܺܝܼܬܶܝܗ̇. ܘܥܰܡܺܝܼ̈ܩܺܝܼܢ ܘܰܪ̈ܘܺܝܼܚܺܝܼܢ ܣܘܼ̈ܟܳܠܶܝܗ̇. ܘܡܶܬܚܰܒܟܺܝܼܢ ܒܫܶܪ̈ܫܶܐ ܫܺܝܼ̈ܬܳܢܳܝܶܐ ܕܰܡܕܺܝܼܢܳܝܽܘܼܬܳܐ ܥܰܬܺܝܼܩܬܳܐ ܕܒܶܝܬܢܰܗܪܺܝܢ. ܒܪܰܡ ܡܳܝܨܺܝܼܢ ܚܰܠܒܳܐ ܡܬܰܪܣܝܳܢܳܐ ܡܼܶܢ ܝܽܘܼܠܦܳܢܳܐ ܡܰܚܝܳܢܳܐ ܕܰܡܫܺܝܼܚܳܐ. ܘܝܰܘܡܳܢܳܐ ܐܳܦܶܢ ܟܡܺܝܼܪ ܙܺܝܼܘܳܗܿ ܘܰܟܡܺܝܕ ܨܶܡܚܳܗܿ ܡܰܦܪܓܳܢܳܐ܆ ܐܶܠܳܐ ܪܶܥܝܳܢܳܐܝܼܬ ܒܰܕܡܽܘܼܬ ܕܪܳܫܳܐ ܕܳܪܳܢܳܝܳܐ ܐܺܝܼܬܶܝܗܿ ܒܰܐܦ̈ܰܝ ܗܽܘܼ̈ܦܳܟܶܐ ܘܕܽܘܼܒܳܪ̈ܶܐ ܝܰܨܪ̈ܳܢܳܝܶܐ ܒܠܺܝܼ̈ܠܶܐ. ܘܓܳܠܝܳܐ ܐ̱ܪ̈ܳܙܶܐ ܘܝܰܕܥ̈ܳܬܳܐ ܘܚܶܟ̈ܡܳܬܳܐ ܕܕܳܪ̈ܶܐ ܘܝܽܘܼܒ̈ܠܐ ܥܒܺܝܼܪ̈ܶܐ ܠܡܰܕ̈ܥܶܐ ܦܳܪ̈ܽܘܿܫܶܐ ܗܿܳܢܽܘܢ ܕܚܳܙܶܝܢ ܝܽܘܼܩܪܳܗܿ ܡܢܰܬܥܳܢܳܐ ܒܫܽܘܼܘܫܳܛܳܐ ܐ̱ܢܳܫܳܝܳܐ. ܘܩܳܠܳܗܿ ܚܢܺܝܼܓ ܘܰܪܟܺܝܼܢ ܐܶܠܳܐ ܒܪܰܡ ܚܳܫܰܚ ܕܢܶܥܨܽܘܿܒ ܟܺܐܒ̈ܶܐ ܢܰܦܫ̈ܳܢܳܝܶܐ ܘܢܶܣܡܽܘܿܟ ܡܰܪܥܽܘܼܬܳܐ ܪܶܥܝܳܢܳܝܬܳܐ ܕܰܫܟܺܝܼܚܳܐ ܗܳܪܟܳܐ ܘܬܰܡܳܢ ܒܰܝܢܳܬ ܓܰܘܳܐ. ܘܩܳܠܳܐ ܗܳܢܳܐ ܚܢܺܝܼܓܳܐ ܒܳܥܶܐ ܡܶܢܰܢ ܕܢܶܬܒܰܩܶܐ ܒܡܰܚܙܺܝܼܬ ܢܰܦܫܰܢ ܠܡܶܫܟܳܚܽܘܼ ܚܽܘܼܒܳܐ ܘܰܚܢܳܢܳܐ ܘܚܰܘܣܳܢܳܐ ܘܐܺܝܼܩܳܪܳܐ ܒܓܰܘܰܢ ܡܛܽܠ ܢܰܘܚܳܐ ܕܡܰܪܕܺܝܼܬܰܢ ܥܳܠܡܳܢܳܝܬܳܐ.

ܒܳܣܡܳܐ ܬܰܪܥܺܝܼܬܝ ܒܫܶܡܥܳܐ ܕܡܰܫ̈ܒܶܐ ܦܰܝܘ̈ܚܶܐ ܕܩܳܠܐ ܗܳܢܳܐ ܕܛܳܥܶܢ ܪ̈ܶܟܢܶܐ ܡܰܪ̈ܕܽܘܼܬܳܢܳܝܶܐ ܕܐܽܘܪܗܳܝ ܘܰܢܨܺܝܼܒܺܝܼܢ ܘܰܕܫܰܪܟܳܐ ܕܡܰܕܪ̈ܫܳܬܳܐ ܥܰܬܺܝܼ̈ܩܳܬܳܐ ܕܒܶܝܬܢܰܗܪܺܝܢ. ܒܕ ܡܼܶܢ ܪܰܟܺܝܼܟܽܘܼܬ ܛܶܦܪ̈ܰܝ ܫܰܪܺܝܼܬ ܕܐܶܦܠܽܘܿܚ ܚܰܘ̈ܩܳܐ ܕܡܰܪܕܽܘܼܬܰܢ ܠܡܶܣܬܰܟܳܠܽܘܼ ܪܘܼܚܳܐ ܕܩܳܠܳܐ ܗܳܢܳܐ. ܘܰܟܡܳܐ ܕܚܶܦܪܶܬ ܝܰܬܺܝܼܪ ܢܳܚܰܬ ܒܶܗ ܬܰܪܥܺܝܬܝ. ܘܰܟܡܳܐ ܕܥܶܡܩܶܬ ܝܰܬܺܝܼܪ ܒܣܶܡ ܪܶܕܝܳܐ ܕܡܶܠܰܘ̈ܗܝ. ܘܰܟܡܳܐ ܕܰܒܩܺܝܼܬ ܝܰܬܺܝܼܪ ܙܰܡ ܨܰܘܬܶܗ ܒܡܰܚܫܰܒܬܝ. ܘܰܟܡܳܐ ܕܰܒܨܺܝܼܬ ܝܰܬܺܝܼܪ ܨܰܚ ܥܰܡܠܶܗ ܟܰܣܝܳܐ ܘܕܰܘܪܶܗ ܛܰܫܝܳܐ.

ܐܰܟܡܳܐ ܕܝܼܺܕܝܼܥܳܐ܆ ܣܦܺܝܼܩܽܘܼܬܳܐ ܐܝܼܺܬܽܘܼܬܳܢܳܝܬܳܐ ܘܣܽܘܼܟܳܠܳܝܬܳܐ ܩܒܺܝܼܥܳܐ ܒܰܒܪܺܝܼܬܳܐ ܕܒܰܪܢܳܫܳܐ. ܘܗܺܝܼ ܗܳܕܶܐ ܒܳܪܝܳܐ ܚܶܪܝܳܢܳܐ ܓܰܘܳܝܳܐ ܘܫܳܒܩܳܐ ܕܢܶܣܓܽܘܿܢ ܒܽܘܼ̈ܠܒܳܠܶܐ ܘܢܶܫܬܰܪܫܽܘܢ ܡܽܘܼ̈ܡܶܐ ܪ̈ܰܒܶܐ ܘܰܙܥܽܘܼܪ̈ܶܐ. ܘܠܰܝܬ ܡܶܕܶܡ ܕܗܳܟܰܢܳܐ ܥܰܙܺܝܼܙ ܘܰܫܚܺܝܼܩ ܐܰܝܟ ܚܶܪܝܳܢܳܐ ܓܰܘܳܝܳܐ ܕܗܳܘܶܐ ܩܶܨܰܬ ܣܦܺܝܼܩܽܘܼܬܳܐ ܗܳܕܶܐ ܕܠܳܐ ܡܶܬܡܰܠܝܳܐ ܒܨܰܘ̈ܒܶܐ ܘܙܰܘ̈ܚܶܐ ܒܰܪ̈ܳܝܶܐ ܐܶܠܳܐ ܒܙܰܘ̈ܥܶܐ ܘܩܰܘ̈ܡܶܐ ܕܣܽܘܼ̈ܟܳܠܐ ܡܩܰܘ̈ܝܳܢܶܐ. ܘܐܰܝܟ ܫܰܪܟܳܐ ܕܰܐ̱ܚܪ̈ܳܢܶܐ ܐܳܦ ܡܰܪܥܳܐ ܗܳܢܳܐ ܣܢܺܝܼܩ ܗ̱ܽܘ ܠܰܥܨܳܒܳܐ ܐܰܝܟܰܢܳܐ ܕܬܶܬܚܠܶܡ ܘܢܰܦܫܳܐ ܘܬܶܬܡܪܶܩ ܘܬܶܬܩܰܝܰܡ ܒܦܽܘܼܪ̈ܫܳܢܶܐ ܗܰܝܡܳܢܽܘܼ̈ܬܳܢܳܝܶܐ ܘܡܰܕ̈ܥܳܢܳܝܶܐ. ܒܪܰܡ ܠܳܐ ܕܳܥܶܟ ܚܶܪܝܳܢܳܐ ܗܳܢܳܐ ܐܶܠܳܐ ܕܢܶܬܢܰܗܪ̈ܳܢ ܚܶܫܽܘܼ̈ܟܳܬܳܐ ܚܘܼܽܫܳܒܳܝ̈ܳܬܳܐ ܒܨܶܡ̈ܚܶܐ ܡܰܪ̈ܕܽܘܼܬܳܢܳܝܶܐ. ܘܐܶܠܘܼܠܐ ܚܰܝܠܐ ܕܢܽܘܼܗܪܳܐ ܗܳܢܳܐ܆ ܠܳܐ ܡܳܐܢܳܐ ܠܶܗ ܒܰܪܢܳܫܳܐ ܡܼܶܢ ܗܿܰܘ ܡܳܐ ܕܙܳܕܩ ܕܢܶܬܒܛܶܠ ܠܶܗ ܥܠܰܘܗܝ. ܘܐܳܦܠܐ ܡܶܬܬܙܺܝܼܥ ܒܦܽܘܼܪ̈ܣܶܐ ܐܽܘܼܟ̈ܦܳܢܳܝܶܐ ܕܐܳܙܠܺܝܼܢ ܠܫܽܘܼܡܠܳܝܳܐ.

ܦܰܓܪܳܐ ܡܿܰܢ ܫܳܡܶܢ ܒܬܽܘܼܪ̈ܣܳܝܶܐ ܠܰܚ̈ܡܳܢܳܝܶܐ ܐܶܠܐ ܢܰܦܫܳܐ ܒܗܿܢܽܘܿܢ ܡܶܠܬܳܢ̈ܳܝܶܐ. ܡܶܛܽܠܗܳܕܶܐ ܐܰܡܺܝܼܪܳܐ ܗܿܳܝ ܕܐܰܡܺܝܼܪܳܐ: «ܕܠܐ ܗ̱ܘܳܐ ܒܠܰܚܡܳܐ ܒܰܠܚܽܘܿܕ ܚܳܝܶܐ ܒܰܪܢܳܫܳܐ. ܐܶܠܳܐ ܒܟܽܠ ܡܶܠܳܐ ܕܢܳܦܩܳܐ ܡܼܶܢ ܦܽܘܼܡܶܗ ܕܰܐܠܗܳܐ» (ܡܬܝ 4: 4). ܘܡܶܠܬܳܐ ܬܢܳܢ ܡܫܰܘܕܥܳܐ ܣܽܘܼ̈ܢܩܳܢܶܐ ܕܥܳܠܡܳܐ ܣܽܘܼܟܳܠܳܝܳܐ «ܕܪܽܘܼܚܳܐ». ܘܠܰܚܡܳܐ ܣܽܘܼ̈ܢܩܳܢܶܐ ܕܥܳܠܡܳܐ ܗܽܘܼܠܳܢܳܝܳܐ «ܕܦܰܓܪܳܐ». ܘܠܳܐ ܓܳܡܪܳܐ  ܛܽܘܼܒܬܳܢܳܝܽܘܼܬܳܐ ܕܒܰܪܢܳܫܳܐ ܐܶܠܳܐ ܒܝܰܕ ܫܰܘܝܽܘܼܬ ܬܰܪܣܺܝܼܬܳܐ ܘܬܰܪܒܺܝܼܬܐ ܕܰܬܪ̈ܰܝܗܘܢ ܥܳܠܡ̈ܶܐ. ܒܕ ܒܰܪܢܳܫܳܐ ܐܺܝܼܬܝܰܐ ܗ̱ܘ ܪܽܘܼܚܳܢܝܳܐ ܘܒܶܣܪܳܢܳܝܳܐ ܕܡܶܬܟܰܝܰܢ ܡܼܶܢ ܥܳܠܡܳܐ ܒܰܪܳܝܳܐ ܕܦܰܓܪܳܐ ܘܗܽܘܼ̈ܠܳܢܳܝܳܬܐ. ܘܡܼܶܢ ܥܳܠܡܳܐ ܓܰܘܳܝܳܐ ܕܪܽܘܼܚܳܐ ܘܣܽܘܼܟ̈ܠܳܝܳܬܳܐ. ܘܐ̱ܢܳܫܽܘܼܬܶܗ ܠܳܐ ܨܳܡܚܳܐ ܐܶܠܳܐ ܒܬܽܘܼܩܳܢܳܐ ܫܰܘܝܳܐ ܕܰܬܪ̈ܰܝܗܽܘܿܢ ܥܳܠܡ̈ܶܐ ܒܝܰܕ ܚܽܘܼ̈ܟܳܡܶܐ ܕܪܽܘܼܚܳܐ. ܘܐܰܟܡܳܐ ܕܡܶܬܬܡܺܝܼܫܳܐ܆ ܪܳܘܶܙ ܘܕܳܐܶܨ ܒܰܪܢܳܫܳܐ ܒܰܫܟܳܚܬܳܐ ܕܫܽܘܼܦܪܳܐ ܒܰܪܳܝܳܐ܆ ܒܪܰܡ ܐܰܝܟ ܕܒܣܽܘܿܓܳܐܐ ܡܰܗܡܰܝ ܫܽܘܼܦܪܳܐ ܓܰܘܳܝܳܐ. ܘܠܰܝܬ ܨܶܦܬܳܐ ܠܰܫܟܳܚܬܶܗ ܐܰܝܟ ܕܙܳܕܩܳܐ. ܡܶܟܳܐ ܠܳܐ ܡܶܫܬܰܟܚܳܐ ܢܰܦܫܳܐ ܪܰܒܬܳܐ ܒܰܝܢܳܬ ܒܠܺܝܼܠܽܘܼܬܳܐ ܓܰܘܳܝܬܳܐ «ܕܰܩܪܺܝܼܡܳܐ ܒܗܶܕܝܽܘܼܛܽܘܼܬܐ ܘܐܶܢܳܢܳܝܽܘܼܬܐ ܘܣܶܢܶܐܬܳܐ ܘܚܰܣܳܡܽܘܼܬܐ ܘܐܰܟܬܳܐ ܘܪܳܡܽܘܼܬܳܐ ܘܝܰܥܢܽܘܼܬܳܐ ܘܠܰܥܒܽܘܼܬܳܐ ܘܪܶܓܬܳܐ ܘܚܶܡܬܳܐ». ܘܟܰܕ ܠܳܐ ܡܶܬܛܰܟܣܳܐ ܒܠܺܝܼܠܽܘܼܬܳܐ ܗܳܕܶܐ܆ ܠܳܐ ܢܳܨܚܺܝܼܢ ܚܽܘܒܳܐ ܘܰܚܢܳܢܳܐ ܘܚܰܘܣܳܢܳܐ. ܘܡܶܟܳܐ ܣܳܓܶܝܢ ܡܽܘܼ̈ܡܶܐ ܘܒܽܘܼܨܳܪ̈ܶܐ ܘܥܳܫܢܳܐ ܫܚܺܝܼܡܽܘܼܬܳܐ ܘܰܚܓܺܝܼܪܽܘܼܬܳܐ. ܘܗܳܝܕܶܝܟ ܠܳܐ ܡܰܨܝܳܐ ܕܢܶܬܓܕܶܡ ܘܢܶܬܦܠܶܩ ܚܰܝܠܳܐ ܩܰܫܝܳܐ ܕܚܰܫ̈ܶܐ ܓܰܘܳܝ̈ܶܐ ܩܳܛ̈ܠܰܝ ܢܰܦܫܳܐ ܪܰܒܬܳܐ. ܐܰܝܟ ܕܐܰܡܺܝܼܪܳܐ: «ܠܰܝܬ ܡܶܕܶܡ ܕܰܠܒܰܪ ܡܼܶܢ ܒܰܪܢܳܫܰܐ ܗ̱ܘ. ܘܥܳܐܶܠ ܠܶܗ ܕܡܶܫܟܰܚ ܡܣܰܝܶܒ ܠܶܗ. ܐܶܠܐ ܡܶܕܶܡ ܕܢܳܦܶܩ ܡܶܢܶܗ ܗܿܰܘ ܗ̱ܽܘܼ ܡܣܰܝܶܒ ܠܒܰܪܢܳܫܳܐ» (ܡܪܩܘܣ 7: 15).

ܡܳܕܶܝܢ ܦܰܐܝܳܐ ܕܢܶܕܰܥ: ܩܳܠܐ ܒܰܪܳܝܳܐ ܠܰܝܬܰܘܗܝ ܐܶܠܐ ܨܰܘܬܳܐ ܕܗܿܰܘ ܓܰܘܳܝܳܐ. ܘܠܳܐ ܪܳܚܶܡ ܘܐܳܦܠܳܐ ܝܳܨܶܦ ܐܶܠܳܐ ܗܿܰܘ ܕܡܶܣܬܰܟܰܠ ܘܝܳܕܥ. ܘܠܰܝܬ ܢܰܘܚܳܐ ܐܶܠܳܐ ܒܰܗܦܳܟܬܳܐ ܠܡܰܒܽܘܼ̈ܥܶܐ ܡܠܺܝܼ̈ܠܶܐ ܕܢܰܦܫܳܐ ܪܰܒܬܳܐ. ܕܠܳܐ ܡܳܛܶܐ ܠܢܺܝܼܫܳܐ ܐܶܠܳܐ ܗܿܰܘ ܕܠܺܝܫ ܘܰܓܒܺܝܼܠ ܒܰܚܡܺܝܼܪܳܗܿ. ܘܥܶܠܰܬ ܥܽܘܼܪ̈ܩܳܠܐ ܘܥܽܘܼܪ̈ܙܳܠܐ ܠܰܝܬܰܘܗܝ ܐܶܠܐ ܫܒܽܘܼܩܝܳܐ ܕܬܰܪܒܺܝܼܬܳܗܿ. ܘܰܡܚܰܛܳܐ ܫܽܘܼܚܬܳܢܺܝܼܬܳܐ ܠܳܐ ܚܳܝܛܳܐ ܦܶܪ̈ܩܶܐ. ܘܒܶܣܬܰܪ ܣܽܘܼ̈ܟܳܠܐ܆ ܐܺܝܼܬ ܗ̱ܽܘ ܡܰܢ ܕܢܳܦܰܚ ܚܰܝܠܳܐ ܒܙܰܘܥܳܐ ܘܪܶܗܛܳܐ ܕܗܳܢܳܐ ܟܽܠ. ܘܟܰܕ ܡܶܬܓܰܠܓܳܐ ܬܰܚܦܺܝܼܬܐ ܕܣܽܘܼ̈ܟܳܠܐ܆ ܗܳܝܕܶܝܟ ܕܰܪܓܳܐ ܘܐܰܩܡܳܐ ܘܫܰܗܪܳܐ܆ ܠܐ ܨܳܒܶܝܢ ܐܶܠܳܐ ܒܙܰܗܪ̈ܶܐ ܘܐܰܡ̈ܢܶܐ ܡܰܪ̈ܕܽܘܼܬܳܢܳܝܶܐ ܡܶܛܽܠ ܡܰܝܬܝܽܘܼܬ ܦܺܐܪ̈ܶܐ ܡܰܘܬܪ̈ܳܢܶܐ.

ܛܰܝܒܶܬ ܟܬܳܒܽܘܼܢܳܐ ܗܳܢܳܐ «ܒܽܘܼܝܳܢܳܐ ܕܚܰܝ̈ܶܐ ܒܡܰܪܕܽܘܼܬܳܐ ܣܽܘܼܪܝܳܝܬܳܐ» ܡܶܛܽܠ ܛܰܒܥܳܐ ܘܰܦܪܳܣܳܐ ܒܓܽܘܼܪܳܓܳܐ ܡܪܰܥܝܳܢܳܐ ܕܪܺܝܼܫ ܡܰܘܬܒܳܐ ܕܥܺܕ̈ܳܬܳܐ ܕܡܶܕܝܰܕ ܡܝܰܩܪܳܐ ܝܰܘܣܶܦ ܬܽܘܼܪܟܰܪ ܗܿܳܢܳܐ ܕܡܶܢ ܡܶܬܚܳܐ ܕܬܠܳܬܺܝܼܢ ܘܚܰܡܶܫ ܫܢܺܝܼ̈ܢ ܗܘܳܐ ܠܶܗ ܕܰܡܫܰܡܶܫ ܘܰܡܕܰܒܰܪ ܙܪܺܝܼܙܳܐܝܼܬ ܒܥܽܘܼ̈ܣܳܩܶܐ ܘܛܽܘܼܪ̈ܳܦܶܐ ܐܰܬܪ̈ܳܢܳܝܶܐ. ܘܗܺܝܼ ܗܳܕܶܐ ܫܰܡܠܺܝܼܬ ܒܛܳܒܽܘܼܬ ܨܶܒܝܳܢܳܐ ܐܰܝܟ ܕܰܠܦܽܘܼܪܥܳܢ ܩܽܘܼܒܳܠܛܰܝܒܘܼ ܘܐܺܝܼܩܳܪܳܐ ܠܚܽܘܼܡܣܳܢܶܗ ܡܳܬܳܢܳܝܳܐ ܚܠܺܝܼܨܳܐ ܘܠܰܛܢܳܢܶܗ ܠܒܺܝܼܒܳܐ ܘܰܠܛܳܒܬܳܐ ܘܦܽܘܼܪܢܳܣܳܐ ܕܝܽܘܼܬܪܳܢܳܐ ܓܰܘܳܢܳܝܳܐ. ܒܰܕ ܡܗܰܝܡܶܢ ܐ̱ܢܳܐ ܕܡܰܪܕܽܘܼܬܰܢ ܢܳܨܚܳܐ ܒܥܽܘܼܬܩܳܐ ܢܳܬܽܘܿܦܳܐ ܕܥܺܕ̈ܳܬܳܐ ܘܕܰܝܪ̈ܳܬܳܐ ܕܐܰܬܪܰܢ. ܐܶܠܳܐ ܒܪܰܡ ܣܳܒܰܪ ܐ̱ܢܳܐ ܚܓܺܝܼܪܳܐ ܦܳܐܶܫ ܢܶܨܚܳܢܳܐ ܗܳܢܳܐ ܡܶܛܽܠ ܓܰܘܳܝ̈ܶܐ ܘܒܰܪ̈ܳܝܶܐ ܐܶܢ ܠܳܐ ܡܶܬܡܰܙܓܳܐ ܢܳܬܽܘܿܦܽܘܼܬܳܐ ܗܳܕܶܐ ܒܣܽܘܼ̈ܟܳܠܐ ܡܨܰܝ̈ܒܳܢܶܐ ܕܡܰܪܕܽܘܼܬܰܢ. ܡܳܕܶܝܢ ܫܠܳܡܳܐ ܘܫܰܝܢܳܐ ܘܚܰܝܠܳܐ ܘܚܽܘܼܠܡܳܢܳܐ ܢܶܬܠܰܘܽܘܿܢ ܠܟܽܠܡܰܢ ܕܰܚܙܺܝܼܩ ܘܡܶܬܚܰܙܰܩ ܒܢܽܘܼܛܳܪܐ ܕܡܰܪܕܽܘܼܬܰܢ: ܗܿܳܝ ܕܫܰܪܝܰܬ ܠܡܰܘܩܳܕܽܘܼ ܦܬܺܝܼܠܬܳܗܿ. ܐܶܠܳܐ ܒܪܰܡ ܪ̈ܽܘܼܫܡܶܝܗܿ ܠܳܐ ܫܳܬܩܺܝܼܢ ܡܼܶܢ ܗܿܳܝ ܕܢܺܐܡܪܽܘܿܢ: ܒܨܺܝܼܪ ܗ̱ܽܘ ܚܽܘܼܒܳܐ ܕܪܰܚܺܝܼܩ ܡܼܶܢ ܫܪܳܪܳܐ. ܘܚܶܫܟܳܐ ܗ̱ܝ ܝܕܰܥܬܳܐ ܒܶܠܥܳܕ ܚܰܘܣܳܢܳܐ. ܘܫܽܘܼܚܢܳܐ ܗ̱ܝ ܡܶܠܬܳܐ ܕܠܰܝܬ ܒܳܗܿ ܚܢܳܢܳܐ. ܘܰܠܦܽܘܼܬ ܛܽܘܼܟܳܣܳܐ ܣܢܺܝܼܩܳܐ ܟܰܟܪܳܐ ܕܡܶܬܛܰܡܪܳܐ ܒܳܨܪܳܐ ܘܠܳܐ ܡܶܬܬܰܓܪܳܐ. ܘܛܰܝܒܽܘܼܬܳܐ ܕܡܶܬܟܰܫܝܳܐ ܚܳܣܪܳܐ ܘܠܳܐ ܡܶܬܩܰܢܝܳܐ. ܘܐܰܡܺܝܼܢܳܐܝܼܬ ܚܳܨܕܺܝܼܢܰܢ ܗܿܰܘ ܡܳܐ ܕܙܳܪܥܺܝܼܢܰܢ. ܘܰܒܚܰܪܬܶܗ ܕܝܰܘܡܳܐ ܡܶܬܩܰܒܪܺܝܼܢܰܢ ܒܥܰܦܪܳܐ ܕܬܺܐܪܬܰܢ!

ܒܣܰܒܪܳܐ ܕܬܶܬܥܰܠܰܡ ܣܰܝܒܽܘܼܬܳܗܿ ܕܡܰܪܕܽܘܼܬܰܢ. ܘܠܳܐ ܢܶܚܙܽܘܿܩ ܚܽܘܒܳܗܿ ܡܼܶܢ ܠܶܒܰܘ̈ܳܬܰܢ. ܘܠܳܐ ܢܚܽܘܼܒ ܣܰܒܪܰܢ ܐܰܝܟܰܢܳܐ ܕܰܬܟܰܬܰܪ ܦܰܩܽܘܼܚܽܘܼܬܳܗܿ ܒܰܝܢܳܬ ܫܰܪ̈ܒܳܬܰܢ. ܒܪܰܡ ܦܰܐܝܳܐ ܕܢܶܕܰܥ: ܡܶܬܝܰܕܥܳܐ ܡܰܪܕܽܘܼܬܰܢ ܠܦܽܘܼܬ ܡܫܽܘܼܚܬܳܐ ܕܦܳܪܽܘܿܫܽܘܼܬܰܢ. ܘܡܶܬܦܰܪܣܳܐ ܠܦܽܘܼܬ ܡܫܽܘܼܚܬܳܐ ܕܥܺܝܼܪܽܘܼܬܰܢ. ܘܡܶܬܢܰܨܚܳܐ ܠܦܽܘܼܬ ܡܫܽܘܼܚܬܳܐ ܕܰܥܪܺܝܼܡܽܘܼܬܰܢ. ܘܬܰܘܕܺܝ ܠܛܳܒܳܐ ܕܣܳܡ ܢܘܼܗܪܳܐ ܕܡܰܪܕܽܘܼܬܳܐ ܒܢܰܦܫܳܐ ܕܐ̱ܢܳܫܽܘܬܰܢ!

ܘܣܳܟܳܐ ܠܡܺܐܡܰܪ: ܩܘܼܒܳܠܛܰܝܒܘܼ ܦܳܪܰܥ ܐ̱ܢܳܐ ܠܡܳܪܝܳܐ ܕܢܳܦܰܚ ܚܰܝܠܐ ܒܰܡܚ̈ܺܝܼܠܶܐ ܘܰܒܨܺܝܼܪ̈ܶܐ. ܘܪܰܒܰܬ ܡܰܘܕܶܐ ܐ̱ܢܳܐ ܠܛܳܒܽܘܼܬ ܬܰܪܥܺܝܼܬܳܐ ܕܡܶܣ̈ܬܰܟܠܳܢܶܐ ܘܰܡܚܰܦ̈ܛܳܢܐ ܘܡܣܰܝ̈ܥܳܢܐ. ܘܡܰܘܕܰܥ ܐ̱ܢܳܐ ܕܠܰܡ ܒܳܣܡܳܐ ܪܽܘܼܚܝ ܐܶܢ ܣܝܳܡܳܐ ܗܳܢܳܐ ܐܳܦܶܢ ܒܰܙܥܽܘܿܪ ܢܺܐܙܰܠ ܠܡܶܣܬܰܟܠܳܢܽܘܬܳܐ ܕܡܰܪܕܽܘܼܬܰܢ ܘܢܰܘܬܰܪ ܠܛܳܒܬܳܐ ܕܢܰܦܫ̈ܳܬܳܐ. ܘܐܶܢ ܫܶܪܰܬ܆ ܚܳܫܶܒ ܗܳܕܶܐ ܐ̱ܢܳܐ ܐܰܝܟ ܐܰܓܪܳܐ ܪܰܒܳܐ ܠܥܰܡ̈ܠܰܝ ܣܳܦܪ̈ܳܝܶܐ ܘܦܽܘܼܪܥܳܢܳܐ ܠܫܰܗܪ̈ܰܝ ܬܰܘ̈ܓܳܢܳܝܶܐ. ܥܰܡ ܐܺܝܼܩܳܪ̈ܰܝ ܟܢܺܝܼ̈ܟܶܐ.

ܘܚܰܕܘܳܐ ܦܨܺܝܼܚܳܐ ܘܚܰܝ̈ܐ ܒܰܣܺܝܼ̈ܡܶܐ ܠܟܽܠ.

 

ܢܽܘܼܗܳܪܳܐ: ܥܽܘܼܕܳܬܰܐ ܗ̱ܘ ܕܰܟܬܶܒܬܶܗ ܡܶܛܽܠ ܟܬܳܒܽܘܼܢܳܐ ܗܳܢܳܐ ܕܛܳܥܶܢ ܫܶܡ «ܒܽܘܼܝܳܢܳܐ ܕܚܰܝ̈ܶܐ ܒܡܰܪܕܽܘܼܬܳܐ ܣܽܘܼܪܝܳܝܬܐ» ܘܰܥܬܺܝܼܕ ܕܢܶܬܦܪܶܣ ܩܰܪܺܝܼܒܳܐܝܼܬ ܒܐܰܪܒܥܳܐ ܠܶܫ̈ܳܢܶܐ: ܣܽܘܼܪܝܳܐܝܼܬ ܘܬܽܘܼܪܟܳܐܝܼܬ ܘܥܰܪܒܳܐܝܼܬ ܘܐܶܢܓܠܺܝܼܫܳܐܝܼܬ ܡܶܛܽܠ ܝܽܘܼܬܪܳܢܳܐ ܕܓܰܘ̈ܳܝܶܐ ܘܒܰܪ̈ܳܝܶܐ.

 

ܝܰܘܣܶܦ ܒܶܓܬܰܫ

ܚܽܘܼܕܪܳܐ ܕܡܰܪܕܽܘܼܬܳܐ ܘܣܶܦܪܳܝܽܘܼܬܳܐ ܕܠܶܫܳܢܳܐ ܣܽܘܼܪܝܳܝܳܐ: ܡܰܪܕܺܝܼܢ

 

[1]  ܬܰܪܕܺܝܼܬܳܐ: ܚܫܰܠܬܗܿ ܠܡܶܬܰܠ ܣܽܘܼܟܳܠ: Disiplin / Discipline

[2]  ܓܠܽܘܼܠܽܘܼܬܳܐ: Pusula / Compass

[3]  ܝܰܩܪܳܐ: Değer / Value

[4]  ܓܪܶܡ ܚܰܨܳܐ ܐܰܘ ܦܳܩܰܪܬܐ: ܚܽܘܼܡܪ̈ܶܐ ܐܰܘ ܫܪ̈ܳܝܳܬܐ ܕܚܰܨܳܐ. Omurga / Belkemiği / Spine / Backbone

[5]  ܫܰܝܳܐ ܐܰܘ ܐܝܼܩܳܪܳܐ ܪܰܒܳܐ: Haysiyet / Dignity