ܐܰܝܟܰܢ ܢܺܚܶܐ ܦܰܛܢܳܐ؟

ܐܰܝܟܰܢ ܢܺܚܶܐ ܦܰܛܢܳܐ ܒܥܳܠܡܳܐ ܘܒܐܰܝܢܳܐ ܢܺܝܼܫܳܐ؟

ܘܐܰܝܟܳܐ ܢܶܥܡܰܪ ܐܰܘ ܒܥܶܢܝܳܢ ܡܿܰܢ ܢܶܩܢܶܐ ܢܦܺܐܫܳܐ؟

ܕܠܳܐ ܐܺܝܼܬ ܒܕܽܘܼܟܳܐ ܐܳܦܠܳܐ ܒܐ̱ܢܳܫ̈ܳܐ ܡܰܣܡܰܟ ܪܺܝܼܫܳܐ.

ܗܳܕܶܐ ܒܢܽܘܼܣܳܝ ܓܰܠܝܳܐ ܠܕܰܩܢܶܐ ܡܰܕܥܳܐ ܦܪܺܝܼܫܳܐ܀

 

ܥܳܠܡܳܐ ܗܶܒܠܰܐ ܗ̱ܘ ܘܫܽܘ̣ܦܪܶܗ ܕܕܰܓܳܠ ܒܙܺܐܦܳܐ ܛܺܝ̣ܫܳܐ.

ܡܠܶܐ ܟܽܠ ܫܟܺܝ̣ܪ̈ܳܢ ܣܰܪܝܳܐ ܕܠܺܝ̣ܚܳܐ ܐܰܝܟ ܐܳܡܺܝ̣ܫܳܐ.

ܠܟܽܠ ܛܳܒܬܳܐ ܕܒܶܗ ܬܶܫܟܰܚ ܒܺܝ̣ܫܬܳܐ ܠܩܽܘܼܒܠܳܗ̇ ܢܩܺܝ̣ܫܳܐ.

ܘܠܰܝܬ ܒܶܗ ܐܽܘܼܪܚܳܐ ܕܡܼܶܢ ܬܽܘܼܩ̈ܠܳܬܳܐ ܫܰܦܝܳܐ ܕܪܺܝ̣ܫܳܐ܀

 

ܘܬܺܐܪܬܳܐ ܕܐ̱ܢܳܫܰܘ̈ܗܝ ܒܡܰܝ̈ܳܐ ܕܢܶܟ̣ܠܳܐ ܘܫܽܘܼܩܪܳܐ ܠܺܝܼܫܳܐ.

ܘܣܶܢܰܐܬ ܐܰܚ̈ܶܐ ܒܟܽܠ ܢܶܟܝܳܢܶܝ̈ܗ̇ ܒܠܶܒܗܽܘܢ ܟܢܺܝ̣ܫܳܐ.

ܗܰܘ ܕܣܳܒܪܰܬ ܠܶܗ ܢܰܟܦܳܐ ܟܺܐܢܳܐ ܐܳܦ ܩܰܕܺܝ̣ܫܳܐ.

ܠܘܳܬ ܢܶܣܝܳܢܳܐ ܬܶܚܙܶܝܘܗܝ ܚܰܪܡܳܐ ܘܒܺܝ̣ܫ ܡܶܢ ܒܺܝ̣ܫܳܐ܀

 

ܐܶܢ ܬܶܬܠܰܘܶܐ ܠܣܰܟܠܳܐ ܬܺܚܶܐ ܠܰܐܝܳܐ ܟܬܺܝ̣ܫܳܐ.

ܘܐܶܢ ܠܥܰܬܺܝ̣ܪܳܐ ܬܶܫܪܰܟ ܠܦܳܪܣܰܬ ܚܽܘܼܬܪܶܗ ܕܺܝ̣ܫܳܐ.

ܘܐܶܢ ܠܙܰܠܺܝܠܳܐ ܠܰܫܡܶܗ ܢܕܺܝܕܳܐ ܬܶܗܘܶܐ ܠܒܺܝ̣ܫܳܐ.

ܘܐܶܢ ܠܥܳܢܘܳܝܳܐ ܠܕܶܚܠܰܬ ܚܰܪܬܳܐ ܬܺܚܶܐ ܬܥܺܝ̣ܫܳܐ܀

 

ܦܰܐܝܳܐ ܗ̱ܝ ܗܳܟܺܝܠ ܒܦܶܥܪܳܐ ܠܚܽܘܼܕܳܝ ܬܩܰܘܶܐ ܚܒܺܝ̣ܫܳܐ.

ܘܰܠܢܺܝ̣ܪ ܥܰܒܕܽܘܼܬ ܟܰܦܢܳܐ ܘܨܶܗܝܳܐ ܟܕܺܝ̣ܢܳܐ ܟܒܺܝ̣ܫܳܐ.

ܛܳܒ ܡܶܢ ܕܬܶܗܘܶܐ ܒܫܶܢ̈ܶܐ ܕܐܳܟ̈ܠܰܝ ܩܰܪܨܳܐ ܢܬܺܝ̣ܫܳܐ.

ܥܪܺܝ̣ܨ ܠܰܥܫܽܘܼܩܝܳܐ ܕܚܰܪ̈ܡܶܐ ܕܺܝ̣ܫ ܡܶܢ ܚܰܪܒܳܐ ܠܛܺܝ̣ܫܳܐ܀

 

ܡܰܠܦܳܢܳܐ ܥܒܶܕ ܡܫܺܝܼܚܳܐ ܕܩܰܪܗܰܒܰܫ ( 9031– 1983 )