ܫܪܒܐ ܕܡܠܦܢܐ ܝܘܣܦ ܒܓܬܫ

ܗܽܘܼܝܽܘܼ ܝܰܘܣܶܦ ܒܰܪ ܢܽܘܼܪܺܝܰܐ ܨܳܝܨܰܠ ܡܼܶܢ ܫܰܪܒܬܳܐ ܕܒܶܝܬ ܐܰܚܳܐ ܕܡܶܕܝܰܕ ܡܕܺܝܼܢ̱ܬܳܐ ܘܩܰܫܺܝܼܫܳܐ ܬܳܐܘܡܰܐ ܒܶܓܬܰܫ ܡܼܶܢ ܫܰܪܒܬܳܐ ܕܒܶܝܬ ܝܰܘܣܶܦ ܕܗܰܣܣܰܢܰܐ ܩܪܺܝܼܬܳܐ. ܘܺܝܼܠܺܝܼܕ ܫܢܰܬ 1967 ܒܳܗܿ ܒܰܩܪܺܝܼܬܳܐ ܗܳܕܶܐ ܕܣܺܝܼܡܳܐ ܒܰܫܦܽܘܼܠ ܛܽܘܼܪܳܐ ܕܩܰܪܕܽܘ. ܘܐܶܬܪܰܒܺܝ ܘܐܶܬܪܕܺܝ ܒܡܶܕܝܰܕ ܟܰܪ ܕܩܰܕܺܝ ܝܽܘܼܠܦܳܢܶܗ ܫܰܪܘܳܝܳܐ ܘܡܶܨܥܳܝܳܐ ܣܽܘܼܪܝܳܐܝܼܬ ܘܬܽܘܼܪܟܳܐܝܼܬ ܒܥܺܕ̈ܳܬܳܗܿ ܘܡܰܕܪ̈ܫܳܬܳܗܿ ܪ̈ܽܘܼܫܡܳܝܬܳܐ. ܘܒܺܝܪܰܚ ܟܳܢܽܘܢ ܩܕܺܝܼܡ ܕܰܫܢܰܬ 1989 ܫܰܘܬܶܦ ܚܰܝܰܘ̈ܗܝ ܥܰܡ ܒܰܪܬ ܙܰܘܓܶܗ ܟܰܢܝܼܡܶܐ ܟܶܣܠܶܪ ܟܦܰܪܙܳܝܰܬ ܫܶܪܫܳܐ ܡܼܶܢ ܫܰܪܒܬܳܐ ܕܒܶܝܬ ܡܰܠܟܽܘܿܢܳܐ. ܒܪܰܡ ܒܰܪܬ ܬܰܪܒܺܝܼܬܳܐ ܕܡܶܕܝܰܕ. ܘܐܶܬܒܰܪܰܟ ܙܽܘܼܘܳܓܳܐ ܗܳܢܳܐ ܒܰܬܪܶܝܢ ܒܢ̈ܰܝܳܐ ܘܰܬܠܳܬ ܒܢ̈ܳܬܳܐ.

1981-1985 ܥܰܠ ܠܕܰܝܪܳܐ ܕܡܳܪܝ ܓܰܒܪܐܝܠ ܟܰܪ ܕܬܰܩܶܢ ܝܽܘܼܠܦܳܢܶܗ ܣܽܘܼܪܝܳܝܳܐ ܘܥܺܕܳܬܢܳܝܳܐ. ܘܰܬܢܳܢ ܫܰܡܠܺܝܼ ܡܰܕܪܰܫܬܳܐ ܥܶܠܳܝܬܳܐ lise / high school ܒܡܶܕܝܰܕ. ܪܰܒܰܬ ܨܳܒܶܐ ܗ̱ܘܳܐ ܕܢܶܥܽܘܼܠ ܘܢܶܕܪܽܘܿܫ ܝܽܘܼܠܦܳܢܳܐ ܒܶܝܬ ܨܰܘܒܳܝܳܐ ܒܪܰܡ ܨܶܒܝܳܢܶܗ ܗܳܢܳܐ ܠܳܐ ܐܶܫܬܰܡܠܺܝܼ ܡܕܰܒܪܳܢܽܘܼܬܳܢܳܐܝܼܬ.

1985-2005 ܫܩܰܠ ܕܰܘܪܳܐ ܩܪܺܝܼܚܳܐ ܘܚܰܘܣܳܢܳܝܳܐ ܒܚܰܘ̈ܩܶܐ ܦܪ̈ܺܝܼܫܶܐ ܘܪ̈ܺܝܼܫܳܝܶܐ ܕܥܽܘܼܡܪܳܐ ܕܡܳܪܝ ܓܰܒܪܐܝܠ ܘܚܰܣܝܽܘܼܬܳܐ ܕܛܽܘܼܪܥܰܒܕܝܢ. ܘܰܒܡܶܬܚܳܐ ܕܕܰܘܪܳܐ ܗܳܢܳܐ ܐܰܫܩܺܝܼ ܚܰܘ̈ܩܰܘܗܝ ܚܠܺܝܼܨܳܐܝܬ ܘܫܰܡܠܺܝ ܡܶܬܬܚܺܝܼ̈ܒܳܢܝܳܬܶܗ ܫܦܺܝܼܥܳܐܝܬ ܒܐܺܝܼܩܳܪܳܐ ܕܠܳܐ ܦܳܪܫ ܗܳܢܳܐ ܡܼܶܢ ܗܿܰܘ ܒܪܽܘܼܚܳܐ ܘܰܫܪܳܪܳܐ «ܕܪܳܥܝܳܐ ܛܒܐ». ܒܰܕ ܗܽܘܼ̈ܕܳܣܰܘܗܝ ܟܽܘܼܫܳܪ̈ܳܝܶܐ ܘܚܽܘܼ̈ܦܳܛܰܘܗܝ ܦܽܘܼܪ̈ܢܳܣܳܝܶܐ ܡܶܫܬܰܒܠܺܝܼܢ ܗ̱ܘܰܘ ܗܳܝܕܶܝܟ ܒܝܰܕ ܪ̈ܶܓܫܶܐ ܐܶܢܰܚ̈ܢܳܝܶܐ ܕܪܰܒܰܬ ܒܰܝܬܳܝܘܼܬܳܐ ܚܕܳܐ ܕܰܥܛܺܝܼܦܳܐ ܗ̱ܘܳܬ ܡܰܕܠܳܢܽܘܼܬܳܐ ܘܡܰܩܠܳܢܽܘܼܬܳܐ ܒܗܳܠܶܝܢ ܕܰܡܕܰܒܪܳܢܽܘܼܬܳܐ ܘܡܰܠܦܳܢܽܘܼܬܳܐ ܘܟܳܬܽܘܿܒܽܘܼܬܳܐ ܘܡܳܠܽܘܿܟܽܘܼܬܳܐ ܘܐܶܣܳܪ̈ܶܐ ܒܰܪ̈ܳܝܶܐ ܕܥܽܘܼܡܪܳܐ ܥܰܡ ܘܳܠܝ̈ܳܬܳܐ ܕܰܟܢܽܘܼܫܝܳܐ ܕܥܺܕ̈ܳܬܳܐ ܕܥܳܠܡܳܐ. ܘܰܗܘܳܐ ܒܰܪ ܝܰܡܺܝܼܢܳܐ ܕܡܳܪܝ ܛܺܝܡܳܬܶܐܘܣ ܫܡܽܘܼܐܝܠ ܐܰܩܛܰܫ ܒܙܰܒܢܳܐ ܡܰܪܺܝܼܪܳܐ ܘܚܰܪܺܝܼܦܳܐ ܘܩܰܫܝܳܐ ܕܐܺܝܼܬܽܘܼܬܳܐ ܘܠܰܝܬܳܝܽܘܼܬܳܐ. ܟܰܕ ܡܕܰܠܩܶܒ ܓܳܠܘܼܬܳܐ ܡܰܪܺܝܪܬܳܐ ܘܡܶܬܥܰܙܶܐ ܒܰܐܬܪ̈ܳܢܳܝܳܬܳܐ ܘܰܡܚܰܡܣܶܢ ܒܢܽܘܼܛܳܪܳܐ ܘܣܽܘܼܬܳܪܳܐ ܕܫܶܪ̈ܫܶܐ ܐܺܝܼܬܽܘܼ̈ܬܳܢܳܝܶܐ ܕܝܳܪܬܽܘܼܬܳܐ ܣܽܘܼܪܝܳܝܬܳܐ ܒܰܝܢܳܬ ܒܠܺܝܼܠܽܘܼܬܳܐ ܐܰܬܪܳܢܳܝܬܳܐ ܕܰܚܒܺܝܼܨܐܳ ܘܰܫܚܺܝܼܩܳܐ ܗ̱ܘܳܬ ܗܳܝܕܶܝܟ ܒܬܰܟܬܽܘܼ̈ܫܶܐ ܒܰܪ̈ܳܝܶܐ ܘܰܙܪܺܝܼܒܳܐ ܘܰܨܠܺܝܼܦܳܐ ܗ̱ܘܳܬ ܒܰܨ̈ܠܳܝܶܐ ܬܰܢܘ̈ܳܝܶܐ ܕܕܽܘܼܒܳܪ̈ܶܐ ܩܨܺܝܼ̈ܨܶܐ.

1995-2000  ܫܰܡܠܺܝ ܡܰܨܚܳܢܽܘܼܬܳܐ ܕܰܡܓܰܠܰܬ «ܩܳܠܐ ܕܛܽܘܼܪܥܰܒܕܝܢ» ܗܿܳܝ ܕܡܶܬܦܰܪܣܳܐ ܗ̱ܘܳܬ ܒܝܰܕ «ܚܰܒܪ̈ܶܐ ܕܛܽܘܼܪܥܰܒܕܺܝܢ» ܣܽܘܼܪܝܳܐܝܼܬ ܘܬܽܘܼܪܟܳܐܝܼܬ ܘܐܶܢܓܠܺܝܼܫܳܐܝܼܬ ܘܰܐܠܡܰܢܳܐܝܼܬ.

2005-2014 ܢܣܰܒ ܕܰܘܪܳܐ ܒܰܡܕܰܒܪܳܢܽܘܼܬܳܐ ܕܕܰܝܪܳܐ ܕܟܽܘܼܪܟܡܳܐ ܕܡܰܪܕܺܝܢ. ܘܰܗܘܳܐ ܒܰܪ ܝܰܡܺܝܼܢܳܐ ܕܡܳܪܝ ܦܺܝܠܳܘܟܣܺܝܢܳܘܣ ܨܰܠܺܝܒܰܐ ܐܳܙܡܰܢ. ܘܫܰܡܠܺܝ ܘܳܠܝ̈ܳܬܳܐ ܕܟܳܬܽܘܿܒܽܘܼܬܳܐ ܘܐܶܣܳܪ̈ܶܐ ܒܰܪ̈ܳܝܶܐ.

2016-2019 ܗܘܼܳܐ ܗܰܕܡܳܐ ܒܩܶܫܬܳܐ ܕܡܰܨܚܳܢܽܘܼܬܳܐ ܕܰܡܓܰܠܰܬ «ܐܰܫ̈ܠܰܝ ܢܨܰܒܰܐ» ܗܿܝ ܕܡܶܬܦܰܪܣܳܐ ܗ̱ܘܳܬ ܒܐܶܢܓܶܠܛܰܪܰܐ ܒܰܬܪܶܝܢ ܠܶܥ̈ܙܶܐ ܕܠܶܫܳܢܳܐ ܣܽܘܼܪܝܳܝܳܐ: ܡܰܕܢܚܳܝܳܐ ܘܡܰܥܪܒܳܝܳܐ.

2017-2020 ܗܘܳܐ ܡܦܰܫܩܳܢܳܐ ܘܰܡܒܰܕܩܳܢܐ ܕܫܰܒܥܺܝܢ ܬܰܚܪ̈ܙܳܬܳܐ «ܕܫܽܘܼܡܠܳܝܳܐ» ܒܫܰܪ̈ܒܶܐ ܝܽܘܼܠܦ̈ܢܳܝܶܐ ܘܡܰܪ̈ܕܘܼܬܳܢܳܝܶܐ ܣܽܘܼܪܝܳܐܝܼܬ ܘܬܽܘܼܪܟܳܐܝܼܬ. ܘܟܽܠ ܦܳܣܽܘܿܩܳܐ 40-45 ܩܰܛܺܝ̈ܢܳܢ. ܘܐܶܬܦܪ̈ܶܣܝ ܒܣܽܘܪܳܝܳܐ TV. ܘܰܫܒ̈ܰܩܝ ܫܶܡܥܳܐ ܒܰܣܺܝܼܡܳܐ ܒܰܝܢܳܬ ܓܰܘܳܐ.

ܘܐܰܝܟ ܒܰܪ ܝܰܡܺܝܼܢܳܐ ܕܰܚܣ̈ܰܝܳܐ ܕܰܦܢܺܝܼܬܳܐ ܦܳܫ ܘܟܰܬܰܪ ܒܰܡܕܰܒܪܳܢܽܘܼܬܳܐ ܕܥܺܕܬܳܐ ܐܰܬܪܳܢܳܝܬܳܐ ܝܰܬܺܝܼܪ ܡܼܶܢ ܬܠܳܬܺܝܢ ܫܢ̈ܺܝܢ ܟܰܕ ܡܫܰܡܠܶܐ ܬܶܫܡܶܫܬܳܐ ܣܒܺܝܼܣܰܬ ܚܰܘ̈ܩܶܐ ܒܝܰܕ ܚܰܝܠܳܐ ܡܠܺܝܼܠܳܐ ܕܩܳܛܶܦ ܡܼܶܢ ܣܽܘ̈ܟܳܠܐ ܡܰܟܺܝܼ̈ܟܶܐ ܘܕܽܘܼܒܳܪ̈ܶܐ ܬܰܡܺܝܼ̈ܡܶܐ «ܕܪܳܥܝܳܐ ܛܳܒܳܐ» ܥܒܳܕܢܳܐܝܼܬ. ܒܰܕ ܡܗܰܝܡܶܢ ܕܟܽܠ ܝܕܰܥܬܳܐ ܛܳܥܢܳܐ ܒܓܰܘܳܗܿ ܡܫܰܐܠܽܘܼܬܳܐ ܬܺܐܪܬܳܢܳܝܬܳܐ. ܘܗܿܐ ܡܐܰܡܶܢ ܘܡܰܩܶܦ ܚܘܼ̈ܦܳܛܰܘܗܝ ܡܰܪ̈ܕܽܘܼܬܳܢܳܝܶܐ ܘܦܽܘܼ̈ܠܚܳܢܰܘܗܝ ܟܢܽܘܼ̈ܫܝܳܝܶܐ ܒܦܳܪܽܘܿܫܽܘܼܬܳܐ ܕܚܳܙܝܳܐ ܝܽܘܼܩܪܳܐ ܡܢܰܬܥܳܢܐ ܕܫܶܒܩܰܬ ܡܰܪܕܽܘܼܬܳܐ ܣܽܘܼܪܝܳܝܬܳܐ ܒܰܣ̈ܚܳܦܶܐ ܛܡܺܝܼܪ̈ܶܐ ܕܝܽܘܼܒܳܠܐ ܕܐ̱ܢܳܫܘܬܳܐ. ܘܡܶܟܳܐ ܩܳܛܦ ܢܽܘܼܗܪܳܐ ܕܚܘܼ̈ܫܳܒܰܘܗܝ ܗܿܳܢܽܘܢ ܕܰܡܨܰܝܒܺܝܢ ܬܰܪܥܺܝܼܬܶܗ ܘܬܰܪܒܺܝܼܬܶܗ ܘܡܰܪܕܺܝܬܶܗ.

ܡܕܰܒܪܳܢܰܐ ܗ̱ܘ ܕܰܟܢܘܼܫܰܬ «ܡܰܪܕܽܘܼܬܳܐ ܘܣܶܦܪܳܝܘܼܽܬܳܐ ܕܠܶܫܳܢܳܐ ܣܽܘܼܪܝܳܝܳܐ» ܒܡܰܪܕܺܝܢ ܟܰܪ ܕܥܳܡܰܪ ܘܰܡܦܰܪܢܶܣ ܦܽܘܼ̈ܠܚܳܢܰܘܗܝ. ܘܪܺܝܼܫܳܢܰܐ ܗ̱ܘ ܬܪܰܝܳܢܳܐ ܕܚܽܘܼܝܳܕܳܐ ܐܰܘܝܽܘܼܬܳܢܳܝܳܐ ܘܰܟܢܽܘܼܫܝܳܝܳܐ ܕܡܰܪܕܺܝܢ ܗܳܢܳܐ ܕܚܳܒܶܫ ܒܓܰܘܶܗ ܠܐܦ̈ܝ 16000 ܗܰܕ̈ܡܶܐ ܡܰܫ̈ܠܡܳܢܶܐ 65 ܚܽܘܼܕܪ̈ܶܐ ܐܰܡܢ̈ܳܝܶܐ ܡܼܶܢ ܟܽܘܼܪ̈ܕܳܝܶܐ ܘܥܰܪ̈ܒܳܝܶܐ ܕܰܦܢܺܝܬܳܐ. ܘܗܰܕܳܡܰܐ ܗ̱ܘ ܕܚܽܘܼܝܳܕܳܐ ܕܣܳܝܽܘܼ̈ܡܶܐ ܘܣܳܦܪ̈ܶܐ ܣܽܘܼܪ̈ܝܳܝܶܐ ܕܥܺܝܼܪܰܩ ܘܰܕܡܰܘܬܒܳܐ ܡܶܬܡܰܠܟܳܢܳܝܳܐ ܕܒܶܝܬ ܨܰܘܒܳܐ ܕܐܰܪܬܽܘܩܠܽܘ ܕܡܰܪܕܺܝܢ. ܘܣܳܝܽܘܿܡܰܐ ܗ̱ܘ ܕܕܰܦܳܐ ܢܰܘܠܳܝܳܐ ܕܺܝܼܠܳܢܳܝܳܐ ܕܟܰܪܝܳܐ ܚܠܺܝܼܨܳܐ www.karyohliso.com ܗܳܢܳܐ ܕܒܶܗ ܦܳܪܶܣ ܡܺܐܡܪ̈ܳܬܳܐ ܡܰܪ̈ܕܽܘܼܬܢܳܝܬܳܐ ܒܐܰܪܒܥܳܐ ܠܶܫ̈ܳܢܶܐ: ܣܽܘܼܪܝܳܝܳܐ ܘܬܽܘܼܪܟܳܝܳܐ ܘܥܰܪܒܳܝܳܐ ܘܐܶܢܓܠܺܝܼܫܳܝܳܐ. ܟܰܕ ܡܳܙܶܓ ܗܿܰܘ ܕܥܰܬܺܝܼܩ ܘܐܰܒܳܗܳܝ ܒܣܽܘܼܠܓܳܣܳܐ ܚܰܕܬܳܐ ܝܽܘܼܠܦܳܢܳܝܳܐ ܘܕܳܪܢܳܝܳܐ.

 

ܘܚܰܕ ܗ̱ܽܘܼ ܡܼܶܢ ܟܳܬܽܘ̈ܒܶܐ ܕܰܗܘܳܐ ܠܶܗ ܫܰܘܬܳܦܽܘܼܬܳܐ ܒܛܽܘܼܝܳܒܳܐ ܘܰܦܪܳܣܳܐ ܕܰܟܬܳܒܳܐ ܬܽܘܼܪܟܳܝܳܐ ܕܰܛܥܺܝܼܢ ܥܶܠܰܘܰܝ «ܫܠܳܡܐ». ܘܝܼܺܨܶܦ ܕܡܰܥܒܪܳܢܽܘܼܬܳܐ ܘܰܦܪܳܣܳܐ ܕܰܟܬܳܒܳܐ ܕ«ܫܶܪ̈ܫܶܐ ܣܽܘܼܪ̈ܝܳܝܶܐ ܕܠܶܥܙܳܐ ܡܶܪܕܺܝܼܢܳܝܳܐ» ܕܰܡܢܳܚܳܐ ܡܰܠܦܳܢܳܐ ܣܰܥܰܕ ܣܰܥܕܺܝܼ ܬܽܘܪܟܳܐܝܼܬ. ܘܐܰܥܒܰܪ «ܡܽܘܼ̈ܫܚܳܬܳܐ ܕܒܰܪܥܶܒܪܳܝܐ» ܡܼܶܢ ܣܽܘܼܪܝܳܝܳܐ ܠܬܽܘܼܪܟܳܝܳܐ ܥܰܡ ܕܳܟܬܳܪ ܘܶܝܣܶܠ ܒܰܫܓܺܝ. ܘܰܟܬܳܒܳܐ ܗܳܢܳܐ ܥܬܺܝܼܕ ܕܢܶܬܦܪܶܣ ܣܽܘܼܪܝܳܐܝܼܬ ܘܬܽܘܼܪܟܳܐܝܼܬ ܒܡܶܠܬܳܐ ܪܘܺܝܼܚܬܳܐ ܕܬܳܢܝܳܐ ܫܰܪܒܳܐ ܕܡܰܚܟܽܘܼܡܬܳܐ ܪܰܒܳܐ. ܘܣܳܝܽܘܡܰܐ ܗ̱ܘ ܕܡܰܐܘ̈ܳܬܳܐ ܕܡܺܐܡܪ̈ܳܬܳܐ ܬܽܘܼܪ̈ܟܳܝܳܬܳܐ ܘܣܽܘܼܪ̈ܝܳܝܳܬܐ ܥܰܡ ܫܬܳܐ ܟܬܳܒ̈ܶܐ ܦܪ̈ܺܝܼܣܶܐ: «ܟܰܪܝܳܐ ܚܠܺܝܼܨܳܐ» ܘ«ܛܰܣܪܳܪܳܐ ܘܒܽܘܼ̈ܝܳܐܶܐ ܕܣܰܒܪܳܐ» ܣܽܘܼܪܝܳܐܝܼܬ. ܘܚܕ ܬܽܘܪܟܳܝܳܐ ܕܰܛܥܺܝܼܢ ܫܶܡ Süryani Mistisizmi ܘ«ܡܰܪܕܽܘܼܬܳܐ ܣܽܘܼܪܝܳܝܬܳܐ ܘܫܽܘܼܓܢܳܝܳܐ ܓܰܘܳܝܳܐ» ܬܽܘܼܪܟܳܐܝܼܬ ܘܣܽܘܼܪܝܳܐܝܼܬ. ܘ«ܒܽܘܼܝܳܢܳܐ ܕܚ̈ܰܝܶܐ ܒܡܰܪܕܽܘܼܬܳܐ ܣܽܘܪܝܳܝܳܬܐ» ܒܐܰܪܒܥܳܐ ܠܶܫ̈ܢܶܐ. ܘ«ܨܰܘܬܳܐ ܕܡܰܪܕܽܘܼܬܳܐ» ܣܽܘܼܪܝܳܐܝܼܬ.

ܐܰܡܺܝܼܢ ܘܰܚܦܺܝܼܛ ܒܣܽܘܼܪ̈ܝܳܝܳܬܳܐ ܬܚܶܝܬ ܝܰܕܥܳܐ: «ܢܽܘܼܦܳܫܳܐ ܘܛܽܘܼܥܳܡܳܐ ܕܠܶܫܳܢܐ ܘܪܶܥܝܳܢܳܐ». ܟܰܕ ܩܳܛܶܦ ܚܰܝܠܐ ܣܰܟܘܼܠܬܳܢܳܝܳܐ ܡܼܶܢ ܗܿܳܝ ܕܐܳܡܪܳܐ: «ܠܳܐ ܬܕܰܥܟܽܘܿܢ ܪܘܼܚܳܐ» (ܬܣܠܘ̈ܢܺܝܩܳܝܐ ܩܰܕܡܳܝܬܐ. 5:19). ܡܶܟܰܐ ܢܰܦܺܝܼܩ ܒܰܒܥܳܬ ܣܽܘܼ̈ܟܳܠܐ ܓܢܺܝܼ̈ܒܶܐ ܘܐܰܒܺܝܼ̈ܕܶܐ. ܘܰܒܛܺܝܼܠܳܐܝܼܬ ܥܳܡܶܠ ܘܟܳܬܶܒ ܘܦܳܪܶܣ. ܘܟܰܕ ܩܳܪܝܳܐ ܣܢܺܝܼܩܽܘܼܬܳܐ ܚܳܫܶܠ ܚܰܫܚ̈ܳܬܳܐ ܠܶܫܳܢ̈ܝܳܬܳܐ ܚܰܕ̈ܳܬܳܬܳܐ ܒܚܰܘܩܳܐ ܗܳܢܳܐ ܟܰܕ ܡܥܰܙܶܙ ܦܺܪܽܘܿܫܽܘܼܬܳܐ ܕܰܚܢܳܢ̊ܳܐ ܘܚܰܘܣܳܢܳܐ ܐܰܝܟܰܢܳܐ ܕܠܳܐ ܢܶܬܓܰܠܙܽܘܿܢ ܐܶܫܟܳܪ̈ܶܐ ܕܣܶܦܪܳܝܽܘܼܬܳܐ ܡܼܶܢ ܛܳܒ̈ܳܬܳܐ ܕܢܳܒ̈ܥܳܢ ܡܼܶܢ ܡܰܥܒ̈ܕܳܢܘܳܬܳܗܿ ܕܡܰܪܕܽܘܼܬܳܐ ܣܽܘܼܪܝܳܝܬܳܐ.

ܐܰܡܝܼܢ ܘܰܚܦܺܝܼܛ ܒܓܰܘ̈ܳܢܳܝܳܬܐ ܐܰܬܪ̈ܢܳܝܳܬܳܐ ܬܚܶܝܬ ܝܰܕܥܳܐ: «ܚܠܳܦ ܫܽܘܼܪ̈ܶܐ ܢܶܒܢܳܐ ܓܺܫܪ̈ܶܐ: ܢܶܓܫܽܘܿܪ ܘܠܳܐ ܢܫܽܘܼܪ» ܡܶܛܽܠ ܫܰܝܢܳܐ ܘܛܽܘܼܘܳܪܐ ܐܰܬܪܳܢܳܝܳܐ ܥܪܺܝܼܡܳܐܝܼܬ ܘܬܰܡܺܝܼܡܳܐܝܼܬ. ܘܐܰܝܟ ܐܺܝܼܙܓܰܕܳܐ ܕܡܰܪܕܽܘܼܬܳܐ ܡܶܬܛܰܝܰܒ ܒܰܟܢܽܘܼ̈ܫܝܶܐ ܘܠܽܘܼ̈ܡܳܕܶܐ ܦܪ̈ܺܝܼܫܶܐ ܒܰܙܒܰܢ ܣܢܺܝܼܩܽܘܼܬܳܐ ܘܰܣܦܺܝܼܩܽܘܼܬܳܐ. ܘܩܶܨܰܬ ܡܠܺܝܼܛܽܘܼܬܶܗ ܡܶܙܕܰܡܰܢ ܕܢܶܗܘܶܐ ܡܒܰܕܩܳܢܳܐ ܘܡܰܠܠܳܐ ܒܫܰܪ̈ܒܶܐ ܡܰܪ̈ܕܽܘܼܬܳܢܳܝܶܐ: ܒܝܽܘܼ̈ܕܳܥܶܐ ܫܰܘܬܳܦ̈ܳܝܶܐ ܣܽܘܼܪܝܳܐܝܼܬ ܘܬܽܘܼܪܟܳܐܝܼܬ. ܘܫܰܡܺܝܼܢܝܼܢ ܣܝ̈ܳܡܰܘܗܝ ܘܡܳܠܶܝܢ ܣܘܺܝܼܚܽܘܼܬܳܐ ܘܰܣܦܺܝܼܩܽܘܼܬܳܐ ܪܰܒܬܳܐ ܕܩܳܪ̈ܽܘܿܝܶܐ ܕܦܽܘܼܪܫܳܢܳܐ ܡܼܶܢ ܣܶܕܪ̈ܶܐ ܦܬܺܝܼ̈ܟܶܐ ܕܓܰܘܳܐ. ܕܢܳܩܠܺܝܼܢ ܐܘܼܪܰܚ ܪܶܥܝܳܢܳܐ ܪܰܟܺܝܼܟܳܐ ܘܣܽܘܼܟܳܠܐ ܢܰܗܺܝܼܪܳܐ ܠܡܰܕܥܳܐ ܬܪܺܝܼܨܳܐ. ܘܕܺܝܼܠܳܢܳܐܝܼܬ ܗܿܳܢܽܘܢ ܬܽܘܼܪ̈ܟܳܝܶܐ ܡܶܬܥܰܦܩܺܝܼܢ ܘܡܶܬܬܰܥܒܪܺܝܼܢ ܠܥܰܪܒܳܝܳܐ ܘܠܐܢܓܠܺܝܼܫܳܝܳܐ ܘܡܶܬܦܰܪܣܺܝܼܢ ܗܳܪܟܳܐ ܘܬܰܡܳܢ ܒܡܶܨ̈ܥܳܝܶܐ ܝܽܘܼܕܳܥ̈ܳܝܶܐ ܦܪ̈ܺܝܼܫܶܐ ܐܰܬܪ̈ܳܢܳܝܶܐ ܘܬܺܒܶܝ̈ܠܳܝܶܐ. ܘܒܰܩܪܺܝܼܚܽܘܼܬܳܐ ܕܚܰܘܣܳܢܳܐ ܩܳܛܰܪ ܐܶܣܳܪ̈ܳܐ ܚܰܡܺܝܼ̈ܥܶܐ ܘܓܺܫܪ̈ܶܐ ܣܽܘܼ̈ܟܳܠܳܝܶܐ ܘܡܰܕ̈ܥܳܢܳܝܶܐ ܥܰܡ ܩܰܘ̈ܡܳܬܐ ܘܡܽܘܼ̈ܫܚܳܬܐ ܦܪ̈ܺܝܼܫܳܬܳܐ. ܘܕܺܝܼܠܳܢܳܐܝܼܬ ܥܰܡ ܡܶܣܬܰܪ̈ܝܳܢܶܐ ܗܿܳܢܽܘܢ ܕܦܳܠܚܺܝܼܢ ܒܒ̈ܳܬܰܝ ܨܰܘ̈ܒܶܐ ܕܐܰܬܪܳܐ ܕܬܽܘܼܪܟܺܝܰܐ. ܘܐܶܬܝܰܩܰܪ ܫܽܘܼܟܳܢܳܐܝܼܬ ܩܶܨܰܬ ܚܦܺܝܼܛܽܘܼܬܶܗ ܘܬܶܫܡܶܫܬܶܗ ܡܰܪܕܽܘܼܬܳܢܳܝܬܳܐ ܘܠܶܫܳܢܳܝܬܳܐ:

ܫܢܰܬ 2018 «ܫܽܘܼܟܳܢܳܐ ܡܰܪܕܽܘܼܬܳܢܳܝܳܐ» ܒܝܰܕ ܟܰܢܳܐ ܣܽܘܼܪܝܳܝܳܐ ܒܰܐܠܡܰܢܝܰܐ.

ܫܢܰܬ 2019 «ܫܽܘܼܟܳܢܳܐ ܕܩܽܘܼܒܳܠܛܰܝܒܽܘܼܬܳܐ» ܒܝܰܕ ܚܽܘܼܝܳܕܳܐ ܐܰܘܝܽܘܼܬܳܢܳܝܳܐ ܘܰܟܢܽܘܼܫܝܳܝܳܐ ܕܡܰܪܕܺܝܢ.

ܫܢܰܬ 2020 «ܫܽܘܼܟܳܢܳܐ ܕܬܰܘܕܺܝܼܬܳܐ» ܒܝܰܕ ܫܽܘܼܬܳܐܣܳܐ ܕܣܰܥܰܕ ܐܺܝܣܚܳܩ ܣܰܥܕܺܝ ܒܣܽܘܼܪܝܰܐ.

ܫܢܰܬ 2022 «ܫܽܘܼܟܳܢܳܐ ܕܣܶܦܪܳܝܽܘܼܬܳܐ ܣܽܘܼܪܝܳܝܬܳܐ» ܒܝܰܕ ܩܶܢܛܪܽܘܢ ܡܰܪܕܽܘܼܬܳܢܳܝܳܐ ܕܐܳܪܳܡ ܒܰܣܘܶܝܕܶܝܢ.

ܫܢܰܬ 2024  «ܫܽܘܼܟܳܢܳܐ ܕܝܽܘܼܒܳܠܐ ܫܰܢܬܳܢܳܝܳܐ» ܒܝܰܕ ܦܪܳܣܚܶܙܘܳܐ ܣܽܘܼܪܝܳܐ TV ܒܡܶܕܝܰܕ.

ܠܳܐ ܢܳܐܰܚ ܘܐܳܦܠܳܐ ܨܳܡܰܚ ܒܰܪܢܳܫܳܐ ܒܶܠܥܳܕ ܬܰܨܒܺܝܼ̈ܬܶܐ ܡܰܪ̈ܕܽܘܼܬܳܢܳܝܶܐ. ܡܶܟܳܐ ܐܺܝܼܩܳܪܳܐ ܡܢܰܬܥܳܢܳܐ ܩܰܢܝܳܐ ܡܶܠܬܳܐ ܕܩܽܘܫܬܳܐ ܘܰܫܪܳܪܳܐ ܗܿܳܝ ܕܢܳܒܥܳܐ ܘܐܳܬܝܳܐ ܡܼܶܢ ܪܽܘܼܚܳܐ ܕܡܰܪܕܽܘܼܬܳܐ. ܒܪܰܡ ܐܰܡܺܝܼܪܳܐ: «ܐܶܠܐ ܡܥܰܪ̈ܦܳܢܶܐ܆ ܠܳܐ ܚܳܟܡܺܝܼܢ ܐܺܝܼܩܳܪܳܐ ܝܰܩܺܝܼܪܳܐ ܕܡܰܪܓܳܢܺܝܼܬܳܐ. ܘܠܳܐ ܚܳܙܶܐ ܫܘܼܦܪܐ ܕܫܰܦܺܝܼܪܳܐ ܐܶܠܳܐ ܗܿܰܘ ܕܢܰܗܺܝܼܪܺܝܼܢ ܕܰܘ̈ܩܰܘܗܝ ܓܰܘ̈ܳܝܶܐ». ܡܶܛܠܗܳܕܳܐ ܠܳܐ ܡܶܬܝܰܩܰܪ ܘܐܳܦܠܳܐ ܡܶܫܬܰܘܫܰܛ ܗܿܰܘ ܡܳܐ ܕܠܳܐ ܡܶܬܦܰܫܰܩ ܘܡܶܬܬܰܩܪܰܚ ܘܡܶܬܬܰܘܕܰܥ ܝܕܰܥܬܳܢܳܐܝܼܬ ܠܒܰܪܢܳܫܳܐ ܘܓܰܘܳܐ. ܡܶܟܳܐ ܠܒܺܝܼܫ ܛܢܳܢܳܐ ܚܠܺܝܼܨܳܐ ܘܰܫܩܺܝܼܠ ܐܽܘܼܟܦܳܢܳܐ ܥܪܺܝܼܡܳܐ ܠܡܰܘܕܳܥܘܼ ܘܰܠܡܰܫܡܳܥܘܼ ܚܽܘܼ̈ܟܳܡܶܐ ܫܺܝܼ̈ܬܳܢܳܝܶܐ ܘܣܽܘܼ̈ܟܳܠܐ ܡܠܺܝܼ̈ܠܶܐ ܕܡܰܪܕܽܘܼܬܳܐ ܣܽܘܪܝܳܝܬܳܐ ܠܰܒ̈ܢܰܝ ܐܰܬܪܳܐ ܒܶܠܥܳܕ ܦܽܘܼܪܫܳܢܳܐ: ܓܰܘ̈ܳܝܶܐ ܘܒܰܪ̈ܳܝܶܐ. ܒܰܕ ܡܗܰܝܡܶܢ ܕܠܰܡ ܠܳܐ ܡܶܫܬܰܪܫܳܐ ܘܐܳܦܠܳܐ ܡܶܬܗܰܒܒܳܐ ܝܕܰܥܬܳܐ ܕܰܓܠܺܝܼܙܳܐ ܡܼܶܢ ܩܽܘܼܫܬܳܐ ܘܟܺܐܢܽܘܼܬܳܐ ܘܰܚܢܳܢܳܐ ܚܰܘܣܳܢܳܐ. ܘܰܦܫܺܝܼܩܳܐܝܼܬ ܡܰܨܝܳܐ ܕܬܶܫܬܰܚܠܰܦ ܠܐܢܳܢܳܝܽܘܼܬܳܐ ܘܰܨܢܺܝܼܥܽܘܼܬܳܐ ܟܰܪ ܕܠܳܐ ܢܳܨܰܚ ܣܽܘܼܟܳܠܐ ܘܨܳܡܰܚ ܫܪܳܪܳܐ ܪܰܒܳܐ. ܡܶܟܳܐ ܡܰܦܪܶܐ ܘܟܳܬܶܒ ܒܫܰܪ̈ܒܶܐ ܦܪ̈ܺܝܼܫܶܐ ܡܶܛܽܠ ܣܽܘܼܝܳܥܳܐ ܕܬܰܪܥܺܝܼܬܳܐ ܘܦܽܘܝܳܓܳܐ ܕܨܰܗܝܽܘܼܬܳܐ ܒܪ̈ܶܓܫܳܐ ܐܶܢܰܚ̈ܢܳܝܶܐ (alturist / diğergam) ܕܢܳܒܥܺܝܼܢ ܡܼܶܢ ܠܽܘܼܓܺܝܼܩܺܝܼ «ܕܫܽܘܼܡܠܳܝܳܐ»: ܕܐܰܒܥܰܬ ܘܫܰܘܫܛܰܬ ܛܽܘܼܠܺܝܼܩܽܘܼܬܶܗ ܘܰܥܪܺܝܼܡܽܘܼܬܶܗ ܣܳܦܪܽܘܼܬܳܢܳܝܬܳܐ.  

ܡܼܶܢ ܪܰܟܺܝܼܟܽܘܬ ܛܶܦܪ̈ܰܘܗܝ ܒܰܠܺܝܼܥ ܗ̱ܽܘ ܒܪܶܚܡܰܬ ܗܰܝܡܳܢܽܘܼܬܳܐ ܘܐܰܬܪܳܐ ܘܠܶܫܳܢܳܐ ܘܡܰܪܕܽܘܼܬܳܐ. ܡܶܟܳܐ ܠܳܐ ܒܳܥܶܐ ܕܢܶܚܙܽܘܿܩ ܚܽܘܼܒܳܐ ܕܠܶܫܳܢܳܐ ܡܼܶܢ ܠܶܒܰܘ̈ܳܬܳܐ. ܐܰܝܟܰܢܳܐ ܕܠܳܐ ܢܶܦܟܰܗ ܛܰܥܡܳܐ ܘܢܶܣܦܰܩ ܘܰܢܚܽܘܼܒ ܣܰܒܪܳܐ. ܘܡܶܬܝܰܐܒ ܕܢܶܬܦܪܶܣ ܢܽܘܼܗܪܳܐ ܕܡܰܪܕܽܘܼܬܳܐ ܣܽܘܪܝܳܝܬܳܐ. ܕܰܡܗܰܝܡܶܢ ܠܡܰܚܣܶܢ ܗܳܟܰܢ ܡܶܬܢܰܨܚܳܐ ܨܒܽܘܼܬܳܐ ܪܰܒܬܳܐ ܘܰܠܡܰܚܣܶܢ ܗܳܟܰܢ ܡܶܫܬܰܒܠܳܐ ܬܰܪܥܺܝܼܬܐ ܕܽܘܼܒܳܪܳܐܝܼܬ «ܒܥܺܕ̈ܬܳܢܳܝܳܬܳܐ ܘܐܽܘܼܡ̈ܬܳܢܳܝܳܬܳܐ»: ܒܰܕ ܐܰܝܢܳܐ ܕܡܰܫܶܦ ܥܰܡ ܪܰܦܝܽܘܼܬܳܐ ܡܶܣܬܰܪܰܩ ܡܼܶܢ ܛܰܝܒܽܘܼܬܳܐ. ܘܠܳܐ ܓܳܡܰܪ ܫܰܝܢܳܐ ܘܰܫܠܳܡܳܐ ܓܰܘܳܝܳܐ ܘܓܰܘܳܢܳܝܳܐ ܒܶܠܥܳܕ ܗܽܘܼ̈ܦܳܟܶܐ ܘܕܽܘܼܒܳܪ̈ܶܐ ܕܟܺܐܢܽܘܼܬܳܐ.

 ܘܫܳܩܝܳܐ ܘܒܳܣܡܳܐ ܪܽܘܼܚܶܗ ܘܥܳܫܶܢ ܣܰܒܪܶܗ ܒܦܳܪܽܘܿܫܽܘܼܬܳܐ ܕܚܰܘܣܳܢܳܐ ܗܿܳܝ ܕܪܳܣܡܳܐ ܚܢܳܢܳܐ ܘܣܽܘܼܟܳܠܐ ܒܐܽܘܼܪܰܚ ܐܺܝܼܩܳܪܳܐ ܪܰܒܳܐ «ܟܶܐܡܰܬ ܫܰܝܳܐ» ܕܒܰܪܢܳܫܳܐ: ܒܰܪܝܳܐ ܒܨܰܠܡܳܐ ܕܰܐܠܗܳܐ. ܘܡܶܛܠܳܬܶܗ ܚܽܘܼܒܳܐ ܢܽܘܼܗܪܰܐ ܗ̱ܘ ܕܪܽܘܼܚܳܐ. ܘܝܕܰܥܬܰܐ ܢܽܘܼܗܪܳܐ ܗ̱ܝ ܕܗܰܘܢܳܐ. ܘܠܳܐ ܝܳܪܒܳܐ ܘܐܳܦܠܳܐ ܢܳܨܚܳܐ ܦܳܪܽܘܿܫܽܘܼܬܳܐ ܕܚܰܘܣܳܢܳܐ ܐܶܠܳܐ ܒܰܢܗܽܘܿܪ ܪܽܘܼܚܳܐ ܘܗܰܘܢܳܐ ܘܰܒܫܽܘܼܪܬܳܚܳܐ ܕܢܽܘܼܗܪܳܐ ܐܠܗܳܝܳܐ ܒܥܳܠܡܳܐ ܓܰܘܳܝܳܐ. ܗܳܢܳܐ ܕܠܳܐ ܝܳܪܶܒ ܘܐܳܦܠܳܐ ܡܶܣܬܰܪܥܰܦ ܐܺܝܼܠܳܢܶܗ ܐܶܠܳܐ ܕܢܶܬܟܣܰܚ ܘܢܶܬܬܰܫܩܶܐ.