ܡܰܪܬܝܳܢܽܘܬܳܐ

ܡܰܪܬܝܳܢܽܘܬܳܐ [1]

 

ܕܰܥ ܐܳܘ ܒܰܪܢܳܫܳܐ ܠܢܰܦܫܳܟ܆ ܕܨܰܠܡܳܐ ܐܺܝܬܶܝܗ̇ ܕܰܐܠܗܳܐ.

ܠܳܐ ܬܰܙܠܺܝܘܗܝ ܠܨܰܠܡܳܐ ܕܡܳܪܳܟ܇ ܒܰܕ ܡܛܰܘܫܰܬ ܠܢܰܦܫܳܐ ܕܺܝܠܳܟ܀

 

ܟܽܠ ܡܶܕܶܡ ܦܳܢܶܐ ܠܛܽܘܼܗܡܶܗ܇ ܘܠܳܐ ܦܳܐܶܕ ܠܰܓܡܳܪ ܡܶܢܶܗ.

ܛܽܘܼܗܡܶܗ ܕܨܰܠܡܳܟ ܕܰܐܠܗܳܐ ܗܰܘ܇ ܠܳܐ ܬܫܰܟܪܺܝܘܗܝ ܘܢܶܬܒܥܳܟ ܡܳܪܝܳܐ܀

 

ܒܟܽܠܗܶܝܢ ܐܽܘܼܪ̈ܚܳܬܳܐ ܕܚܰܝ̈ܰܝܟ܇ ܐܰܚܽܘܼܕ ܒܕܶܚܠܰܬ ܐܰܠܳܗܳܐ.

ܐܶܢ ܣܳܛܶܐ ܐܰܢ̱ܬ ܠܒܰܪ ܡܶܢܳܗ̇܇ ܬܽܘܼܟܳܐ ܘܡܰܘܬܳܐ ܩܳܛܶܦ ܐܰܢ̱ܬ܀

 

ܗܺܝܼ ܢܳܛܪܳܐ ܠܳܟ ܐܶܢ ܠܒܟܰܬܳܗ̇܇ ܘܗܺܝܼ ܦܳܪܥܳܐ ܠܳܟ ܐܶܢ ܫܦܰܪܬ ܠܳܗ̇.

ܘܐܶܢ ܠܳܐ ܐܶܬܐܰܘܺܝܬ ܥܰܡܳܗ̇܇ ܗܳܘܝܳܐ ܚܰܪܬܳܟ ܠܐܰܒܕܳܢܳܐ܀

 

ܡܳܪܝܳܐ ܗܽܘܼܝܽܘܼ ܒܳܪܽܘܿܝܳܟ܇ ܐܰܝܟ ܒܳܪܝܳܐ ܗܳܟܰܢ ܒܰܪܝܳܐ.

ܘܐܶܢ ܐܶܬܒܰܠܒܰܠ ܠܶܗ ܛܰܘܣܳܐ܇ ܥܶܠܰܬ ܥܶܠܰܬ ܓܢܺܝܚ̈ܳܬܳܐ܀

 

ܐܠܳܗܳܐ ܐܺܝܬܰܘܗܝ ܒܟܽܠܕܽܘܟ܇ ܘܠܳܐ ܡܰܡܶܕ ܡܶܢܶܗ ܐܰܬܪܳܐ.

ܚܳܒܶܫ ܠܳܗ̇ ܠܟܽܠܳܗ̇ ܒܪܺܝܼܬܳܐ܇ ܕܗܽܘܼܝܽܘ ܬܰܚܡܳܗ̇ ܠܰܒܪܺܝܬܳܐ܀

 

ܚܳܙܶܐ ܠܟܽܠܗܽܘܢ ܦܽܘܼܠܚܳܢ̈ܰܝܟ܇ ܘܐܳܦ ܠܳܐ ܚܰܕ ܛܳܥܶܐ ܡܶܢܶܗ.

ܘܬܳܩܶܠ ܠܟܽܠܗܽܘܢ ܣܽܘܼܥܪ̈ܳܢܰܝܟ܇ ܒܡܰܣܰܐܬܳܐ ܕܬܰܠܝܳܐ ܩܕܳܡܰܘܗܝ܀

 

ܫܳܡܰܥ ܡܶܕܶܡ ܕܪܳܬܶܡ ܐܰܢ̱ܬ܇ ܘܐܳܦ ܒܶܣܬܰܪ ܐܶܣܬܳܐ ܫܺܝܼܥܬܳܐ.

ܟܽܠܗܶܝܢ ܡܶܠܰܝ̈ܟ ܡܰܢ̈ܝܳܢ ܠܶܗ܇ ܘܐܳܦܠܳܐ ܚܕܳܐ ܢܳܦܠܳܐ ܡܶܢܶܗ܀

 

ܚܽܘܫܳܒܰܝ̈ܟ ܘܟܽܠܗܽܘܢ ܗܶܪ̈ܓܰܝܟ܇ ܓܠܶܝܢ ܩܕܳܡܰܘܗܝ ܐܰܝܟ ܢܰܗܺܝܼܪܳܐ.

ܒܳܚܰܪ ܒܳܩܶܐ ܘܰܡܒܰܨܶܐ܇ ܟܽܠ ܣܥܺܝܼܪ̈ܳܬܳܐ ܕܛܳܡܰܪ ܐܰܢ̱ܬ܀

ܟܽܠ ܪܶܓܬܳܐ ܕܣܳܠܩܳܐ ܒܠܶܒܳܟ܇ ܚܳܐܶܫ ܒܳܗ̇ ܡܶܢ ܩܕܳܡ ܕܬܶܣܰܩ.

ܟܽܠܗܽܘܢ ܝܽܘܐܳܒ̈ܶܐ ܕܢܰܦܫܳܟ܇ ܪܫܺܝܼܡܺܝܼܢ ܒܣܶܦܪܶܗ ܕܠܳܐ ܛܳܐܶܫ.

 

ܗܘܺܝ ܡܶܟܺܝܠ ܕܳܚܶܠ ܡܶܢܶܗ܇ ܘܰܦܪܽܘܿܥ ܙܶܕܩ̈ܰܘܗܝ ܒܫܰܠܡܽܘܼܬܳܐ.

ܘܐܶܢ ܥܒܰܕܬ ܗܳܟܰܢ ܩܢܰܝܬ ܐܶܢܽܘܢ܇ ܠܰܬܪ̈ܰܝܗܽܘܢ ܥܳܠܡ̈ܶܐ ܐܰܟܚܰܕ܀

 

ܒܳܬܰܪ ܡܳܪܝܳܐ ܐܰܠܳܗܳܟ܇ ܐܰܚܶܒ ܐܶܢܽܘܢ ܠܰܐܒܳܗ̈ܰܝܢ.

ܕܗܶܢܽܘܢ ܒܳܬܰܪ ܐܰܠܳܗܳܐ܇ ܝܳܗܒܺܝܢ ܠܳܟ ܚܰܝ̈ܶܐ ܘܙܰܒܢܳܐ܀

 

ܬܽܘܼܪܣܳܝܳܐ ܥܰܡ ܬܰܟܣܺܝܼܬܳܐ܇ ܡܩܰܪܒܺܝܢ ܠܳܟ ܕܠܳܐ ܚܰܘܣܳܢܳܐ.

ܘܰܡܓܰܙܪܺܝܢ ܠܳܟ ܟܽܠܡܳܐ ܕܒܳܥܶܐ܇ ܦܰܓܪܳܟ ܡܶܢ ܢܝܳܚ̈ܶܐ ܕܥܳܠܡܳܐ܀

 

ܒܟܽܠ ܕܶܡܘ̈ܳܢ ܘܰܒܟܽܠ ܐܽܘܼܪ̈ܚܳܢ܇ ܐܳܟܦܺܝܢ ܕܢܶܪܥܽܘܢ ܒܳܥܽܘܬܳܟ.

ܒܟܽܠ ܫܳܥܳܐ ܘܰܒܟܽܠ ܥܶܕܳܢ܇ ܩܳܝܡܺܝܢ ܠܗܶܝܢ ܠܰܣܢܺܝܩܘ̈ܳܬܳܟ܀

 

ܐܰܒܽܘܟ ܠܳܐ ܫܳܠܶܐ ܡܶܡܬܽܘܿܡ܇ ܡܶܢ ܦܽܘܼܠܚܳܢܳܐ ܕܥܰܠ ܐܰܦܰܝ̈ܟ.

ܟܳܕܶܢ ܠܺܠܝܳܐ ܘܐܺܝܼܡܳܡܳܐ܇ ܕܢܰܘܬܰܪ ܠܡܳܐ ܕܒܳܥܝܳܐ ܢܰܦܫܳܟ܀

 

ܠܳܐ ܩܽܘܪܳܐ ܐܳܦܳܠܐ ܚܽܘܼܡܳܐ܇ ܟܳܠܶܝܢ ܠܶܗ ܒܪܶܗܛܳܐ ܕܥܰܡܠܶܗ.

ܠܳܐܶܐ ܘܕܳܥܶܬ ܘܰܡܚܰܡܣܶܢ܇ ܒܗܰܘ ܩܪܳܒܳܐ ܕܡܽܘܼܠܳܝ ܪܶܓܬܳܟ܀

 

ܢܳܦܶܩ ܠܐܰܬܪܳܐ ܪܰܚܺܝܼܩܳܐ܇ ܒܐܰܦ̈ܰܝ ܩܶܢܛܳܐ ܘܣܽܘܼܪ̈ܳܕܶܐ.

ܘܠܳܐ ܗܳܦܶܟ ܐܶܠܳܐ ܕܰܢܗܦܶܟ܇ ܗܰܘܡܳܐ ܕܡܶܬܒܥܶܐ ܠܦܽܘܼܪܢܳܣܳܟ܀

 

ܐܶܡܰܬܝ ܕܦܳܢܶܐ ܡܶܢ ܥܰܡܠܶܗ܇ ܘܢܳܦܶܨ ܠܶܗ ܠܝܽܘܼܩܪܳܐ ܕܝܰܘܡܶܗ.

ܟܡܳܐ ܚܳܕܶܐ ܘܫܳܘܚ̈ܳܢ ܐܰܦ̈ܰܘܗܝ܇ ܕܢܶܫܟܰܚܟܽܘܢ ܚܠܺܝܼܡ̈ܶܐ ܢܛܺܝܼܪ̈ܶܐ܀

 

ܘܫܰܪܒܳܐ ܕܐܶܡܳܐ ܡܒܰܠܗܳܐ ܠܺܝ܇ ܘܠܰܝܬ ܠܺܝ ܒܶܗ ܡܰܦܬܰܚ ܦܽܘܼܡܳܐ.

ܕܟܽܠܡܳܐ ܕܐܶܡܪܶܬ ܢܳܦܶܠ ܠܟܳܐ܇ ܘܐܳܦܠܳܐ ܣܳܟ ܚܳܢܶܐ ܠܢܺܝܼܫܳܐ܀

 

ܠܳܐ ܩܰܢܝܳܐ ܐܳܦܠܳܐ ܦܽܘܼܡܳܐ܇ ܡܨܶܝܢ ܡܦܰܚܡܺܝܢ ܠܗܳܕܶܐ ܒܥܳܬܳܐ.

ܘܡܳܪܶܕ ܫܰܪܒܳܐ ܕܐܶܡܗ̈ܳܬܳܐ܇ ܡܶܢ ܟܽܠ ܦܶܚܡܳܐ ܘܰܒܨܳܬܳܐ܀

 

ܡܶܢ ܒܳܬܰܪ ܬܶܫܥܳܐ ܝܰܪ̈ܚܺܝܢ܇ ܕܒܰܛܢܳܐ ܥܡܺܝܼܠܳܐ ܘܡܰܠܙܳܢܳܐ.

ܡܳܚܶܝܢ ܚܶܒ̈ܠܶܐ ܠܝܳܠܶܕܬܳܐ܇ ܘܡܳܛܝܳܐ ܠܳܗ̇ ܠܣܶܦܬܳܐ ܕܩܰܒܪܳܐ܀

 

ܘܡܳܐ ܕܶܝܠܕܰܬ ܒܶܝܬ ܚܰܝ ܠܡܺܝܬܬܳܐ܇ ܗܳܐ ܛܥܳܬܳܗ̇ ܠܟܽܠܳܗ̇ ܥܳܩܬܳܐ.

ܡܥܰܦܩܳܐ ܡܢܰܫܩܳܐ ܠܝܰܠܽܘܼܕܗܿ܇ ܐܰܝܟ ܗܳܝ ܕܠܳܐ ܐܰܣܒܠܳܗ̇ ܡܶܕܶܡ܀

 

ܘܣܳܠܶܩ ܗܽܘܼ ܒܟܽܠ ܥܽܘܼܣܳܩ̈ܶܐ܇ ܘܣܳܠܩܳܐ ܗܳܝ ܒܟܽܠ ܥܽܘܼܦܳܩ̈ܶܐ.

ܘܰܟܡܳܐ ܕܐܰܣܓܺܝ ܡܶܢ ܚܽܘܨܳܦܶܗ܇ ܡܰܣܓܝܳܐ ܚܽܘܼܒܳܐ ܘܚܽܘܼܡܣܳܢܳܐ܀

 

ܐܶܢ ܡܳܛܶܐ ܠܶܗ ܟܺܐܒܳܐ ܙܥܽܘܿܪܳܐ܇ ܗܳܐ ܐܳܚܕܺܝܼܢ ܠܳܗ̇ ܨܰܘܪ̈ܳܢܶܐ.

ܘܐܳܙܳܠ̱ܐ ܘܢܳܩܫܳܐ ܒܟܽܠ ܬܰܪܥܳܐ܇ ܕܰܟܒܰܪ ܡܥܰܕܝܳܐ ܣܰܡܳܡ̈ܢܶܐ܀

 

ܘܐܳܬܶܐ ܠܺܠܝܳܐ ܚܰܪܡܳܢܳܐ܇ ܘܝܳܪܒܺܝܢ ܥܽܘܼܣܳܩ̈ܶܐ ܕܛܰܠܝܳܐ.

ܥܳܒܪܺܝܢ ܙܰܒܢ̈ܶܐ ܘܥܶܕܳܢ̈ܶܐ܇ ܘܰܡܥܰܦܶܦ ܠܓܽܘܼܡܕܳܢܽܘܬܶܗ܀

 

ܠܳܐ ܫܳܠܶܐ ܠܶܗ ܡܶܢ ܒܶܟܝܳܐ܇ ܘܡܶܢ ܩܳܠܳܐ ܕܟܽܠ ܙܥܳܩ̈ܳܬܳܐ.

ܥܳܪܩܳܐ ܫܶܢܬܳܐ ܡܶܢ ܥܰܝ̈ܢܶܝܗ̇܇ ܘܠܳܐ ܝܳܕܥܳܐ ܠܐܰܝܟܳܐ ܬܶܥܪܽܘܿܩ܀

 

ܡܢܰܨܪܳܐ ܠܶܗ ܒܰܣܺܝܼܡܳܐܺܝܬ܇ ܢܽܘܼܨܳܪ̈ܶܐ ܡܰܠܰܐܟܳܝ̈ܶܐ.

ܡܢܺܝܕܳܐ ܕܰܪܓܽܘܼܫܬܶܗ ܘܒܳܥܝܳܐ܇ ܘܰܡܦܰܢܶܐ ܠܳܗ̇ ܒܥܽܘ̈ܝܳܛܶܐ܀

 

ܘܥܳܒܰܪ ܠܶܠܝܳܐ ܗܳܟܰܢܳܐ܇ ܒܗܳܢ ܡܰܟܬܳܫܳܐ ܡܣܺܝܼܦܳܢܳܐ.

ܘܠܳܐ ܛܶܥܡܰܬ ܒܳܒܬܳܗ̇ ܫܶܢܬܳܗ̇܇ ܘܐܳܦܠܳܐ ܦܰܓܪܳܗ̇ ܟܽܠ ܪܘܳܚܬܳܐ܀

 

ܫܡܰܥܘ ܕܡܳܢܳܐ ܥܳܒܕܳܐ ܐܶܡܳܐ܇ ܒܳܬܰܪ ܟܽܠܶܗ ܗܰܘ ܫܚܳܩܳܐ.

ܢܳܬܦܳܐ ܠܶܗ ܡܶܢ ܕܰܪܓܽܘܼܫܬܶܗ܇ ܘܰܡܕܰܒܩܳܐ ܠܶܗ ܥܰܠ ܚܰܕܝܳܗ̇܀

 

ܐܰܢ̱ܬ ܗܽܘ ܐܳܒܝ ܘܐܶܡܝ ܐܳܡܪܳܐ ܠܶܗ܇ ܘܐܰܢ̱ܬ ܗ̱ܽܘ ܐܺܝܼܬܰܝܟ ܚܽܘܼܒܶܗ ܕܠܶܒܝ.

ܡܢܰܫܩܳܐ ܠܶܗ ܘܒܳܟܝܳܐ ܘܓܳܚܟܳܐ܇ ܘܪܳܢܝܳܐ ܕܐܺܝܼܬܶܝܗ̇ ܒܦܰܪܕܰܝܣܳܐ܀

 

ܡܰܢ ܡܰܕܪܶܟ ܠܶܗ ܠܗܳܢ ܐ̱ܪܳܙܳܐ܇ ܘܡܰܢܽܘܼ ܡܶܫܟܰܚ ܡܦܰܫܶܩ ܠܶܗ.

ܠܰܝܬ ܠܶܗ ܦܽܘܫܳܩܳܐ ܒܐܰܪܥܳܐ܇ ܐܶܠܳܐ ܒܠܶܒܳܐ ܕܝܳܠܶܕܬܳܐ܀

 

ܐܶܢ ܗܳܕܶܐ ܐܺܝܬܶܝܗ̇ ܐܶܡܳܟ܇ ܟܡܳܐ ܚܰܝܳܒ ܐܰܢ̱ܬ ܠܳܗ̇ ܛܰܠܝܳܐ.

ܐܰܣܓܳܐ ܟܽܠܝܽܘܿܡ ܐܺܝܼܩܳܪܳܟ܇ ܘܚܽܘܼܒܳܐ ܕܪܳܬܰܚ ܠܝܳܠܶܕܬܳܟ܀

 

ܠܳܐ ܬܶܛܥܶܐ ܟܺܐܒ̈ܶܐ ܕܣܶܒܠܰܬ܇ ܚܠܳܦܰܝܟ ܡܶܢ ܝܰܘܡܶܗ ܕܒܰܛܢܳܟ.

ܦܪܽܘܿܥ ܠܳܗ̇ ܩܰܠܺܝܠ ܡܶܢ ܣܰܓܺܝ܇ ܘܡܳܪܝܳܐ ܦܳܪܰܥ ܠܳܟ ܒܣܰܓܺܝ܀

 

ܒܳܬܰܪ ܪܶܚܡܰܬ ܐܰܠܳܗܳܐ܇ ܘܒܳܬܰܪ ܚܽܘܒܳܐ ܕܝܳܠܽܘܕ̈ܰܝܟ.

ܐܰܚܶܒܳܝܗܝ ܐܳܦ ܠܩܰܪܺܝܒܼܳܟ܇ ܕܐܺܝܼܬܰܘܗܝ ܒܰܪ ܓܶܢܣܳܟ ܘܛܽܘܼܗܡܳܟ܀

 

ܟܽܠܡܳܐ ܕܨܳܒܶܝܬ ܕܢܶܥܒܶܕ ܠܳܟ܇ ܩܰܪܺܝܼܒܳܟ ܒܗܳܠܶܝܢ ܚܰܝ̈ܶܐ.

ܥܒܶܕ ܥܰܡܶܗ ܡܫܰܡܠܝܳܐܺܝܬ܇ ܘܗܳܢܰܘ ܦܽܘܼܩܕܳܢܶܗ ܕܪܰܒܳܟ܀

 

ܨܳܒܶܝܬ ܕܢܶܪܚܡܳܟ ܫܰܦܝܳܐܺܝܬ܇ ܪܚܰܡܳܝܗܝ ܐܳܦ ܐܰܢ̱ܬ ܕܰܟܝܳܐܺܝܬ.

ܘܒܳܥܶܐ ܐܰܢ̱ܬ ܕܰܢܩܽܘܡ ܒܥܶܕܪܳܟ܇ ܦܫܽܘܿܛ ܠܶܗ ܥܶܕܪܳܐ ܕܝܰܡܺܝܢܳܟ܀

 

ܠܳܐ ܫܳܦܪܳܐ ܠܳܟ ܕܢܰܒܶܐܫ ܠܳܟ܇ ܠܳܐ ܬܰܢܟܺܝܘܗܝ ܐܳܦܠܳܐ ܩܰܠܺܝܠ.

ܘܰܕܠܳܐ ܪܳܓܳܐ ܠܳܟ ܕܢܶܣܩܪܳܟ܇ ܠܳܐ ܬܶܛܰܪ ܠܶܗ ܩܶܢܶܐܬܳܐ܀

 

 

ܒܪܺܝܫܳܐ ܕܣܶܕܪܳܐ ܕܩܰܪ̈ܺܝܒܶܐ܇ ܕܰܦܩܺܝܕ ܐܰܢ̱ܬ ܠܰܡܥܰܕܳܪܽܘ.

ܐܳܬܶܝܢ ܣܳܒ̈ܶܐ ܕܝܰܘܡ̈ܳܬܳܐ܇ ܕܐܰܣܺܝܼ̈ܢܳܢ ܠܗܽܘܿܢ ܚܶܟܡ̈ܳܬܳܐ܀

 

ܠܳܐ ܬܫܽܘܛ ܐܶܢܽܘܢ ܕܰܣܚܺܝܼܦܺܝܼܢ܇ ܚܙܳܬܳܐ ܠܳܐ ܡܰܗܢܝܳܐ ܡܶܕܶܡ.

ܐܺܝܼܬܰܝܗܽܘܢ ܓܰܙ̈ܶܐ ܘܐܰܘܨܪ̈ܶܐ܇ ܘܣܺܝܼܡ̈ܳܬܳܐ ܕܓܳܝܚ̈ܳܢ ܒܥܽܘܼܬܪ̈ܶܐ܀

 

ܟܫܶܝܢ ܠܘܳܬܗܽܘܢ ܟܽܠ ܢܶܣܝܳܢ̈ܶܐ܇ ܘܰܡܕܰܪܫܺܝܼܢ ܒܟܽܠ ܕܽܘܒܳܪ̈ܶܐ.

ܙܠܽܘܥ ܡܶܢ ܝܰܡܗܽܘܢ ܚܶܟܡ̈ܳܬܳܐ܇ ܘܝܺܕܰܥܬܳܐ ܕܢܳܦܠܳܐ ܠܐܽܘܪܚܳܟ܀

 

ܠܳܐ ܬܰܦܶܠ ܐܶܢܽܘܢ ܒܡܶܕܶܡ܇ ܕܠܳܐ ܢܠܽܘܼܛܽܘܼܢܳܟ ܘܬܶܒܰܐܫ ܠܳܟ.

ܝܰܩܰܪ ܐܶܢܽܘܢ ܚܘܺܝܼܚܳܐܺܝܬ܇ ܘܐܺܝܩܳܪܳܟ ܡܶܬܦܢܶܐ ܠܳܟ܀

 

ܐܺܝܬܰܝܗܽܘܢ ܗ̱ܰܘܘ ܐܳܦ ܗܶܢܽܘܢ܇ ܒܝܰܘܡܰܝ̈ܗܽܘܢ ܒܳܗ̇ ܒܰܕܡܽܘܬܳܟ.

ܐܶܢ ܝܰܘܡܳܢܳܐ ܣܚܺܝܦܺܝܢ܇ ܐܶܬܕܟܰܪ ܕܙܰܒܢܳܐ ܢܣܺܝܼܦ ܐܳܦ ܠܳܟ܀

 

ܐܰܚܶܒܳܝܗܝ ܛܳܒ ܠܝܽܘܼܠܦܳܢܳܐ܇ ܘܐܶܬܟܰܬܰܫ ܚܠܳܦܰܘܗܝ ܟܽܠܝܽܘܿܡ.

ܗܽܘܝܽܘ ܕܰܡܨܰܒܶܬ ܢܰܦܫܳܟ܇ ܘܦܳܪܶܫ ܠܳܟ ܡܶܢ ܚܰܝܘ̈ܳܬܳܐ܀

 

ܩܪܺܝܼ ܟܽܠܝܽܘܿܡ ܘܠܳܐ ܬܶܡܰܐܢ ܠܳܟ܇ ܒܨܺܝ ܟܬܳܒ̈ܶܐ ܘܫܰܐܶܠ ܐܶܢܽܘܢ.

ܕܰܟܡܳܐ ܕܡܰܘܣܦܰܬ ܝܽܘܼܠܦܳܢܳܐ܇ ܡܟܰܢܫܰܬ ܠܳܟ ܟܽܠ ܥܽܘܼܕܪܳܢܳܐ܀

 

ܗܘܼܺܝ ܫܳܡܽܘܿܥܳܐ ܠܒܰܪ ܓܶܢܣܳܟ܇ ܕܢܶܫܒܽܘܿܩ ܠܳܟ ܡܳܪܝܳܐ ܚܰܘܒܰܝ̈ܟ.

ܐܰܟܬܳܐ ܒܳܪܡܳܐ ܠܶܗ ܠܶܠܒܳܐ܇ ܘܐܶܢ ܐܶܬܕܰܚܝܰܬ ܐܶܬܐܰܣܺܝ܀

 

ܝܺܨܶܦ ܕܚܽܘܼܠܡܳܢܳܐ ܕܦܰܓܪܳܟ܇ ܕܝܰܩܺܝܼܪ ܡܶܢ ܟܽܠܡܳܐ ܕܰܩܢܰܝܬ.

ܘܐܶܢ ܐܶܬܒܰܠܒܰܠ ܡܽܘܼܙܳܓܳܟ܇ ܗܘܰܘ ܟܽܠܗܽܘܢ ܚܰܝܰܝ̈ܟ ܫܚܳܩ̈ܶܐ܀

 

ܠܳܐ ܬܰܣܓܶܐ ܡܶܢ ܡܶܐܟܽܘܼܠܬܳܐ܇ ܦܪܺܝܼܫܳܐܺܝܬ ܡܶܢ ܗܳܝ ܕܪܰܡܫܳܐ.

ܕܐܶܢ ܐܶܙܕܰܪܒܰܬ ܠܳܗܿ ܟܰܪܣܳܐ܇ ܐܰܘܠܕܰܬ ܣܽܘܼܓܳܐܐ ܕܟܽܘܼܪ̈ܗܳܢܶܐ܀

 

ܗܘܼܺܝ ܡܛܰܟܣܳܐ ܒܟܽܠ ܐܽܘܼܪ̈ܚܳܬܳܟ܇ ܬܳܩܢܺܝܢ ܠܗܽܘܿܢ ܟܽܠ ܗܽܘܼܦܳܟ̈ܰܝܟ.

ܠܒܰܪ ܡܶܢ ܛܶܟܣܳܐ ܕܰܡܫܽܘܼܚܬܳܐ܇ ܟܽܠܗܶܝܢ ܐܳܬܶܝܢ ܗܦܺܝܼܟ̈ܳܬܳܐ܀

 

ܟܠܺܝܼܠܳܟ ܡܶܢ ܪܶܚܡܰܬ ܟܶܣܦܳܐ܇ ܕܠܰܝܬ ܠܗܶܝܢ ܬܚܽܘܼܡܳܐ ܠܒܳܥܽܘܬܳܗ̇.

ܘܰܟܡܳܐ ܕܟܳܫܶܝܬ ܡܳܡܽܘܿܢܳܐ܇ ܠܳܐ ܣܳܒܥܳܐ ܢܰܦܫܳܟ ܡܶܢܶܗ܀

 

ܝܰܥܢܽܘܼܬܳܐ ܐܺܝܼܬܶܝܗ̇ ܬܰܪܥܳܐ܇ ܠܟܽܠܗܽܘܢ ܫܚܳܩ̈ܶܐ ܕܗܳܢ ܥܳܠܡܳܐ.

ܡܶܢܳܗ̇ ܢܳܒܥܺܝܼܢ ܚܶܪ̈ܝܳܢܶܐ܇ ܘܰܩܪ̈ܳܒܶܐ ܕܟܽܠܗܽܘܢ ܙܰܒܢ̈ܶܐ܀

 

ܡܶܬܓܰܪܶܐ ܥܰܡܳܐ ܒܥܰܡܳܐ܇ ܕܢܰܦܬܶܐ ܘܢܶܡܫܽܘܿܚ ܐܰܪ̈ܥܳܬܶܗ.

ܘܡܰܠܟܽܘܿܬܳܐ ܫܳܒܝܳܐ ܚܒܰܪܬܳܗ̇܇ ܕܬܶܚܛܽܘܿܦ ܡܶܢܳܗ̇ ܛܳܒ̈ܳܬܳܗ̇܀

 

ܐܶܙܕܰܗܰܪ ܡܶܢ ܪܶܓܬܳܐ ܕܦܰܓܪܳܐ܇ ܕܰܡܣܺܝܼܦܳܐ ܠܳܗ̇ ܠܐܺܝܬܽܘܬܳܟ.

ܡܩܰܦܚܳܐ ܡܬܰܠܚܳܐ ܠܪܘܿܟܳܒܳܟ܇ ܘܠܰܝܬ ܣܰܒܥܽܘܼ ܠܫܰܝܚܳܢܽܘܬܳܗ̇܀

 

ܫܰܟܶܢ ܠܳܗ̇ ܟܽܠܡܳܐ ܕܒܳܥܝܳܐ܇ ܘܡܶܬܠܰܗܛܳܐ ܘܝܰܬܺܝܪ ܒܳܥܝܳܐ.

ܘܫܳܐܰܚ ܠܶܗ ܟܽܠܶܗ ܦܰܓܪܳܟ܇ ܘܐܳܙܶܠ ܡܰܕܥܳܟ ܥܰܡ ܗܰܘܢܳܟ܀

 

ܡܫܰܚܛܳܐ ܫܡܳܟ ܒܶܝܬ ܒܢܰܝܢ̈ܳܫܳܐ܇ ܘܒܶܗܬܰܬ ܐܰܦ̈ܶܐ ܡܰܠܒܫܳܐ ܠܳܟ.

ܠܐܰܝܟܳܐ ܕܡܶܬܦܢܶܝܬ ܡܽܘܼܝܳܩܳܐ܇ ܘܚܶܣܕܳܐ ܠܘܳܬ ܟܽܠ ܡܽܘܼܫܚ̈ܳܬܳܐ܀

 

ܗܘܼܺܝ ܡܣܰܝܒܪܳܢܳܐ ܒܕܽܘܼܘܳܢܳܟ܇ ܘܚܰܡܣܶܢ ܘܠܳܐ ܬܰܘܚܶܠ ܡܶܡܬܽܘܡ.

ܠܳܐ ܡܰܘܚܰܪ ܐܳܬܶܐ ܢܦܺܐܫܳܐ܇ ܘܚܰܕܶܬ ܘܡܶܬܪܰܘܚܳܐ ܢܰܦܫܳܟ܀

 

ܠܰܝܬ ܦܽܘܼܪܣܳܐ ܠܡܶܛܥܰܢ ܟܺܐܒ̈ܶܐ܇ ܘܡܶܫܬܰܘܙܰܒܘ ܒܐܽܘܼܠܨܳܢܳܐ.

ܠܒܰܪ ܡܶܢ ܐܽܘܼܪܚܳܐ ܕܚܽܘܼܡܣܳܢܳܐ܇ ܕܒܳܗ̇ ܪܕܰܘ ܟܽܠܗܽܘܢ ܚܰܟܺܝܡ̈ܶܐ܀

 

 

ܐܰܪܚܶܩ ܡܶܢ ܚܠܽܘܼ̈ܠܶܐ ܕܥܳܠܡܳܐ܇ ܕܥܳܒܶܕ ܠܗܽܘܢ ܒܺܝܼܫܳܐ ܩܶܢܶܗ.

ܘܡܶܢܗܽܘܢ ܫܰܪ̈ܒܳܢ ܡܰܨܘ̈ܳܬܳܐ܇ ܘܟܽܠ ܪ̈ܺܝܫܶܐ ܕܰܓܢܺܝܚ̈ܳܬܳܐ܀

 

ܐܶܫܬܰܐܰܠ ܡܶܢ ܪܰܘܳܝܽܘܬܳܐ܇ ܕܥܳܒܕܳܐ ܠܶܗ ܠܡܳܪܳܗ̇ ܓܽܘܼܚܟܳܐ.

ܘܢܳܬܦܳܐ ܡܶܢܶܗ ܠܒܽܘܼܝܳܢܳܐ܇ ܘܗܳܘܶܐ ܠܶܗ ܒܥܺܝܪܳܐ ܕܚܰܩܠܳܐ܀

 

ܐܶܬܬܦܺܝܼܪ ܡܼܶܢ ܩܽܘܼܦ̈ܣܶܐ ܘܦܶܣ̈ܶܐ܇ ܕܠܰܝܬ ܠܗܽܘܢ ܩܝܳܡܳܐ ܘܰܡܫܽܘܼܚܬܳܐ.

ܕܒܳܙܺܝܢ ܘܰܡܥܰܪܛܠܺܝܢ ܠܡܳܪܗܽܘܢ܇ ܘܣܳܬܪܺܝܢ ܒܰܝܬܶܗ ܘܰܕܚܰܒܪ̈ܰܘܗܝ܀

 

ܠܳܐ ܬܶܬܚܪܶܐ ܠܽܘܼܩܒܰܠ ܐܰܢ̱ܬܬܳܐ܇ ܕܙܳܟܝܳܐ ܠܳܟ ܟܡܳܐ ܕܐܶܬܓܰܒܰܪܬ.

ܕܠܳܐ ܐܶܬܳܐ ܒܣܶܦܪܳܐ ܕܥܰܡܡ̈ܶܐ܇ ܕܐܶܬܟܰܒܫܰܬ ܐܰܢ̱ܬܬܳܐ ܕܢܳܗܡܳܐ܀

 

ܥܰܡ ܚܰܒܪ̈ܰܝܟ ܗܘܼܺܝ ܫܰܪܺܝܪܳܐ܇ ܕܠܳܐ ܐܺܝܬ ܕܰܫܟܺܝܪ ܡܶܢ ܙܺܐܦܳܐ.

ܕܐܳܙܺܠ̱ܝܢ ܒܐܽܘܼܪܚܳܐ ܢܟܺܝܠܼܳܐܺܝܬ܇ ܐܽܘܼܪܚܗܽܘܢ ܗܳܘܝܳܐ ܠܗܽܘܿܢ ܠܦܰܚܳܐ܀

 

ܠܐܢܳܫ̈ܳܐ ܒܺܝܫ̈ܶܐ ܠܳܐ ܬܶܩܰܦ܇ ܕܠܳܐ ܬܶܕܒܰܩ ܒܳܟ ܒܺܝܼܫܽܘܼܬܗܽܘܢ.

ܕܐܰܡܺܝܼܪܳܐ ܒܡܰܬܠܳܐ ܕܥܰܡܡ̈ܶܐ܇ ܕܢܳܩܶܦ ܠܒܺܝܼܫܳܐ ܗܳܘܶܐ ܚܰܒܪܶܗ܀

 

ܐܶܢ ܝܺܙܰܦܬ ܦܪܽܘܿܥ ܒܰܓܥܰܠ܇ ܕܠܳܐ ܢܶܫܠܰܡ ܫܰܪܒܳܐ ܒܬܽܘܼܟܳܐ.

ܕܡܰܘܙܦܳܢܳܐ ܥܰܡ ܝܳܙܽܘܦܳܐ܇ ܣܽܘܼܓܰܐܬ ܚܳܬܡܺܝܢ ܒܢܶܨܝܳܢܳܐ܀

 

ܐܶܢ ܢܕܰܪܬ ܡܶܕܶܡ ܫܰܠܶܡܳܝܗܝ܇ ܘܐܶܢ ܠܳܐ ܗܳܘܶܐ ܢܶܕܪܳܟ ܥܰܘܠܳܐ.

ܕܺܝܡܰܝܬ ܫܰܡܠܳܐ ܡܰܘܡ̈ܳܬܳܟ܇ ܕܝܳܡܶܐ ܣܰܓܺܝ ܕܰܓܳܠܳܐ ܗܰܘ܀

 

ܠܳܐ ܬܨܰܚܶܐ ܒܐܰܝܕܳܐ ܥܶܠܬܳܐ܇ ܕܨܽܘܼܚܺܝܬܳܐ  ܡܰܚܦܪܳܐ ܐܰܦ̈ܶܐ.

ܠܳܐ ܬܓܰܕܶܦ ܐܳܦܠܳܐ ܬܶܟܦܽܘܿܪ܇ ܕܓܽܘܼܕܳܦܳܐ ܣܢܶܐ ܗܽܘܼ ܩܕܳܡ ܡܳܪܝܳܐ܀

 

ܠܳܐ ܬܰܫܠܶܡ ܢܰܦܫܳܟ ܠܨܰܕܘܳܐ܇ ܘܨܰܕܘܳܐ ܫܳܪܶܟ ܠܰܩܠܳܠܳܐ.

ܗܘܼܺܝ ܪܡܺܝܼܣܳܐ ܒܟܽܠܗܽܘܢ ܥܒܳܕ̈ܰܝܟ܇ ܘܠܳܐ ܡܶܡܬܽܘܿܡ ܫܳܪܥܳܐ ܪܶܓܠܳܟ܀

 

ܠܳܐ ܬܶܬܚܪܶܐ ܠܘܼܽܩܒܰܠ ܣܰܟܠܳܐ܇ ܕܳܠܐ ܡܰܗܢܝܳܐ ܣܳܦܪܽܘܼܬܳܟ.

ܘܐܶܢ ܐܰܓܡܶܕܬ ܘܐܰܣܓܺܝܬ ܕܪܳܫܳܐ܇ ܗܦܰܟܬ ܘܰܗܘܰܝܬ ܠܳܟ ܐܰܟܘܳܬܶܗ܀

 

ܚܙܺܝ ܠܳܐ ܬܶܣܬܰܪܗܰܒ ܒܡܶܠܬܳܐ܇ ܘܐܶܠܳܐ ܒܰܓܥܰܠ ܢܳܦܶܠ ܐܰܢ̱ܬ.

ܘܐܶܢ ܫܰܐܠܽܘܼܟ ܪܰܢܳܐ ܣܰܓܺܝ܇ ܡܶܢ ܩܕܳܡ ܕܬܶܬܶܠ ܦܽܘܼܢܳܝܳܐ܀

 

ܠܳܐ ܬܶܗܘܶܐ ܠܳܟ ܦܰܩܳܩܳܐ܇ ܕܠܳܐ ܢܒܰܙܚܽܘܢ ܒܳܟ ܫܳܡܽܘܿܥ̈ܶܐ.

ܦܰܩܳܩܽܘܬܳܐ ܡܦܰܪܣܝܳܐ ܠܶܗ܇ ܠܡܳܪܳܗ̇ ܕܐܺܝܼܬܰܘܗܝ ܠܶܗ ܣܪܺܝܩܳܐ܀

 

ܠܳܐ ܬܶܗܘܶܐ ܪܳܡܳܐ ܒܠܶܒܳܟ܇ ܕܪܳܡܽܘܼܬܳܟ ܡܩܰܘܝܳܐ ܠܘܳܬܳܟ.

ܘܠܳܐ ܚܳܫܒܺܝܢ ܠܳܟ ܟܢܰܘ̈ܳܬܳܟ܇ ܐܶܠܳܐ ܐܰܟܡܳܐ ܕܫܳܘܶܐ ܐܰܢ̱ܬ܀

 

ܗܘܼܺܝ ܒܰܣܺܝܼܡܳܐ ܥܰܡ ܟܽܠܢܳܫ܇ ܘܟܰܒܶܫܬ ܐܳܦ ܠܗܽܘܢ ܠܣܳܢ̈ܰܝܟ.

ܗܘܼܺܝ ܡܰܟܺܝܼܟܳܐ ܒܐܽܘܼܪ̈ܚܳܬܳܟ܇ ܘܰܡܡܰܟܶܟ ܐܰܢ̱ܬ ܠܓܰܢ̱ܒܳܪ̈ܶܐ܀

 

ܫܦܺܝܼܥܳܐ ܪܚܺܝܼܡ ܗ̱ܽܘܼ ܠܘܳܬ ܟܽܠܚܰܕ܇ ܘܰܫܦܺܝܥܼܽܘܼܬܶܗ ܡܶܙܕܰܡܪܳܐ.

ܕܰܦܫܺܝܛܳܐ ܐܺܝܕܶܗ ܠܡܶܬܰܠ܇ ܡܶܬܢܰܫܩܳܐ ܐܺܝܕܶܗ ܒܚܽܘܼܒܳܐ܀

 

ܠܳܐ ܬܶܗܘܶܐ ܙܰܝܽܘܥܬܳܢܳܐ܇ ܟܰܪ ܕܠܰܝܬ ܐܰܬܪܳܐ ܠܙܰܘܥܬܳܐ.

ܘܐܶܠܳܐ ܗܘܰܝܬ ܠܳܟ ܓܽܘܼܚܟܳܐ܇ ܠܘܳܬ ܟܽܠܗܽܘܢ ܕܫܳܡܥܺܝܢ ܛܶܒܳܟ܀

 

ܠܒܺܝܼܒܳܐ ܕܩܳܪܶܐ ܥܰܠ ܩܺܐܪܣܳܐ܇ ܘܰܡܚܰܡܣܶܢ ܘܠܳܐ ܡܰܟܫܶܠ ܠܶܗ.

ܟܠܝܼܠܳܐ ܩܳܛܶܦ ܕܩܽܘܼܠܳܣ̈ܶܐ܇ ܘܗܳܘܶܐ ܠܡܰܬܠܳܐ ܘܬܽܘܼܢܳܝܳܐ܀

 

ܗܘܼܺܝ ܡܗܰܘܢܳܐ ܐܰܟܡܳܐ ܕܰܡܨܶܝܬ܇ ܒܟܽܠܗܽܘܢ ܦܽܘܼܠܚܳܢ̈ܶܐ ܕܝܰܘܡܳܟ.

ܘܫܳܦܰܥ ܦܽܘܼܠܚܳܢܳܟ ܒܐܳܕܫ̈ܶܐ܇ ܘܟܽܠ ܦܺܐܪ̈ܶܐ ܕܡܰܘܬܪܺܝܢ ܠܚܰܝܰܝ̈ܟ܀

 

 

ܗܘܺܝܼ ܡܪܰܚܡܳܢܳܐ ܠܘܳܬ ܟܽܠܢܳܫ܇ ܕܟܽܠܢܳܫ ܢܒܰܪܶܟ ܠܗܽܘܢ ܚܰܝܰܝ̈ܟ.

ܕܠܰܝܬ ܡܶܕܶܡ ܒܰܕܡܽܘܬ ܚܢܳܢܳܐ܇ ܕܩܳܕܶܐ ܪ̈ܰܚܡܶܐ ܥܰܠ ܡܳܪܶܗ܀

 

ܩܰܠܽܘܛܳܐ ܕܠܳܐ ܡܨܶܐ ܕܢܶܬܶܠ܇ ܐܳܦܠܳܐ ܗܽܘ ܡܶܬܗܢܶܐ ܡܶܕܶܡ.

ܐܳܙܶܠ ܩܶܢܝܳܢܶܗ ܠܐܰܒܕܳܢ܇ ܚܽܘܼܣܪܳܢܳܐ ܠܶܗ ܘܰܠܐܢܳܫܳܐ܀

 

ܚܳܕܽܘܿܪܳܐ ܕܦܳܫܶܛ ܐܺܝܕܶܗ܇ ܦܫܽܘܿܛ ܐܺܝܕܳܟ ܠܘܳܬ ܣܽܘܢܩܳܢܶܗ.

ܒܰܕܢܳܩܶܫ ܒܬܰܪܥܳܟ ܠܳܐ ܬܶܓܥܽܘܿܪ܇ ܕܐܳܬܶܐ ܠܳܟ ܕܚܰܫܒܳܟ ܛܳܒܳܐ܀

 

ܠܐܰܪܡܰܠܬܳܐ ܕܐܶܬܓܰܠܙܰܬ ܠܳܗ̇܇ ܡܶܢ ܓܰܒܪܳܐ ܘܡܶܢ ܥܳܕܽܘܪܳܐ.

ܩܽܘܼܡ ܒܥܶܕܪܳܗ̇ ܘܗܰܒ ܣܢܺܝܼܩܽܘܼܬܳܗ̇܇ ܘܐܶܫܬܟܰܚܬ ܡܰܠܰܐܳܟܐ ܠܐܽܘܼܪܚܳܗ̇܀

 

ܠܝܰܬܡܳܐ ܕܪܳܐܶܬ ܡܶܢ ܩܽܘܪܳܐ܇ ܐܰܠܒܶܫܳܝܗܝ ܘܙܰܘܶܕܳܝܗܝ ܒܚܽܘܼܒܳܐ.

ܘܐܶܢ ܥܒܰܕܬ ܗܳܟܰܢܳܐ ܗܘܰܝܬ ܠܶܗ܇ ܐܰܒܳܐ ܘܐܶܡܳܐ ܚܠܳܦ ܡܳܪܳܟ܀

 

ܠܐܰܟܣܢܳܝܳܐ ܕܠܰܝܬ ܠܶܗ ܕܽܘܟܳܐ܇ ܕܢܶܣܡܽܘܿܟ ܪܺܝܫܶܗ ܠܰܢܝܳܚܳܐ.

ܟܰܢܶܫܳܝܗܝ ܘܗܳܘܶܐ ܐܰܓܪܳܟ܇ ܒܐܰܘܳܢ̈ܶܐ ܕܰܠܥܶܠ ܕܐܰܒܽܘܼܟ܀

 

ܟܪܺܝܗܳܐ ܕܡܶܫܬܰܢܰܩ ܒܥܰܪܣܶܗ܇ ܘܠܳܐ ܡܨܶܐ ܕܢܶܙܒܶܢ ܣܰܡܳܡܢ̈ܶܐ.

ܣܥܽܘܿܪܳܝܗܝ ܘܐܶܫܟܰܚ ܠܶܗ ܐܳܣܝܳܐ܇ ܐܶܫܟܰܚܬ ܐܳܣܝܳܐ ܠܟܽܘܼܬܡ̈ܳܬܳܟ܀

 

ܠܣܰܡܝܳܐ ܕܦܳܐܶܕ ܡܶܢ ܫܒܺܝܠܳܐ܇ ܗܺܘܝ ܠܶܗ ܗܰܕܳܝܳܐ ܠܐܽܘܼܪܚܶܗ.

ܘܰܡܨܰܠܶܐ ܥܠܰܝܟ ܘܦܳܬܰܚ ܠܳܟ܇ ܐܽܘܪܚܳܐ ܕܦܰܪܕܰܝܣܳܐ ܕܰܠܥܶܠ܀

 

ܠܗܰܘ ܕܢܰܟܠܶܗ ܙܰܒܢܳܐ ܘܰܢܦܰܠ܇ ܘܒܳܗܶܬ ܕܢܶܓܠܶܐ ܠܶܗ ܠܛܶܒܶܗ.

ܐܰܩܺܝܡܳܝܗܝ ܘܢܶܬܪܰܘܰܚ ܠܶܗ܇ ܘܬܶܬܪܰܘܰܚ ܥܳܩܬܳܟ ܐܶܢ ܗܘܳܬ܀

 

ܗܰܘ ܕܐܰܪܫܺܝ ܒܳܟ ܛܰܝܒܽܘܬܳܐ܇ ܐܰܣܓܳܐ ܠܘܳܬܶܗ ܬܰܘܕܺܝܼܬܳܐ.

ܕܠܰܝܬ ܡܶܕܶܡ ܕܰܪܚܺܝܼܡ ܡܩܰܒܰܠ܇ ܒܰܕܡܽܘܼܬ ܩܽܘܼܒܳܠ ܛܰܝܒܽܘܼܬܳܐ܀

 

ܠܳܐ ܬܶܪܢܶܐ ܒܺܝܼܫܬܳܐ ܒܐ̱ܢܳܫܳܐ܇ ܐܶܠܳܐ ܬܩܽܘܼܡ ܠܳܗ̇ ܬܰܚܘܼܺܝܬܳܐ.

ܕܠܰܝܬܰܝܟ ܒܳܚܽܘܿܪܳܐ ܕܐ̱ܢܳܫܳܐ܇ ܕܡܳܪܝܳܐ ܐܶܢܶܝܢ ܟܰܣܝ̈ܳܬܳܐ.

 

ܗܘܼܺܝ ܡܗܰܝܡܢܳܐ ܥܰܡܗܽܘܿܢ ܕܚܰܒܪ̈ܰܝܟ܇ ܒܟܽܠ ܐܽܘܼܪܚܳܐ ܕܐܳܙܶܠ ܐܰܢ̱ܬ ܒܳܗ̇.

ܕܢܳܟܶܠ ܠܚܰܒܪܶܗ ܒܟܽܠ ܥܶܠܬܳܐ܇ ܗܳܘܶܐ ܠܶܗ ܚܰܒܪܳܐ ܠܣܳܛܳܢܳܐ܀

 

ܠܳܐ ܬܶܥܽܘܼܠ ܒܫܰܪܒܳܐ ܕܠܰܝܬ ܠܳܟ܇ ܟܽܠ ܨܒܽܘܼܬܳܐ ܒܶܗ ܘܟܽܠ ܡܶܠܳܐ.

ܘܐܶܠܳܐ ܥܒܰܕܬ ܠܳܟ ܢܩܳܫ ܪܺܝܼܫܳܐ܇ ܫܺܝܼܥܳܐܺܝܬ ܘܡܶܢ ܝܰܬܺܝܼܪܘܼ܀

 

ܡܰܣܰܐܬܳܟ ܬܶܗܘܶܐ ܬܪܺܝܨܳܐ܇ ܘܠܳܐ ܬܶܗܐ ܬܳܩܶܠ ܒܳܗ̇ ܒܙܺܐܦܳܐ.

ܐܶܬܕܟܰܪ ܠܡܰܣܰܐܬܳܐ ܐ̱ܚܪܺܬܳܐ܇ ܒܗܰܘ ܝܰܘܡܳܐ ܕܬܳܩܠܺܝܢ ܥܒܳܕ̈ܰܝܟ܀

 

ܐܳܦ ܕܪܳܥܳܟ ܥܰܡܶܗ ܕܟܰܝܠܳܟ܇ ܢܶܫܬܰܡܠܽܘܢ ܒܫܰܪܺܝܼܪܽܘܼܬܳܐ.

ܕܠܳܐ ܢܟܽܘܼܠܽܘܼܢ ܠܳܟ ܒܗܰܘ ܝܰܘܡܳܐ܇ ܒܰܟܠܺܝܼܠܳܐ ܕܫܳܚܶܩ ܠܳܟ ܒܥܽܘܼܙܶܗ܀

 

ܟܽܠ ܣܽܘܼܥܪܳܢܳܐ ܕܦܳܠܰܚ ܐܰܢ̱ܬ܇ ܐܰܝܬܳܝܗܝ ܠܫܽܘܼܡܠܳܝ ܒܟܺܐܢܽܘܼܬܳܐ.

ܕܰܡܩܰܒܶܠ ܐܰܢ̱ܬ ܫܰܠܡܳܐܺܝܬ܇ ܐܰܓܪܶܗ ܡܶܢ ܗܰܘ ܕܗܳܦܶܟ ܠܶܗ܀

 

ܟܽܠ ܐܽܘܼܡܳܢܳܐ ܘܨܰܢܳܥܳܐ܇ ܢܶܥܒܶܕ ܒܕܰܟܝܽܘܬܳܐ ܕܬܺܐܪܬܳܐ.

ܢܳܡܽܘܣܳܐ ܗܰܘ ܐܰܠܳܗܳܝܳܐ܇ ܟܝܳܢܳܝܳܐ ܘܰܟܬܳܒܳܝܳܐ܀

 

ܩܰܪܕܳܚܳܐ ܥܰܡ ܚܳܫܽܘܿܠܳܐ܇ ܢܰܓܳܪܳܐ ܥܰܡ ܦܳܣܽܘܿܠܳܐ.

ܒܰܢܳܝܳܐ ܥܰܡ ܐܰܪܕܺܝܟܠܳܐ܇ ܥܒܶܕܘ ܥܒܳܕܟܽܘܢ ܒܐܽܘܪܚܳܐ ܕܩܽܘܫܬܳܐ܀

 

ܐܶܢ ܐܶܓܰܪܬ ܦܳܥܠܳܐ ܠܟܰܪܡܳܟ܇ ܐܰܘ ܠܚܰܩܠܳܟ ܐܰܘ ܦܰܪܕܰܝܣܳܟ.

ܗܰܒܠܶܗ ܐܰܓܪܶܗ ܡܶܢ ܪܰܡܫܶܗ܇ ܐܰܝܟ ܕܰܟܬܺܝܒ ܗ̱ܽܘ ܒܰܣܒܰܪܬܳܐ܀

 

 

ܠܚܳܨܽܘܕܳܐ ܐܰܣܓܳܐ ܐܰܓܪܶܗ܇ ܕܥܳܡܶܠ ܒܚܽܘܼܡܳܐ ܨܰܚܺܝܚܳܐ.

ܐܳܦ ܠܐܰܟܳܪܳܐ ܐܰܘܣܶܦ ܠܶܗ܇ ܕܐܳܙܶܠ ܘܐܳܬܶܐ ܘܠܳܐ ܫܳܠܶܐ܀

 

ܠܪܳܥܝܳܐ ܙܰܘܶܕܳܝܗܝ ܒܡܶܠܚܳܐ܇ ܕܒܳܗ̇ ܢܶܙܒܶܢ ܠܶܒܳܐ ܕܥܳܢ̈ܳܐ.

ܕܐܳܙܶܠ ܘܢܳܩܦܳܐ ܥܬܺܝܕܳܐܺܝܬ܇ ܕܰܒܺܝܩܳܐ ܒܰܦܣܳܥ̈ܳܬܶܗ܀

 

ܠܚܰܝܽܘܬܳܐ ܠܳܐ ܬܰܗܰܪ ܠܰܓܡܳܪ܇ ܕܐܺܝܬܶܝܗ̇ ܒܪܺܝܼܬܶܗ ܕܰܡܪܰܝܡܳܐ.

ܕܠܰܝܬ ܠܳܗ̇ ܦܽܘܡܳܐ ܕܰܬܒܰܓܶܢ܇ ܡܳܪܝܳܐ ܬܳܒܰܥ ܠܰܥܝܳܪܬܳܗ̇܀

 

ܠܟܰܠܒܳܐ ܟܰܦܢܳܐ ܗܰܒ ܠܰܚܡܳܐ܇ ܕܰܡܗܰܝܡܶܢ ܡܶܢ ܟܽܠ ܒܰܪܝܳܐ.

ܐܳܦ ܠܡܰܬܺܝܢܽܘܬ ܚܡܳܪܳܐ ܛܥܰܢ܇ ܕܗܽܘܼ ܛܳܥܶܢ ܠܝܽܘܼܩܪܶܗ ܕܒܰܝܬܳܟ܀

 

ܛܰܪ ܩܶܢܳܗ̇ ܕܰܣܢܽܘܢܺܝܬܳܐ܇ ܘܠܳܐ ܬܶܣܥܶܐ ܥܰܠ ܦܰܪ̈ܽܘܓܶܝܗ̇.

ܕܚܳܐܫܳܐ ܒܒܺܝܼܫܬܳܐ ܕܡܳܛܝܳܐ ܠܗܽܘܢ܇ ܐܰܝܟ ܐܶܡܳܟ ܒܒܺܝܼܫܬܳܐ ܕܝܰܠܕ̈ܶܝܗ̇܀

 

ܠܳܐ ܬܕܽܘܼܫ ܥܰܠ ܬܰܘܠܥܳܐ ܕܐܰܪܥܳܐ܇ ܕܗܳܐ ܚܳܕܝܳܐ ܒܚܰܝ̈ܶܐ ܕܩܰܒܠܰܬ.

ܠܳܐ ܬܶܓܫܽܘܿܦ ܒܚܰܒܬܳܐ ܕܛܳܥܶܢ܇ ܫܽܘܼܫܡܳܢܳܐ ܡܙܰܘܶܢ ܣܰܬܘܳܐ܀

 

ܠܳܐ ܬܶܬܓܰܪܶܐ ܒܗܰܘ ܚܶܘܝܳܐ܇ ܕܪܳܫܶܦ ܘܠܳܐ ܡܶܬܠܰܚܰܡ ܠܳܟ.

ܕܐܶܢ ܐܰܒܶܫܬܳܝܗܝ ܗܳܦܶܟ ܘܢܰܟܬܳܟ܇ ܕܗܳܘܝܳܐ ܡܚܽܘܿܬܶܗ ܥܒܳܕ ܐܺܝܕ̈ܰܝܟ܀

 

ܣܽܘܼܣܝܳܐ ܚܰܝܽܘܼܬܳܐ ܕܫܽܘܼܒܗܳܪܳܐ܇ ܗܳܘܶܐ ܡܰܠܟܳܐ ܕܟܽܠܗܽܘܢ ܩܪ̈ܳܒܶܐ.

ܕܡܳܐ ܕܡܶܫܬܓܰܪ ܚܺܐܦܶܗ ܬܳܐܰܪ܇ ܐܰܝܟ ܟܽܘܼܟܺܝܼܬܳܐ ܕܰܒܛܰܗܪܳܐ܀

 

ܠܬܰܘܪܳܐ ܕܪܳܥܶܐ ܠܳܐ ܬܶܡܚܶܐ܇ ܕܠܳܐ ܢܶܗܦܽܘܟ ܘܰܢܦܰܪܶܛ ܠܳܟ.

ܠܬܽܘܼܪܬܳܐ ܫܠܺܝܼܬܳܐ ܠܳܐ ܬܰܠܶܙ܇ ܕܙܳܝܢܳܐ ܠܪ̈ܶܒܘܳܬܳܐ ܕܐ̱ܢܳܫܳܐ.

 

ܠܥܳܢ̈ܳܐ ܬܰܡܺܝܼ̈ܡܳܬܳܐ ܢܛܰܪ܇ ܕܟܽܠܳܗ̇ ܒܟܽܠܳܗ̇ ܝܽܘܼܬܪܳܢܳܐ.

ܒܚܰܠܒܳܗ̇ ܒܚܶܐܘܬܳܗ̇ ܥܰܡ ܓܒܶܢ̱ܬܳܗ̇܇ ܡܰܣܬܳܗ̇ ܘܥܰܡܪܳܗ̇ ܥܰܡ ܒܶܣܪܳܗ̇܀

 

ܡܶܢ ܟܽܘܼܕܰܢܝܳܐ ܡܒܰܥܛܳܢܳܐ܇ ܐܶܙܕܰܗܰܪ ܠܳܟ ܒܟܽܠ ܥܶܕܳܢܳܐ.

ܕܰܡܦܰܪܶܛ ܠܰܡܥܰܝ̈ܟ ܡܶܢ ܫܶܠܝ܇ ܒܶܠܥܳܕ ܥܶܠܬܳܐ ܘܚܶܛܝܳܢܳܐ܀

 

ܐܳܦ ܠܩܰܛܽܘܼܬܳܐ ܠܳܐ ܬܗܰܝܡܶܢ܇ ܕܰܙܠܺܝܼܚ ܢܶܟܠܳܐ ܒܰܟܝܳܢܶܗ.

ܠܕܶܒܳܐ ܐܽܘܼܪܚܳܗ̇ ܠܳܐ ܬܶܚܒܽܘܿܫ܇ ܐܶܠܳܐ ܬܶܬܒܰܥܪܰܪ ܘܬܶܩܶܛܠܳܟ܀

 

ܐܰܪܝܳܐ ܡܰܠܟܳܐ ܕܚܰܝܘ̈ܳܬܳܐ܇ ܠܳܐ ܬܳܒܰܪ ܐܶܢ ܠܳܐ ܡܶܬܶܐܠܶܨ.

ܐܳܠܶܨ ܠܶܗ ܟܰܦܢܳܐ ܠܙܺܝܼܙܳܐ܇ ܐܰܘ ܡܰܪܳܚܳܐ ܕܒܳܠܶܩ ܥܠܰܘܗܝ܀

 

ܓܳܣܰܪ ܘܡܰܪܥܶܠ ܠܒܶܪ̈ܝܳܬܳܐ܇ ܡܶܢ ܢܗܰܡܬܶܗ ܕܚܺܝܼܠܬܳܐ.

ܡܦܰܪܶܛ ܡܒܰܣܒܶܣ ܕܠܳܐ ܚܰܘܣܳܢ܇ ܘܠܰܝܬ ܡܶܕܶܡ ܕܩܳܐܶܡ ܒܐܰܦ̈ܰܘܗܝ܀

 

ܢܶܡܪܳܐ ܚܰܝܽܘܬܳܐ ܢܳܟܽܘܠܬܳܐ܇ ܩܳܛܶܠ ܒܶܠܥܳܕ ܟܽܠ ܥܶܠܬܳܐ.

ܗܽܘ ܥܰܡ ܕܺܐܒܳܐ ܠܳܐ ܫܳܘܶܝܢ܇ ܕܬܶܗܘܶܐ ܠܗܽܘܢ ܟܰܠ ܐܺܝܬܽܘܬܳܐ܀

 

ܝܰܕܶܕ ܠܗܽܘܢ ܠܐܰܬܪܳܟ ܘܐܽܘܡܬܳܟ܇ ܘܐܰܪܺܝܡ ܩܰܪܢܗܽܘܢ ܟܡܳܐ ܕܰܡܨܶܝܬ.

ܕܠܰܝܬ ܚܰܒܺܝܒ ܒܟܽܠܗܶܝܢ ܕܥܳܠܡܳܐ܇ ܡܶܢ ܐܰܪܥܳܐ ܕܐܰܒܳܗ̈ܳܬܳܐ܀

 

ܗܳܠܶܝܢ ܕܐܰܝܟ ܗܳܠܶܝܢ ܡܰܠܠܶܬ܇ ܐܰܝܟ ܕܕܳܠܝ̈ܳܢ ܒܡܰܕܰܥܝ ܚܰܠܳܫܳܐ.

ܝܳܕܰܥ ܐ̱ܢܳܐ ܕܐܰܫܦܶܠ ܩܰܢܝܳܐ܇ ܕܐܰܪܚܫܶܬ ܒܪܶܗܛܳܐ ܕܦܶܬܓ̈ܳܡܰܝ܀

 

ܐܰܟܬܒܶܬ ܟܽܠ ܒܦܳܣܺܝܼ̈ܩܳܬܳܐ܇ ܕܠܳܐ ܬܺܐܩܰܪ ܡܶܠܰܬܝ ܣܰܓܺܝ.

ܘܗܰܘ ܡܳܐ ܕܣܺܝܼܡ ܗ̱ܘܳܐ ܩܕܳܡ ܥܰܝܢ̈ܰܝ܇ ܕܢܶܩܛܽܘܿܦ ܓܰܘܳܐ ܝܽܘܼܬܪܳܢܳܐ܀

 

 

ܠܰܝܬ ܚܰܝܠܬܳܢܳܐ ܒܡܰܡܠܳܐ܇ ܠܳܐ ܒܣܶܦܪܳܐ ܘܠܳܐ ܒܺܝܕܰܥܬܳܐ.

ܐܰܝܟ ܡܚܺܝܼܠܽܘܼܬ ܙܰܘܥ̈ܰܝ ܪܶܫܡܶܬ܇ ܗܶܪ̈ܓܶܐ ܕܐܰܙܺܝܼܥܽܘܗ̇ ܠܡܰܚܫܰܒܬܝ܀

 

ܡܰܪܦܶܐ ܐ̱ܢܳܐ ܠܪ̈ܳܡܰܝ ܡܰܕܥܳܐ܇ ܕܰܢܬܰܪܓܡܽܘܢ ܠܫܰܪܒܳܐ ܒܫܰܘܝܽܘ.

ܣܳܦܶܩ ܠܺܝ ܕܩܰܪܒܶܬ ܡܶܕܶܡ܇ ܕܡܰܗܢܶܐ ܟܒܰܪ ܠܕܰܟ̈ܝ̣ܰܝ̣ ܠܶܒܳܐ܀

 

ܒܝܰܕ ܩܰܫܺܝܫܳܐ ܦܰܘܠܽܘܣ ܒܶܝܬ ܕܰܪܳܐ [2]

 

ܡܳܐ ܦܐܶܐ ܘܰܫܒܺܝܼܚ ܗܳܢ ܥܶܢܝܳܢܳܐ ܕܡܰܪܬܝܳܢܽܘܬܳܐ܇

ܠܟܽܠܡܰܢ ܕܩܳܪܶܐ ܘܫܳܩܶܠ ܡܶܢܶܗ ܛܥܶܡ ܚܰܠܝܽܘܬܳܐ.

ܩܽܘܼܒܳܠ ܛܰܝܒܽܘ ܡܩܰܪܒܺܝܢܰܢ ܠܶܗ ܒܰܣܘܺܝ̣ܚܽܘܬܳܐ.

ܠܰܡܪܰܟܒܳܢܶܗ ܬܡܺܝܼܗ ܝܽܘܼܠܦܳܢܳܐ ܕܣܽܘܼܪܝܳܝܽܘܼܬܳܐ.

 

ܦܳܪܽܘܿܣܳܐ ܝܰܘܣܶܦ ܒܶܓܬܰܫ

 

 

[1] ܦܶܪܣܶܬ ܡܰܪܬܝܳܢܽܘܼܬܳܐ ܗܳܕܶܐ ܩܶܨܰܬ ܣܘܼ̈ܟܳܠܶܝܗܿ ܩܰܛܺܝ̈ܢܶܐ ܘܪ̈ܰܒܶܐ ܒܪܰܡ ܡܶܬܒܰܥܝ̈ܳܢܶܐ. ܘܰܢܣܺܝܼܒܳܐ ܡܼܶܢ ܟܬܳܒܽܘܿܢܳܐ ܛܒܺܝܼܥܳܐ ܕܰܡܛܳܐ ܠܐܝ̈ܕܰܝ ܡܼܶܢ ܡܝܰܩܪܳܐ ܐܰܕܰܝ ܒܶܢܝܳܡܶܝܢ ܒܰܪ ܡܫܰܡܫܳܢܳܐ ܓܶܘܰܪܓܺܝܼܣ ܕܳܐܫܺܝܼܬܳܐ ܥܽܡܽܘܿܪܳܐ ܕܫܺܝܼܟܰܓܳܐ ܕܐܰܡܪܺܝܼܟܰܐ ܒܐܘܼܪܰܚ ܡܝܰܩܪܳܐ ܓܰܒܪܐܝܠ ܡܰܪܟܳܐ ܥܳܡܽܘܿܪܳܐ ܕܰܣܘܶܝܕܶܝܢ. ܪܰܒܰܬ ܡܰܘܕܶܐ ܐ̱ܢܳܐ ܠܰܒܛܺܝܼܠܽܘܼܬܗܽܘܿܢ ܠܶܫܳܢܳܝܬܳܐ. ܘܰܡܩܰܒܶܠ ܐ̱ܢܳܐ ܛܰܝܒܘܼܽܬܗܽܘܿܢ.   

[2] ܐܶܬܝܼܠܶܕ ܫܢܰܬ 1887 ܒܰܝܕܰܪܳܐ ܩܪܺܝܼܬܳܐ (ܒܶܝܬ ܕܰܪܳܐ) ܕܩܰܪܺܝܼܒܳܐ ܠܙܰܟܽܘ. ܘܣܽܘܼܪܝܳܐܝܼܬ ܡܶܬܦܰܫܩܳܐ ܕܽܘܼܟܰܬ ܬܰܟܬܽܘܼܫܳܐ ܐܰܘ ܐܶܣܛܰܕܝܽܘܢ ܕܰܩܪܳܒܳܐ. ܢܣܰܒ ܝܘܼܠܦܳܢܶܗ ܫܰܪܘܳܝܳܐ ܒܰܩܪܺܝܼܬܶܗ. ܘܥܰܠ ܠܰܩܠܝܼܪܝܼܩܳܝܬܳܐ ܕܡܳܪܝ ܝܽܘܼܚܰܢܢ ܚܰܒܺܝܼܒܳܐ ܕܡܰܘܨܶܠ ܟܰܪ ܕܟܰܬܰܪ ܒܗܿ ܥܣܰܪ ܫܢܝ̈ܢ. ܘܪܰܒܺܝܼ ܘܬܰܠܡܶܕ ܝܳܠܘ̈ܦܶܐ ܣܰܓܺܝ̈ܶܐܐ. ܘܐܶܣܬܰܦܰܪ ܫܢܰܬ 1912 ܕܰܝܪܳܝܳܐ ܠܥܺܕܬܳܐ ܟܰܠܕܳܝܬܳܐ ܕܰܩܪܺܝܼܬܶܗ. ܘܫܰܡܶܫ ܟܳܗܢܽܘܼܬܳܐ ܫܒܰܥ ܫܢܺܝܼ̈ܢ ܒܒܰܝܪܽܘܼܬ ܘܚܰܣܰܟܶܐ ܘܩܰܡܶܫܠܝ. ܘܰܗܘܳܐ ܡܕܰܒܪܳܢܳܐ ܕܡܰܕܪܰܫܬܳܐ ܕܥܺܕܬܳܐ ܟܰܠܕܳܝܬܳܐ ܗܿܳܝ ܕܒܳܗܿ ܒܛܺܝܼܠܐܝܼܬ ܫܰܪܺܝܼ ܕܢܺܐܨܰܦ ܕܠܶܫܳܢܳܐ ܣܘܼܪܝܳܝܳܐ ܘܛܶܟܣܳܝ̈ܳܬܳܐ ܕܥܺܕܬܳܐ. ܘܢܶܙܪܽܘܿܥ ܘܢܶܦܪܽܘܿܣ ܪܶܥܝܳܢܳܐ ܕܚܽܘܼܝܳܕܳܐ ܐܘܼܡܬܳܢܳܝܳܐ ܒܰܝܢܳܬ ܣܶܕܪ̈ܶܐ ܕܓܰܘܳܐ: ܣܽܘܼܪ̈ܝܳܝܶܐ ܐܳܬܘܼܪ̈ܳܝܶܐ ܟܰܠܕܳܝ̈ܶܐ. ܘܰܗܦܰܟ ܫܢܰܬ 1960 ܡܶܢܕܪܺܝܼܫ ܠܥܺܝܼܪܰܩ ܟܰܪ ܕܥܰܙܺܝܼܙܳܐܝܼܬ ܫܰܪܝ ܒܦܽܘܼ̈ܠܚܰܢܰܘܗܝ ܐܽܘܼܡ̈ܬܳܢܳܝܶܐ ܘܪ̈ܶܥܝܳܢܳܝܶܐ ܟܰܕ ܚܠܺܝܼܨܳܐܝܼܬ ܡܶܬܕܰܪܰܪ ܒܛܽܘܼܪ̈ܶܐ ܓܰܪ̈ܒܝܳܝܶܐ ܕܥܺܝܼܪܰܩ ܒܢܺܝܼܫܳܐ ܕܢܶܒܢܶܐ ܩܠܺܝܼܡܳܐ ܠܰܒ̈ܢܰܝ ܐܽܘܼܡܬܶܗ. ܘܰܥܢܰܕ ܫܢܰܬ 1974 ܒܕܰܝܪܳܐ ܕܡܳܪܝ ܩܽܘܼܪܝܰܩܽܘܣ ܕܩܰܪܝܼܒܳܐ ܠܡܰܘܨܶܠ. ܘܐܶܬܩܒܰܪ ܛܰܣܪܳܪܳܐ ܗܳܢܳܐ ܠܶܫܳܢܳܝܳܐ ܘܥܺܕܬܳܢܳܝܳܐ ܘܐܽܘܼܡܬܳܢܳܝܳܐ ܒܥܺܕܬܳܐ ܪܰܒܬܐ ܕܡܺܣܟܶܢܬܰܐ ܕܡܰܘܨܶܠ ܟܰܕ ܫܳܒܶܩ ܒܳܬܪܶܗ ܥܰܡܠܐ ܡܩܰܠܣܳܐ ܘܐܰܓܘܿܢܳܐ ܪܰܒܳܐ ܘܰܣܝ̈ܳܡܶܐ ܡܗܺܝܼܪ̈ܶܐ ܥܰܪܒܳܐܝܼܬ ܘܣܽܘܼܪܝܳܐܝܼܬ. ܠܰܘ ܒܰܠܚܽܘܿܕ ܦܰܪܳܫܳܐ ܗ̱ܘܳܐ ܕܠܶܫܳܢܳܐ ܣܽܘܼܪܝܳܝܐ ܐܶܠܳܐ ܐܳܦ ܥܰܡܺܝܼܩ ܗ̱ܘܳܐ ܒܥܰܪܰܒܳܝܳܐ ܘܦܪܰܢܫܳܝܳܐ ܘܟܽܘܼܪܕܳܝܳܐ ܘܠܰܛܺܝܼܢܳܝܳܐ ܘܐܶܢܓܠܺܝܼܫܳܝܳܐ. ܘܬܘܼܪܳܨ ܡܰܡܠܠܐ ܕܠܶܫܳܢܳܐ ܣܽܘܼܪܝܳܝܳܐ. ܐܽܘܢ ܐܽܘܼܡܬܳܐ ܪܚܺܝܼܡܬܳܐ. ܘܦܽܘܼܫܳܩ ܡܐܺܡܪ̈ܶܐ ܕܡܳܪܝ ܐܰܦܪܶܝܡ ܣܝ̈ܳܡܰܘܗܝ ܐܶܢܽܘܿܢ ܪ̈ܺܝܼܫܳܝܶܐ ܣܽܘܼܪܝܳܐܝܼܬ.