ܪܽܘܟܳܒܶܗ ܕܒܰܪܢܳܫܳܐ

ܪܽܘܟܳܒܶܗ ܕܒܰܪܢܳܫܳܐ

 

ܠܡܶܬܕܰܪܟܳܢܽܘܬܳܐ ܚܰܬ̊ܺܝܬ̥ܬܳܐ ܕܬܶܕܡܽܘܪܬܳܐ ܕܪܽܘܟܳܒܶܗ ܕܒܰܪܢܳܫܳܐ܉ ܕܪܶܥܝܳܢܳܐ ܐܺܝܬܶܝܗ̇ ܐܰܝܢܳܐ ܕܡܶܢ ܛܰܝܒܽܘܬܳܐ ܐܰܠܳܗܳܝܬܳܐ ܐܶܬܚܰܟܰܡ ܕܢܰܕܪܶܟ ܟܰܣܝܽܘܬܳܐ ܕܰܥܒܳܕܰܘ̈ܗܝ ܕܰܐܠܳܗܳܐ. ܡܶܛܽܠ ܓܶܝܪ ܕܗܽܘ ܒܰܪܢܳܫܳܐ ܠܬܰܪܬܶܝܢ ܡܢܰܘ̈ܳܢ ܡܦܰܠܰܓ. ܕܢܰܦܫܳܐ ܘܰܕܦܰܓܪܳܐ. ܥܰܣܩܽܘܬܳܐ ܗ̱ܝ ܪܰܒܬܳܐ ܕܰܢܩܽܘܡ ܥܰܠ ܒܨܳܬ̥ܳܐ ܚܰܬ̊ܺܝܬ̥ܬܳܐ ܕܪܽܘܟܳܒܶܗ^[1] ܕܗܳܢܳܐ ܡܳܐܢܳܐ ܕܬܶܕܡܽܘܪܬܳܐ. ܠܰܘ ܓܶܝܪ ܒܰܠܚܽܘܕ ܒܦܽܘܪܫܳܢܳܐ ܕܰܡ̈ܢܰܘܳܬܶܗ ܥܣܶܩ ܘܠܳܐ ܕܠܺܝܠ ܠܰܒܨܳܬܶܗ. ܐܶܠܳܐ ܐܳܦ ܒܰܩܢܽܘܡܬܳܢܽܘܬܶܗ ܗܳܝ ܕܺܐܝܬܶܝܗ̇ ܝܺܚܺܝܕܳܝܬܳܐ ܘܰܠܚܽܘܕܳܝܬܳܐ܇ ܒܰܥܒܳܕܳܐ ܘܰܒܣܽܘܥܪܳܢܳܐ ܘܰܒܡܷ̈ܠܶܐ. ܕܰܐܝܟܰܢ ܕܶܝܢ ܗܽܘ ܗܳܢܳܐ ܒܰܪܢܳܫܳܐ: ܟܽܠ ܚܕܳܐ ܚܕܳܐ ܡܶܢ ܗܳܠܶܝܢ ܡܢܰܘ̈ܳܬܶܗ ܒܗܳܢܳܐ ܩܢܽܘܡܳܐ ܝܺܚܺܝܕܳܝܳܐ ܡܶܬܦܰܪ̈ܫܳܢ܇ ܘܡܶܬܦܰܠ̈ܓܳܢ ܒܕܺܝ̈ܠܳܝܳܬܳܐ ܕܡܰܥܒܕܳܢܽܘܬܗܶܝܢ ܟܽܠ ܚܕܳܐ ܡܶܢܗܶܝܢ ܒܕܺܝܠܳܗ̇. ܕܰܐܝܟܰܢ ܬܽܘܒ ܒܰܚܕܳܐ ܫܰܘܝܽܘܬܳܐ ܘܰܐܘܝܽܘܬܳܐ ܒܰܚܕܳܝܽܘܬܳܐ ܠܚܽܘܕܳܝܬܳܐ܇ ܐܳܬܶܝܢ ܠܚܰܕ ܣܽܘܥܪܳܢܳܐ ܠܚܽܘܕܳܝܳܐ ܕܰܥܒܳܕ̈ܶܐ ܟܽܠܗܽܘܢ ܘܰܕܣܽܘܥܪ̈ܳܢܶܐ ܘܰܕܡܷ̈ܠܶܐ ܛܳܒ ܥܰܣܩܳܐ ܠܡܶܕܰܥ. ܗܳܕܶܐ ܓܶܝܪ ܐܽܘܪܚܳܐ ܐܺܝܬܶܝܗ̇ ܘܰܫܒܺܝܠܳܐ܉ ܕܕܳܪܫܳܐ ܡܰܥܰܠܬܳܐ ܠܟܽܠܶܗ ܝܽܘܠܦܳܢܳܐ ܕܰܥܠܰܘܗܝ. ܘܡܶܛܽܠ ܒܥܳܬܳܐ ܣܰܓܺܝܐܬܳܐ ܕܒܰܙܒܰܢ ܙܒܰܢ ܡܶܬ̊ܬܙܺܝܥܳܐ ܡܶܢ ܪ̈ܳܚܡܰܝ ܝܽܘܠܦܳܢܳܐ܉ ܥܠܰܘܗܝ ܥܰܠ ܗܳܢܳܐ ܒܰܪܢܳܫܳܐ ܐܳܡܰܪ ܐ̱ܢܳܐ ܒܰܙܥܽܘܪ̈ܝܳܬܳܐ܉ ܐܰܝܟ ܕܰܐܢܺܝܚ ܪܶܥܝܳܢܳܐ ܕܰܐܝܠܶܝܢ ܕܗܳܕܶܐ ܫܳܐܠܺܝܢ.

 

ܘܠܽܘܩܕܰܡ ܥܳܒܕܺܝܢܰܢ ܥܽܘܩܳܒܳܐ ܕܰܥܠܰܘܗܝ ܕܒܰܪܢܳܫܳܐ ܡܶܢ ܢܰܦܫܳܐ. ܗܺܝ ܓܶܝܪ ܐܺܝܬܶܝܗ̇ ܫܽܘܪܳܝܳܐ ܘܫܶܬܶܐܣܬܳܐ ܕܟܽܠܗܽܘܢ ܣܽܘܥܪ̈ܳܢܶܐ ܘܰܥܒܳܕ̈ܶܐ ܘܡܷ̈ܠܶܐ. ܘܰܒܙܰܘ̈ܥܶܐ ܕܡܰܥܒ̈ܕܳܢܘܳܬܳܗ̇ ܐܳܬ̥ܝ̈ܳܢ ܠܓܶܠܝܳܐ ܘܳܐܦ ܗܳܠܶܝܢ ܕܦܰܓܪܳܐ. ܥܦܺܝܦܳܐ ܓܶܝܪ ܐܺܝܬܰܘܗܝ ܗܽܘ ܗܳܢܳܐ ܪܽܘܟܳܒܳܐ ܕܰܩܢܽܘܡܳܐ ܕܺܝܠܳܢܳܝܳܐ ܕܒܰܪܢܳܫܳܐ. ܘܡܶܛܽܠ ܗܳܕܶܐ ܐܳܦ ܡܰܥܒܕܳܢܽܘܬܶܗ ܘܙܰܘ̈ܥܰܘܗܝ ܕܰܒܣܽܘܥܪ̈ܳܢܶܐ ܘܒܰܥ̈ܒܳܕܶܐ ܘܰܒܡܷ̈ܠܶܐ܉ ܥܦܺܝ̈ܦܶܐ ܐܺܝܬܰܝܗܽܘܢ. ܘܡܶܢܗܽܘܢ ܢܳܦܠܺܝܢ ܬܚܶܝܬ ܪܓܶܫܬܳܐ܉ ܘܡܶܢܗܽܘܢ ܥܶܠܳܝܺܝܢ ܡܶܢ ܪܓܶܫܬܳܐ. ܘܒܺܝܕܰܥܬܳܐ ܗ̱ܘ̣ ܒܰܠܚܽܘܕ ܡܶܬܕܰܪܟܺܝܢ. ܚܙܳܬܳܐ ܓܶܝܪ ܘܫܶܡܥܳܐ ܘܣܰܘܩܳܐ ܘܓܶܫܬܳܐ ܘܰܛܥܳܡܬܳܐ. ܟܽܠ ܚܕܳܐ ܡܶܢܗܶܝܢ ܥܰܡܳܗ̇ ܕܺܝܠܳܗ̇ ܕܰܪܓܶܫܬܳܐ܉ ܘܰܕܡܰܥܒܕܳܢܽܘܬܳܐ ܕܺܝܠܳܗ̇ ܕܰܪܓܶܫܬܳܐ. ܐܺܝܬ ܗ̱ܘ̣ ܡܶܕܶܡ ܐ̱ܚܪܺܝܢ܉ ܕܰܒܣܽܘܟܳܠܳܐ ܘܒܺܝܕܰܥܬܳܐ ܡܶܬܪܢܶܐ ܘܡܶܬܕܪܶܟ ܠܰܐܝܠܶܝܢ ܕܺܐܝܬܰܝܗܽܘܢ ܒܳܚܪ̈ܰܝ ܣܽܘܥܪ̈ܳܢܶܐ: ܘܡܰܕܪ̈ܟܰܝ ܝܺܕܰܥܬܳܐ ܚܰܬ̊ܺܝܬ̥ܬܳܐ ܕܰܥܠܰܝܗܽܘܢ. ܘܒܰܕܓܽܘܢ ܡܶܢ ܥܽܘܩܳܒܳܐ ܝܺܚܺܝܕܳܝܳܐ ܕܟܽܠ ܚܕܳܐ ܚܕܳܐ ܡܶܢ ܡܢܰܘ̈ܳܬܳܐ ܕܺܝܠܶܗ ܕܒܪܢܳܫܳܐ ܡܫܰܪܶܝܢܰܢ ܠܽܘܩܕܰܡ܉ ܘܗܳܝܕܶܝܢ ܡܶܬܕܰܪܓܺܝܢܰܢ ܘܢܳܚܬܺܝܢܰܢ ܒܡܶܠܬܰܢ ܐܳܦ ܠܘܳܬ ܗܳܠܶܝܢ ܝܺܚܺܝ̈ܕܳܝܳܬܳܐ ܘܰܩܢܽܘ̈ܡܳܝܳܬܳܐ. ܕܒܳܗ̇ ܒܗܳܕܶܐ ܚܕܳܝܽܘܬܳܐ ܩܢܽܘܡܳܝܬܳܐ ܕܺܝܠܶܗ ܕܒܰܪܢܳܫܳܐ ܡܶܬܕܰܪ̈ܟܳܢ^[2]܀

 

ܢܰܦܫܳܐ ܓܶܝܪ ܐܺܝܬ ܠܳܗ̇ ܚܰܝ̈ܠܶܐ ܬܪܶܝܢ ܕܰܡܠܺܝܠܽܘܬܳܐ ܘܰܕܚܰܝܽܘܬܳܐ. ܗܰܘ ܕܶܝܢ ܚܰܝܠܳܐ ܚܰܝܽܘܬܳܢܳܐ܉ ܐܺܝܬ ܠܶܗ ܡܰܥܒ̈ܕܳܢܘܳܬܳܐ ܬܰܪܬܶܝܢ ܕܳܐܦ ܗܶܢܶܝܢ ܒܚܰܝܠܳܐ ܩܳܝ̈ܡܳܢ. ܚܶܡܬܳܐ ܘܪܶܓܬܳܐ. ܪܶܓܬܳܐ ܕܶܝܢ ܐܺܝܬܶܝܗ̇܉ ܒܰܝܢܳܬ ܬܰܪܬܶܝܢ ܡܰܥܒ̈ܕܳܢܘܳܬܳܐ ܐ̱ܚܪ̈ܳܢܝܳܬܳܐ. ܒܶܝܬ ܟܢܺܝܟܽܘܬܳܐ ܠܰܫܪܺܝܚܽܘܬܳܐ. ܒܺܝܫܽܘܬܳܗ̇ ܓܶܝܪ ܕܪܶܓܬܳܐ ܫܪܺܝܚܽܘܬܳܐ^[3] ܐܺܝܬܶܝܗ̇. ܘܛܳܒܽܘܬܳܗ̇ ܟܢܺܝܟܽܘܬܳܐ. ܘܚܶܡܬܳܐ ܬܽܘܒ ܐܺܝܬܶܝܗ̇܉ ܒܶܝܬ ܕܶܚܠܬܳܐ ܠܓܰܢ̱ܒܳܪܽܘܬܳܐ. ܛܳܒܬܳܐ ܐܺܝܬܶܝܗ̇܉ ܗܺܝ ܗܳܕܶܐ ܡܰܥܒܕܳܢܽܘܬܳܐ ܕܰܒܚܰܝܠܳܐ ܕܚܶܡܬܳܐ ܡܶܣܬܰܥܪܳܐ. ܐܶܢܕܶܝܢ ܬܚܽܘܒ ܩܕܳܡ ܚܰܫ̈ܶܐ ܘܬܶܕܚܰܠ ܡܶܢ ܡܰܘܬܳܐ ܒܺܝܫܬܳܐ ܐܺܝܬܶܝܗ̇.

 

ܗܽܘ ܕܶܝܢ ܚܰܝܠܳܐ ܕܰܡܠܺܝܠܽܘܬܳܐ܉ ܐܺܝܬ ܠܶܗ ܚܰܝ̈ܠܶܐ ܐ̱ܚܪ̈ܳܢܶܐ ܕܰܒܡܰܥܒܕܳܢܽܘܬܳܐ ܡܶܬܓܰܡܪܺܝܢ ܘܳܐܬܶܝܢ ܠܓܶܠܝܳܐ. ܡܰܕܥܳܐ ܘܚܽܘܫܳܒܳܐ ܘܗܰܘܢܳܐ ܘܬܰܪܥܺܝܬܳܐ. ܚܽܘܫܳܒܳܐ ܕܶܝܢ ܣܺܝܡ ܒܶܝܬ ܪܶܓܬܳܐ ܠܚܶܡܬܳܐ. ܘܡܰܕܥܳܐ ܒܶܝܬ ܗܰܘܢܳܐ ܠܚܽܘܫܳܒܳܐ. ܗܽܘ ܕܶܝܢ ܗܰܘܢܳܐ܉ ܒܶܝܬ ܪܡܺܝܣܽܘܬܳܐ ܠܰܫܓܺܝܫܽܘܬܳܐ. ܪܶܥܝܳܢܳܐ ܕܶܝܢ ܒܶܝܬ ܡܶܬܛܦܺܝܣܳܢܽܘܬܳܐ ܠܠܳܐ ܡܶܬܛܦܺܝܣܳܢܽܘܬܳܐ. ܘܟܽܠ ܚܰܕ ܚܰܕ ܡܶܢܗܽܘܢ ܐܺܝܬܰܘܗܝ܉ ܡܥܰܕܪܳܢܳܐ ܘܰܡܣܰܝܥܳܢܳܐ ܕܚܰܒܪܶܗ܇ ܐܰܝܢܳܐ ܕܢܰܩܺܝܦ ܒܡܰܥܒܕܳܢܽܘܬܳܐ ܕܰܥܒܕܳܐ ܗܳܝ ܕܗܺܝ ܗ̱ܝ ܡܰܝܬܝܳܐ ܠܓܶܠܝܳܐ ܚܰܝ̈ܠܶܐ ܗܳܠܶܝܢ ܕܰܟܣܶܝܢ ܒܢܰܦܫܳܐ. ܪܶܓܬܳܐ ܘܚܶܡܬܳܐ ܡܙܺܝܥܺܝܢ ܠܰܢ ܠܘܳܬ ܣܽܘܥܪ̈ܳܢܶܐ ܟܽܠܗܽܘܢ. ܐܰܘ ܕܢܶܬܩܰܪܰܒ ܐܰܘ ܕܢܶܬܪܰܚܰܩ. ܟܰܕ ܟܽܠ ܚܰܕ ܚܰܕ ܡܶܢܗܽܘܢ ܣܺܝܡ܉ ܒܶܝܬ ܬܰܪܬܶܝܢ ܡܰܥܒ̈ܕܳܢܘܳܬܳܐ. ܪܶܓܬܳܐ ܡܩܰܪܒܳܐ ܠܰܢ ܘܪܽܘܓܙܳܐ ܡܰܪܚܶܩ ܠܰܢ. ܗܳܕܶܐ ܕܳܐܦ ܠܚܰܝ̈ܘܳܬܳܐ ܐܺܝܬܶܝܗ̇ ܟܰܕ ܓܠܺܝ̈ܙܳܢ ܡܶܢ ܡܶܠܬܳܐ ܘܚܽܘܫܳܒܳܐ. ܗܽܘ ܕܶܝܢ ܗܳܢܳܐ ܚܽܘܫܳܒܳܐ܉ ܡܙܺܝܥ ܠܰܢ ܠܘܳܬ ܫܽܘܡܠܳܝܳܐ ܕܺܝܠܗܶܝܢ ܕܡܰܥܒ̈ܕܳܢܘܳܬܳܐ. ܘܡܳܐ ܕܶܐܬܬܙܺܝܥ ܒܚܰܝܠܳܐ ܝܰܕܽܘܥܬܳܢܳܐ ܠܘܳܬ ܚܕܳܐ ܚܕܳܐ ܡܶܢ ܡܰܥܒ̈ܕܳܢܘܳܬܳܐ܉ ܬܳܟܶܣ ܪܶܥܝܳܢܳܐ ܘܰܡܛܰܟܶܣ ܠܶܗ ܗܰܘܢܳܐ. ܡܶܛܽܠ ܕܟܽܠ ܚܰܕ ܚܰܕ ܡܶܢܗܽܘܢ ܒܗܳܝ ܕܕܺܝܠܶܗ ܒܰܠܚܽܘܕ ܣܳܥܰܪ ܚܰܝܠܶܗ ܒܡܰܥܒܕܳܢܽܘܬܳܐ ܚܕܳܐ ܡܶܢ ܡܰܥܒ̈ܕܳܢܘܳܬܳܐ. ܠܘܳܬ ܚܶܟܡܬܳܐ ܐܳܡܰܪ ܐ̱ܢܳܐ ܐܰܘ ܠܘܳܬ ܝܺܕܰܥܬܳܐ ܐܰܘ ܣܽܘܟܳܠܳܐ ܐܰܘ ܥܒܳܕ̈ܶܐ ܐܰܘ ܣܽܘܥܪ̈ܳܢܶܐ. ܘܰܥܒܳܕܳܐ ܬܽܘܒ ܘܣܽܘܥܪܳܢܳܐ܉ ܐܰܘ ܟܝܳܢܳܝ̈ܶܐ ܐܺܝܬܰܝܗܽܘܢ ܐܰܘ ܐܽܘܡܳܢܳܝ̈ܶܐ ܕܒܽܐܘܡܳܢܽܘܬܳܐ ܐܰܘ ܒܚܽܘܫܳܒܳܐ ܡܶܬܓܰܡܪܺܝܢ܀

 

ܡܠܺܝܠܽܘܬܳܐ ܕܶܝܢ ܘܚܽܘܫܳܒܳܐ ܘܡܰܕܥܳܐ ܘܗܰܘܢܳܐ ܘܬܰܪܥܺܝܬܳܐ ܒܢܰܦܫܳܐ ܟܝܳܢܳܐܺܝܬ ܐܺܝܬܰܝܗܽܘܢ܉ ܐܰܝܟ ܚܰܝܽܘܬܳܐ ܘܪܶܓܬܳܐ ܘܪܽܘܓܙܳܐ. ܗܳܠܶܝܢ ܕܶܝܢ ܝܺܚܺܝ̈ܕܳܝܳܬܳܐ ܕܢܰܦܫܳܐ ܥܰܡ ܕܦܰܓܪܳܐ ܐܳܬ̥ܝ̈ܳܢ ܠܓܶܠܝܳܐ: ܘܡܶܬܕܰܪ̈ܟܳܢ ܠܪ̈ܶܓܫܳܬܰܢ. ܡܰܕܥܳܐ ܥܶܠܳܝ ܒܡܰܥܒܕܳܢܽܘܬܶܗ ܕܰܒܢܰܦܫܳܐ ܡܶܢ ܚܽܘܫܳܒܳܐ ܘܗܰܘܢܳܐ ܘܪܶܥܝܳܢܳܐ. ܐܰܝܟ ܕܳܐܦ ܝܺܕܰܥܬܳܐ ܪܰܒܳܐ ܡܶܢ ܚܶܟܡܬܳܐ ܘܣܽܘܟܳܠܳܐ. ܗܳܢܳܐ ܕܶܝܢ ܩܰܪܺܝܒ ܠܰܐܠܳܗܳܝ̈ܳܬܳܐ܉ ܘܰܡܕܰܪܶܓ ܠܢܰܦܫܳܐ ܠܺܝܕܰܥܬܳܐ ܕܟܰܣ̈ܝܳܬܳܐ. ܗܰܘܢܳܐ ܓܶܝܪ ܡܛܰܟܶܣ ܠܚܽܘܫܳܒܳܐ܉ ܘܰܡܫܰܡܶܫ ܠܡܰܕܥܳܐ ܠܘܳܬ ܣܽܘܥܪܳܢܳܐ ܕܰܡܝܰܬܪܽܘܬܳܐ ܘܰܕܚܶܟܡܬܳܐ ܘܰܕܣܽܘܟܳܠܳܐ. ܘܰܒܒܽܘܝܳܢܳܐ ܕܣܽܘܟܳܠܳܐ ܪܶܥܝܳܢܳܐ ܡܶܬܚܰܝܰܠ ܘܡܶܬܓܰܢ̱ܒܰܪ ܥܰܠ ܚܰܫ̈ܶܐ ܘܥܰܠ ܙܰܘ̈ܥܶܐ ܟܝܳܢܳܝ̈ܶܐ. ܘܰܡܫܰܡܶܫ ܠܗܰܘܢܳܐ ܘܰܡܚܰܝܶܠ ܠܚܽܘܫܳܒܳܐ. ܘܰܡܚܰܝܶܕ ܠܰܬܪ̈ܰܝܗܽܘܢ ܒܚܰܝܠܶܗ ܒܡܰܥܒܕܳܢܽܘܬܶܗ܉ ܕܰܢܩܰܒܠܽܘܢ ܡܰܥܒܕܳܢܽܘܬܶܗ ܕܡܰܕܥܳܐ. ܘܢܶܕܪܫܽܘܢ ܫܒܺܝܠܳܐ ܫܰܦܺܝܪܳܐ ܠܰܡܠܺܝܠܽܘܬܳܐ܇ ܠܘܳܬ ܝܺܕܰܥܬܳܐ ܘܚܶܟܡܬܳܐ ܘܣܽܘܟܳܠܳܐ: ܘܰܥܒܳܕ̈ܶܐ ܟܽܠܗܽܘܢ ܕܰܡܝܰܬܪܽܘܬܳܐ. ܘܠܳܐ ܢܶܗܘܶܐ ܒܠܺܝܠ ܛܶܟܣܳܗܿ ܦܰܐܝܳܐ ܕܰܡܠܺܝܠܽܘܬܳܐ ܘܠܳܐ ܬܬܕܒܰܪ ܢܰܦܫܳܐ ܐܰܝܟ ܚܰܝ̈ܘܳܬܳܐ ܒܣܽܘܥܪ̈ܳܢܶܐ: ܒܪܶܓܬܳܐ ܘܰܒܚܶܡܬܳܐ. ܐܳܦܠܳܐ ܒܙܰܘ̈ܥܶܐ ܟܝܳܢܳܝ̈ܶܐ ܐܰܝܟ ܕܬܶܗܘܶܐ ܚܰܝܽܘܬܳܐ ܕܠܳܐ ܦܽܘܪܫܳܢ ܐܶܠܳܐ ܟܽܠ ܕܬܶܣܥܽܘܪ ܐܰܝܟ ܡܠܺܝܠܽܘܬܳܐ܉ ܢܶܗܘܶܐ ܒܦܽܘܪܫܳܢܳܐ ܕܚܺܐܪܽܘܬܳܐ ܘܨܶܒܝܳܢܳܐ. ܚܺܐܪܽܘܬܳܐ ܕܶܝܢ ܐܺܝܬܶܝܗ̇ ܕܫܽܘܠܛܳܢܳܐ ܕܨܶܒܝܳܢܳܐ. ܘܨܶܒܝܳܢܳܐ ܡܕܰܒܰܪ ܠܗܽܘܢ ܠܘܳܬ ܫܽܘܡܠܳܝܳܐ ܕܣܽܘܥܪܳܢܳܐ ܕܪܶܓܬܳܐ ܘܰܕܪܽܘܓܙܳܐ. ܐܳܡܰܪ ܐ̱ܢܳܐ ܕܢܶܬܩܰܪܰܒ ܐܰܘ ܢܶܬܪܰܚܰܩ. ܟܰܕ ܡܫܰܡܫܺܝܢ ܠܶܗ ܚܰܝ̈ܠܶܐ ܗܳܠܶܝܢ ܚܰܡܫܳܐ ܕܢܰܦܫܳܐ܉ ܥܰܡ ܪ̈ܶܓܫܶܐ ܗܳܠܶܝܢ ܚܰܡܫܳܐ ܕܦܰܓܪܳܐ܀

 

ܡܶܛܽܠ ܕܰܡܠܺܝܠܽܘܬܳܐ ܘܡܰܕܥܳܐ ܘܚܽܘܫܳܒܳܐ ܘܪܶܥܝܳܢܳܐ ܘܗܰܘܢܳܐ܉ ܒܫܽܘܠܛܳܢܳܐ ܕܨܶܒܝܳܢܳܐ ܐܺܝܬܰܝܗܽܘܢ܉ ܐܰܝܟ ܥܰܒ̈ܕܶܐ ܬܚܶܝܬ ܡܳܪܽܘܬܳܐ. ܕܰܒܡܰܥܒܕܳܢܽܘܬܳܐ ܕܺܝܠܗܽܘܢ ܡܫܰܡܠܶܐ ܘܣܳܥܰܪ ܬܰܪ̈ܬܰܝܗܶܝܢ. ܒܺܝ̈ܫܳܬܳܐ ܘܛܳܒ̈ܳܬܳܐ. ܚܶܟܡܬܳܐ ܘܣܰܟܠܽܘܬܳܐ. ܡܶܛܽܠ ܕܛܳܒ̈ܳܬܳܐ ܘܒܺܝ̈ܫܳܬܳܐ ܚܶܟܡܬܳܐ ܘܣܰܟܠܽܘܬܳܐ܉ ܠܰܘ ܚܰܝ̈ܠܶܐ ܕܢܰܦܫܳܐ ܐܶܢܽܘܢ ܐܶܠܳܐ ܣܽܘܥܪ̈ܳܢܶܐ. ܘܒܽܘܝܳܢܳܐ ܕܺܝܠܗܽܘܢ ܕܚܰܝ̈ܠܶܐ. ܘܥܰܠܗܳܕܶܐ ܠܰܘ ܙܰܒܢܰܐ ܗ̱ܘ ܕܢܺܐܡܰܪ: ܡܶܛܽܠ ܕܥܰܠ ܫܰܪܒܳܐ ܕܡܶܢܶܗ ܘܰܥܠܰܘܗܝ ܣܢܺܝܩܳܐ ܡܶܠܬܳܐ. ܪܶܓܬܳܐ ܓܶܝܪ ܘܙܰܘܥܳܐ ܘܪܽܘܓܙܳܐ܉ ܠܰܘ ܬܚܶܝܬ ܫܽܘܠܛܳܢܳܐ ܕܨܶܒܝܳܢܳܐ ܣܺܝܡܺܝܢ ܐܶܠܳܐ ܫܽܘܡܠܳܝܗܽܘܢ܇ ܕܢܶܪܰܓ ܕܶܝܢ ܐܰܘ ܕܠܳܐ ܢܶܪܰܓ: ܐܰܘ ܕܢܶܬܬܥܺܝܩ ܐܰܘ ܕܢܶܚܕܶܐ܉ ܠܰܘ ܕܨܶܒܝܳܢܳܐ ܐܺܝܬܶܝܗ̇ ܐܶܠܳܐ ܕܰܟܝܳܢܳܐ. ܥܳܩܬܳܐ ܕܶܝܢ ܘܚܰܕܽܘܬܳܐ ܡܶܢ ܡܢܳܬܳܐ ܚܶܡܬܳܢܳܝܬܳܐ ܐܺܝܬܰܝܗܶܝܢ. ܐܰܝܟ ܕܳܐܦ ܟܰܦܢܳܐ ܘܣܰܒܥܳܐ ܡܶܢ ܡܢܳܬܳܐ ܪܶܓܬܳܢܳܝܬܳܐ. ܟܽܠ ܓܶܝܪ ܚܕܳܐ ܚܕܳܐ ܡܶܢܗܶܝܢ ܒܙܰܒܢܳܗ̇ ܡܶܣܬܰܥܪܳܐ܉ ܐܶܢ ܢܶܨܒܶܐ ܘܶܐܢ ܠܳܐ ܢܶܨܒܶܐ. ܘܒܰܕܓܽܘܢ ܚܽܘܫܳܒܳܐ ܘܡܰܕܥܳܐ ܘܪܶܥܝܳܢܳܐ ܘܗܰܘܢܳܐ܉ ܚܰܝ̈ܠܶܐ ܕܰܡܠܺܝܠܽܘܬܳܐ. ܕܺܐܝܬܰܝܗܽܘܢ ܚܰܝ̈ܠܶܐ ܩܰܕܡܳܝ̈ܶܐ. ܘܰܡܢܳܬܳܢܳܝ̈ܶܐ ܕܢܰܦܫܳܐ܉ ܣܺܝܡܺܝܢ ܬܚܶܝܬ ܫܽܘܠܛܳܢܶܗ ܕܨܶܒܝܳܢܳܐ. ܗܳܢܰܘ ܕܶܝܢ ܚܺܐܪܽܘܬܳܐ܀

 

ܥܰܠ ܚܺܐܪܽܘܬܳܐ ܕܶܝܢ ܘܨܶܒܝܳܢܳܐ܉ ܐܶܡܰܪܢ ܒܫܰܪܒܳܐ ܗܰܘ ܕܰܥܒܰܕܢ܉ ܕܥܳܠܡܳܐ ܙܥܽܘܪܳܐ ܐܝܬܰܘܗܝ ܒܰܪܢܳܫܳܐ. ܪܶܓܬܳܐ ܕܶܝܢ ܘܚܶܡܬܳܐ܉ ܕܚܰܝܠܳܐ ܚܰܝܽܘܬܳܢܳܐ ܕܢܰܦܫܳܐ. ܘܰܟܝܳܢܳܐ ܫܰܠܺܝܛ ܥܰܠ ܙܰܘܥܳܐ ܕܗܳܠܶܝܢ܉ ܘܠܰܘ ܨܶܒܝܳܢܳܐ. ܡܰܕܥܳܐ ܕܶܝܢ܉ ܡܙܺܝܥܳܢܰܐ ܗ̱ܘ ܕܚܽܘܫܳܒܳܐ. ܘܪܶܥܝܳܢܳܐ ܡܓܰܢ̱ܒܰܪ ܘܰܡܚܰܝܶܠ ܠܶܗ ܠܚܽܘܫܳܒܳܐ. ܘܗܰܘܢܳܐ ܡܛܰܟܶܣ ܡܰܦܰܩܬܶܗ܉ ܠܘܳܬ ܣܽܘܥܪܳܢܳܐ ܕܰܡܝܰܬܪܽܘܬܳܐ. ܘܰܕܚܶܟܡܬܳܐ. ܘܰܕܣܽܘܟܳܠܳܐ. ܘܰܕܡܶܠܬܳܐ ܬܪܺܝܨܬܳܐ ܕܒܽܘܝܳܢܳܐ ܕܰܡܠܺܝܠܽܘܬܳܐ. ܪܶܓܬܳܐ ܕܶܝܢ ܘܪܽܘܓܙܳܐ܉ ܟܝܳܢܳܐ ܡܙܺܝܥ ܠܗܶܝܢ. ܐܰܘ ܕܢܶܬܩܰܪܰܒ ܠܰܚܫܰܚܬܶܗ܉ ܐܰܘ ܕܢܶܬܪܰܚܩ ܡܶܢ ܢܶܟܝܳܢ̈ܶܐ. ܘܗܳܕܶܐ ܠܚܰܝ̈ܘܳܬܳܐ ܐܺܝܬܶܝܗ. ܘܳܐܦ ܥܰܠ ܗܳܕܶܐ ܐܶܡܰܪܢ܉ ܒܫܰܪܒܳܐ ܗܰܘ ܕܥܰܠ ܒܰܪܢܳܫܳܐ: ܥܳܠܡܳܐ ܙܥܽܘܪܳܐ. ܘܳܐܦ ܕܰܐܝܟܰܢܳܐ ܬܽܘܒ ܡܚܰܝ̈ܢܳܢ ܡܰܥܒ̈ܕܳܢܘܳܬܳܐ ܕܦܰܓܪܳܐ ܐܶܡܰܪܢ܉ ܬܽܘܒ ܒܶܗ ܒܫܰܪܒܳܐ ܗܰܘ.

 

ܡܳܕܶܝܢ ܥܰܠ ܗܳܕܶܐ ܡܢܳܬܳܐ ܡܠܺܝܠܬܳܐ ܕܢܰܦܫܳܐ ܕܰܐܝܟܰܢܳܐ ܡܚܰܝܕܺܝܢ ܚܰܝ̈ܠܶܝܗ̇ ܥܰܡ ܪ̈ܶܓܫܶܐ ܕܦܰܓܪܳܐ ܐܳܠܨܳܐ ܕܢܺܐܡܰܪ܇ ܒܫܰܪܒܳܐ ܗܳܢܳܐ ܕܣܺܝܡ ܩܕܳܡܰܝܢ. ܡܶܛܽܠ ܕܶܐܡܰܪܢ ܡܶܢ ܠܥܶܠ܉ ܕܰܥܣܶܩ ܕܢܶܬܕܪܶܟ ܪܽܘܟܳܒܶܗ ܠܪܶܥܝܳܢܳܐ ܕܠܳܐ ܡܶܬܕܪܶܫ ܒܫܰܪ̈ܒܶܐ ܕܰܐܝܟ ܗܳܠܶܝܢ. ܘܥܰܠ ܗܳܕܶܐ ܐܳܦ ܦܪܰܫܢ ܩܰܕܡܳܝܰܬ ܡܢܰܘ̈ܳܬܳܐ ܕܺܝܠܳܗ̇ ܕܢܰܦܫܳܐ ܘܚܰܝ̈ܠܶܐ ܕܺܝܠܗܶܝܢ ܕܰܡܢܰܘ̈ܳܬܳܐ܉ ܐܰܝܟ ܕܬܶܬܢܰܗܰܪ ܡܶܠܬܳܐ ܠܪ̈ܳܚܡܰܝ ܝܽܘܠܦܳܢܳܐ. ܘܳܐܦ ܓܶܝܪ ܥܰܠ ܚܰܝܠܳܐ ܕܟܽܠܚܰܕ ܚܰܕ ܡܶܢܗܽܘܢ ܐܶܡܰܪܢ. ܘܫܽܘܠܛܳܢܳܐ ܕܡܰܥܒܕܳܢܽܘܬܶܗ܉ ܘܰܣܝܳܡܳܐ ܕܛܶܟ̈ܣܰܝܗܽܘܢ. ܕܰܒܗܽܘܢ ܩܳܝܡܺܝܢ ܣܽܘܥܪ̈ܳܢܶܐ ܕܟܽܠܗܽܘܢ ܡܠܺܝ̈ܠܶܐ܀

 

ܕܡܰܕܥܳܐ ܕܶܝܢ ܛܳܒܽܘܬܶܗ ܐܺܝܬܶܝܗ̇ ܝܺܕܰܥܬܳܐ܉ ܘܒܺܝܫܽܘܬܶܗ ܡܰܪܳܚܽܘܬܳܐ. ܘܰܕܚܽܘܫܳܒܳܐ ܛܳܒܽܘܬܶܗ ܚܶܟܡܬܳܐ ܘܒܺܝܫܽܘܬܶܗ ܣܰܟܠܽܘܬܳܐ. ܘܗܰܘܢܳܐ ܛܳܒܽܘܬܶܗ ܐܺܝܬܶܝܗ̇ ܪܡܺܝܣܽܘܬܳܐ ܘܒܺܝܫܽܘܬܶܗ ܫܓܺܝܫܽܘܬܳܐ. ܘܪܶܥܝܳܢܳܐ ܛܳܒܽܘܬܶܗ ܡܶܬܛܦܺܝܣܳܢܽܘܬܳܐ ܘܒܺܝܫܽܘܬܶܗ ܠܳܐ ܡܶܬܛܦܺܝܣܳܢܽܘܬܳܐ. ܡܶܬܛܦܺܝܣܳܢܽܘܬܳܐ ܕܶܝܢ ܩܳܝܡܳܐ ܒܶܝܬ ܡܰܪܳܚܽܘܬܳܐ ܠܕܶܚܠܬܳܐ. ܘܚܶܟܡܬܳܐ ܒܶܝܬ ܒܽܘܝܳܢܳܐ ܠܠܶܠܽܘܬܳܐ. ܝܺܕܰܥܬܳܐ ܕܶܝܢ ܒܶܝܬ ܣܽܘܟܳܠܳܐ ܕܐ̱ܪܳܙܳܐ ܠܠܳܐ ܡܶܣܬܰܟܠܳܢܽܘܬܳܐ. ܐܰܝܟ ܕܳܐܦ ܚܰܟܺܝܡܽܘܬܳܐ ܒܶܝܬ ܥܒܳܕ̈ܶܐ ܠܡܷ̈ܠܶܐ. ܘܰܪܡܺܝܣܽܘܬܳܐ ܩܳܝܡܳܐ ܒܶܝܬ ܗܳܝ ܕܢܶܐܚܽܘܕ ܐ̱ܢܳܫ ܢܰܦܫܶܗ ܘܰܕܠܳܐ ܢܣܰܝܒܰܪ. ܗܳܟܰܢܳܐ ܐܳܦ ܗܳܠܶܝܢ ܐ̱ܚܪ̈ܳܢܝܳܬܳܐ ܕܡܶܢ ܗܳܠܶܝܢ ܡܶܬܝܰܠ̈ܕܳܢ܉ ܩܳܝ̈ܡܳܢ ܒܡܶܨܥܳܝܽܘܬܳܐ ܕܒܶܝܬ ܬܰܪܬܶܝܢ ܕܕܰܠܩܽܘܒܠܳܐ: ܕܰܒܗܶܝܢ ܡܰܥܒܶܕ ܚܰܝܠܳܐ ܕܰܡܠܺܝܠܽܘܬܳܐ܇ ܒܝܰܕ ܚܰܝ̈ܠܶܐ ܗܳܠܶܝܢ ܕܥܰܡܶܗ ܣܽܘܥܪ̈ܳܢܶܐ ܟܽܠܗܽܘܢ܇ ܒܪ̈ܶܓܫܶܐ ܕܦܰܓܪܳܐ ܒܰܚܕܳܐ ܚܕܳܝܽܘܬܳܐ ܩܢܽܘܡܳܝܬܳܐ ܕܒܰܪܢܳܫܳܐ܀

 

ܢܺܐܡܰܪ ܕܶܝܢ ܐܳܦ ܥܰܠ ܪ̈ܶܓܫܶܐ ܕܦܰܓܪܳܐ ܘܚܰܝ̈ܠܶܐ ܟܝܳܢܳܝ̈ܶܐ ܕܕܺܝܠܶܗ ܕܦܰܓܪܳܐ. ܐܺܝܬ ܠܶܗ ܓܶܝܪ ܚܰܝܽܘܬܳܐ ܢܰܦܫܳܢܳܝܬܳܐ ܘܦܳܪܽܘܫܽܘܬܐ. ܘܰܠܗܰܘ ܚܰܝܠܳܐ ܚܰܝܳܐ܉ ܐܺܝܬ ܠܶܗ ܪܶܓܬܳܐ ܘܪܽܘܓܙܳܐ. ܕܢܶܬܩܰܪܰܒ ܘܰܕܢܶܬܪܰܚܰܩ. ܐܰܝܟ ܕܶܐܡܰܪܢ ܒܥܶܠܳܝ̈ܳܬܳܐ. ܕܗܳܕܶܐ ܐܺܝܬ ܐܳܦ ܠܚܰܝ̈ܘܳܬܳܐ. ܠܳܐ ܓܶܝܪ ܓܠܺܝܙ ܡܶܢ ܗܳܠܶܝܢ ܦܰܓܪܳܐ ܐ̱ܢܳܫܳܝܳܐ. ܠܗܰܘ ܓܶܝܪ ܚܰܝܠܳܐ ܦܳܪܽܘܫܳܐ܉ ܐܺܝܬ ܠܶܗ ܪ̈ܶܓܫܶܐ ܚܰܡܫܳܐ. ܕܰܡܫܰܡܫܺܝܢ ܘܡܰܥܒܕܺܝܢ ܒܗܽܘܢ ܚܰܝ̈ܠܶܐ ܚܰܡܫܳܐ: ܚܙܳܬܳܐ. ܫܶܡܥܳܐ. ܓܶܫܬܳܐ. ܛܥܳܡܬܳܐ. ܘܣܰܘܩܳܐ. ܘܰܠܗܽܘܢ ܠܗܳܠܶܝܢ ܣܺܝܡܺܝܢ ܗܰܕܳܡ̈ܶܐ ܒܦܰܓܪܳܐ ܠܥܳܒܽܘܕܳܐ ܚܰܟܺܝܡܳܐ. ܕܰܢܩܰܒܠܽܘܢ ܚܰܝ̈ܠܶܐ ܘܢܰܥܒܕܽܘܢ ܒܗܽܘܢ ܒܚܰܝܠܳܐ ܦܳܪܽܘܫܳܐ ܕܕܺܝܠܶܗ ܕܦܰܓܪܳܐ܉ ܥܰܡ ܚܰܝܠܳܐ ܕܢܰܦܫܳܐ. ܐܰܘ ܟܰܕ ܫܳܩܠܺܝܢ ܙܰܘܥܳܐ ܡܶܢ ܠܒܰܪ ܒܨܶܒ̈ܘܳܬܳܐ ܕܦܳܓ̈ܥܳܢ ܒܗܽܘܢ. ܐܰܘ ܟܰܕ ܡܶܬܬܙܺܝܥܺܝܢ ܡܶܢ ܠܓܰܘ܇ ܡܶܢ ܡܰܥܒܕܳܢܽܘܬܳܐ ܕܚܰܝ̈ܠܶܐ ܗܳܢܽܘܢ ܕܰܡܢܳܬܳܐ ܡܠܺܝܠܬܳܐ ܕܢܰܦܫܳܐ. ܟܰܕ ܐܳܬܝ̈ܳܢ ܬܰܪ̈ܬܰܝܗܶܝܢ ܡܢܰܘ̈ܳܬܳܐ ܕܢܰܦܫܳܐ ܠܰܚܕܳܐ ܚܕܳܝܽܘܬܳܐ ܒܡܰܥܒܕܳܢܽܘܬܳܐ ܕܗܳܠܶܝܢ. ܕܕܺܝܠܗܶܝܢ ܕܰܡܢܰܘ̈ܳܬܳܐ܉ ܪܶܓܬܳܐ ܘܪܽܘܓܙܳܐ ܥܰܡ ܡܰܕܥܳܐ ܘܚܽܘܫܳܒܳܐ ܘܬܰܪܥܺܝܬܳܐ ܘܗܰܘܢܳܐ ܒܫܽܘܠܛܳܢܳܐ ܚܺܐܪܳܝܳܐ ܕܨܶܒܝܳܢܳܐ.

 

ܒܙܰܘܥܳܐ ܡܚܰܝܕܳܐ ܕܢܰܦܫܳܐ ܘܰܕܦܰܓܪܳܐ. ܡܶܛܽܠ ܕܙܰܘܥܳܐ ܡܚܰܝܕܰܐ ܗ̱ܘ. ܘܥܰܠ ܗܳܕܶܐ ܠܰܘ ܙܰܒܢܰܐ ܗ̱ܘ ܕܢܺܐܡܰܪ. ܡܶܛܽܠ ܕܢܺܝܫܰܢ ܐ̱ܚܪܺܢܰܐ ܗ̱ܘ. ܗܽܘ ܓܶܝܪ ܗܳܢܳܐ ܙܰܘܥܳܐ ܡܚܰܝܕܳܐ܉ ܐܰܚܺܝܕ ܠܶܗ ܡܰܕܥܳܐ. ܘܡܰܥܒܶܕ ܒܶܗ ܚܽܘܫܳܒܳܐ. ܘܰܡܛܰܟܶܣ ܗܰܘܢܳܐ ܦܳܪܽܘܫܳܐܺܝܬ. ܘܡܶܬܚܰܝܰܠ ܪܶܥܝܳܢܳܐ ܠܘܳܬ ܣܽܘܥܪܳܢܳܐ ܕܰܡܝܰܬܪܽܘܬܳܐ: ܟܰܕ ܡܥܰܬܶܕ ܠܶܗ ܨܶܒܝܳܢܳܐ ܒܫܽܘܠܛܳܢܳܐ ܕܚܺܐܪܽܘܬܶܗ. ܒܗܽܘܢ ܒܗܳܠܶܝܢ ܪ̈ܶܓܫܶܐ ܕܦܰܓܪܳܐ܇ ܘܚܰܝܠܳܐ ܕܦܳܪܽܘܫܽܘܬܳܐ ܦܰܓܪܳܢܳܝܬܳܐ: ܐܰܝܟ ܕܶܐܡܰܪܢ ܚܕܳܐ ܙܒܰܢ܀

 

ܟܽܠ ܓܶܝܪ ܕܡܶܬܬܙܺܝܥ܉ ܐܰܘ ܡܶܢ ܠܒܰܪ ܡܶܬܬܙܺܝܥ܉ ܐܰܘ ܡܶܢ ܠܓܰܘ. ܕܡܶܢ ܠܓܰܘ ܓܶܝܪ ܘܡܶܢ ܢܰܦܫܶܗ ܡܶܬܬܙܺܝܥ ܒܰܪܢܳܫܳܐ܉ ܛܳܒ ܓܰܠܝܳܐ ܠܟܽܠܢܳܫ. ܡܳܕܶܝܢ ܡܶܢ ܝܳܬ̥ܶܗ ܘܡܶܢ ܢܰܦܫܶܗ ܡܶܬܬܙܺܝܥ ܦܰܓܪܳܐ ܒܟܽܠܗܽܘܢ ܪ̈ܶܓܫܰܘܗܝ. ܘܗܰܕܳܡ̈ܶܐ ܡܰܥܒ̈ܕܳܢܶܐ ܘܰܡܕܰܒܪ̈ܳܢܶܐ܀

 

ܗܰܕܳܡ̈ܶܐ ܪ̈ܺܝܫܳܝܶܐ ܘܰܡܕܰܒܪ̈ܳܢܶܐ ܕܦܰܓܪܳܐ ܐܺܝܬܰܝܗܽܘܢ܉ ܡܽܘܚܳܐ. ܘܟܰܒܕܳܐ. ܘܠܶܒܳܐ. ܘܶܐܣܛܽܘܡܟܳܐ. ܘܟܽܘܠ̈ܝܳܬܳܐ. ܘܚܰܝ̈ܠܶܐ ܕܰܒܗܽܘܢ܉ ܦܳܪܽܘܫܽܘܬܳܐ. ܘܪܶܓܬܳܐ. ܘܪܽܘܓܙܳܐ. ܘܡܶܬܝܰܐܒܳܢܽܘܬܳܐ. ܘܰܪܓܶܫܬܳܐ. ܪܓܶܫܬܳܐ ܕܶܝܢ ܐܺܝܬܶܝܗ̇ ܒܡܽܘܚܳܐ. ܘܦܳܪܽܘܫܽܘܬܳܐ ܒܠܶܒܳܐ. ܘܪܶܓܬܳܐ ܒܶܐܣܛܽܘܡܟܳܐ. ܘܡܶܬܝܰܐܒܳܢܽܘܬܳܐ ܒܟܽܘܠ̈ܝܳܬܳܐ. ܘܪܽܘܓܙܳܐ ܒܟܰܒܕܳܐ. ܒܗܳܠܶܝܢ ܕܶܝܢ ܕܢܰܦܫܳܐ ܡܽܘܚܳܐ ܡܫܰܡܶܫ ܠܗܰܘܢܳܐ. ܘܦܳܬܚܺܝܢ ܠܶܗ ܚܰܡܫܳܐ ܪ̈ܶܓܫܺܝܢ. ܚܙܳܬܳܐ. ܘܫܶܡܥܳܐ. ܘܣܰܘܩܳܐ. ܘܰܛܥܳܡܬܳܐ. ܘܓܶܫܬܳܐ. ܠܶܒܳܐ ܕܶܝܢ ܡܰܕܥܳܐ. ܕܩܰܪܺܝܒܺܝܢ ܠܶܗ܉ ܟܰܒܕܳܐ ܘܶܐܣܛܽܘܡܟܳܐ ܘܚܶܠܒܳܐ ܦܳܪܽܘܫܳܐ. ܡܶܬܩܪܶܐ ܡܩܰܪܡܳܐ ܕܠܶܒܳܐ. ܘܟܽܘܠ̈ܝܳܬܳܐ ܕܰܡܚܰܙ̈ܩܳܢ ܘܰܐܚܺܝ̈ܕܳܢ ܒܡܱ̈ܬܢܳܬܳܐ. ܠܪܶܥܝܳܢܳܐ ܡܫܰܡܶܫ ܚܶܠܒܳܐ ܦܳܪܽܘܫܳܐ܉ ܟܰܕ ܫܳܩܶܠ ܡܶܢ ܠܶܒܳܐ ܚܰܝܠܳܐ ܕܙܰܘܥܳܐ. ܒܝܰܕ ܕܡܳܐ ܡܫܰܡܶܫ ܘܰܡܬܰܪܣܶܐ܇ ܥܽܘܩܰܒܪ̈ܳܬܳܐ ܕܰܡܙܺܝ̈ܥܳܢ ܠܶܗ ܥܰܡ ܬܽܘ̈ܬܶܐ ܕܡܶܫ̈ܬܰܡܗܳܢ ܬܺܐܪ̈ܳܬܳܐ ܘܣܺܝ̈ܡܳܢ ܒܚܶܠܒܳܐ ܬܰܪܒܳܢܳܐ ܕܰܠܥܶܠ ܡܶܢܶܗ܀ ܟܽܘܠ̈ܝܳܬܳܐ ܠܚܽܘ̈ܫܳܒܶܐ. ܡܰܫ̈ܩܠܳܢ ܐܳܦ ܗܶܢܶܝܢ ܙܰܘ̈ܥܶܐ ܡܶܢܶܗ ܡܶܢ ܠܶܒܳܐ ܒܝܰܕ ܘܰܪ̈ܺܝܕܶܐ ܕܰܡܚܰܙܩܺܝܢ ܘܰܡܩܰܛܪܺܝܢ ܒܡܱ̈ܬܢܳܬܳܐ܀ ܪܶܓܬܳܐ ܕܶܝܢ ܒܶܐܣܛܽܘܡܟܳܐ ܘܪܽܘܓܙܳܐ ܒܟܰܒܕܳܐ.

 

ܨܶܒܝܳܢܳܐ ܕܶܝܢ ܕܚܺܐܪܽܘܬܳܐ ܠܳܐ ܡܰܨܝܳܐ ܕܢܶܗܘܶܐ܇ ܒܡܽܘܙܳܓܳܐ ܕܥܰܡ ܦܰܓܪܳܐ. ܐܶܠܳܐ ܕܺܝܠܶܗ ܗ̱ܝ̣ ܕܢܶܬܚܰܝܰܠ ܐܰܘ ܕܢܶܫܬܰܦܰܠ. ܗܳܠܶܝܢ ܕܶܝܢ ܐ̱ܚܪ̈ܳܢܶܐ ܚܰܝ̈ܠܶܐ ܕܰܡܠܺܝܠܽܘܬܳܐ ܐܰܘ ܕܰܡܢܳܬܳܐ ܚܰܝܽܘܬܳܢܳܝܬܳܐ܉ ܡܶܬܚܰܝܠܺܝܢ ܕܶܝܢ ܒܰܙܒܰܢ ܡܶܢ ܡܰܥܒܕܳܢܽܘܬܳܐ ܕܦܰܓܪܳܐ ܘܰܕܢܰܦܫܳܐ ܐܰܘ ܬܳܚܒܺܝܢ^[4]: ܐܰܝܟ ܕܢܶܬܕܰܘܰܕ ܒܰܪܢܳܫܳܐ ܒܗܰܘܢܶܗ ܡܶܢ ܢܶܟܝܳܢܳܐ ܕܡܽܘܚܳܐ. ܗܳܟܰܢܳܐ ܐܳܦ ܗܳܠܶܝܢ ܐ̱ܚܪ̈ܳܢܶܐ ܕܡܰܕܥܳܐ ܘܚܽܘܫܳܒܳܐ ܘܪܶܥܝܳܢܳܐ ܐܰܘ ܥܰܙܺܝܙܽܘܬ̥ܳܗ̇ ܕܚܶܡܬܳܐ ܐܰܘ ܣܰܓܺܝܐܘܬܳܗ̇ ܕܪܶܓܬܳܐ. ܟܰܕ ܛܳܒ ܫܰܠܺܝܛ ܨܶܒܝܳܢܳܐ ܘܠܳܐ ܣܺܝܡ ܬܚܶܝܬ ܫܽܘܥܒܳܕܳܐ ܕܰܪܓܶܫܬܳܐ ܕܦܰܓܪܳܐ܉ ܡܶܬܥܰܡܶܝܢ [ܡܶܬܠܰܡܶܝܢ] ܕܶܝܢ ܒܰܙܒܰܢ ܚܰܝ̈ܠܶܝܗ̇ ܕܢܰܦܫܳܐ ܡܶܢ ܣܳܥܽܘܪܽܘܬܳܐ ܕܰܒܗܽܘܢ. ܘܗܳܘܶܐ ܐ̱ܢܳܫ ܕܠܳܐ ܚܽܘܫܳܒܳܐ܉ ܘܰܕܠܳܐ ܪܶܓܬܳܐ ܕܰܡܝܰܬܪܽܘܬܳܐ.

 

ܘܒܰܕܓܽܘܢ ܠܶܒܳܐ ܥܶܩܳܪܰܐ ܗ̱ܘ ܕܘܰܪ̈ܺܝܕܶܐ ܘܰܕܫܶܪ̈ܝܳܢܶܐ ܘܝܳܗܶܒ ܙܰܘܥܳܐ ܠܟܽܠܗܽܘܢ. ܘܡܰܪܕܶܐ ܚܰܝܽܘܬܳܐ ܠܟܽܠܶܗ ܓܽܘܫܡܳܐ. ܘܰܡܙܺܝܥ ܥܽܘܩܒܪ̈ܬܐ ܕܣܺܝ̈ܡܳܢ ܥܶܠ ܓܶܢ̱ܒ ܫܶܪ̈ܝܳܢܶܐ. ܡܽܘܚܳܐ ܓܶܝܪ ܥܶܩܳܪܰܐ ܗ̱ܘ ܕܫܶܪ̈ܝܳܢܶܐ. ܘܰܡܫܰܕܰܪ ܪܓܶܫܬܳܐ ܒܟܽܠܶܗ ܓܽܘܫܡܳܐ. ܘܢܰܦܫܳܐ ܚܰܝܬܳܐ ܒܫܶܪ̈ܝܳܢܶܐ ܘܰܒܗܰܕܳܡ̈ܶܐ. ܟܰܒܕܳܐ ܙܳܠܚܳܐ ܚܰܡܺܝܡܽܘܬܳܐ ܒܝܰܕ ܕܡܳܐ܉ ܒܝܰܕ ܫܰܠܦܽܘܚܬܳܐ ܢܽܘܪܳܢܳܝܬܳܐ ܕܣܺܝܡܳܐ ܥܰܠ ܓܰܒܳܗ̇. ܐܶܣܛܽܘܡܟܳܐ ܡܕܰܒܰܪ ܠܟܽܘܠ̈ܝܳܬܳܐ ܠܡܶܬܝܰܐܒܳܢܽܘܬܳܐ ܘܰܠܟܰܒܕܳܐ ܠܘܳܬ ܪܶܓܬܳܐ. ܘܰܠܫܰܪܟܳܐ ܕܗܰܕܳܡ̈ܶܐ ܡܦܰܪܢܶܣ: ܐܰܝܟ ܪܰܒܝܬܳܐ ܦܽܘܪܢܳܣܳܐ ܕܪܶܓܬܗܽܘܢ. ܡܶܢܶܗ ܓܶܝܪ ܫܳܩܶܠ ܪܶܓܬܳܐ ܟܽܠܶܗ ܓܽܘܫܡܳܐ܀

 

ܙܰܘܥܳܐ ܕܶܝܢ ܡܫܰܘܚܕܰܐ ܗ̱ܘ. ܕܣܺܝܡ ܒܠܶܒܳܐ ܘܰܡܫܰܡܶܫ ܠܡܰܕܥܳܐ܉ ܘܰܡܫܰܡܶܫ ܠܚܽܘܫܳܒ̈ܶܐ. ܘܡܳܐ ܕܶܐܬܬܥܺܝܪ ܒܪܶܓܬܳܐ ܕܥܰܠ ܨܒܽܘ ܐܰܝ̇ܕܳܐ ܕܗܺܝ܉ ܫܳܩܠܺܝܢ ܚܰܝܠܳܐ ܕܡܶܬܝܰܐܒܳܢܽܘܬܳܐ ܠܘܳܬ ܪܶܓܬܳܐ ܡܶܢ ܟܽܘܠ̈ܝܳܬܳܐ: ܘܡܶܬܝܰܐܒܺܝܢ ܝܰܥܢܳܐܺܝܬ ܠܘܳܬ ܫܽܘܡܠܳܝܳܐ܉ ܒܬܰܪܥܺܝܬܳܐ ܐܰܝܕܳܐ ܕܰܡܫܰܠܶܛ ܠܗܽܘܢ ܨܶܒܝܳܢܳܐ ܥܠܶܝܗ̇. ܟܰܕ ܡܛܰܟܣ ܗܰܘܢܳܐ ܒܚܰܝܠܳܐ ܕܰܪܓܶܫܬܳܐ ܟܰܕ ܐܶܬܬܙܺܝܥ ܡܶܢ ܙܰܘܥܳܐ ܡܚܰܝܕܳܐ ܕܡܰܕܥܳܐ. ܘܡܳܐ ܕܩܳܐܶܡ ܡܶܨܥܳܐܺܝܬ܉ ܡܶܬܶܐܫܶܕ ܒܶܝܬ ܡܶܨܛܰܠܝܳܢܽܘܬܳܐ ܕܥܳܐܠܳܐ ܡܶܢ ܚܰܫܳܐ ܕܰܠܒܰܪ ܐܰܘ ܕܰܠܓܰܘ܉ ܘܗܳܝܕܶܝܢ ܢܳܦܶܩ ܠܓܶܠܝܳܐ ܗܽܘ ܝܰܠܕܳܐ ܕܟܽܠܗܽܘܢ ܘܢܳܦܶܩ ܠܣܽܘܥܪܳܢܳܐ ܐܰܝܢܳܐ ܕܰܡܫܰܠܶܛ ܠܶܗ ܗܽܘ ܨܶܒܝܳܢܳܐ ܚܺܐܪܳܝܳܐ ܕܢܰܦܫܳܐ܉ ܐܶܢ ܠܛܳܒܬܳܐ ܘܶܐܢ ܠܒܺܝܫܬܳܐ. ܘܡܶܢܳܗ̇ ܡܶܢ ܪܶܓܬܳܐ ܘܪܽܘܓܙܳܐ ܫܳܩܠܺܝܢ ܫܽܘܪܳܝܳܐ ܕܣܽܘܥܪ̈ܳܢܶܐ ܟܽܠܗܽܘܢ܉ ܒܡܰܥܒܕܳܢܽܘܬܳܐ ܡܚܰܝܰܕܬܳܐ ܕܚܰܝ̈ܠܶܐ ܕܢܰܦܫܳܐ ܘܰܕܦܰܓܪܳܐ܉ ܒܶܗ ܒܗܰܘ ܙܰܘܥܳܐ ܡܚܰܝܕܳܐ ܕܝܳܗܶܒ ܠܗܽܘܢ ܫܽܘܪܳܝܳܐ ܘܩܽܘܝܳܡܳܐ.

 

ܐܶܢ ܓܶܝܪ ܬܶܦܓܰܥ ܐܰܢ̱ܬܬܳܐ ܒܐ̱ܢܳܫ܇ ܘܬܶܬܶܐܫܶܕ ܚܙܳܬܶܗ ܥܰܠ ܫܽܘܦܪܳܐ ܕܰܐܦ̈ܶܐ. ܘܢܶܬܬܙܺܝܥ ܡܶܢܫܠܝ ܠܘܳܬ ܪܶܓܬܳܐ ܟܰܕ ܡܶܬܝܰܐܒܺܝܢ ܚܽܘܫܳܒ̈ܶܐ ܠܘܳܬ ܫܽܘܡܠܳܝܳܐ܉ ܘܰܡܙܺܝܥ ܡܰܕܥܳܐ ܠܘܳܬ ܦܽܘܪ̈ܣܶܐ܇ ܘܰܡܛܰܟܶܣ ܗܰܘܢܳܐ ܡܰܦܰܩܬܗܽܘܢ: ܘܡܶܬܓܰܢ̱ܒܰܪ ܪܶܥܝܳܢܳܐ ܠܘܳܬ ܣܽܘܥܪ̈ܳܢܶܐ: ܘܬܳܚܶܒ ܨܶܒܝܳܢܳܐ ܒܪܰܦܝܽܘܬܶܗ: ܘܡܶܫܬܰܠܗܒܺܝܢ ܪ̈ܶܓܫܶܐ ܒܙܰܘ̈ܥܶܐ ܚܰܡܺܝ̈ܡܶܐ ܒܪܶܓܬܳܐ: ܘܡܶܬܓܡܰܪ ܘܡܶܫܬܰܡܠܶܐ ܣܽܘܥܪܳܢܳܐ ܕܰܚܛܺܝܬܳܐ܉ ܒܰܚܕܳܐ ܚܕܳܝܽܘܬܳܐ ܩܢܽܘܡܳܝܬܳܐ ܕܺܝܠܶܗ ܕܒܰܪܢܳܫܳܐ. ܗܳܟܰܢܳܐ ܘܳܐܦ ܒܣܽܘܥܪܳܢܳܐ ܕܙܰܕܺܝܩܽܘܬܳܐ܉ ܡܶܢ ܚܕ ܠܰܐ̱ܚܪܺܝܢ ܡܶܬ̥ܰܐܫܕܺܝܢ ܚܰܝ̈ܠܶܐ ܒܙܰܘ̈ܥܶܐ ܡܚܰܝ̈ܕܶܐ ܕܠܶܒܳܐ܇ ܡܫܰܡܫܳܢܳܐ ܕܡܰܕܥܳܐ. ܘܡܶܬܝܰܒܰܠ ܚܽܘܫܳܒܳܐ ܠܘܳܬ ܪܶܓܬܳܐ ܕܰܡܝܰܬܪ̈ܳܬܳܐ. ܘܡܰܝܬܶܐ ܚܰܝܠܳܐ ܪܶܓܬܳܢܳܐ܉ ܠܘܳܬ ܫܽܘܡܠܳܝܳܐ ܕܣܽܘܥܪܳܢܳܐ. ܟܰܕ ܡܓܰܢ̱ܒܰܪ ܠܗܘܢ ܠܚܽܘ̈ܫܳܒܶܐ ܪܶܥܝܳܢܳܐ܉ ܘܰܡܛܰܟܶܣ ܗܰܘܢܳܐ ܥܒܳܕܳܐ ܕܰܡܝܰܬܪܽܘܬܳܐ ܦܳܪܽܘܫܳܐܺܝܬ ܐܰܝܟ ܡܠܺܝܠܳܐ ܒܫܽܘܠܛܳܢܶܗ ܕܨܶܒܝܳܢܳܐ.

 

ܘܡܶܬܩܰܝܡܳܐ ܚܕܳܐ ܩܢܽܘܡܬܳܢܽܘܬܳܐ ܒܚܰܝܠܳܐ ܕܢܰܦܫܳܐ ܘܰܕܦܰܓܪܳܐ. ܡܶܛܽܠ ܕܳܐܦ ܗܶܢܽܘܢ ܗܳܠܶܝܢ ܗܰܕܳܡ̈ܶܐ ܕܺܐܝܬܰܝܗܽܘܢ ܡܕܰܒܪ̈ܳܢܶܐ ܘܡܰܥܒ̈ܕܳܢܶܐ ܕܣܳܥܽܘܪ̈ܘܳܬܳܐ ܟܽܠܗܶܝܢ ܗܺܝ ܟܰܕ ܗܺܝ ܝܳܗܒܺܝܢ ܚܰܝܠܳܐ ܠܰܚܕܳܕ̈ܶܐ ܠܘܳܬ ܙܰܘܥܳܐ ܕܣܽܘܥܪ̈ܳܢܶܐ. ܘܡܶܬܬܙܺܝܥܺܝܢ ܚܰܝ̈ܠܶܐ ܕܢܰܦܫܳܐ ܥܰܡܗܽܘܢ ܒܗܰܘ ܙܰܘܥܳܐ ܕܶܐܡܰܪܢ ܡܶܢ ܠܥܶܠ. ܘܰܡܚܰܝܕܺܝܢ ܡܕܰܒܪܳܢܽܘܬܳܐ ܘܡܰܥܒܕܳܢܽܘܬܳܐ ܕܣܽܘܥܪ̈ܳܢܶܐ ܠܰܚܕܳܐ ܩܢܽܘܡܬܳܢܽܘܬܳܐ ܕܒܰܪܢܳܫܳܐ. ܐܶܢ ܡܶܢ ܠܒܰܪ ܢܶܬܬܙܺܝܥܽܘܢ ܒܰܐܝܠܶܝܢ ܕܦܳܓܥܺܝܢ܉ ܐܰܘ ܡܶܢ ܠܓܰܘ ܒܚܰܫ̈ܶܐ ܕܺܝܠܳܢܳܝ̈ܶܐ ܒܚܰܝܠܳܐ ܟܝܳܢܳܝܳܐ ܕܪܶܓܬܳܐ ܘܰܕܪܽܘܓܙܳܐ. ܟܰܕ ܣܺܝܡ ܚܽܘܫܳܒܳܐ ܒܡܶܨܥܰܬ ܬܰܪܬܶܝܢ܉ ܒܫܽܘܠܛܳܢܳܐ ܕܨܶܒܝܳܢܳܐ ܚܺܐܪܳܝܳܐ ܘܰܕܡܰܥܒܕܳܢܽܘܬܳܐ ܘܕܰܡܠܺܝܠܽܘܬܳܐ. ܘܡܶܬܚܰܝܰܠ ܘܬܳܚܶܒ ܘܡܶܨܛܠܶܐ ܠܘܳܬ ܓܒܳܝܬܳܐ ܨܶܒܝܳܢܳܝܬܳܐ ܕܣܽܘܥܪܳܢܳܐ ܐܰܝܢܳܐ ܕܗܽܘ ܕܛܳܒܬܳܐ ܐܰܘ ܕܒܺܝܫܬܳܐ. ܟܰܕ ܐܳܦ ܒܰܙܒܰܢ ܡܚܰܝ̈ܕܳܢ ܠܰܚ̈ܕܳܕܶܐ܉ ܐܳܦ ܡܢܰܘ̈ܳܬܳܐ ܕܢܰܦܫܳܐ܉ ܒܗܽܘܢ ܒܚܰܝ̈ܠܶܐ ܗܳܠܶܝܢ ܕܶܐܡܰܪܢ. ܪܶܓܬܳܐ ܕܶܝܢ ܐܰܝܟ ܡܰܢ ܕܡܶܢ ܫܽܘܪܳܝܳܐ ܐܺܝܬܶܝܗ̇ ܕܟܽܠܗܽܘܢ ܣܽܘܥܪ̈ܳܢܶܐ܉ ܒܰܕܡܶܢܳܗ̇ ܫܳܩܶܠ ܫܽܘܪܳܝܳܐ ܙܰܘܥܳܐ ܕܰܒܠܶܒܳܐ ܕܰܡܫܰܡܶܫ ܠܡܰܕܥܳܐ. ܚܰܝܠܳܐ ܡܝܰܬܪܳܐ ܕܰܡܠܺܝܠܽܘܬܳܐ܉ ܘܟܶܢ ܪܳܕܶܐ ܘܢܳܚܶܬ ܒܡܶܬܝܰܐܒܳܢܽܘܬܳܐ ܕܟܽܘܠ̈ܝܳܬܳܐ ܠܚܽܘܫܳܒܳܐ. ܘܡܶܬܚܰܝܰܠ ܪܶܥܝܳܢܳܐ ܡܶܢ ܡܰܥܒܕܳܢܽܘܬܶܗ܉ ܡܶܢ ܚܶܠܒܳܐ ܗܰܘ ܕܡܶܫܬܰܡܰܗ ܬܰܪܥܺܝܬܳܐ. ܘܡܶܬܥܰܫܰܢ ܘܣܳܠܶܩ ܒܚܰܝܠܳܐ ܕܟܰܒܕܳܐ܉ ܒܶܗ ܒܗܰܘ ܙܰܘܥܳܐ ܓܰܘܳܢܳܝܳܐ ܘܰܡܚܰܝܕܳܐ ܠܘܳܬ ܪܽܘܓܙܳܐ. ܟܰܕ ܡܙܺܝܥ ܗܰܘܢܳܐ ܠܚܽܘܫܳܒ̈ܶܐ. ܘܰܡܛܰܟܶܣ ܦܽܘܪ̈ܣܶܐ..

 

ܣܳܝܽܘܿܡܳܐ ܡܳܪܝ ܐܰܚܽܘܕܶܡܶܗ (†575).

 

ܢܽܘܼܗܳܪܳܐ: ܠܩܺܝܼܛ ܘܰܩܛܺܝܼܦ ܒܽܘܼܚܳܢܳܐ ܗܳܢܳܐ ܡܶܢ ܟܬܳܒܳܐ ܕ BnF Gallica TRAITE D'AHUDEMEH SUR L'HOMME  ܒܝܕ ܡܰܠܦܳܢܳܐ ܥܺܝܼܣܰܐ ܕܶܡܺܝܼܪ ܗܳܢܳܐ ܕܚܳܝܶܐ ܒܐܰܘܣܛܽܘܼܪܝܳܐ. ܬܰܘܕܺܝ ܣܰܓܺܝ ܠܡܰܕܥܶܗ ܦܳܪܽܘܿܫܳܐ ܘܰܛܢܳܢܶܗ ܠܶܫܳܢܳܝܳܐ ܘܥܰܡܠܶܗ ܣܳܦܪܽܘܼܬܳܢܳܝܐ.

 

ܦܳܪܽܘܿܣܳܐ ܝܰܘܣܶܦ ܒܶܓܬܰܫ

 

 

[1]  ܕܥܽܘܩܳܒܶܗ

 ܡܶܬܕܰܪܟܳܐ[2]

 ܫܪܺܝܚܽܘܬܳܗܿ[3]

[4]  ܐܰܘ ܕܢܰܦܫܳܐ ܬܳܚܒܺܝܢ