ܒܳܬܰܪ ܗܳܟܺܝܠ ܕܚܰܘܺܝܢܰܢ ܕܡܳܢܳܐ ܙܳܕܶܩ ܠܒܰܪ ܐ̱ܢܳܫܳܐ ܕܢܶܕܰܥ ܘܢܺܐܠܰܦ ܩܰܕܡܳܐܺܝܬ̥. ܗܳܢܰܘ ܕܶܝܢ܆ ܕܰܢܥܰܩܶܒ ܚܰܬ̊ܺܝܬ̥ܳܐܺܝܬ̥ ܥܰܠ ܫܪܳܪܳܐ ܘܢܶܦܪܫܺܝܘܗܝ ܡܶܢ ܕܰܓܳܠܽܘܬܳܐ. ܬܽܘܒ ܐܳܡܪܺܝܢܰܢ ܗܳܫܳܐ ܕܰܐܝܟܰܢܳܐ ܡܰܨܝܳܐ ܕܢܶܬܺܝܕܰܥ ܠܶܗ ܫܪܳܪܳܐ ܠܗܰܘ ܕܰܡܥܰܩܶܒ ܥܠܰܘܗܝ ܚܰܬ̊ܺܝܬ̥ܳܐܺܝܬ̥.
ܩܰܕܡܳܐܺܝܬ̥ ܐܳܡܪܺܝܢܰܢ ܕܰܟܬܳܒܳܐ ܗܳܢܳܐ ܕܰܩܕܳܡܰܝܢ. ܒܢܺܝܫܳܐ ܛܳܒܳܐ ܕܚܽܘܒܳܐ ܫܰܪܺܝܪܳܐ ܘܰܐܠܳܗܳܝܳܐ ܐܶܟܬܰܒ ܠܟܽܠܗܽܘܢ ܥܰܡܡ̈ܶܐ ܓܰܘܳܢܳܐܝܬ̥. ܠܝܽܘܬܪܳܢܳܐ ܪܰܒܳܐ ܕܢܰܦܫܳܐ ܘܰܢܛܺܝܪܽܘܬ̥ ܦܰܓܪܳܐ. ܕܗܳܢܽܘܢ ܕܰܥܬܺܝܕܺܝܢ ܕܢܶܫܡܥܽܘܢܳܝܗܝ. ܘܰܠܥܽܘܗܕܳܢܳܐ ܛܳܒܳܐ ܕܟܳܬܽܘܒܳܐ ܡܚܺܝܠܳܐ ܘܰܣܢܺܝܩܳܐ. ܠܬܶܫܒܽܘܚܬܳܐ ܕܶܝܢ ܘܺܐܝܩܳܪܳܐ ܕܚܰܕ ܡܳܪܳܐ ܕܟܽܠܳܐ. ܥܳܒܽܘܕܳܐ ܒܳܪܽܘܝܳܐ ܘܰܡܦܰܪܢܣܳܢܳܐ ܚܰܟܺܝܡܳܐ. ܗܰܘ ܕܡܶܢܶܗ ܗܺܝ ܟܽܠ ܛܳܒܬܳܐ ܡܫܰܡܠܰܝܬܳܐ. ܘܗܽܘ ܝܳܗܶܒ ܡܶܠܬܳܐ ܕܺܝܕܰܥܬܳܐ ܫܰܪܺܝܪܬܳܐ ܠܳܐܡܽܘܪܳܐ. ܘܣܽܘܟܳܠܳܐ ܘܒܽܘܝܳܢܳܐ ܚܰܬ̊ܺܝܬ̥ܳܐ ܠܫܳܡܽܘܥܳܐ. ܐܶܢ ܟܺܝܬ ܘܰܬܪ̈ܰܝܗܽܘܢ ܒܢܺܝܫܳܐ ܕܚܽܘܒܳܐ ܘܡܰܟܺܝܟܽܘܬܳܐ ܘܕܶܚܠܰܬ̥ ܐܰܠܳܗܳܐ ܡܶܬܚܰܫܚܺܝܢ. ܣܛܰܪ ܡܶܢ ܟܽܠ ܚܰܫܳܐ ܣܰܢܝܳܐ ܕܰܚܣܳܡܳܐ. ܘܙܺܐܦܳܐ ܕܒܺܝܫܽܘܬܳܐ ܘܫܽܘܒܚܳܐ ܣܪܺܝܩܳܐ ܢܕܺܝܕ ܥܰܠ ܐܰܠܳܗܳܐ. ܘܪܳܡܽܘܬ̥ܳܐ ܛܰܡܰܐܬܳܐ ܢܳܨܝܰܬ̥ ܥܰܡ ܐܰܠܳܗܳܐ.
ܘܡܶܛܽܠ ܕܟܽܠܗܽܘܢ ܥܰܡܡ̈ܶܐ ܕܺܐܝܬ ܒܟܽܠܶܗ ܥܳܠܡܳܐ. ܢܶܦܠܰܬ̥ ܒܰܝܢܳܬܗܽܘܢ ܣܰܩܽܘܒܠܳܝܽܘܬܳܐ ܪܰܒܬܳܐ. ܘܥܰܡ ܐܰܪܺܝܟ̥ܽܘܬ̥ ܙܰܒܢܳܐ ܘܡܶܬܚܳܐ ܕܰܫ̈ܢܰܝܳܐ. ܣܶܓܝܰܬ̥ ܣܰܩܽܘܒܠܳܝܽܘܬܳܐ ܘܢܶܦܩܰܬ̥ ܠܣܶܢܶܐܬ̥ܳܐ ܘܰܠܣܰܓܺܝ ܒܺܝ̈ܫܳܬܳܐ ܕܥܰܠ ܓܶܕܫܳܢܳܐܺܝܬ̥ ܐܰܝܟ ܓܰܢܳܒ̈ܶܐ ܠܺܠܝܳܝ̈ܶܐ ܥܰܠ ܓܶܢܣܳܐ ܕܰܒܢܰܝ̈ ܐ̱ܢܳܫܳܐ. ܘܡܶܢ ܝܰܕ ܗܳܟܰܢ ܢܶܦܠܰܬ̥ ܒܰܝܢܳܬܗܽܘܢ ܦܠܺܝܓܽܘܬܳܐ ܘܠܳܐ ܡܶܬܬܦܺܝܣܳܢܽܘܬܳܐ ܕܠܰܚ̈ܕܳܕܶܐ. ܘܡܶܢ ܗܳܠܶܝܢ ܐܶܬܡܛܝܘ ܠܰܒܥܶܠܕܒܳܒܽܘܬܳܐ ܪܰܒܬܳܐ ܘܰܐܒܕܳܢܳܐ ܕܰܚ̈ܕܳܕܶܐ. ܗܳܠܶܝܢ ܐܰܚ̈ܶܐ ܪ̈ܚܺܝܡܶܐ ܒ̈ܢܰܝ ܚܰܕ ܐܰܒܳܐ ܛܳܒܳܐ ܘܒܰܣܺܝܡܳܐ. ܘܥܰܒ̈ܕܰܝ ܚܰܕ ܡܰܠܟܳܐ ܪܰܒܳܐ ܘܰܡܪܰܚܡܳܢܳܐ ܘܣܰܓܺܝ ܥܰܬܺܝܪܳܐ. ܘܬܰܠܡܺܝ̈ܕܰܝ ܚܰܕ ܡܰܠܦܳܢܳܐ ܫܰܪܺܝܪܳܐ ܕܩܽܘܫܬܳܐ ܘܣܰܓܺܝ ܚܰܟܺܝܡܳܐ. ܘܰܐܣܛܺܝܘ ܟܽܠܚܰܕ ܠܰܣܛܰܪ ܘܰܥܒܰܕ ܠܶܗ ܟܬܳܒܳܐ ܘܬܰܘܕܺܝܬܳܐ ܘܢܳܡܽܘ̈ܣܶܐ ܘܰܥܝܳܕ̈ܶܐ ܘܶܐܬܕܒܰܪܘ ܒܗܽܘܢ ܥܕܰܡܳܐ ܠܝܰܘܡܳܢܳܐ ܘܰܒܡܶܕܶܡ ܡܶܢ ܗܳܠܶܝܢ ܦܠܺܝܓܺܝܢ ܥܰܠ ܚ̈ܕܳܕܶܐ. ܘܰܒܡܶܕܶܡ ܫܘܶܝܢ ܘܰܐܘܶܝܢ ܐܰܝܟ ܕܰܥܬܺܝܕܺܝܢܰܢ ܕܰܢܚܰܘܶܐ ܒܝܰܕ ܐܰܠܳܗܳܐ ܟܽܠ ܫܰܪܒܳܐ ܒܕܽܘܟܬܶܗ ܘܰܐܝܟܳܐ ܕܠܳܚܶܡ ܠܶܗ. ܡܶܛܽܠ ܗܳܟܺܝܠ ܕܟܽܠ ܚܰܕ ܡܶܢ ܥܰܡܡ̈ܶܐ ܟܬܳܒ̈ܶܐ ܠܰܣܛܰܪ. ܐܺܝܬ ܠܶܗ ܢܳܡܽܘ̈ܣܶܐ ܘܰܥܝܳܕ̈ܶܐ ܘܬܰܘܕ̈ܝܳܬܳܐ. ܠܳܐ ܡܩܰܒܶܠ ܗܳܢܳܐ ܟܬܳܒܳܐ ܕܗܰܘ. ܘܠܳܐ ܗܰܘ ܕܗܳܢܳܐ. ܘܠܳܐ ܢܳܡܽܘ̈ܣܶܐ ܘܠܳܐ ܥܝܳܕ̈ܶܐ. ܥܰܡ ܫܰܪܟܳܐ ܕܰܐ̱ܚܪ̈ܳܢܝܳܬܳܐ. ܘܰܕܡܶܢ ܐܰܝܟܳܐ ܥܶܠܰܬ̥ ܗܳܕܶܐ ܦܠܺܝܓܽܘܬܳܐ ܡܚܰܘܶܝܢܰܢ ܐܶܢ ܨܳܒܶܐ ܡܳܪܳܐ ܕܟܽܠܰܢ ܐܰܝܟܰܢܳܐ ܕܟܰܕ ܡܰܦܩܺܝܢܰܢ ܠܗܽܘܢ. ܘܦܳܝܫܺܝܢ ܡܳܪ̈ܰܘܗܝ ܕܒܰܝܬܳܐ ܕܠܳܐ ܩܶܢܛܳܐ ܒܰܢܝܳܚܳܐ ܕܠܳܐ ܡܰܪܢܺܝܬܳܐ. ܗܰܘ ܕܩܳܪܶܐ ܢܶܣܬܰܟܰܠ. ܡܶܛܽܠ ܕܰܦܠܺܝܓܺܝܢ ܥܰܡܡ̈ܶܐ ܥܰܠ ܚ̈ܕܳܕܶܐ ܘܠܳܐ ܡܩܰܒܠܺܝܢ ܬܰܘܕ̈ܝܳܬܳܐ ܘܰܟܬܳܒ̈ܶܐ ܘܢܳܡܽܘ̈ܣܶܐ ܕܰܚ̈ܕܳܕܶܐ. ܠܳܐ ܡܰܨܝܳܐ ܘܠܳܐ ܙܳܕܶܩ ܠܰܢ ܕܢܶܬܚܰܫܰܚ ܒܬܰܚܘܺܝܬܳܐ ܕܚܰܕ ܡܶܢ ܟܬܳܒ̈ܶܐ. ܘܠܳܐ ܕܢܰܝܬܶܐ ܣܳܗܕܽܘܬܳܐ ܡܶܢ ܢܳܡܽܘܣܳܐ ܘܬܰܘܕܺܝܬܳܐ ܕܰܐ̱ܚܪܺܝܢ ܥܰܠ ܐ̱ܚܪܺܢܳܐ. ܡܶܛܽܠ ܕܠܳܐ ܡܩܰܒܶܠ. ܚܕܳܐ ܡܶܛܽܠ ܢܺܝܫܳܐ ܕܬܰܘܕܺܝܬܳܐ ܕܰܠܒܺܝܟ̥. ܘܰܐ̱ܚܪܺܬܳܐ ܡܶܢ ܛܶܟܣܳܐ ܕܕܽܘܒܳܪܳܐ ܘܝܽܘܠܦܳܢܳܐ ܘܢܳܡܽܘܣܳܐ ܕܒܶܗ ܐܶܬܪܕܺܝ. ܘܡܶܢ ܪܰܚܺܝܩܽܘܬܳܐ ܘܠܳܐ ܥܶܢܝܳܢܳܐ ܘܰܚܫܰܚܬܳܐ ܕܥܰܡ ܚ̈ܕܳܕܶܐ.
ܡܶܛܽܠ ܗܳܟܰܢ ܗܳܐ ܡܶܢ ܟܰܕ ܫܰܪܺܝܢܰܢ ܒܰܟܬܳܒܳܐ ܗܳܢܳܐ. ܣܳܟ ܠܳܐ ܐܶܬܚܰܫܰܚܢܰܢ ܐܳܦܠܳܐ ܒܰܚܕܳܐ ܡܶܠܬܳܐ ܕܣܰܩܽܘܒܠܳܝܳܐ ܠܚܰܕ ܡܶܢ ܥܰܡܡ̈ܺܝܢ. ܐܶܠܳܐ ܒܢܺܝܫܳܐ ܕܬܰܘܕܺܝܬܳܐ ܐܳܦܠܳܐ ܕܰܥܝܳܕܳܐ ܘܕܽܘܒܳܪܳܐ. ܘܚܰܟܺܝ̈ܡܶܐ ܘܝܰܕܽܘ̈ܥܬܳܢܶܐ ܡܶܣܬܰܟܠܺܝܢ ܟܰܕ ܩܳܪܶܝܢ ܡܶܛܽܠ ܕܗܰܘ ܕܒܳܢܶܐ ܚܽܘܒܳܐ ܫܰܪܺܝܪܳܐ ܘܰܐܠܳܗܳܝܳܐ ܒܳܥܶܐ ܕܢܰܘܬ̥ܰܪ ܠܰܐ̱ܚܪܺܝܢ ܒܗܳܝ ܕܡܰܚܶܒ. ܒܡܶܕܶܡ ܕܡܰܨܝܳܐ ܠܶܗ ܕܢܶܫܡܰܥ ܘܰܡܩܰܒܶܠ ܗܰܘܢܶܗ ܘܣܳܗܶܕ ܥܠܰܘܗܝ ܣܽܘܟܳܠܶܗ ܘܰܟܝܳܢܶܗ. ܙܳܕܶܩ ܕܢܶܬܚܰܫܰܚ ܥܰܡܶܗ. ܐܰܝܟܰܢܳܐ ܕܗܰܘ ܕܨܳܒܶܐ ܕܢܺܐܡܰܪ ܠܐ̱ܢܳܫ ܡܶܕܶܡ. ܒܠܶܫܳܢܳܐ ܕܝܳܕܰܥ ܗܰܘ ܙܳܕܶܩ ܠܶܗ ܕܰܢܡܰܠܶܠ ܕܢܶܕܰܥ ܘܢܶܣܬܰܟܰܠ ܡܰܡܠܠܶܗ. ܘܗܰܘ ܕܨܳܒܶܐ ܕܰܢܢܺܝܚ ܠܐ̱ܢܳܫ ܒܡܶܐܟܽܘܠܬܳܐ. ܒܳܐܕ̈ܫܶܐ ܕܚܳܫܚܺܝܢ ܠܶܗ ܙܳܕܶܩ ܕܰܢܢܺܝܚܺܝܘܗܝ. ܗܳܢܰܘ ܕܖܝܢ܆ ܐܶܢ ܝܰܠܽܘܕܰܐ ܗ̱ܘ ܒܚܰܠܒܳܐ ܘܡܰܝ̈ܳܐ. ܘܶܐܢ ܟܪܺܝܗܰܐ ܗ̱ܘ ܒܫܶܩ̈ܝܶܐ ܘܣܰܡܡܳܢ̈ܶܐ. ܘܶܐܢ ܡܚܺܝܠܰܐ ܗ̱ܘ ܒܝܰܪܩܳܐ ܘܙܰܪ̈ܥܽܘܢܶܐ. ܘܶܐܢ ܓܰܒܪܰܐ ܗ̱ܘ ܡܫܰܡܠܝܳܐ ܘܰܚܠܺܝܡܳܐ ܒܡܶܐܟ̈ܠܳܬܳܐ ܚܠܺܝ̈ܡܳܬܳܐ ܕܠܰܚܡܳܐ ܘܒܶܣܪܳܐ. ܘܫܰܪܟܳܐ ܕܦܰܛܒܳܓ̈ܶܐ. ܐܰܝܟܰܢܳܐ ܕܳܐܦ ܐܰܒܳܐ ܥܰܡ ܒܪܶܗ ܝܰܠܽܘܕܳܐ ܒܠܶܫܳܢܶܗ ܕܺܝܠܶܗ ܕܝܰܠܽܘܕܳܐ ܡܡܰܠܶܠ ܥܰܡܶܗ ܐܰܝܟ ܕܗܽܘ ܡܫܰܡܰܗ ܠܰܐܒܳܐ ܘܠܶܐܡܳܐ ܘܠܰܐܚ̈ܶܐ ܘܰܠܫܰܪܟܳܐ ܕܨܶܒ̈ܘܳܬܳܐ. ܘܠܰܘ ܒܡܰܡܠܠܳܐ ܓܡܺܝܪܳܐ ܕܺܝܠܗܽܘܢ ܕܰܡܫܰܡ̈ܠܰܝܳܐ. ܘܰܐܝܟܰܢܳܐ ܟܰܝ ܢܶܥܒܶܕ ܗܰܘ ܕܨܳܒܶܐ ܕܰܢܢܺܝܚ ܘܰܢܥܰܕܰܪ ܠܟܽܠܗܽܘܢ ܥܰܡܡ̈ܶܐ ܓܰܘܳܢܳܐܺܝܬ̥ ܒܡܶܠܬܳܐ ܕܺܝܕܰܥܬܳܐ. ܟܰܕ ܒܡܶܠܬܳܐ ܕܰܟܬܳܒܳܐ ܠܳܐ ܡܶܬܚܰܫܰܚ ܒܬܰܚܘܺܝܬܳܐ. ܐܰܘ ܒܣܳܗܕܽܘܬܳܐ. ܐܶܢܳܐ ܕܶܝܢ ܗܳܟܰܢ ܐܳܡܰܪ ܐ̱ܢܳܐ. ܐܰܝܟ ܕܳܐܦ ܡܶܬܚܰܫܰܒ ܐ̱ܢܳܐ. ܕܰܐܝܟ ܢܺܝܫܶܗ ܘܬܰܪܥܺܝܬܶܗ ܘܨܶܒܝܳܢܶܗ ܕܐ̱ܢܳܫ ܡܶܬܺܝܗܶܒ ܠܶܗ ܡܶܢ ܠܥܶܠ. ܗܳܢܰܘ ܕܶܝܢ܆ ܐܶܢ ܒܢܺܝܫ ܚܽܘܒܳܐ ܫܰܪܺܝܪܳܐ ܘܰܐܠܳܗܳܝܳܐ. ܒܰܙܢܳܐ ܕܡܰܟܺܝܟܽܘܬܳܐ ܘܢܺܝܫܳܐ ܬܪܺܝܨܳܐ ܕܰܡܚܰܪܰܪ ܡܶܢ ܟܽܠ ܚܰܫܳܐ ܣܰܢܝܳܐ ܘܙܺܐܦܳܢܽܘܬܳܐ. ܨܳܒܶܐ ܒܰܪ ܐ̱ܢܳܫܳܐ ܕܰܢܥܰܕܰܪ ܠܰܐܚܰܘ̈ܗܝ ܘܗܰܕܳܡܰܘ̈ܗܝ. ܒܪܺܝܬܳܐ ܘܬܽܘܩܳܢܳܐ ܕܒܳܪܽܘܝܳܐ ܕܺܝܠܶܗ. ܡܶܛܽܠ ܚܽܘܒܶܗ ܘܛܳܒܽܘܬ̥ ܨܶܒܝܳܢܳܐ ܕܺܝܠܶܗ ܕܡܳܪܳܐ ܕܓܰܘܳܐ ܕܪܳܚܶܡ ܒܪܺܝܬܶܗ ܘܰܓܒܺܝܠܬܶܗ. ܗܽܘ ܗܰܘ ܡܳܪܳܐ ܛܳܒܳܐ ܘܪܳܚܶܡ ܒܢܰܝ̈ܢܳܫܳܐ ܘܨܳܒܶܐ ܒܚܰܝ̈ܶܐ ܘܛܳܒܬܳܐ ܘܥܽܘܕܪܳܢܳܐ ܕܟܽܠܗܽܘܢ ܝܳܗܶܒ ܠܶܗ ܝܺܕܰܥܬܳܐ ܘܗܰܘܢܳܐ ܘܚܶܟܡܬܳܐ. ܘܣܳܐܶܡ ܒܦܽܘܡܶܗ ܡܶܠܬܳܐ ܡܥܰܕܪܳܢܺܝܬܳܐ ܠܳܐܡܽܘܪܳܐ ܬܪܺܝܨ ܢܺܝܫܳܐ ܘܰܠܫܳܡܽܘܥܳܐ ܒܪܺܝܟܳܐ ܘܡܰܟܺܝܟܳܐ ܕܰܡܚܰܪܰܪ ܡܶܢ ܟܽܠܶܗ ܚܣܳܡܳܐ ܠܬܶܫܒܽܘܚܬܳܐ ܕܰܫܡܶܗ ܕܝܳܗܽܘܒܳܐ. ܘܰܠܥܽܘܕܪܳܢܳܐ ܕܟܽܠܗܽܘܢ ܓܰܒ̈ܶܐ܀
ܗܳܫܳܐ ܚܰܒܺܝ̈ܒܰܝ. ܕܠܳܐ ܡܰܨܝܳܐ ܘܠܳܐ ܙܳܕܶܩ ܠܰܢ ܕܢܶܬܚܰܫܰܚ ܥܕܰܟܺܝܠ ܒܡܶܠܬܳܐ ܕܬܰܚܘܺܝܬܳܐ. ܐܰܘ ܣܳܗܕܽܘܬܳܐ ܡܶܢ ܟܬܳܒܳܐ. ܢܶܣܰܩ ܘܢܶܬܥܰܠܶܐ ܒܡܰܚܫܰܒܬܰܢ ܕܡܶܢ ܐܰܝܟܳܐ ܐܶܬܺܝܠܶܕ ܘܶܐܬܝܰܒܰܠ ܟܬܳܒܳܐ. ܘܡܰܢ ܕܰܢܣܰܒ ܟܬܳܒܳܐ ܝܽܘܠܦܳܢܳܐ ܕܚܳܫܰܚ ܠܶܗ. ܢܶܣܰܒ ܐܳܦ ܚܢܰܢ ܡܶܕܶܡ ܕܚܳܫܰܚ ܠܟܽܠܰܢ. ܘܰܢܦܰܪܢܶܣ ܒܶܗ ܠܰܚ̈ܕܳܕܶܐ.
ܡܳܢܰܘ ܕܶܝܢ ܗܳܢܳܐ ܘܰܐܝܟܰܘ؟ ܘܳܐܡܪܺܝܢܰܢ ܕܰܐܒܽܘܗܝ ܕܰܟܬܳܒܳܐ ܐܺܝܬܰܘܗܝ ܥܰܡ ܟܽܠܰܢ. ܘܩܰܫܺܝܫܶܗ ܕܰܟܬܳܒܳܐ ܐܺܝܬܰܘܗܝ ܐܰܒܳܐ ܕܟܽܠܰܢ. ܐܰܒܽܘܗܝ ܕܶܝܢ ܕܰܟܬܳܒܳܐ ܐܺܝܬܰܘܗܝ ܡܰܕܥܳܐ. ܗܳܢܳܐ ܐܰܘܠܶܕ ܠܰܟܬܳܒܳܐ. ܘܰܠܟܽܠܗܽܘܢ ܝܽܘܠ̈ܦܳܢܶܐ ܘܚܶܟ̈ܡܳܬܳܐ ܘܽܐܘܡܳܢ̈ܘܳܬܳܐ. ܒܪܰܡ ܒܡܰܥܒܕܳܢܽܘܬܳܐ ܟܣܺܝܬܳܐ ܘܡܰܘܗܰܒܬܳܐ ܡܳܪܳܢܳܝܬܳܐ. ܕܒܳܪܽܘܝܳܐ ܛܳܒܳܐ ܘܥܰܬܺܝܪ ܒܫܽܘܟܳܢ̈ܶܐ ܘܚܰܟܺܝܡ ܒܡܰܘܗ̈ܒܳܬܳܐ. ܩܰܫܺܝܫܶܗ ܕܶܝܢ ܕܰܟܬܳܒܳܐ ܐܺܝܬܰܘܗܝ ܐܰܒܳܐ ܕܟܽܠܰܢ. ܐܺܝܬܰܘܗܝ ܟܝܳܢܳܐ ܕܰܐܝܬܺܝ ܠܰܢ ܠܰܗܘܳܝܳܐ ܘܺܐܝܬ̥ܽܘܬ̥ܳܐ. ܡܳܕܶܝܢ ܟܰܕ ܫܳܐܠܺܝܢܰܢ ܡܶܢ ܥܳܒܽܘܕܶܗ ܕܰܟܝܳܢܳܐ ܕܰܢܚܰܟܶܡ ܗܶܕܝܽܘܛܽܘܬܰܢ. ܒܡܰܟܬܒܳܢܽܘܬܳܐ ܗܳܕܶܐ ܕܰܠܘܳܬܟܽܘܢ ܐܳܘ ܪ̈ܚܺܝܡܶܐ ܘܚܰܒܺܝ̈ܒܶܐ ܘܰܐܚ̈ܶܐ ܡܝܰܩܪ̈ܶܐ. ܡܶܢܶܗ ܕܰܟܝܳܢܳܐ ܐܰܒܳܐ ܕܟܽܠܰܢ. ܢܶܬܚܰܫܰܚ ܒܟܽܠܳܗ̇ ܡܶܠܬܳܐ ܕܡܰܪܕܺܝܬܳܐ. ܗܳܕܶܐ ܕܣܺܝܡܳܐ ܩܕܳܡܰܝܢ. ܥܕܰܡܳܐ ܠܙܰܒܢܳܐ ܕܗܽܘ ܟܝܳܢܳܐ ܡܰܠܶܦ ܠܰܢ ܕܫܰܪܺܝܪ ܟܬܳܒܳܐ ܘܡܶܢܶܗ ܕܰܟܝܳܢܳܐ ܐܺܝܬܰܘܗܝ. ܘܠܰܘ ܢܽܘܟܪܳܝܳܐ. ܘܣܳܗܕܳܐ ܠܰܢ ܬܰܪܥܺܝܬܰܢ. ܘܰܡܩܰܒܶܠ ܠܶܗ ܗܰܘܢܰܢ ܘܡܰܚܫܰܒܬܰܢ. ܗܳܝܕܶܝܢ ܐܳܦ ܒܡܶܠܬܳܐ ܕܰܟܬܳܒܳܐ ܢܶܬܚܰܫܰܚ ܐܰܝܟܳܐ ܕܘܳܠܶܐ. ܡܰܐܠܽܘܢ ܐܰܝܟܳܐ ܕܨܳܒܶܐ ܘܰܐܝܟ ܕܝܳܗܒܳܐ ܛܰܝܒܽܘܬ̥ܶܗ ܕܡܳܪܳܐ ܕܰܟܝܳܢܳܐ ܘܕܰܟܬܳܒܳܐ ܘܰܕܟܽܠܰܢ.
ܘܶܐܠܽܘ ܗܳܕܶܐ ܡܰܟܬܒܳܢܽܘܬܳܐ ܠܳܐ ܡܶܢ ܚܰܟܺܝ̈ܡܶܐ ܡܫܰܡ̈ܗܶܐ ܕܰܒܥܳܠܡܳܐ ܐܰܘ ܒܚܰܕ ܡܶܢ ܥܰܡܡܺܝ̈ܢ ܥܒܺܝܕܳܐ ܗ̱ܘܳܬ̥. ܐܰܘ ܠܚܰܕ ܡܶܢ ܡܰܠ̈ܦܳܢܶܐ ܒܚܺܝܪ̈ܶܐ. ܐܰܘ ܠܚܰܕ ܡܶܢ ܪܰܘܪ̈ܒܳܢܶܐ ܕܶܐܬܺܝܕܰܥܘ ܒܥܳܠܡܳܐ. ܐܰܘ ܠܚܰܕ ܡܶܢ ܡܰܠ̈ܟܶܐ ܕܶܐܬܢܰܨܰܚܘ ܒܰܐܪܥܳܐ. ܠܳܐ ܪܰܒܳܐ ܗ̱ܘܳܬ̥ ܨܒܽܘܬܳܐ ܡܰܐܠܽܘܢ ܐܳܦܠܳܐ ܡܶܬܗܰܝܡܢܳܐ ܗ̱ܘܳܬ̥ ܐܰܘ ܡܶܬܩܰܒܠܳܐ ܠܘܳܬ ܟܽܠ ܥܰܡܡܺܝ̈ܢ. ܒܗܳܝ ܕܡܶܬܬܥܺܝܪ ܗ̱ܘܳܐ ܠܽܘܩܒܰܠ ܡܰܟܬܒܳܢܽܘܬܳܐ ܚܣܳܡܳܐ ܘܣܰܩܽܘܒܠܳܝܽܘܬܳܐ. ܐܶܠܳܐ ܒܗܳܕܶܐ ܝܳܪܒܳܐ ܬܶܫܒܽܘܚܬܶܗ ܕܝܳܗܽܘܒܳܐ. ܘܡܶܬܗܰܝܡܰܢ ܘܡܶܬܩܰܒܰܠ ܡܰܟܬܒܳܢܳܐ. ܘܡܶܬܪܚܶܡ ܘܡܶܬܚܢܢ ܘܡܶܬܥܰܕܰܪ ܒܡܶܠܬܳܐ ܕܰܨܠܽܘܬܳܐ. ܒܗܳܝ ܕܺܐܝܬܰܘܗܝ ܐ̱ܢܳܫ ܒܨܺܝܪܳܐ ܘܰܙܥܽܘܪܳܐ. ܫܺܝܛܳܐ ܘܰܫܚܺܝܡܳܐ. ܘܗܶܕܝܽܘܛܳܐ ܘܒܪܺܝܪ ܠܶܒܳܐ. ܕܟܽܠ ܕܚܳܙܶܐ ܠܶܗ ܐܰܘ ܫܳܡܰܥ ܛܶܒܶܗ܆ ܡܶܬܚܢܶܢ ܠܶܗ ܘܡܰܚܶܒ ܠܶܗ. ܘܰܡܨܰܠܶܐ ܚܠܶܦ ܥܽܘܕܪܳܢܶܗ. ܡܶܛܽܠ ܕܠܰܘ ܡܶܛܽܠ ܝܽܘܬܪ̈ܳܢܶܐ ܦܰܓܪ̈ܳܢܳܝܶܐ ܥܒܰܕ ܘܰܐܟܬܶܒ ܗܳܠܶܝܢ. ܘܠܳܐ ܡܶܛܽܠ ܩܽܘ̈ܠܳܣܶܐ ܥܳܠ̈ܡܳܢܳܝܶܐ ܘܬܶܫܒܽܘܚܬܳܐ ܣܪܺܝܩܬܳܐ ܘܠܳܐ ܡܩܰܘܝܳܢܺܝܬܳܐ. ܘܠܳܐ ܡܶܛܽܠ ܚܰܕ ܚܰܫܳܐ ܒܺܝܫܳܐ ܘܙܺܐܦܳܢܳܐ. ܐܶܠܳܐ ܒܰܠܚܽܘܕ ܡܶܛܽܠ ܚܽܘܒܳܐ ܐܰܠܳܗܳܝܳܐ ܘܡܶܛܽܠ ܥܽܘܕܪܳܢܳܐ ܕܓܰܘܳܐ ܕܟܽܠܗܽܘܢ ܒܢܰܝ̈ܢܳܫܳܐ. ܡܰܐܠܽܘܢ ܘܰܐܝܟ ܕܰܡܢܳܚ ܠܰܐܠܳܗܳܐ ܥܽܘܕܪܳܢܳܐ ܕܰܒܪܺܝܬܶܗ. ܘܰܐܝܟ ܕܰܠܬܳܫܒܽܘܚܬܳܐ ܕܰܫܡܶܗ ܡܫܰܒܚܳܐ ܘܰܣܓܺܝܕܳܐ. ܘܠܰܘ ܡܶܛܽܠ ܕܡܰܟܬܰܒ ܠܐ̱ܢܳܫ ܫܚܺܝܡܳܐ. ܘܶܐܢ ܡܶܬܗܰܢܶܐ ܐܰܢ̱ܬ ܘܡܶܬܒܰܣܰܡ ܘܡܶܬܥܰܕܰܪ ܡܶܢ ܫܶܡܥܶܗ ܐܰܘܕܳܐ. ܘܩܽܘܒܠ ܛܰܝܒܽܘܬܳܐ ܕܝܳܗܽܘܒܳܐ ܛܳܒܳܐ ܘܡܰܠܦܳܢܳܐ ܚܰܟܺܝܡܳܐ ܘܰܡܦܰܪܢܣܳܢܳܐ ܥܰܬܺܝܪܳܐ. ܨܰܠܳܐ ܚܠܳܦ ܥܽܘܕܪܳܢܳܐ ܕܡܰܟܬܒܳܢܳܐ ܣܢܺܝܩܳܐ ܚܠܳܦ ܫܶܦܠܳܐ ܕܰܟܬܺܝܒܬܶܗ ܒܰܠܚܽܘܕ ܘܰܕܨܶܒܝܳܢܶܗ ܛܳܒܳܐ ܘܚܽܘܒܶܗ ܫܰܪܺܝܪܳܐ. ܘܗܳܟܰܢ ܐܶܬܚܙܺܝ ܡܳܪܳܐ ܛܳܒܳܐ ܕܰܥܒܰܕ ܡܶܢ ܫܽܘܪܳܝܶܗ ܕܥܳܠܡܳܐ. ܕܰܒܝܰܕ ܫܺܝ̈ܛܶܐ ܘܰܒܨܺܝܪ̈ܰܝ ܓܶܢܣܳܐ ܘܰܒܪܺܝܪ̈ܰܝ ܠܶܒܳܐ. ܘܰܫܚܺܝ̈ܡܶܐ ܕܒܰܒ̈ܢܰܝ ܐ̱ܢܳܫܳܐ. ܐܰܥܒܶܕ ܘܝܰܗܒ ܡܶܠܬܳܐ ܕܥܽܘܕܪܳܢܳܐ. ܘܫܰܕܰܪ ܠܫܰܪܟܳܐ ܕܰܒܢܰܝ̈ܢܳܫܳܐ ܗܳܠܶܝܢ ܕܰܥܬܺܝܕܺܝܢܰܢ ܕܢܰܕܟܰܪ ܐܶܢܽܘܢ ܐܰܝܟܳܐ ܕܙܳܕܶܩ ܘܨܳܒܶܐ ܡܳܪܰܢ. ܘܰܒܗܳܕܶܐ ܝܰܬܺܝܪ ܝܳܪܒܳܐ ܬܶܫܒܽܘܚܬܳܐ ܕܡܳܪܐ ܛܳܒܳܐ. ܘܡܶܬܗܰܝܡܢܳܐ ܡܶܠܬܳܐ ܘܡܶܬܩܰܒܠܳܐ ܕܡܶܢܶܗ ܐܺܝܬܶܝܗ̇. ܒܗܳܝ ܕܠܰܘ ܥܰܡ ܚܰܟܺܝ̈ܡܰܘܗܝ ܕܥܳܠܡܳܐ ܘܡܰܠ̈ܦܳܢܶܐ ܡܫܰܡ̈ܗܶܐ ܘܪܰܘܪ̈ܒܳܢܶܐ ܡܫܰܕܰܪ ܡܶܠܬܶܗ. ܐܶܠܳܐ ܥܰܡ ܦܫܺܝ̈ܛܶܐ ܘܗܶܕܝܽܘ̈ܛܶܐ. ܘܰܒܪܺܝܪ̈ܰܝ ܠܶܒܳܐ. ܘܗܳܠܶܝܢ ܣܳܦ̈ܩܳܢ ܒܗܳܢܳܐ ܢܺܝܫܳܐ. ܐܳܦܶܢ ܣܶܓܝܰܬ̥ ܡܶܠܬܳܐ ܝܰܬܺܝܪ ܡܶܢ ܙܶܕܩܳܐ. ܐܶܠܳܐ ܥܶܠܬܳܐ ܥ̣ܨܳܬ̥ ܕܗܳܠܶܝܢ ܢܶܬ̥ܰܐܡܪ̈ܳܢ ܩܰܕܡܳܐܺܝܬ̥܀
ܘܗܳܫܳܐ ܬܽܘܒ ܢܺܐܡܰܪ ܘܢܰܘܕܰܥ ܕܰܐܝܟܰܢ ܡܶܬܺܝܕܰܥ ܫܪܳܪܳܐ ܚܰܬ̊ܺܝܬ̥ܳܐܝܬ̥ ܘܢܶܪܕܶܐ ܒܛܶܟܣܳܐ ܕܡܶܠܬܰܢ ܣܕܺܝܪܳܐܝܬ̥. ܐܶܡܰܪܢܰܢ ܡܶܢ ܠܥܶܠ ܘܚܰܘܺܝܢܰܢ ܒܪܺܝܫܳܐ ܕܰܩܕܳܡ ܗܳܢܳܐ. ܕܰܐܝܟܰܢܳܐ ܕܶܐܠܰܨ ܘܰܥܨܳܐ ܠܰܢ ܟܝܳܢܶܗ ܕܦܰܓܪܳܐ ܕܰܢܣܰܬܪܺܝܘܗܝ ܡܶܢ ܡܰܚܫܳܢ̈ܝܳܬܶܗ. ܘܗܰܘܢܰܢ ܐܶܬܦܰܪܰܣ ܘܰܒ̣ܢܳܐ ܠܶܗ ܒܰܝܬܳܐ ܠܰܢܛܺܝܪܽܘܬ̥ܶܗ. ܗܳܟܰܢܳܐ ܙܳܕܶܩ ܕܳܐܦ ܢܶܬܒܢܶܐ ܒܰܝܬܳܐ ܢܰܦܫܳܢܳܐ. ܐܰܘܟܺܝܬ ܪܽܘܚܳܢܳܐ ܠܢܰܦܫܰܢ ܪܽܘܚܳܢܳܝܬܳܐ. ܘܕܶܐܡܰܪܢܰܢ ܘܰܐܕܟܰܪܢܰܢ ܗܳܫܳܐ ܢܰܦܫܳܢܳܐ ܘܪܽܘܚܳܢܳܐ. ܠܰܘ ܚܰܕ ܐܶܢܽܘܢ ܐܶܠܳܐ ܬܪܶܝܢ. ܚܰܕ ܢܰܦܫܳܢܳܐ ܘܰܐ̱ܚܪܺܢܳܐ ܪܽܘܚܳܢܳܐ. ܥܰܡ ܗܰܘ ܩܰܕܡܳܝܳܐ ܕܦܰܓܪܳܐ. ܕܗܳܘܶܝܢ ܟܽܠܗܽܘܢ ܬܠܳܬܳܐ. ܘܗܰܘ ܩܰܕܡܳܝܳܐ ܕܦܰܓܪܳܐ ܒܢܰܝܢܰܢ ܘܒܳܢܶܝܢܰܢ ܥܕܰܟܺܝܠ ܕܡܶܬܬܚܺܝܒ ܠܶܗ. ܘܗܰܘ ܢܰܦܫܳܢܳܐ ܗܳܟܘܳܬ̥ ܐܳܠܨܳܐ ܠܰܢ ܕܢܶܒܢܶܝܘܗܝ ܘܰܡܨܶܝܢܰܢ ܘܡܶܬܬܚܺܝܒ ܠܰܢ. ܗܰܘ ܕܶܝܢ ܪܽܘܚܳܢܳܐ ܐܰܠܳܗܳܐ ܒܰܢܝܶܗ. ܘܶܐܢ ܟܺܝܬ ܘܰܚܢܰܢ ܨܳܒܶܝܢܰܢ ܘܝܳܨܦܺܝܢܰܢ ܘܰܡܦܺܝܣܺܝܢܰܢ ܘܫܳܘܶܝܢܰܢ. ܘܥܰܠ ܗܳܕܶܐ ܐܳܡܪܺܝܢܰܢ ܢܰܗܺܝܪܳܐܝܬ̥ ܐܶܡܰܬܝ ܕܨܳܒܶܐ ܡܳܪܳܐ ܛܳܒܳܐ ܘܡܶܬܡܛܝܢܢ ܠܕܽܘܟܬܳܐ ܕܠܳܚܡܳܐ ܠܗܶܝܢ. ܗܳܫܳܐ ܕܶܝܢ ܙܳܕܶܩ ܠܰܢ ܕܢܰܬܩܶܢ ܒܰܝܬܳܐ ܡܣܰܬܪܳܢܳܐ ܘܰܡܢܰܛܪܳܢܳܐ ܠܢܰܦܫܰܢ ܐܰܝܟ ܕܰܐܩܺܝܡܢܰܢ ܒܰܝܬܳܐ ܠܦܰܓܪܰܢ. ܘܰܐܟܡܳܐ ܡܫܰܠܗܶܒ ܠܦܰܓܪܰܢ ܗܳܟܰܢ ܗܳܐ ܚܳܙܶܝܢܰܢ ܕܚܽܘܡܳܗ̇ ܕܪܶܓܬܳܐ ܘܰܕܚܶܡܬܳܐ ܕܰܢܨܺܝܒܳܐ ܒܰܟܝܳܢܰܢ ܡܫܰܠܗܶܒ ܠܢܰܦܫܰܢ. ܘܰܐܟܡܳܐ ܕܩܽܘܪܳܐ ܘܪܰܛܺܝܒܽܘܬܳܐ ܡܨܰܪܶܦ ܠܦܰܓܪܰܢ. ܒܝܰܕ ܓܠܺܝܙܽܘܬܳܐ ܕܙܰܠܺܝ̈ܩܰܝ ܝܺܕܰܥܬܳܐ ܕܰܫܪܳܪܳܐ ܫܶܡܫܳܐ. ܗܳܟܘܳܬ̥ ܩܽܘܪܳܐ ܕܡܰܗܡܝܳܢܽܘܬܳܐ ܘܪܰܛܺܝܒܽܘܬܳܐ ܕܰܪ̈ܓܺܝܓܳܬܳܐ ܡܛܰܒܰܥ ܠܢܰܦܫܰܢ ܒܝܰܕ ܓܠܺܝܙܽܘܬ ܙܰܠܺܝ̈ܩܰܝ ܝܺܕܰܥܬܳܐ ܕܰܫܪܳܪܳܐ. ܘܰܐܟܡܳܐ ܕܚܰܝ̈ܘܳܬܳܐ ܚܰܒܴ̈ܠܳܬܳܐ ܡܚܰܒ̈ܠܳܢ ܠܦܰܓܪܳܐ ܕܰܠܒܰܪ ܡܶܢ ܐܶܣܰܝ̈ ܒܰܝܬܳܐ. ܗܳܟܘܳܬ̥ ܚܰܫ̈ܶܐ ܣܢܰܝ̈ܳܐ ܡܚܰܒܠܺܝܢ ܢܰܦܫܳܐ ܕܺܐܝܬܶܝܗ̇ ܠܒܰܪ ܡܶܢ ܐܶܣܰܝ̈ ܚܶܟܡܬܳܐ ܫܰܪܺܝܪܬܳܐ. ܕܺܐܝܬܰܝܗܽܘܢ ܚܣܳܡܳܐ. ܘܰܐܟܬܳܐ. ܘܣܶܢܶܐܬܳܐ. ܘܫܽܘܒܚܳܐ ܣܪܺܝܩܳܐ. ܘܪܽܘܓܙܳܐ. ܘܥܶܨܝܳܢܳܐ. ܘܥܳܩܬܳܐ. ܘܪܶܚܡܰܬ̥ ܟܶܣܦܳܐ. ܥܰܡ ܫܰܪܟܳܐ ܕܰܐܝܟ ܗܳܠܶܝܢ. ܘܰܕܥܰܫܺܝܢ ܡܶܢ ܟܽܘܠܗܽܘܢ ܪܳܡܽܘܬ̥ܳܐ ܢܳܨܝܰܬ̥ ܥܰܡ ܐܰܠܳܗܳܐ. ܥܰܡ ܚܬܺܝܪܽܘܬܳܐ ܘܫܽܘܒܗܳܪܳܐ. ܘܰܐܟܡܳܐ ܕܓܰܢܳܒ̈ܶܐ ܚܳܛܦܺܝܢ ܘܰܡܚܰܠܨܺܝܢ ܡܶܢ ܒܰܝܬܳܐ ܕܠܳܐ ܡܚܰܣܰܢ ܒܶܐܣ̈ܶܐ ܘܰܒܬܰܪ̈ܥܶܐ. ܗܳܟܰܢܳܐ ܘܚܰܫ̈ܶܐ ܕܕܰܓܳܠܽܘܬܳܐ ܘܛܳܥܝܽܘܬܳܐ ܕܠܳܐ ܝܺܕܰܥܬܳܐ ܥܳܐܠܴ̈ܢ ܥܰܠ ܢܰܦܫܳܐ ܕܠܳܐ ܡܚܰܣܢܳܐ ܒܚܶܟܡܬܳܐ ܫܰܪܺܝܪܬܳܐ. ܘܰܡܚܰܠܨܺܝܢ ܡܶܢܳܗ̇ ܟܽܠܗܶܝܢ ܛܳܒ̈ܳܬܳܐ ܕܒܰܟܝܳܢܳܗ̇. ܘܕܰܩ̣ܢܳܬ̥ ܬܽܘܒ ܒܝܰܕ ܝܰܨܺܝܦܽܘܬ̥ܳܗ̇. ܡܳܕܶܝܢ ܘܳܠܶܐ ܠܰܢ ܕܝܰܬܺܝܪ ܚܦܺܝܛܳܐܝܬ̥ ܘܰܒܝܰܨܺܝܦܽܘܬܳܐ ܣܰܓܺܝܐܬܳܐ ܢܶܬܚܰܟܰܡ ܘܢܶܬܦܰܪܰܣ. ܘܰܢܚܰܣܶܢ ܒܶܗ ܢܰܦܫܰܢ. ܘܗܳܕܶܐ ܝܺܕܰܥܬܳܐ ܣܢܺܝܩܳܐ ܥܰܠ ܕܽܘܪܳܫܳܐ ܘܝܽܘܠܦܳܢܳܐ ܘܗܳܢܳܐ ܡܶܬܩܢܶܐ ܡܶܢ ܥܽܘܩܳܒܳܐ ܕܥܰܠ ܫܪܳܪܳܐ. ܕܢܶܬܺܝܕܰܥ ܘܢܶܬܦܪܶܫ ܡܶܢ ܕܰܓܳܠܽܘܬܳܐ. ܡܶܢ ܗܳܪܟܳܐ ܘܳܠܶܐ ܠܰܢ ܕܰܢܫܰܪܶܐ ܒܒܶܢܝܳܢܳܐ ܕܺܝܕܰܥܬܶܗ ܕܰܫܪܳܪܳܐ ܕܺܐܝܬܰܘܗܝ ܢܽܘܗܪܳܐ ܘܛܳܒܽܘܬܳܐ. ܐܰܟܡܳܐ ܕܡܶܢ ܫܶܬܶܐܣ̈ܶܐ ܫܰܪܺܝܢܰܢ ܒܬܽܘܩܳܢܶܗ ܕܒܰܝܬܳܐ ܡܣܰܬܪܳܢܶܗ ܕܦܰܓܪܳܐ. ܕܰܐܝܟܰܢܳܐ ܕܶܝܢ ܡܶܬܺܝܕܰܥ ܗܳܢܳܐ. ܐܶܡܰܪܢܰܢ ܡܶܢ ܟܰܕܽܘ ܠܰܐܝܢܳܐ ܕܶܐܣܬܰܟܰܠ. ܘܬܽܘܒ ܐܳܡܪܺܝܢܰܢ ܘܰܡܢܰܗܪܺܝܢܰܢ. ܢܽܘܗܪܳܐ ܡܰܢ ܡܶܕܡ ܐܺܝܬܰܘܗܝ. ܘܺܐܝܬ ܠܶܗ ܩܢܽܘܡܳ ܘܽܐܘܣܺܝܰܐ. ܘܣܺܝܡ ܒܶܐܣܦܺܝܪܶܗ ܕܫܶܡܫܳܐ. ܟܰܕ ܐܺܝܬ ܢܽܘܗܪ̈ܶܐ ܐ̱ܚܪ̈ܳܢܶܐ ܒܰܟܝܳܢܳܐ ܕܟܺܐܦ̈ܶܐ. ܘܰܕܡܰܪ̈ܓܳܢܝܳܬܳܐ ܘܕܰܦܪ̈ܰܚܕܽܘܕܶܐ ܘܳܐܕ̈ܫܶܐ ܐ̱ܚܪ̈ܳܢܶܐ. ܚܶܫܟܳܐ ܕܶܝܢ ܠܰܝܬܰܘܗܝ ܡܶܕܶܡ ܡܩܰܝܡܳܐ ܐܶܠܳܐ ܓܠܺܝܙܽܘܬܳܐ. ܘܥܳܠܡܳܐ ܗܳܢܳܐ ܘܒܰܪ ܐ̱ܢܳܫܳܐ ܐܺܝܬܰܝܗܽܘܢ. ܘܰܩܢܽܘ̈ܡܶܐ ܐܶܢܽܘܢ. ܘܺܐܝܬ ܠܗܽܘܢ ܟܝܳܢܳܐ ܘܽܐܘܣܺܝܰܐ. ܗܳܝܕܶܝܢ ܕܢܺܐܡܰܪ ܐ̱ܢܳܫ ܕܠܰܝܬܰܘܗܝ ܥܳܠܡܳ ܘܠܳܐ ܒܰܪ ܐ̱ܢܳܫܳܐ. ܘܠܳܐ ܡܶܕܶܡ ܐܺܝܬܶܝܗ̇. ܥܰܡ ܣܰܓܺܝ̈ܐܬܐ ܕܕܰܐܝܟ ܗܳܠܶܝܢ. ܡܳܕܶܝܢ ܐܺܝܬ ܫܪܳܪܳܐ ܚܰܬ̊ܺܝܬ̥ܳܐܝܬ̥ ܒܥܳܠܡܳܐ. ܘܢܽܘܗܪܳܐ ܐܺܝܬܰܘܗܝ. ܕܺܐܝܬܶܝܗ̇ ܝܺܕܰܥܬܶܗ ܕܰܫܪܳܪܳܐ. ܘܗܽܘ ܫܪܳܪܳܐ ܟܝܳܢܳܐ ܕܰܡܟܳܢ ܘܰܫܟܺܝܚ ܐܺܝܬܰܘܗܝ. ܘܰܟܝܳܢܳܐ ܐܰܝܬܺܝ ܟܽܘܠ ܠܰܗܘܳܝܳܐ. ܡܳܕܶܝܢ ܟܝܳܢܳܐ ܕܰܐܝܬܺܝ ܟܽܘܠ ܠܰܗܘܳܝܳܐ ܘܠܺܐܝܬ̥ܽܘܬ̥ܳܐ. ܗܽܘ ܐܺܝܬܰܘܗܝ ܫܪܳܪܳܐ ܚܰܬ̊ܺܝܬ̥ܳܐ. ܡܳܕܶܝܢ ܠܘܳܬ ܗܰܘ ܟܬܳܒܳܐ ܕܰܟܝܳܢܳܐ ܢܶܪܗܰܛ. ܘܒܶܗ ܢܶܩܪܶܐ ܘܡܶܢܶܗ ܢܺܐܠܰܦ ܥܰܠ ܟܽܠܡܶܕܶܡ ܕܡܶܬܒܥܶܐ ܠܰܢ. ܘܙܳܕܶܩ ܠܰܢ ܠܡܺܐܠܰܦ. ܘܰܒܗܳܠܶܝܢ ܐܶܬܚܬܶܡ ܩܶܦܰܠܶܐܘܢ ܕܰܬܪܶܝܢ ܒܝܰܕ ܐܰܠܳܗܳܐ ܕܗܰܕܺܝ.
ܡܰܒܘܿܥܳܐ ܕܟܬܺܝܼܒܬܐ: Go to link.
ܢܽܘܼܗܳܪܳܐ: ܟܬܺܝܼܒܬܳܐ ܗܳܕܶܐ ܫܟܺܝܼܚܳܐ ܒܰܟܬܳܒܳܐ ܚܰܕ ܕܰܛܥܺܝܼܢ ܫܶܡ «ܥܶܠܬܳܐ ܕܟܽܠ ܥܶܠ̈ܠܳܢ. ܟܬܳܒܳܐ ܓܰܘܳܢܳܝܳܐ ܠܟܽܠ ܥܰܡ̈ܡܺܝܼܢ ܕܰܬܚܶܝܬ ܫܡܰܝܳܐ». ܘܰܢܛܺܝܼܪ ܒܒܶܝܬ ܐܰܪ̈ܟܶܐ ܕܥܺܕܬܐ ܕܐܰܪܒܥܺܝܢ ܣܳܗ̈ܕܶܐ ܕܡܰܪܕܺܝܢ. ܘܰܢܣܺܝܟ ܒܝܰܕ ܕܰܝܪܳܝܳܐ ܓܰܒܪܐܝܼܠ ܣܒܺܝܼܪܝܼܢܳܝܳܐ ܒܰܫܢܰܬ ܐܰܠܦܳܐ ܘܰܫܒܰܥ̈ܡܳܐܐ ܘܰܬܡܳܢܺܝܢ ܘܚܰܡܶܫ ܕܝܰܘ̈ܢܳܝܶܐ (ܕܡܰܘܠܳܕܳܐ 1474) ܒܥܽܘܼܡܪܳܐ ܕܒܶܝܬ ܡܳܪܝ ܫܶܡܥܽܘܢ ܘܡܳܪܝ ܫܡܽܘܐܝܼܠ ܘܡܳܪܝ ܓܰܒܪܐܝܼܠ ܒܝܰܘ̈ܡܰܝ ܡܳܪܝ ܝܘܼܚܰܢܳܢ ܐܶܦܶܣܩܺܘܼܦܳܐ ܕܺܝܼܠܶܗ ܕܥܽܘܼܡܪܳܐ.
ܘܰܟܬܺܝܼܒܬܳܐ ܗܳܕܶܐ ܠܩܺܝܛܳܐ ܡܼܶܢ ܐܰܣܳܪܳܐ ܕܢܰܘܠܐ ܕܰܠܥܶܠ ܒܝܰܕ ܡܝܰܩܪܳܐ ܡܰܠܦܳܢܳܐ ܥܺܝܼܣܰܐ ܡܽܘܼܣܰܐ ܕܶܡܺܝܪ ܗܳܢܳܐ ܕܚܳܝܶܐ ܒܐܰܘܣܛܘܪܝܰܐ. ܬܰܘܕܺܝ ܣܰܓܺܝ ܠܐܟܺܝܼܦܘܼܬܶܗ ܘܰܒܛܝܼܠܘܼܬܶܗ ܠܶܫܳܢܳܝܬܐ.
You can also send us an email to karyohliso@gmail.com
Leave a Comment