ܡܰܕܥܳܐ ܘܡܰܩܬܳܢܽܘܼܬܳܐ

ܡܫܺܝܼܚܳܐ ܡܿܰܢ ܡܰܕܥܰܐ ܗ̱ܘ ܕ«ܐܽܘܼܪܚܳܐ ܘܰܫܪܳܪܳܐ ܘܚܰܝ̈ܶܐ» (ܝܘܚܢܢ 14: 6). ܘܡܰܕܠܳܢܰܐ ܗ̱ܘ ܪܰܒܳܐ ܕܡܰܪ̈ܗܳܛܶܐ ܐ̱ܢܳܫ̈ܳܝܶܐ ܦܪ̈ܺܝܼܫܶܐ ܟܰܕ ܡܶܬܝܰܠܰܦ ܘܡܶܬܚܟܶܡ ܒܽܘܼܝܳܢܶܗ ܝܕܰܥܬܳܢܳܐܝܼܬ ܘܡܶܣܬܰܟܠܳܢܳܐܝܼܬ. ܡܶܛܠܗܳܕܶܐ ܡܶܬܕܰܘܰܕ ܗܿܰܘ ܕܪܰܚܺܝܼܩ ܡܼܶܢ ܣܽܘ݂ܟ̈ܳܠܐ ܕܡܰܕܥܳܐ ܗܳܢܳܐ. ܒܰܕ ܡܶܬܕܰܠܚܺܝܼܢ ܡܰܦܽܘ݂ܚ̈ܶܐ ܘܡܰܣܽܘ݂ܟ̈ܶܐ ܕܪܽܘܼܚܳܐ ܟܰܪ ܕܠܐ ܦܠܺܝܼܚ ܘܰܕܪܺܝܼܫ. ܐܶܠܳܐ ܒܪܰܡ ܢܳܨܚܳܐ ܬܰܪܥܺܝܼܬܳܐ ܕܫܳܩܝܳܐ ܡܼܶܢ ܡܰܝ̈ܳܐ ܕܰܦܨܺܝܕ̈ܰܘܗܝ. ܐܺܝܼܢ: ܡܰܠܶܠ ܠܶܫܳܢܰܢ ܐܰܝܟܰܢܳܐ ܕܢܶܡܙܽܘܿܓ ܠܶܫܳܢܶܗ ܒܕܺܝܼܠܰܢ. ܒܪܰܡ ܐܰܝܟܰܢ ܚܳܟܡܺܝܼܢܰܢ ܠܶܫܳܢܶܗ ܟܰܕ ܣܰܪܺܝܼܟܺܝܼܢܰܢ ܒܰܚܡܺܝܼܪܳܐ ܥܰܬܺܝܼܩܳܐ ܕܐ̱ܢܳܫܽܘܼܬܰܢ؟

 

ܫܪܳܪܳܐ ܠܡܺܐܡܰܪ: ܦܽܘܼܢܳܝܳܐ ܕܫܽܘܼܐܳܠܐ ܗܳܢܳܐ ܒܕܺܝܼܪ ܗ̱ܽܘ ܒܛܶܟܣ̈ܶܐ ܥܺܕ̈ܬܳܢܳܝܶܐ. ܒܰܨܒܽܘܼܬܳܐ ܓܝܪ ܗܳܕܶܐ ܡܳܪܝ ܣܶܘܶܪܝܽܘܤ ܕܐܰܢܛܺܝܽܘܼܟܺܝܰܐ (459-533) ܕܗܳܟܰܢܳܐ ܟܳܬܶܒ: «ܟܽܠܗܶܝܢ ܐܰܝܠܶܝܢ ܕܰܒܥܕ̈ܳܬܳܐ ܕܰܐܠܗܳܐ ܡܶܫܬܰܡܠܝ̈ܳܢ ܘܡܶܬܦܰܠܚ̈ܳܢ ܠܘܳܬ ܚܰܕ ܫܽܘܼܠܳܡܳܐ ܚܳܝܪ̈ܳܢ. ܠܘܳܬ ܬܽܘܼܪܳܨܳܐ ܕܺܝܼܠܰܢ. ܘܰܠܘܳܬ ܡܶܬܩܰܪܒܳܢܽܘܼܬܳܐ ܕܨܶܝܕ ܗܳܠܶܝܢ ܕܰܡܝܰܬܪ̈ܳܢ. ܘܰܠܘܳܬ ܫܽܘܼܘܫܳܛܳܐ ܕܰܠܪܰܘܡܳܐ. ܐܳܦܶܢ ܥܺܐܕܳܐ ܬܺܐܡܰܪ. ܐܳܦܶܢ ܨܰܘܡܳܐ. ܐܳܦܶܢ ܡܶܕܶܡ ܐ̱ܚܪܺܢܳܐ ܡܼܶܢ ܗܳܠܶܝܢ ܕܕܐܰܝܟ ܗܳܟܰܢ...»

 

ܩܕܳܡ ܕܢܶܥܕܽܘܿܠ ܗܳܢܳܐ ܘܗܰܘ ܠܽܘܼܩܕܰܡ ܦܩܺܝܼܕܝܼܢܰܢ ܘܰܙܡܺܝܼܢܝܼܢܰܢ ܠܬܘܼܪܳܨܳܐ ܘܛܘܼܟܳܣܳܐ ܕܓܰܘ̈ܳܝܳܬܰܢ. ܒܰܕ ܠܳܐ ܟܳܫܰܪ ܘܐܳܦܠܳܐ ܢܳܨܰܚ ܬܽܘܼܩܳܢܳܐ ܕܒܰܪܢܳܫܳܐ ܐܠܐ ܒܢܽܘܼܗܳܪܳܐ ܕܕ̈ܰܘܩܶܐ ܓܰܘܳܝ̈ܶܐ ܘܗܽܘܼܕ̈ܳܣܶܐ ܬܺܐܪ̈ܬܳܢܳܝܶܐ ܘܣܽܘ݂ܟ̈ܳܠܐ ܐܶܢܰܚܢܳܝ̈ܶܐ. ܘܗܺܝܼ ܗܳܕܶܐ ܠܳܐ ܡܶܫܬܰܡܠܝܳܐ ܐܶܠܳܐ ܕܗܽܘܼ ܒܰܪܢܳܫܳܐ ܢܶܬܚܰܦܰܛ ܠܡܶܦܬܰܚ ܥܰܝܢܳܐ ܕܪܽܘܼܚܳܐ ܠܡܶܚܙܶܐ ܠܳܐ ܡܶܬܚܰܙܝܳܢܳܐ ܒܡܶܬܚܰܙܝܳܢ̈ܶܐ. ܕܰܐܡܺܝܼܪܳܐ: «ܡܰܠܟܽܘܼܬܶܗ ܓܶܝܪ ܕܰܐܠܗܳܐ ܠܓܰܘ ܡܶܢܟܽܘܿܢ ܗ̱ܺܝ» (ܠܘܩܐ 17: 20-21). «ܒܥܰܘ ܕܶܝܢ ܠܽܘܼܩܕܰܡ ܡܰܠܟܽܘܼܬܶܗ ܕܰܐܠܗܳܐ ܘܙܰܕܺܝܼܩܽܘܼܬܶܗ ܘܟܽܠܗܶܝܢ ܗܳܠܶܝܢ ܡܶܬܬܰܘܣ̈ܦܳܢ ܠܟܘܢ» (ܡܬܝ 6: 13). ܕܠܳܐ ܡܶܬܛܰܟܰܣ «ܡܶܬܚܰܙܝܳܢܳܐ ܒܰܪܳܝܳܐ» ܐܶܠܳܐ ܕܢܶܬܬܰܩܰܢ «ܠܳܐ ܡܶܬܚܰܙܝܳܢܐ ܓܰܘܳܝܳܐ» ܒܢܽܘܼܗܪܳܐ ܕܗܰܝܡܳܢܽܘܼܬܳܐ ܘܚܽܘܼܒܳܐ ܘܺܝܼܕܰܥܬܳܐ ܗܳܕܶܐ. ܡܶܛܠܗܳܕܶܐ ܐܳܡܰܪ: «ܘܰܒܡܰܢ ܐܶܥܡܰܪ؟ ܐܶܠܳܐ ܒܢܺܝܼܚܳܐ ܘܰܒܡܰܟܺܝܼܟ ܪܽܘܼܚܳܐ.»

 ܡܶܟܳܐ ܒܰܝܢܳܬ ܡܰܟܫܽܘܼ̈ܠܐ ܘܡܰܚܫܽܘܼ̈ܠܐ ܕܥܳܠܡܳܐ ܣܢܺܝܼܩ ܗ̱ܽܘܼ ܒܰܪܢܳܫܳܐ ܕܢܶܬܬܥܺܝܼܪ ܘܢܶܗܦܽܘܿܟ ܠܢܰܦܫܶܗ. ܐܰܝܟܳܢܳܐ ܕܢܶܬܛܰܟܰܣ ܘܢܶܬܚܰܣܰܢ. ܘܥܺܝܪܽܘܼܬܳܐ ܗܳܕܶܐ ܣܢܺܝܼܩܳܐ ܠܕܽܘܼܟܳܝܳܐ ܗܰܘܢܳܢܳܝܐ ܘܕܽܘܼܒܳܪܳܝܐ. ܒܰܕ ܠܳܐ ܕܳܢܰܚ ܢܰܗܺܝܼܪܳܐ ܘܐܳܦܠܐ ܨܳܡܰܚ ܬܪܺܝܨܳܐ ܐܶܠܐ ܕܢܶܬܢܰܩܰܕ ܒܰܪܢܳܫܳܐ ܡܼܶܢ ܛܽܘܼܠܫܳܐ ܘܰܫܥܺܝܼܢܳܐ ܕܝܰܨܪ̈ܶܐ ܐܶܢܳܢܳܝ̈ܶܐ. ܡܶܛܠܗܳܕܶܐ ܐܳܡܿܰܪ ܦܽܘܼܡܳܐ ܡܰܚܝܳܢܳܐ: «ܐܶܢܳܐ ܐ̱ܢܳܐ ܓܦܶܬܳܐ ܕܰܫܪܳܪܳܐ. ܘܐܳܒܝ ܗ̱ܘܼ ܦܰܠܳܚܳܐ. ܟܽܠ ܫܒܶܫܬܳܐ ܕܒܺܝܼ ܦܺܐܪ̈ܶܐ ܠܳܐ ܝܳܗܒܳܐ܆ ܫܳܩܶܠ ܠܳܗܿ. ܘܰܐܝܕܳܐ ܕܝܳܗܒܳܐ ܦܺܐܪܶ̈ܐ܆ ܡܕܰܟܶܐ ܠܳܗܿ: ܕܦܺܐܪ̈ܶܐ ܣܰܓܺܝ̈ܶܐܐ ܬܰܝܬܶܐ. ܐܰܢܬܽܘܿܢ ܡܼܶܢ ܟܰܕܽܘܼ ܕܟܶܝܢ ܐܰܢ̱ܬܽܘܿܢ. ܡܶܛܽܠ ܡܶܠܬܳܐ ܕܡܰܠܠܶܬ ܥܰܡܟܽܘܿܢ. ܩܰܘܰܘ ܒܺܝܼ. ܘܐܶܢܳܐ ܒܟܽܘܢ. ܐܰܝܟܳܢܳܐ ܕܰܫܒܶܫܬܳܐ ܠܳܐ ܡܶܫܟܚܳܐ ܕܬܶܬܶܠ ܦܺܐܪ̈ܶܐ ܡܼܶܢ ܢܰܦܫܶܗܿ. ܐܶܠܳܐ ܡܩܰܘܝܳܐ ܒܰܓܦܶܬܳܐ܆ ܗܳܟܰܢܳܐ ܐܳܦ ܐܰܢ̱ܬܽܘܿܢ܆ ܐܶܠܳܐ ܬܩܰܘܽܘܿܢ ܒܺܝܼ. ܐܶܢܳܐ ܐ̱ܢܳܐ ܓܦܶܬܳܐ. ܘܐܰܢ̱ܬܽܘܿܢ ܫܒܶܫ̈ܬܶܐ. ܡܿܰܢ ܕܰܡܩܰܘܶܐ ܒܺܝܼ ܘܐܶܢܳܐ ܒܶܗ܆ ܗܳܢܳܐ ܡܰܝܬܶܐ ܦܺܐܪ̈ܶܐ ܣܰܓܺܝ̈ܶܐܐ. ܡܶܛܽܠ ܕܰܕܠܳܐ ܐܶܢܳܐ܆ ܠܳܐ ܡܶܫܟܚܺܝܼܢ ܐܰܢ̱ܬܽܘܿܢ ܠܡܶܥܒܰܕ ܡܶܕܶܡ» (ܝܘܚܢܢ 15: 1-5).

ܠܰܝܬ ܒܰܣܺܝܼܡ ܘܰܛܥܺܝܼܡ ܘܡܰܠܦܳܢ ܐܰܝܟ ܡܰܬܠܳܐ ܗܳܢܳܐ ܕܒܶܗ ܗ̱ܽܘܼ ܨܺܝܼܪܺܝܼܢ ܘܰܨܪܺܝܼܪܺܝܢ ܚܽܘܼ̈ܟܳܡܶܐ ܕܚܰܘ̈ܩܶܐ ܘܶܐܫܟܳܪ̈ܶܐ ܬܶܫܡܶܫܬܳܢܳܝ̈ܶܐ ܒܶܠܥܳܕ ܦܽܘܼܪܫܳܢܳܐ ܕܕܰܪܓܳܐ ܘܰܐܩܡܳܐ. ܘܡܰܬܠܳܐ ܗܳܢܳܐ ܛܽܘܼܦܣܰܐ ܗ̱ܘ ܕܚܽܘܼܫܳܚܳܐ ܕܳܪܳܢܳܝܳܐ ܕܐܳܡܰܪ: «ܕܰܘܪܶܗ ܕܠܶܒܳܐ ܘܡܰܕܥܳܐ ܕܳܡܶܐ ܠܕܰܘܪܳܐ ܕܘܺܝܼܦܺܝ WİFİ ܒܥܳܠܡܳܐ ܠܳܐ ܡܶܬܚܰܙܝܳܢܳܐ. ܘܣܳܟ ܠܳܐ ܡܰܘܬܪܳܐ ܐܰܝܢܳܝܽܘܼܬܳܐ ܕܬܶܠܺܝܦܳܘܢ ܬܰܩܢܳܐ܆ ܟܰܕ ܬܟܳܒܳܐ (frekans) ܐܳܐܰܪܳܝܳܐ ܣܟܺܝܼܪ ܐܰܘ ܦܣܺܝܼܩ. ܒܳܗܿ ܒܰܕܡܽܘܼܬܐ ܡܶܫܬܓܶܫ ܘܡܶܬܕܰܘܰܕ ܒܰܪܢܳܫܳܐ ܗܿܰܘ ܕܠܳܐ ܪܓܺܝܼܫ ܐܰܘ ܪܰܚܺܝܩ ܡܼܶܢ ܣܽܘܼܟ̈ܳܠܐ ܕܰܡܫܺܝܼܚܳܐ. ܘܥܳܡܶܛ ܘܦܳܐܫ ܒܬܰܘ̈ܳܢܶܐ ܚܶܫܽܘܟܳܝ̈ܶܐ ܕܝܰܨܪ̈ܶܐ ܘܰܟܕܺܝܼܢܳܐ ܒܚܰܫ̈ܶܐ ܢܰܦܫܳܢܳܝ̈ܶܐ. ܘܗܺܝܼ ܗܳܕܶܐ ܗܳܘܝܳܐ ܥܶܠܬܳܐ ܕܠܳܐ ܢܶܬܒܰܝܰܢ ܛܽܘܼܟܳܣܳܐ ܕܚܰܝ̈ܶܐ ܘܢܶܬܥܰܣܰܩ ܒܡܰܬܿܠܐ ܕܦܺܐܪ̈ܶܐ ܒܰܫܺܝ̈ܠܶܐ ܟܰܕ ܡܳܐܶܫ ܐܶܣ̈ܶܐ ܒܰܕܡܽܘܼܬ ܣܰܡܝܳܐ.»

ܐܺܝܼܢ: ܢܺܘܼܗܪܳܐ ܕܣܘܟ̈ܳܠܐ ܗܳܠܶܝܢ ܝܳܗܒܺܝܼܢ ܬܽܘܼܩܦܳܐ ܓܰܘܳܝܳܐ: ܣܳܦܩܳܐ ܘܡܶܬܒܰܥܝܳܢܳܐ ܠܩܰܕܡܳܝܽܘܿܬܰܢ. ܕܨܰܠܡܳܐ ܕܓܶܠܝ̈ܳܢܰܘܗܝ ܕܡܳܪܝܳܐ ܨܺܝܼܪܺܝܼܢ ܘܰܨܪܺܝܼܪܺܝܼܢ ܒܬܽܘܼܩܳܢܶܗ ܕܒܰܪܢܳܫܰܢ. ܘܰܫܪܳܪܳܐ ܗܳܢܳܐ ܐܠܗܳܝܳܐ ܙܳܥܶܩ ܒܰܥܡܽܘܿܩ ܗܰܝܡܳܢܽܘܼܬܳܐ ܘܐܳܡܰܪ: «ܠܳܐ ܡܰܨܝܳܐ ܕܬܶܫܟܚܽܘܿܢ ܢܽܘܼܗܪܳܐ ܕܺܐܝܼܬܽܘܼܬܝ ܗܳܪܟܳܐ ܘܬܰܡܳܢ ܐܶܠܰܐ ܒܛܳܒ̈ܳܬܳܐ ܘܒܽܘܼܪ̈ܟܳܬܳܐ ܕܝܼܺܗܝܼ̈ܒܳܢ ܠܟܽܘܿܢ. ܘܢܳܛܪ̈ܳܢ ܘܰܡܚ̈ܰܣܢܳܢ ܐܺܝܼܬܽܘܼܬܳܟܽܘܿܢ ܒܚܰܝ̈ܶܐ ܬܢܳܢ̈ܝܶܐ. ܡܶܟܳܐ ܠܳܐ ܘܳܠܶܐ ܕܢܶܫܬܰܚ̈ܠܦܳܢ ܡܼܶܢ ܕܡܽܘܼ ܠܰܕܡܽܘܼ ܒܰܕܡܽܘܼܬ ܨܰܠܡ̈ܶܐ ܘܰܦܬܰܟܪ̈ܶܐ ܣܪ̈ܺܝܼܩܶܐ.»

ܫܘܼܐܳܠܐ ܗܳܢܰܘ: ܡܳܢܰܘ ܕܰܪܓܳܐ ܕܣܽܘܼܟܳܠܐ ܗܳܢܳܐ ܒܚܽܘܼܫܳܚܳܐ ܘܒܽܘܼܝܳܢܳܐ ܕܰܡܕܰܒܪܳܢܽܘܼܬܢ؟ ܐܰܝܟܳܐ ܬܰܠܝܳܐ ܡܰܩܬܳܢܽܘܼܬܰܢ ܘܡܰܨܕܳܢܽܘܼܬܰܢ؟ ܐܰܪܰܐ ܩܰܕܡܳܝܰܬ ܒܳܥܶܝܢܰܢ ܡܰܠܟܽܘܼܬܶܗ ܘܙܰܕܺܝܼܩܽܘܼܬܶܗ ܕܐܠܗܐ؟ ܐܰܪܰܐ ܡܩܰܕܫܺܝܼܢܰܢ ܡܶܠܬܰܢ ܘܨܶܒܝܳܢܰܢ ܘܪܶܥܝܳܢܰܢ ܘܕܽܘܼܒܳܪܰܢ ܒܢܽܘܼܗܪܳܐ ܗܳܢܳܐ؟ ܐܰܪܰܐ ܪܳܓܫܺܝܼܢܢ ܪܽܘܼܚܳܢܳܐܝܼܬ ܒܶܗ؟ ܐܰܘ ܡܰܗܦܳܟܽܘܼ ܡܰܗܦܟܺܝܼܢܰܢ ܡܶܢܶܗ ܚܰܘܪܰܢ ܘܨܰܘܒܰܢ ܘܩܰܘܡܰܢ ܡܶܢܶܗ؟

ܡܶܛܠܗܳܕܶܐ ܢܳܝܚܺܝܼܢܰܢ ܘܒܳܣܡܺܝܼܢܰܢ ܟܰܕ ܢܳܗܪܺܝܼܢܰܢ ܒܣܽܘܼ̈ܟܳܠܰܘܗܝ ܡܰܚ̈ܝܳܢܶܐ. ܒܪܰܡ ܣܽܘܼܟܳܠܳܐ ܠܳܐ ܡܰܩܢܶܐ ܣܽܘܼܟܳܠܳܐ ܐܶܠܳܐ ܠܰܕܚܳܟܶܡ ܣܽܘܼܟܳܠܳܐ. ܘܝܕܰܥܬܳܐ ܗܳܕܶܐ ܠܐ ܡܶܬܝܰܩܪܳܐ ܐܶܠܐ ܒܢܽܘܼܗܪܳܐ ܕܢܰܗܺܝܼܪܳܐ. ܒܪܰܡ ܝܰܬܺܝܼܪ ܢܳܨܚܳܐ ܒܢܽܘܼܗܪܳܐ ܕܡܶܣܬܰܟ̈ܠܳܢܶܐ. ܘܗܳܟܶܢ ܟܳܬܶܒ ܚܰܕ ܡܼܶܢ ܡܰܚ̈ܒܳܢܰܝ ܣܽܘܼܟܳܠܐ: «ܐܝܟܳܐ ܕܰܬܪܶܝܢ ܐܰܘ ܬܠܳܬܳܐ ܟܢܺܝܼܫܺܝܼܢ ܒܫܶܡܝ ܒܰܝܢܳܬܗܽܘܿܢ ܐ̱ܢܳܐ. ܟܰܕ ܐܳܦ ܘܰܒܗܳܕܶܐ ܥܰܠ ܩܢܽܘܼܡ ܚܰܕ ܒܰܪܢܳܫܳܐ ܪܳܡܶܙ. ܕܰܡܪܰܟܰܒ ܡܼܶܢ ܬܠܳܬ ܡܢܰܘ̈ܳܬܳܐ: ܦܰܓܪܳܢܽܘܼܬܳܐ ܘܢܰܦܫܳܢܽܘܼܬܳܐ ܘܪܽܘܼܚܳܢܽܘܼܬܐ. ܕܐܶܡܰܬܝ ܕܢܶܬܟܰܢܫܽܘܿܢ ܘܢܶܫܠܡܽܘܢ ܠܰܚܕܳܐ ܐܰܘܝܽܘܼܬܳܐ ܒܰܫܡܶܗ ܠܡܶܓܡܰܪ ܨܶܒܝܳܢܶܗ. ܟܰܕ ܠܳܐ ܬܶܗܘܶܐ ܕܰܠܩܽܘܼܒܠܳܝܽܘܼܬܳܐ ܒܶܝܬ ܦܰܓܪܳܐ ܠܢܰܦܫܳܐ ܘܰܠܪܽܘܼܚܳܐ. ܬܰܡܳܢ ܗܳܘܶܐ ܘܥܳܡܰܪ ܐ̱ܢܳܐ ܒܚܽܘܼܒܳܐ. ܘܬܽܘܼܒ ܕܶܝܢ ܡܿܰܢ ܕܪܳܚܶܡ ܠܝܼ ܡܶܠܰܬܝ ܢܳܛܰܪ. ܘܐܳܒܝ ܢܶܪܚܡܺܝܼܘܗܝ. ܘܰܠܘܳܬܶܗ ܐܳܬܶܝܢܰܢ. ܘܰܠܘܳܬܶܗ ܐܰܘܳܢܳܐ ܥܳܒܕܺܝܼܢܰܢ ܐܶܡܰܪ ܡܳܪܰܢ».

ܐܶܢ ܠܳܐ ܚܳܡܠܺܝܼܢܰܢ ܘܩܳܦܣܺܝܼܢܰܢ ܡܰܩܬܳܢܽܘܼܬܳܢ ܘܡܰܨܕܳܢܽܘܼܬܰܢ ܠܳܐ ܥܳܡܰܪ ܒܰܝܢܳܬܰܢ. ܘܐܳܦܠܳܐ ܥܳܒܶܕ ܐܰܘܢܳܐ ܠܘܳܬܢ. ܒܰܕ ܒܰܪܢܳܫܳܐ ܓܰܘܳܝܳܐ ܡܶܨܛܒܰܥ ܒܓܰܘ̈ܢܶܐ ܕܡܰܩܬܳܢܽܘܼܬܶܗ. ܘܡܶܣܬܰܟܰܡ ܒܰܚܢܳܝ̈ܶܐ ܕܡܰܨܕܳܢܽܘܼܬܶܗ. ܡܶܛܠܗܳܕܶܐ ܡܰܩܬܳܢܽܘܼܬܰܢ ܘܡܰܨܕܳܢܽܘܼܬܰܢ ܒܰܐܡܺܝܼܢܽܘܼ ܙܳܕܶܩ ܬܶܗܘܶܐ ܐܰܣܺܝܼܪܳܐ ܒܣܽܘ݂ܟ̈ܳܠܐ ܕܰܡܫܺܝܼܚܳܐ. ܕܢܳܗܰܪ ܗܿܰܘ ܕܗܳܦܶܟ ܠܡܰܒܽܘܼܥܳܐ ܗܳܢܳܐ ܪܰܒܳܐ. ܒܪܰܡ ܠܳܐ ܡܰܨܝܳܐ ܕܢܶܡܬܽܘܿܩ ܘܢܶܙܠܽܘܿܚ ܡܼܶܢܶܗ ܐܶܠܳܐ ܕܢܶܬܕܰܟܶܐ ܡܼܶܢ ܐܰܒܩܳܐ ܘܛܺܝܼܢܳܐ: ܟܶܐܡܰܬ ܡܼܶܢ ܪ̈ܶܥܝܳܢܶܐ ܕܠܺܝܼ̈ܚܳܐ ܘܚܳܢܽܘܼ̈ܩܶܐ ܕܗܽܘܼܠܳܐ.

 

ܝܰܘܣܶܦ ܒܶܓܬܰܫ

ܚܽܘܕܪܳܐ ܕܡܰܪܕܽܘܼܬܐ ܘܣܶܦܪܳܝܘܼܬܳܐ ܕܠܶܫܳܢܳܐ ܣܽܘܼܪܝܳܝܳܐ: ܡܰܪܕܺܝܢ