ܡܐܺܡܪܳܐ ܦܬܺܝܼܟ ܣܽܘܼܟܳܠܐ

ܡܐܺܡܪܳܐ ܦܬܺܝܼܟ ܣܽܘܼܟܳܠܐ

ܩܪܺܝ ܘܶܐܬܕܰܡܰܪ ܩܳܪܽܘܝܳܐ ܡܗܺܝܪܳܐ ܘܫܰܒܰܚ ܠܡܰܥܬܪܳܢܳܐ ܕܥܰܒ̈ܕܰܘܗܝ ܕܰܟܡܳܐ ܐܰܥܬܪܶܗ ܠܣܳܝܽܘܡܳܐ ܡܢܳܚܳܐ܀

ܐ: ܡܳܐ ܕܡܶܣܬܰܟܰܠ ܓܶܝܪ ܗܰܘܢܳܐ: ܬܶܐܘܳܪ̈ܺܝܰܣ ܕܰܒܪܽܘܚܳܐ.
ܡܶܫܟܰܚ ܡܰܕܪܶܟ ܐܰܝܟ ܣܺܝܡܬܳܐ: ܪ̈ܶܥܝܳܢܶܐ ܕܐ̱ܪ̈ܳܙܶܐ ܟܣܰܝ̈ܳܐ܀
ܣܺܝ̈ܡܳܬܳܐ ܓܶܝܪ ܒܰܫܪܳܪܳܐ: ܐܺܝܬܰܝܗܽܘܢ ܐ̱ܪ̈ܳܙܶܐ ܟܣܰܝ̈ܳܐ.
ܘܡܰܪ̈ܓܳܢܝܳܬܳܐ ܛܡܺܝܪ̈ܳܬܳܐ: ܬܶܐܘܳܪ̈ܺܝܰܣ ܕܰܒܪܽܘܚܳܐ܀
ܚܡܺܝ̈ܠܳܢ ܗܳܠܶܝܢ ܡܶܢ ܪܶܡܙܳܐ: ܒܒܶܝܬ ܓܰܙܳܐ ܕܣܶܦܪ̈ܰܝ ܪܽܘܚܳܐ.
ܘܰܛܡܺܝܪ̈ܳܢ ܒܰܐܪܰܥ ܗܰܘܢܳܐ: ܟܝܳܢܳܝܳܐ ܕܡܰܕܥܳܐ ܘܢܰܦܫܳܐ܀
ܐܶܠܳܐ ܠܳܐ ܡܨܶܝܢ ܒܳܨܽܘ̈ܝܶܐ: ܠܡܶܓܠܳܐ ܛܡܺܝܪ̈ܳܬܳܐ ܕܣܶܦܪ̈ܶܐ.
ܕܠܳܐ ܡܰܘܗܰܒܬܳܐ ܕܛܰܝܒܽܘܬܳܐ: ܘܒܶܠܥܳܕ ܫܽܘܟܳܢ̈ܶܐ ܕܪܽܘܚܳܐ܀
ܗܳܕܶܐ ܗܳܟܺܝܠ ܡܰܘܗܰܒܬܳܐ: ܥܽܘܬܪܳܐ ܗ̱ܝ ܠܳܐ ܡܶܬܡܰܠܠܳܢܳܐ.
ܘܡܶܬܝܰܗܒܳܐ ܡܶܢ ܐܰܠܳܗܳܐ: ܠܰܕܣܳܥܪܳܐ ܠܗܽܘܢ ܛܰܝܒܽܘܬܳܐ܀
ܒܰܨܠܰܘ̈ܳܬܳܐ ܬܟ̥ܺܝ̈ܒܳܬܳܐ: ܡܶܢ ܒܰܥܳܝ̈ܶܐ ܡܶܬܩܰܢܝܳܐ.
ܘܒܶܠܥܳܕ ܫܰܗܪܳܐ ܘܰܢܛܽܘܪܬܳܐ: ܠܩܰܢܳܝܶܝ̈ܗ̃ ܠܳܐ ܡܶܬܩܰܕܝܳܐ܀
ܒܡܽܘܟܳܟܳܐ ܘܒܰܢܙܺܝܪܽܘܬܳܐ: ܡܶܬܢܰܗܪܳܐ ܛܳܒ ܡܶܢ ܫܶܡܫܳܐ.
ܘܰܒܢܰܟܦܽܘܬܳܐ ܘܕܰܟܝܽܘܬܳܐ: ܐܳܙ̱ܳܠܐ ܒܬܰܘܣܶܦܬܳܐ ܘܣܳܓܝܳܐ܀
ܒ: ܕܰܒ̈ܡܰܬܠܶܐ ܘܰܒܦ̈ܶܠܳܐܬܳܐ: ܢܶܬܓܰܢܙܽܘܢ ܫܰܪ̈ܒܶܐ ܟܣܰܝ̈ܳܐ.
ܐ̱ܪܳܙܳܐ ܗ̱ܝ ܕܰܡܕܰܒܪܳܢܽܘܬܳܐ: ܕܚܰܟܺܝܡ ܚܰܟܺܝ̈ܡܶܐ ܡܳܪܝܳܐ܀
ܕܰܗܒܳܐ ܘܟܺܐܦ̈ܶܐ ܛܳܒ̈ܳܬܳܐ: ܥܽܘܬܪܳܐ ܕܥܳܠܡܳܐ ܥܳܒܽܘܪܳܐ.
ܒܒܶܝܬ ܓܰܙ̈ܶܐ ܘܠܶܒܳܐ ܕܰܐܪܥܳܐ: ܛܳܡܪܺܝܢ ܥܰܬܺܝܪ̈ܶܐ ܕܥܳܠܡܳܐ܀
ܛܳܒ ܫܰܦܺܝܪ ܐܳܦ ܐܰܠܳܗܳܐ: ܦܰܪܢܶܣ ܗܳܕܶܐ ܒܚܶܟܡܬܳܐ.
ܘܟܰܣܺܝ ܘܰܓܢܰܙ ܣܽܘ̈ܟܳܠܶܐ: ܒܡܷ̈ܠܶܐ ܕܐ̱ܪ̈ܳܙܰܘܗܝ ܩܰܕܺܝ̈ܫܶܐ܀
ܝܰܩܺܝܪ̈ܳܬܳܐ ܕܗܳܢ ܥܳܠܡܳܐ: ܕܡܶܢ ܕܰܗܒܳܐ ܘܡܰܪ̈ܓܳܢܝܳܬܳܐ.
ܚܡܺܝ̈ܠܳܢ ܣܺܝ̈ܡܳܢ ܒܶܝܬܓܰܙ̈ܶܐ: ܘܰܡܣܰܬܪ̈ܳܢ ܡܶܢ ܢܽܘܟܪ̈ܳܝܶܐ܀
ܒܰܝ̈ܬܳܝܶܐ ܩܢܶܝܢ ܫܽܘܠܛܳܢܳܐ: ܠܡܶܚܕܳܐ ܒܗܶܝܢ ܐܰܝܟ ܡܳܪ̈ܰܝܳܐ.
ܘܠܰܝܬ ܬܰܡܳܢ ܡܰܦܣܳܢܽܘܬܳܐ: ܕܰܬܕܺܝܩ ܥܰܝܢܳܐ ܢܽܘܟܪܳܝܬܳܐ܀
ܐܳܦ ܐ̱ܪ̈ܳܙܶܐ ܕܣܶܦܪ̈ܰܝ ܪܽܘܚܳܐ: ܠܬܰܠܡܺܝ̈ܕܶܐ ܓܠܶܝܢ ܕܰܒܪܽܘܚܳܐ.
ܠܗܳܢܽܘܢ ܕܶܐܡܰܪ ܦܳܪܽܘܩܳܐ: ܕܺܝܗܺܝܒ ܐ̱ܪܳܙܳܐ ܕܡܰܠܟܽܘܬܳܐ܀
ܠܢܽܘܟܪ̈ܳܝܶܐ ܠܳܐ ܒܰܝ̈ܬܳܝܶܐ: ܒܦܷ̈ܠܳܐܬܳܐ ܘܰܒܝܰܕ ܪ̈ܶܡܙܶܐ.
ܕܠܳܐ ܢܛܰܘܫܽܘܢ ܩܽܘܕܫܳܐ ܚܰܣܝܳܐ: ܘܠܳܐ ܢܕܽܘܫܽܘܢ ܡܰܪ̈ܓܳܢܝܳܬܳܐ܀
ܓ: ܐܺܝܬ ܠܳܗ̇ ܐ̱ܚܪܳܢܝܳܐܺܝܬ ܐ̱ܪܳܙܳܐ: ܠܰܓܢܺܝܙܽܘܬ̥ ܡܶܠܬܳܐ ܘܩܽܘܫܬܳܐ.
ܘܠܰܘ ܫܺܝܥܳܐܺܝܬ ܘܰܒܫܶܓܡܳܐ: ܟܣܶܝܢ ܣܽܘܟ̈ܳܠܶܐ ܒܦܷ̈ܠܳܐܬ̥ܳܐ܀
ܝܶܫܽܘܥ ܗ̱ܘ̣ ܡܳܪܳܐ ܕܥܳܠ̈ܡܶܐ: ܕܰܐܫܠܶܡ ܦܷ̈ܠܳܐܬܳܐ ܘܡ̈ܰܬ̥ܠܶܐ.
ܕܬܶܗܘܶܐ ܒܥܳܬܳܐ ܠܩܳܪ̈ܽܘܝܶܐ: ܘܰܚܦܺܝܛܽܘܬܳܐ ܠܒܳܨܽܘ̈ܝܶܐ܀
ܘܢܶܬܡܰܟܟ̥ܽܘܢ ܐܳܦ ܝܳܠܽܘ̈ܦܶܐ: ܘܢܶܬܪܰܡܪܡܽܘܢ ܡܰܠ̈ܦܳܢܶܐ.
ܘܢܶܬܝܰܩܪܽܘܢ ܛܳܒ ܝܳܕܽܘ̈ܥܶܐ: ܘܢܶܬ̊ܬܫܺܝܛܽܘܢ ܠܳܐ ܝܳܕܽܘ̈ܥܶܐ܀
ܢܶܬܪܰܚܡܽܘܢ ܬܽܘܒ ܣܽܘܟ̈ܳܠܶܐ: ܘܬܶܣܓܶܐ ܝܺܕܰܥܬܳܐ ܕܐ̱ܪ̈ܳܙܶܐ.
ܘܢܶܪܗܰܛ ܟܽܠܫܳܥ ܒܰܒܥܳܬܳܐ: ܕܦܽܘܫܳܩ ܡܷ̈ܠܶܐ ܓܢܺܝ̈ܙܳܬܳܐ܀
ܢܶܦܢܽܘܢ ܠܺܝܕܰܥܬܳܐ ܕܚܰܝ̈ܶܐ: ܠܳܐ ܝܳܕܽܘ̈ܥܶܐ ܗܶܕܝܽܘ̈ܛܶܐ.
ܡܳܐ ܕܢܺܐܠܦܽܘܢ ܦܽܘܫܳܩ ܣܶܦܪ̈ܶܐ: ܠܳܐ ܝܳܕܽܘ̈ܥܶܐ ܘܚܰܟܺܝ̈ܡܶܐ܀
ܬܶܣܓܶܐ ܘܬܶܬ̥ܦܪܰܥ ܬܶܫܒܽܘܚܬܳܐ: ܘܬܶܬܕܒܰܚ ܬܰܘܕܺܝܬܳܐ ܕܩܽܘܫܬܳܐ.
ܠܚܰܕ ܐܰܠܳܗܳܐ ܡܫܰܟܢܳܢܳܐ: ܕܡܰܘܗܰܒܬܳܐ ܫܡܰܝܳܢܺܝܬܳܐ܀
ܢܩܰܒܠܽܘܢ ܦܽܘܪ̈ܥܳܢܶܐ ܛܳܒ̈ܶܐ: ܒܡܰܠܟܽܘܬܐ ܡܰܠܝܰܬ ܛܽܘ̈ܒܶܐ.
ܡܚܰܦ̈ܛܳܢܶܐ ܘܡܶܬܚܰܦ̈ܛܳܢܶܐ: ܘܡܰܠ̈ܦܳܢܶܐ ܐܳܦ ܝܳܠܽܘ̈ܦܶܐ܀
ܕ: ܡܰܘܗܰܒܬܳܐ ܗ̱ܝ ܪܽܘܚܳܢܳܝܬܳܐ: ܝܺܕܰܥܬܳܐ ܕܐ̱ܪ̈ܳܙܰܝ ܪܽܘܚܳܐ.
ܘܫܽܘܟܳܢܳܐ ܕܡܶܢ ܐܰܠܳܗܳܐ: ܦܽܘܫܳܩܳܐ ܒܚܰܬ̊ܺܝܬ̥ܽܘܬ̥ܳܐ܀
ܬܠܳܬܳܐ ܐܶܢܽܘܢ ܓܶܝܪ ܛܶܟ̈ܣܶܐ: ܕܺܝܕܰܥܬܳܐ ܕܟܽܠ ܝܽܘܠ̈ܦܳܢܶܐ.
ܦܰܓܪܳܢܳܐ ܘܢܰܦܫܳܢܳܝܳܐ: ܘܰܬܠܺܝܬܳܝܳܐ ܪܽܘܚܳܢܳܐ܀
ܗܰܘ ܕܰܩܢܳܐ ܙܢܳܐ ܩܰܕܡܳܝܳܐ: ܝܺܕܰܥܬܳܐ ܦܰܓܪܳܢܳܝܬܳܐ.
ܒܕܰܒ̣ܪܳܐ ܕܢܰܣܳܐ ܘܰܡܪܺܝܒܳܐ: ܦܳܗܶܐ ܕܫܳܥܬܳܐ ܒܛܽܘܪܳܦܳܐ܀
ܗܳܢܳܐ ܐܰܕܪܶܟ ܣܽܘܟ̈ܳܠܶܐ: ܕܒܶܪ̈ܝܳܬܳܐ ܕܡܶܬܚܰܙܝܳܢ̈ܶܐ.
ܘܠܳܐ ܚܙܳܐ ܒܛܽܘܪܳܐ ܥܰܡ ܡܽܘܫܶܐ: ܒܶܪ̈ܝܳܬܳܐ ܕܡܶܬܝܰܕ̈ܥܳܢܶܐ܀
ܘܗܰܘ ܕܶܐܬܕܰܪܰܫ ܒܺܝܕܰܥܬܳܐ: ܡܶܨܥܳܝܬܳܐ ܢܰܦܫܳܢܳܝܬܳܐ.
ܗܘܳܐ ܚܰܒܪܳܐ ܠܡܶܬܝܰܕ̈ܥܳܢܶܐ: ܘܥ̣ܰܠ ܘܺܝܪܶܬ̥ ܦܳܠܰܣܛܺܝ̈ܢܶܐ܀
ܘܗܰܘ ܕܰܩܢܳܐ ܙܢܳܐ ܕܪ̈ܽܘܚܳܢܶܐ: ܐܰܕܪܶܟ ܣܽܘܡ̈ܛܶܐ ܘܳܐܣܽܘ̈ܡܛܶܐ.
ܦܰܓܪ̈ܳܢܶܐ ܘܪ̈ܽܘܚܳܢܳܝܶܐ: ܘܺܝܕܰܥܬܳܐ ܕܡܰܬܩܶܢ ܥܳܠ̈ܡܶܐ܀
ܗܳܢܰܘ ܒܰܪܢܳܫܳܐ ܓܡܺܝܪܳܐ: ܐܶܢ ܐܺܝܬ ܣܳܟ ܒܰܪܝܳܐ ܓܡܺܝܪܳܐ.
ܕܰܐܡܠܶܟ ܥܰܠ ܕܰܘܺܝܕ ܡܰܠܟܳܐ: ܒܰܩܪܺܝܬܶܗ ܕܡܰܠܟܳܐ ܪܰܒܳܐ܀
ܗ: ܐܶܠܽܘ ܪܰܟܶܒ ܒܳܪܽܘܝܳܐ: ܡܶܢ ܫܽܘܪܳܝܳܐ ܘܪܺܝܫܺܝܬܳܐ.
ܟܽܠ ܐܽܘ̈ܡܳܢܘܳܢ ܕܰܒܥܳܠܡܳܐ: ܠܳܐ ܗܳܘܶܐ ܗ̱ܘܳܐ ܕܳܪܽܘܫܳܐ܀
ܘܶܐܢ ܐܰܟܡܳܐ ܕܫܶܡܫܳܐ ܘܣܰܗܪܳܐ: ܒܰܪ̈ܝܳܢ ܗ̱ܘ̈ܰܝ ܐܽܘܡܳܢ̈ܘܳܬܳܐ.
ܡܰܢ ܡܶܢ ܐ̱ܢܳܫ̈ܳܐ ܝܳܠܶܦ ܗ̱ܘܳܐ: ܣܳܦܪܽܘܬܳܐ ܘܡܰܚܳܪܽܘܬܳܐ܀
ܘܶܐܢ ܪܽܘܚܳܐ ܡܶܢ ܫܽܘܪܳܝܳܐ: ܣܳܡ ܥܰܠ ܣܶܦܪ̈ܶܐ ܦܽܘܫܳܩܳܐ.
ܠܳܐ ܐܺܝܬ ܗ̱ܘܳܐ ܠܶܗ ܣܢܺܝܩܽܘܬܳܐ: ܠܝܳܠܽܘܦܳܐ ܥܰܠ ܡܰܠܦܳܢܳܐ܀
ܒܳܛܠܺܝܢ ܗ̱ܘܰܘ ܬܽܘܒ ܐܺܝܩܳܪ̈ܶܐ: ܕܪ̈ܰܒܳܢܶܐ ܡܶܢ ܬܰܠܡܺܝ̈ܕܶܐ.
ܘܗܳܘܶܝܢ ܗ̱ܘܰܘ ܟܽܠܗܽܘܢ ܐ̱ܢܳܫ̈ܳܐ: ܒܛܶܟܣܳܐ ܫܰܘܝܳܐ ܕܺܝܕܰܥܬܳܐ܀
ܗܳܢܳܐ ܙܢܳܐ ܕܫܰܘܝܽܘܬ ܛܶܟܣܳܐ: ܠܳܐ ܝܰܗܒ ܗܳܪܟܳܐ ܒܳܪܽܘܝܳܐ.
ܘܝܳܗܶܒ ܠܶܗ ܒܥܳܠܡܳܐ ܥܬܺܝܕܳܐ: ܡܳܐ ܕܡܰܡܠܟ̥ܳܐ ܓܡܺܝܪܽܘܬܳܐ܀
ܬܢܳܢ ܐܰܝܟ ܕܰܒܝܰܕ ܡܰܚܙܺܝܬܳܐ: ܝܺܠܶܦܢܰܢ ܩܽܘܫܬܳܐ ܒܐ̱ܪܳܙܳܐ.
ܘܡܳܐ ܕܡܰܢܰܥ ܙܰܒܢܳܐ ܓܡܺܝܪܳܐ: ܠܳܐ ܣܢܺܝܩܺܝܢܰܢ ܦܶܠܶܐܬܳܐ܀
ܫܽܘܒܚܳܐ ܠܗܰܘ ܕܰܠܗܳܢ ܥܳܠܡܳܐ: ܣܳܡܶܗ ܠܰܢ ܒܶܝܬ ܕܽܘܪܳܫܳܐ.
ܕܡܳܐ ܕܡܰܢܰܥܢܰܢ ܠܰܓܡܺܝܪܳܐ: ܠܳܐ ܢܶܗܘܶܐ ܠܶܗ ܡܫܰܡ̈ܠܰܝܳܐ܀
ܘ: ܠܰܝܬ ܥܽܘܕܪܳܢܳܐ ܒܝܰܒܪ̈ܽܘܚܶܐ: ܡܳܐ ܕܠܰܝܬܰܝܗܽܘܢ ܒܰܫܺܝ̈ܠܶܐ.
ܕܠܳܐ ܠܣܰܘܩܳܐ ܐܳܦܠܳܐ ܠܚܶܟܳܐ: ܗܳܘܶܐ ܡܶܢܗܽܘܢ ܗܶܢܝܳܢܳܐ܀
ܐ̱ܚܪܳܢܝܳܐܺܝܬ ܕܶܝܢ ܘܰܒܗܶܦܟܳܐ: ܣܽܘܓܦܳܢܳܐ ܩܢܶܝܢ ܝܰܬܺܝܪܳܐ.
ܠܦܰܓܪܳܐ ܒܰܚܕܳܐ ܘܰܠܗܰܘܢܳܐ: ܐܶܢܗܽܘ ܕܠܳܐ ܡܨܰܝܒܺܝܢ ܡܰܘܬܳܐ܀
ܡܰܪܡܶܝܢ ܕܶܝܢ ܥܰܡܠܳܐ ܘܠܶܐܘܬ̥ܳܐ: ܠܳܐܣܰܘ̈ܳܬܳܐ ܒܬܶܫܡܶܫܬܳܐ.
ܕܗܳܡܣܺܝܢ ܢܰܦܢܽܘܢ ܚܽܘܠܡܳܢܳܐ: ܒܣܰܡܡܳܢ̈ܶܐ ܘܰܒܫܳܩ̈ܘܳܬܳܐ܀
ܐܳܦ ܐ̱ܢܳܫ̈ܳܐ ܬܽܘܒ ܚܶܡ̈ܬܳܢܶܐ: ܘܕܰܒܡܽܘܟܳܟ̥ܳܐ ܠܳܐ ܡܢܰܦ̈ܩܶܐ.
ܠܳܐ ܦܐܶܐ ܕܢܶܗܘܽܘܢ ܪ̈ܺܝܫܳܢܶܐ: ܘܳܐܦܠܳܐ ܠܥܺܕܬܳܐ ܡܕܰܒܪ̈ܳܢܶܐ܀
ܡܣܰܓ̈ܦܳܢܶܐ ܘܰܡܕܰܠ̈ܚܳܢܶܐ: ܗܳܘܶܝܢ ܗܳܠܶܝܢ ܡܰܪ̈ܳܚܶܐ.
ܒܡܷ̈ܠܶܐ ܘܒܰܚܕܳܐ ܘܒܰܥܒܳܕ̈ܶܐ: ܒܰܐܡܺܝܢܽܘ ܠܡܶܬܪ̈ܰܥܝܳܢܶܐ܀
ܡܶܫܬܰܓܫܺܝܢ ܓܶܝܪ ܡܶܢ ܚܶܡܬ̥ܳܐ: ܐܰܝܟ ܐܺܝܠܳܢ̈ܶܐ ܡܶܢ ܪܽܘܚܳܐ.
ܘܳܐܫܕܺܝܢ ܪܶܓܬܳܐ ܕܰܛܢܳܢܳܐ: ܥܰܠ ܡܰܟܺܝ̈ܟ̥ܶܐ ܕܰܒܥܳܢ̈ܳܐ܀
ܥܰܠ ܗܳܕܶܐ ܐܰܣܠܺܝ ܫܠܺܝܚܳܐ: ܒܢܽܘܗܳܪܳܐ ܥܰܠ ܩܰܫܺܝܫܳܐ.
ܛܠܶܐ ܬܽܘܠܡܳܕܳܐ ܘܚܶܡܬ̥ܳܢܳܐ: ܘܕܰܓܪܶܐ ܒܪܶܚܡܰܬ̥ ܡܳܡܽܘܢܳܐ܀
ܙ: ܘܳܠܶܐ ܕܢܶܗܘܶܐ ܡܕܰܒܪܳܢܳܐ: ܡܰܟܺܝܟ̥ܳܐ ܘܥܺܝܪ ܪܶܥܝܳܢܳܐ.
ܘܰܕܠܳܐ ܓܪܶܐ ܒܩܶܪܝܳܝܽܘܬܳܐ: ܘܪܶܚܡܰܬ ܫܽܘܒܚܳܐ ܘܡܰܘ̈ܡܳܬܳܐ܀
ܚܰܣܝܳܐ ܘܢܺܝܚܳܐ ܘܒܰܣܺܝܡܳܐ: ܘܚܰܟܺܝܡܳܐ ܠܦܽܘܢܳܝ ܡܶܠܬܳܐ.
ܕܠܳܐ ܢܶܗܘܶܐ ܠܶܗ ܪܺܝܫ ܛܽܘܦܣܳܐ: ܪܚܶܒܥܰܡ ܡܰܣܓܶܐ ܣܰܟܠܽܘܬܳܐ܀
ܒܕܶܐܢ ܗܳܘܶܐ ܚܰܣܺܝܪ ܡܰܕܥܳܐ: ܡܶܬܚܰܣܰܕ ܡܶܢ ܒܰܪ ܣܺܝܪܳܐ.
ܘܡܶܬܦܰܠܓܳܐ ܠܪ̈ܺܝܫܳܢܘܳܬܳܐ: ܪܳܥܝܽܘܬܶܗ ܠܳܐ ܡܛܰܟܰܣܬܳܐ܀
ܘܟܶܢ ܫܳܠܡܳܐ ܗܳܝ ܕܰܐܡܺܝܪܳܐ: ܠܪܽܘܚܳܐ ܒܣܶܦܪ̈ܰܝ ܚܰܟܺܝܡܳܐ.
ܕܠܶܒܳܐ ܩܰܫܝܳܐ ܘܡܰܪܺܝܪܳܐ: ܢܶܣܓܽܘܢ ܟܺܐܒܰܘ̈ܗܝ ܒܶܝܬ ܐ̱ܢܳܫ̈ܳܐ܀
ܘܰܐܝܢܳܐ ܕܥܳܒܶܕ ܐܰܝܟ ܣܰܟܠܳܐ: ܨܶܒܝܳܢܳܐ ܕܢܰܦܫܶܗ ܒܚܶܡܬܳܐ.
ܗܰܘ ܗ̱ܘ̣ ܕܥܳܒܶܕ ܨܶܒܝܳܢܳܐ: ܕܣܳܢܶܐܗ ܒܟܶܣܝܳܐ ܘܰܒܓܶܠܝܳܐ܀
ܘܢܰܦܫܳܐ ܩܫܺܝܬܳܐ ܘܡܰܪܺܝܪܬܳܐ: ܬܚܰܒܶܠ ܡܳܪܳܗ̇ ܒܰܚܛܺܝܬܳܐ.
ܐܰܝܟ ܕܰܡܬ̥ܺܝܠܳܐ ܡܶܢ ܪܽܘܚܳܐ: ܒܣܶܦܪ̈ܰܝ ܡܷ̈ܠܶܐ ܕܚܰܟܺܝܡܳܐ܀
ܕܥܰܠ ܗܳܕ ܐܶܡܰܪ ܛܽܘܒܳܢܳܐ: ܦܰܘܠܘܣ ܓܰܒܝܶܗ ܕܰܡܫܺܝܚܳܐ.
ܕܘܳܠܶܐ ܕܢܶܗܘܶܐ ܩܰܫܺܝܫܳܐ: ܐܰܝܢܳܐ ܕܠܳܐ ܐܺܝܬ ܒܶܗ ܡܽܘܡܳܐ܀
ܚ: ܠܳܐ ܓܶܝܪ ܫܰܠܺܝܛܳܐ ܐܰܢ̱ܬܬܳܐ: ܕܬܶܣܰܒ ܒܰܥܠܳܐ ܥܰܡ ܒܰܥܠܳܐ.
ܕܰܠܡܳܐ ܬܶܗܘܶܐ ܚܠܳܦ ܐܰܢ̱ܬܬܳܐ: ܓܰܝܳܪܬܳܐ ܘܰܡܛܰܢܰܦܬܳܐ܀
ܘܶܐܢ ܡܺܝܬ ܒܰܥܠܳܗ̇ ܩܰܕܡܳܝܳܐ: ܡܫܰܠܛܳܐ ܕܬܶܗܘܶܐ ܠܰܐ̱ܚܪܺܢܳܐ.
ܒܰܕܠܳܐ ܐܺܝܬܶܝܗ̇ ܓܰܝܳܪܬܳܐ: ܡܳܐ ܕܰܠܚܰܕ ܢܳܩܦܳܐ ܒܰܥܠܳܐ܀
ܘܡܳܐ ܕܠܰܬܪܶܝܢ ܒܰܥ̈ܠܶܐ ܥܳܦܩܳܐ: ܠܰܝܬܶܝܗ̇ ܕܚܰܕ ܡܶܢܗܽܘܢ ܐܰܢ̱ܬܬܳܐ.
ܕܠܰܬܪܰܝܳܢܳܐ ܓܰܝܳܪܬܳܐ: ܘܰܠܩܰܕܡܳܝܳܐ ܙܳܢܺܝܬܳܐ܀
ܐܰܢ̱ܬܬܳܐ ܠܰܝܬܶܝܗ̇ ܓܰܝܳܪܬܳܐ: ܘܓܰܝܳܪܬܳܐ ܠܰܝܬܶܝܗ̇ ܐܰܢ̱ܬܬܳܐ.
ܕܰܐܝ̃ܕܳܐ ܕܚܰܕ ܒܰܥܠܳܐ ܗ̱ܝ ܐܰܢ̱ܬܬܳܐ: ܘܕܰܬܪܶܝܢ ܒܰܥ̈ܠܺܝܢ ܓܰܝܳܪܬܳܐ܀
ܦܰܣܰܬ̥ ܐܺܝܕܳܐ ܕܡܶܬܦܰܣܩܳܐ: ܠܳܐ ܢܳܩܦܳܐ ܠܓܽܘܫܡܳܐ ܐ̱ܚܪܺܢܳܐ.
ܘܠܳܐ ܡܰܨܝܳܐ ܠܡܶܗܘܳܐ ܐܺܝܕܳܐ: ܠܓܽܘܫܡܳܐ ܐ̱ܚܪܺܢܳܐ ܦܣܺܝܩ ܐܺܝܕܳܐ܀
ܪܰܒ ܗ̱ܘ̣ ܓܶܝܪ ܐ̱ܪܳܙܳܐ ܗܳܢܳܐ: ܕܺܐܝܬ ܠܰܡܫܺܝܚܳܐ ܥܰܡ ܥܺܕܬܳܐ:
ܘܰܠܢܰܦܫܳܐ ܬܽܘܒ ܡܗܰܝܡܰܢܬܳܐ: ܕܰܐܣܺܝܪܳܐ ܒܪܶܚܡܰܬ̥ ܡܳܪܝܳܐ܀
ܗܰܕܳܡ̈ܶܐ ܚܢܰܢ ܕܰܡܫܺܝܚܳܐ: ܘܗܽܘ ܪܺܝܫܳܐ ܘܰܚܢܰܢ ܓܽܘܫܡܳܐ.
ܘܠܳܐ ܢܣܰܒܢܰܢ ܡܰܦܣܳܢܽܘܬܳܐ: ܕܢܶܗܘܶܐ ܒ̈ܢܰܝ ܓܽܘܫܡܳܐ ܐ̱ܚܪܺܢܳܐ܀
ܛ: ܐܶܠܥܶܗ ܗܺܝ ܕܓܰܒܪܳܐ ܐܰܢ̱ܬܬܳܐ: ܘܥܰܠ ܗܳܕ ܚܰܕ ܐܶܢܽܘܢ ܓܽܘܫܡܳܐ.
ܘܰܒܗܳܝ ܬܽܘܒ ܕܡܶܢܶܗ ܢܣܺܝܒܳܐ: ܢܰܩܺܝܦܳܐ ܠܶܗ ܒܰܟܝܳܢܳܐ܀
ܚܰܕ ܐܶܢܽܘܢ ܓܰܒܪܳܐ ܘܰܐܢ̱ܬܬܳܐ: ܒܕܺܐܝܬܶܝܗ̇ ܡܶܢ ܓܰܒܪܳܐ ܐܰܢ̱ܬܬܳܐ.
ܘܗܳܘܶܝܢ ܒܚܰܕ ܒܶܣܪܳܐ ܘܦܰܓܪܳܐ: ܒܝܰܠܕܳܐ ܕܡܶܢ ܗܳܝ ܘܰܕܗܳܕܶܐ܀
ܐܳܦ ܥܺܕܬܳܐ ܓܶܝܪ ܩܰܕܺܝܫܬܳܐ: ܚܰܕ ܓܽܘܫܡܳܐ ܗ̱ܝ ܒܰܒܪܳܐ ܡܫܺܝܚܳܐ.
ܒܰܕܡܶܢ ܒܶܣܪܶܗ ܗܺܝ ܚܰܝܳܐ: ܘܡܶܢ ܓܰܪ̈ܡܰܘܗܝ ܐܰܝܟ ܕܰܐܡܺܝܪܳܐ܀
ܚܰܕ ܐܶܢܽܘܢ ܬܽܘܒ ܓܶܝܪ ܓܽܘܫܡܳܐ: ܥܺܕܬܳܐ ܓܒܺܝܬܳܐ ܘܰܡܫܺܝܚܳܐ.
ܒܰܒ̈ܢܰܝܳܐ ܕܡܰܥܡܽܘܕܺܝܬܳܐ: ܕܡܶܬܝܰܠܕܺܝܢ ܡܶܢ ܓܰܘ ܡܰܝ̈ܳܐ܀
ܘܡܶܢ ܒܶܣܪܶܗ ܚܢܰܢ ܩܰܕܺܝܫܳܐ: ܒܰܟܝܳܢ ܛܽܘܗܡܳܐ ܕܐ̱ܢܳܫܽܘܬܳܐ.
ܘܡܶܢ ܓܰܪ̈ܡܰܘܗܝ ܐܰܝܟ ܕܰܐܡܺܝܪܳܐ: ܠܦܘܠܘܣ ܓܰܒܝܶܗ ܕܰܡܫܺܝܚܳܐ܀
ܚܰܝܳܒ ܡܳܕܶܝܢ ܒܰܫܪܳܪܳܐ: ܐܰܝܢܳܐ ܕܺܐܝܬܰܘܗܝ ܕܰܡܫܺܝܚܳܐ.
ܕܰܢܨܰܒܶܬ̥ ܢܰܦܫܳܐ ܘܦܰܓܪܳܐ: ܒܕܰܟܝܽܘܬܳܐ ܘܗܰܝܡܳܢܽܘܬܳܐ܀
ܡܟ̥ܰܪܬ̊ܟ̥ܽܘܢ ܓܶܝܪ ܐܳܡܰܪ ܓܰܒܝܳܐ: ܠܥܺܕܬܳܐ ܕܒܰܝ̈ܬܳܝܶܐ ܩܪ̈ܰܝܳܐ.
ܒܬܽܘܠܬܳܐ ܕܟܺܝܬܳܐ ܘܩܰܕܺܝܫܬܳܐ: ܕܶܐܩܰܪܶܒ ܠܶܗ ܠܰܡܫܺܝܚܳܐ܀
ܐܽܘܪܳܝܬܳܐ.

ܝ: ܗܳܢܰܘ ܛܶܟܣܳܐ ܟܝܳܢܳܝܳܐ: ܘܢܳܡܽܘܣܳܐ ܕܣܳܡ ܒܳܪܽܘܝܳܐ.
ܕܰܠܟܽܠ ܐܰܢ̱ܬܬܳܐ ܚܰܕ ܒܰܥܠܳܐ: ܘܰܠܟܽܠ ܒܰܥܠܳܐ ܚܕܳܐ ܐܰܢ̱ܬܬܳܐ܀
ܒܨܺܝ ܢܳܡܽܘܣܳܐ ܟܝܳܢܳܝܳܐ: ܘܰܩܪܺܝ ܣܶܦܪܳܐ ܟܬܳܒܳܝܳܐ.
ܘܡܶܢ ܗܳܢܳܐ ܘܡܶܢ ܗܰܘ ܒܰܚܕܳܐ: ܬܺܐܠܦܺܝܘܗܝ ܠܰܫܪܳܪܳܐ ܕܡܶܠܬܳܐ܀
ܚܰܕ ܗ̱ܘ̣ ܟܝܳܢܳܐ ܐ̱ܢܳܫܳܝܳܐ: ܠܓܰܒܪܳܐ ܘܰܐܢ̱ܬܬܳܐ ܒܫܰܘܝܽܘܬܳܐ.
ܘܗܽܘ ܠܗܳܕܶܐ ܘܗܳܕܶܐ ܠܗܳܢܳܐ: ܒ̣ܪܳܐ ܘܰܐܬܩܶܢ ܡܰܬ̥ܩܶܢ ܟܽܠܳܐ܀
ܠܳܐ ܓܰܒܪܳܐ ܒܶܠܥܳܕ ܐܰܢ̱ܬܬܳܐ: ܘܠܳܐ ܐܰܢ̱ܬܬܳܐ ܒܶܠܥܳܕ ܓܰܒܪܳܐ.
ܘܕܰܬܪ̈ܰܝܗܽܘܢ ܐܺܝܬܶܝܗ̇ ܚܫܰܚܬܳܐ: ܕܙܽܘܘܳܓܳܐ ܠܝܽܘܒܳܠ ܙܰܪܥܳܐ܀
ܐܶܢ ܚܰܕ ܗ̱ܘ̣ ܒܰܥܠܳܐ ܠܰܐܢ̱ܬܬܳܐ: ܚܕܳܐ ܗ̱ܝ ܡܳܕܶܝܢ ܐܰܢ̱ܬܬܳܐ ܠܒܰܥܠܳܐ.
ܘܶܐܢ ܣܽܘܓܳܐܐ ܕܢܶܫ̈ܶܐ ܠܓܰܒܪܳܐ: ܣܽܘܓܳܐܐ ܕܓܰܒܪ̈ܶܐ ܐܳܦ ܠܰܐܢ̱ܬܬܳܐ܀
ܚܰܕ ܓܽܘܫܡܳܐ ܠܟܽܠܚܰܕ ܪܺܝܫܳܐ: ܘܚܰܕ ܪܺܝܫܳܐ ܠܟܽܠ ܚܰܕ ܓܽܘܫܡܳܐ.
ܘܰܚܕܳܐ ܠܚܰܕ ܐܳܕܳܡ ܚܰܘܳܐ: ܘܚܰܕ ܐܳܕܳܡ ܠܰܚܕܳܐ ܚܰܘܳܐ܀
ܚܕܳܐ ܓܶܝܪ ܢܰܦܫܳܐ ܠܚܰܕ ܦܰܓܪܳܐ: ܘܚܰܕ ܦܰܓܪܳܐ ܠܰܚܕܳܐ ܢܰܦܫܳܐ.
ܘܚܰܕ ܓܰܒܪܳܐ ܠܰܚܕܳܐ ܓܒܰܪܬܳܐ: ܘܰܚܕܳܐ ܓܒܰܪܬܳܐ ܠܚܰܕ ܓܰܒܪܳܐ܀
ܝܐ: ܐܳܦܶܢ ܐܺܝܬ ܦܰܪܶܗ̱ܣܺܝܰܐ: ܘܣܰܒܪܳܐ ܠܚܰܒܺܝ̈ܒܶܐ ܒܢܰܝ̈ܳܐ.
ܐܶܠܳܐ ܠܳܐ ܐܝܬ ܬܽܘܟܠܳܢܳܐ: ܒܒܰܝܬܳܝܽܘܬܳܐ ܠܰܒ̈ܢܰܝܳܐ܀
ܠܳܐ ܥܰܕܪܰܬ̥ ܠܰܒ̈ܬܽܘܠܳܬܳܐ: ܒܒܰܪܬ ܩܳܠܳܐ ܡܦܺܝܣܳܢܺܝܬܳܐ.
ܒܰܐܬܪܳܐ ܕܠܰܝܬ ܡܰܦܣܳܢܽܘܬܳܐ: ܠܡܽܘܠܳܝܳܐ ܕܚܰܣܺܝܪ̈ܳܬܳܐ܀
ܐܶܣܬܰܟܠ ܗܳܝ ܕܰܟܬܺܝܒܳܐ: ܒܣܶܦܪܳܐ ܕܡ̈ܰܬܠܶܐ ܕܚܰܒܺܝܒܳܐ.
ܓܙܳܡܳܐ ܘܡܰܬ̥ܠܳܐ ܡܙܰܗܪܳܢܳܐ: ܒܢܺܝܫܳܐ ܘܰܙܢܳܐ ܡܣܰܪܕܳܢܶܐ܀
ܐܳܦܶܢ ܗܽܘ ܕܒܰܣܺܝܡ ܢܺܝܪܳܐ: ܘܡܰܘܒܠܳܐ ܣܗܺܝܕܳܐ ܕܩܰܠܺܝܠܳܐ.
ܐܶܠܳܐ ܒܗܳܝ ܕܺܝܗܺܝܒ ܐܰܬܪܳܐ: ܠܰܬܝܳܒܽܘܬܳܐ ܒܗܳܢ ܥܳܠܡܳܐ܀
ܐܳܦ ܗܰܘ ܗܳܟܺܝܠ ܕܺܐܝܬܰܘܗܝ ܗ̱ܘܳܐ: ܒܪܳܐ ܚܰܟܺܝܡܳܐ ܡܚܰܕܝܳܢܳܐ.
ܠܳܐ ܗܘ̣ܳܬ̥ ܠܶܗ ܡܰܦܣܳܢܽܘܬܳܐ: ܕܥܰܡ ܪ̈ܳܚܡܰܘܗܝ ܢܶܐܟܽܘܠ ܓܰܕܝܳܐ܀
ܐܰܚܽܘܗܝ ܗ̱ܘܳܐ ܒܪܳܐ ܐܳܣܽܘܛܳܐ: ܕܶܐܬܕܒܰܚ ܠܶܗ ܬܰܘܪܳܐ ܡܦܰܛܡܳܐ.
ܒܪܰܡ ܗܽܘ ܝܰܬܺܝܪ ܫܰܠܺܝܛ ܗ̱ܘܳܐ: ܒܒܰܝܬܳܝܽܘܬܳܐ ܐܰܝܟ ܝܳܪܬ̥ܳܐ܀
ܟܽܠܡܶܕܶܡ ܓܶܝܪ ܕܺܝܠܶܗ ܗ̱ܘܳܐ: ܡܶܢ ܫܽܘܪܳܝܳܐ ܠܫܽܘܠܳܡܳܐ.
ܕܠܳܐ ܣܢܺܝܩ ܗ̱ܘܳܐ ܕܰܒܛܰܝܒܽܘܬܳܐ: ܢܶܣܰܒ ܡܶܕܶܡ ܝܰܬܺܝܪܳܐ܀
ܝܒ: ܐܰܝܢܳܐ ܓܶܝܪ ܕܺܐܝܬ ܠܶܗ ܥܽܘܬܪܳܐ: ܕܶܐܬܟܰܢܰܫ ܡܶܢ ܛܰܠܝܽܘܬܳܐ.
ܛܳܒ ܗ̱ܘ̣ ܡܶܢ ܗܰܘ ܕܰܠܚܰܪܬܳܐ: ܡܟܰܢܶܫ ܒܰܙܒܰܢ ܣܰܝܒܽܘܬܳܐ܀
ܥܰܡ̈ܠܶܐ ܥܡܺܝ̈ܠܶܐ ܕܛܰܠܝܽܘܬܳܐ: ܟܠܺܝ̈ܠܶܐ ܕܠܰܙܒܰܢ ܣܰܝܒܽܘܬܳܐ.
ܐܰܝܟ ܕܰܐܡܺܝܪ ܡܶܢ ܚܰܟܺܝܡܳܐ: ܒܚܶܟܡܰܬ̥ ܡ̈ܰܬܠܶܐ ܘܦܷ̈ܠܳܐܬܳܐ܀
ܐܳܦ ܠܰܐܟܳܪ̈ܶܐ ܟܰܫܺܝܪ̈ܶܐ: ܐܺܝܬ ܗ̱ܘ̣ ܡ̈ܰܬܠܶܐ ܟܝܳܢܳܝ̈ܶܐ.
ܕܛܳܒܺܝܢ ܙܰܪ̈ܥܶܐ ܕܰܒܙܰܒ̈ܢܶܐ: ܬܶܫܪ̈ܝܳܝܶܐ ܘܣܰܬܘܳܝ̈ܶܐ܀
ܐܳܦ ܥܰܡ̈ܠܶܐ ܝܰܡܺܝ̈ܢܳܝܶܐ: ܒܙܰܒ̈ܢܶܐ ܗܳܠܶܝܢ ܥܳܒܽܘܪ̈ܶܐ.
ܗܳܘܶܝܢ ܚܰܕܽܘܬܳܐ ܠܥܳܡ̈ܠܶܐ: ܒܙܰܒ̈ܢܶܐ ܥܬܺܝܕܳܐ ܡܩܰܘ̈ܝܳܢܶܐ܀
ܕܥܰܠ ܗܳܕܶܐ ܘܡܶܛܽܠ ܗܳܕܶܐ: ܐܺܡܺܝܪ ܗ̱ܘ̣ ܒܶܝܬ ܙܽܘܡܳܪ̈ܶܐ.
ܕܰܢܨܰܠܶܐ ܠܳܟ ܟܽܠ ܕܰܓܒܶܐ: ܒܙܰܒܢܳܐ ܡܩܰܒܠܳܐ ܕܰܦܝܳܣ̈ܶܐ܀
ܒܙܰܒܢܳܐ ܗܳܢܳܐ ܕܰܐܓܽܘ̈ܢܶܐ: ܫܳܡܰܥ ܡܳܪܝܳܐ ܠܰܦܝܳܣ̈ܶܐ.
ܘܒܰܙܒܰܢ ܐܰܓܪܳܐ ܘܦܽܘܪ̈ܥܳܢܶܐ: ܠܳܐ ܫܳܡܰܥ ܠܰܡܦܺܝ̈ܣܳܢܶܐ܀
ܝܓ: ܠܰܘ ܡܶܛܽܠ ܕܶܐܬܕܒܰܚ ܐܶܡܪܳܐ: ܡܶܬܕܒܰܚ ܗ̱ܘܳܐ ܐܶܡܪܳܐ ܡܠܺܝܠܳܐ.
ܒܕܰܥܬܺܝܕ ܗ̱ܘܳܐ ܕܢܶܬܕܒܰܚ ܐܶܡܪܳܐ: ܐܶܬܕܒܰܚ ܐܶܡܪܳܐ ܠܳܐ ܡܠܺܝܠܳܐ܀
ܕܡܳܐ ܚܰܝܳܐ ܕܶܐܡܪܳܐ ܡܠܺܝܠܳܐ: ܥܬܺܝܕ ܗ̱ܘܳܐ ܕܢܶܙܕܠܰܚ ܒܰܙܩܺܝܦܳܐ.
ܒܝܽܘܡ ܚܰܫܳܐ ܦܳܪܽܘܩܳܝܳܐ: ܠܦܽܘܪܩܳܢ ܥܳܠ̈ܡܶܐ ܘܒܶܪ̈ܝܳܬܳܐ܀
ܕܡܶܛܽܠܳܬܶܗ ܒܝܰܕ ܐ̱ܪܳܙܳܐ: ܕܡܳܐ ܐܶܬܪܣܶܣ ܠܳܐ ܡܠܺܝܠܳܐ.
ܕܶܐܡܪܳܐ ܚܰܪܫܳܐ ܠܦܽܘܪܩܳܢܳܐ: ܕܥܶܒܪ̈ܳܝܶܐ ܠܰܡܠܶܐ ܙܰܒܢܳܐ܀
ܒܗܳܝ ܕܶܐܠܽܘܠܳܐ ܬܰܦܢܟܳܐ: ܠܳܐ ܡܶܬܝܰܩܰܢ ܗ̱ܘܳܐ ܨܰܠܡܳܐ.
ܘܶܐܠܽܘܠܳܐ ܫܪܳܪܳܐ ܘܓܽܘܫܡܳܐ: ܠܰܝܬ ܗ̱ܘܳܐ ܐ̱ܪܳܙܳܐ ܘܛܶܠܳܠܳܐ܀
ܡܳܕܶܝܢ ܐܰܝܟ ܗܰܘܢܳܐ ܕܡܶܠܬܳܐ: ܕܰܐܝܟ ܬܰܛܠܺܝܠܳܐ ܠܫܶܬܶܐܣܬܳܐ.
ܐ̱ܚܪ̈ܳܝܳܬܳܐ ܐܶܢܶܝܢ ܥܶܠܬܳܐ: ܠܩܰܕܡܳܝ̈ܳܬܳܐ ܕܰܒܛܽܘܦܣܳܐ܀
ܢܦܺܝܣܳܟ ܝܽܘܠܦܳܢ ܚܰܟܺܝ̈ܡܶܐ: ܦܺܝܠܳܣܽܘ̈ܦܶܐ ܝܰܘ̈ܢܳܝܶܐ.
ܕܦܰܫܩܽܘܗܝ ܫܽܘܠܳܡܳܐ ܠܢܺܝܫܳܐ: ܕܩܳܕܶܡ ܡܶܬܗܰܘܢܰܢ ܡܰܕܥܳܐ܀
ܛܳܒ ܡܶܢܗܽܘܢ ܦܘܠܘܣ ܪܰܒܳܐ: ܡܦܰܠܣܶܦ ܩܽܘܫܬܳܐ ܒܝܰܕ ܪܽܘܚܳܐ.
ܕܟܽܠ ܕܰܗ̈ܘܰܝ ܡܶܢ ܪܺܝܫܺܝܬܳܐ: ܠܰܢ ܐܶܬܺܝܗܶܒܶܝ̈ܢ ܛܽܘܦܣܳܐ܀
ܝܕ: ܐܶܠܽܘܠܳܐ ܐܺܝܬ ܗ̱ܘܳܐ ܢܺܝܫܳܐ: ܕܢܶܬ̊ܬܪܺܝܡ ܦܰܓܪܳܐ ܒܰܙܩܺܝܦܳܐ.
ܠܳܐ ܐܶܬ̊ܬܪܺܝܡ ܗ̱ܘܳܐ ܒܓܰܘ ܕܰܒܪܳܐ: ܚܶܘܝܳܐ ܢܚܳܫܳܝܳܐ ܒܐ̱ܪܳܙܳܐ܀
ܘܶܐܠܽܘܠܳܐ ܥܬܺܝܕ ܗ̱ܘܳܐ ܨܠܺܝܒܳܐ: ܕܢܰܐܣܶܐ ܚܰܫ̈ܶܐ ܕܰܚܛܺܝܬܳܐ.
ܠܳܐ ܐܰܣܺܝ ܚܶܘܝܳܐ ܚܰܪܫܳܐ: ܢܽܘܟ̈ܬܳܬ̥ܳܐ ܕܰܚ̈ܘܰܘܳܬܳܐ܀
ܡܶܪܬܳܐ ܠܗܰܠ ܕܰܚ̈ܘܰܘܳܬܳܐ: ܐ̱ܪܳܙ ܚܰܫܳܐ ܗ̱ܘܳܬ ܕܰܚܛܺܝܬܳܐ.
ܘܰܗܘܳܬ̥ ܐܳܣܝܽܘܬܳܐ ܒܐ̱ܪܳܙܳܐ: ܕܬܰܕܢܰܚ ܐܳܣܽܘܬܳܐ ܓܡܺܝܪܬܳܐ܀
ܦܽܘܪܩܳܢܳܐ ܒܶܐܡܪܳܐ ܚܰܪܫܳܐ: ܠܰܡܠܶܐ ܙܒܰܢ ܗ̱ܘܳܐ ܘܥܳܒܽܘܪܳܐ.
ܘܦܽܘܪܩܳܢܳܐ ܕܒܰܒܪܶܗ ܕܐ̱ܢܳܫܳܐ: ܠܥܳܠܡܺܝܢܳܝܳܐ ܡܩܰܘܝܳܢܳܐ܀
ܗܳܕܐ ܗ̱ܝ ܕܶܐܡܰܪ ܦܳܪܽܘܩܳܐ: ܠܬܰܠܡܺܝ̈ܕܰܘܗܝ ܐܰܝܟ ܕܰܒܐ̱ܪܳܙܳܐ.
ܕܰܐܝܟ ܕܰܐܪܺܝܡ ܡܽܘܫܶܐ ܚܶܘܝܳܐ: ܡܶܬ̊ܬܪܺܝܡ ܬܽܘܒ ܘܰܒܪܶܗ ܕܐ̱ܢܳܫܳܐ܀
ܒܕܶܐܢ ܠܳܐ ܢܳܦܠܳܐ ܒܓܰܘ ܐܰܪܥܳܐ: ܦܪܶܕܬܳܐ ܕܚܶܛܬܳܐ ܒܝܰܕ ܐ̱ܪܳܙܳܐ.
ܘܡܳܝܬ̥ܳܐ ܘܗܳܝܕܶܝܢ ܡܶܬܢܰܚܡܳܐ: ܠܚܽܘܕܶܝܗ̇ ܦܳܝܫܳܐ ܕܠܳܐ ܦܺܐܪ̈ܶܐ܀
ܘܐ̱ܢܳܫܽܘܬܐ ܒܐ̱ܪܳܙܳܐ ܕܚܶܛܬܳܐ: ܐܶܢ ܠܳܐ ܡܳܝܬܳܐ ܒܓܰܘ ܐܰܪܥܳܐ.
ܠܳܐ ܡܶܬܢܰܚܡܳܐ ܕܰܡܢܰܚܡܳܐ: ܒܐ̱ܪܳܙ ܦܺܐܪܳܐ ܟܝܳܢܳܐ ܕܐ̱ܢܳܫ̈ܳܐ܀
ܝܗ: ܦܰܠܳܚܳܐ ܕܦܳܠܰܚ ܟܰܪܡܳܐ: ܘܕܳܐܶܫ ܥܶܢ̈ܒܶܐ ܒܡܰܥܨܰܪܬܳܐ.
ܚܰܝܳܒ ܗ̱ܘ̣ ܕܢܶܗܘܶܐ ܡܟܰܬܡܳܐ: ܠܒܽܘܫܶܗ ܡܶܢ ܪܶܙܦܳܐ ܕܚܰܡܪܳܐ܀
ܐܽܘܡܳܢܽܘܬܳܐ ܡܰܟܪܙܳܐ: ܥܰܠ ܐ̱ܢܳܫ ܐ̱ܢܳܫ ܐܰܝܟ ܕܰܒܣܽܘܓܳܐܐ.
ܘܰܦܪܰܓܡܰܛܺܝܰܐ ܡܚܰܘܝܳܐ: ܙܢܳܢܳܝܽܘܬܶܗ ܕܦܰܪܨܽܘܦܳܐ܀
ܐܳܦ ܗܳܢܽܘܢ ܓܶܝܪ ܕܰܒܪܽܘܚܳܐ: ܦܳܠܚܺܝܢ ܟܰܪܡܳܐ ܫܡܰܝܳܢܳܐ.
ܓܰܘܢܳܐ ܕܕܳܡܶܐ ܚܠܳܦ ܚܰܡܪܳܐ: ܫܩܺܝܠ ܗ̱ܘ̣ ܠܒܽܘܫܗܽܘܢ ܐܶܣܟܺܡܳܐ܀
ܣܳܗܕܳܐ ܠܡܶܠܬܳܐ ܕܰܫܪܳܪܳܐ: ܦܶܠܶܐܬܳܐ ܕܒܰܢܒܺܝܽܘܬܳܐ.
ܥܰܠ ܗܰܘ ܕܰܠܒܺܝܫ ܗ̱ܘܳܐ ܠܒܽܘܫܳܐ: ܕܣܘܡܳܩ ܗ̱ܘܳܐ ܕܡܽܘܬ̥ܳܐ ܕܰܕܡܳܐ܀
ܡܶܢ ܐܰܕܽܘܡ ܗܰܠܶܟ ܒܽܐܘܪܚܳܐ: ܘܡܶܢ ܒܽܘܨܪܐܬܐ ܗ̱ܘܳܐ ܩܪܺܝܬܳܐ.
ܚܕܳܐ ܛܽܘܦܣܳܐ ܘܰܚܕܳܐ ܨܰܠܡܳܐ: ܗܳܝ ܐ̱ܪܳܙܳܐ ܘܗܳܢܳܐ ܪܶܡܙܳܐ܀
ܫܡܳܐ ܕܰܐܕܽܘܡ ܐ̱ܪܳܙܳܐ ܕܰܕܡܳܐ: ܘܒܽܘܨܪ ܐܓܘܪܣܐ ܕܫܽܘܘܙܳܒܳܐ.
ܘܗܰܘ ܕܰܚܙܳܐ ܢܒܺܝܳܐ ܒܪܽܘܚܳܐ: ܓܰܘܣܳܐ ܕܓܶܢܣܳܐ ܐ̱ܢܳܫܳܝܳܐ܀
ܒܪܺܝܟ ܕܰܗܘܳܐ ܡܶܢ ܫܽܘܘܙܳܒܳܐ: ܠܰܟܝܳܢܳܐ ܐܳܕܳܡܳܝܳܐ.
ܘܶܐܫܬܰܘܕܺܝ ܒܣܽܘܡܳܩܽܘܬܳܐ: ܕܢܰܚܶܐ ܒܰܕܡܶܗ ܒܶܪ̈ܝܳܬܳܐ܀

ܢܽܘܼܗܳܪܳܐ: ܩܛܺܝܼܦ ܣܝܳܡܳܐ ܗܳܢܳܐ ܡܼܶܢ ܟܬܳܒܳܐ ܕܕܽܘܪܳܫܳܐ ܕܡܳܪܝ ܐܠܝܳܐ ܕܐܰܢܒܰܪ ܒܝܰܕ ܡܰܠܦܳܢܳܐ ܥܺܝܼܣܰܐ ܕܶܡܺܝܼܪ ܗܳܢܳܐ ܕܚܳܝܶܐ ܒܐܰܘܣܛܪܝܰܐ. ܬܰܘܕܺܝܼ ܠܥܰܡܠܶܗ ܘܰܒܛܺܝܼܠܘܼܬܶܗ ܠܶܫܳܢܳܝܬܳܐ.