ܬܽܘܼܩܳܢܳܐ ܕܒܰܪܢܳܫܳܐ

ܬܽܘܼܩܳܢܳܐ ܕܒܰܪܢܳܫܳܐ ܝܳܕܥܺܝܼܢܰܢ ܕܐܳܦܶܢ ܒܰܝܬܰܢ ܗܳܢܳܐ ܕܦܰܓܪܳܐ ܢܶܫܬܪܶܐ܆ ܐܶܠܳܐ ܐܺܝܬ ܠܰܢ ܒܶܢܝܳܢܳܐ ܕܡܶܢ ܐܰܠܳܗܳܐ܇ ܒܰܝܬܳܐ ܕܠܳܐ ܥܒܺܝܼܕ ܒܐܺܝܕ̈ܰܝܳܐ ܒܰܫܡܰܝܳܐ ܠܥܳܠܰܡ. ܐܶܢ ܦܰܓܪܳܐ ܗܳܟܺܝܠ ܢܶܩܪܺܝܘܗܝ. ܘܐܶܢ ܡܰܫܟܢܳܐ ܐܰܘ ܒܰܝܬܳܐ ܐܰܘ ܡܰܥܡܪܳܐ܆ ܛܽܘܼܦܣܳܐ ܐܺܝܼܬܰܘܗܝ ܕܥܳܠܡܳܐ ܗܳܢܳܐ ܪܰܒܳܐ ܕܥܳܒܰܪ. ܐܰܠܳܗܳܐ ܡܶܛܽܠ ܒܰܪܢܳܫܳܐ. ܘܥܳܠܡܳܐ ܪܰܒܳܐ ܘܰܕܝܰܬܺܝܪ ܘܕܶܐܬܬܣܺܝܡ ܒܓܰܘ ܥܳܠܡܳܐ ܗܳܢܳܐ ܐܰܝܟ ܕܒܰܙܥܽܘܿܪܳܐ ܕܢܶܗܘܶܐ ܐܳܦ ܗܽܘ ܒܰܕܡܽܘܼܬ ܒܰܝܬܳܐ ܠܒܰܪܢܳܫܳܐ ܗܰܘ ܫܰܪܺܝܪܳܐ ܗܰܘܢܳܐ. ܢܶܬܦܰܚܰܡ ܕܶܝܢ ܣܰܓܺܝ ܒܘܳܠܺܝܬܳܐ ܘܢܶܗܘܶܐ ܐܺܝܬ ܠܶܗ ܕܽܘܼܡܝܳܐ ܒܰܙܢܳܐ ܡܶܕܶܡ ܐܳܦ ܠܘܳܬ ܡܰܓܕܠܳܐ ܡܶܕܶܡ ܪܳܡܳܐ ܘܥܰܫܺܝܢܳܐ ܕܰܒܢܶܐ ܡܫܰܪܪܳܐܺܝܬ ܥܰܠ ܒܪ̈ܰܘܳܬܳܐ ܬܰܪ̈ܬܶܝܢ ܚܠܺܝܼܡ̈ܳܬܳܐ. ܘܐܺܝܬ ܒܶܗ ܚܰܡܫܳܐ ܡܶܕܝܳܪ̈ܶܐ ܕܰܦܪܺܝܼܫܺܝܼܢ ܚܰܕ ܠܥܶܠ ܡܶܢ ܚܰܕ. ܪ̈ܶܓܠܶܐ ܓܶܝܪ ܐܺܝܬ ܒܶܗ ܘܥܰܛܡ̈ܳܬܳܐ ܘܟܰܪܣܳܐ ܘܰܩܕܳܠܳܐ ܘܺܪܝܼܫܳܐ. ܥܒܰܕ ܠܶܗ ܐܰܠܳܗܳܐ ܐܽܘܡܳܢܳܐ ܫܶܬܶܐܣܬܳܐ ܡܫܰܪܰܪܬܳܐ ܕܰܬܚܽܘܼܬܰܘܗܝ. ܒܰܕܡܽܘܼܬ ܒܐܰܣܺܝܣ ܕܰܬܚܶܝܬ ܥܰܡܽܘܼ̈ܶܕܐ. ܦܰܪ̈ܣܳܬܳܐ ܩܒܺܝܼܥ̈ܳܬܳܐ ܘܰܡܣ̈ܰܬܬܳܬܳܐ ܕܰܩܒܺܝܼ̈ܥܳܢ ܥܰܠ ܐܰܪܥܳܐ. ܐܰܡܺܝܼܢܳܐܺܝܬ ܬܚܶܝܬ ܪ̈ܶܓܠܰܘܗܝ. ܘܰܠܗܳܠܶܝܢ ܠܰܘ ܩܰܫܝ̈ܳܬܳܐ ܘܐܳܦܠܳܐ ܓܠܺܝ̈ܠܳܬܳܐ ܬܰܩܶܢ ܐܶܢܶܝܢ܆ ܐܰܝܟ ܗܳܠܶܝܢ ܕܰܒܥܺܝܪܳܐ ܐܰܘ ܕܚܰܝܘ̈ܳܬܳܐ܆ ܐܶܠܳܐ ܪ̈ܰܟܺܝܟܳܬܳܐ ܟܺܝܬ ܒܶܣܪ̈ܳܢܳܝܳܬܳܐ. ܘܕܐܺܝܬ ܠܗܶܝܢ ܐܰܪܺܝܼܟܽܘܼܬܳܐ ܠܰܩܕܳܡܰܝܗܝܢ܇ ܐܰܝܟܰܢܳܐ ܕܟܰܕ ܟܽܠܳܗ̇ ܩܰܘܡܬܶܗ ܕܒܶܢܝܳܢܳܐ ܡܶܬܪܰܟܢܳܐ ܠܡܶܬܓܗܳܢܽܘܼ ܠܰܩܕܳܡܶܝܗ̇ ܢܶܗܘ̈ܝܳܢ ܘܣܳܡ̈ܟܳܢ ܠܳܗ̇ ܕܠܳܐ ܬܶܦܶܠ. ܐܰܝܟܰܢܳܐ ܕܠܳܐ ܐܳܦ ܠܒܶܣܬܪܳܐ ܬܶܡܰܛ ܘܬܶܨܛܠܶܐ. ܡܶܛܽܠ ܡܥܰܠܝܽܘܼܬܳܐ ܕܪܰܘܡܶܗ ܕܡܰܓܕܠܳܐ. ܒܥܶܩܒ̈ܶܐ ܚܠܺܝܼܡ̈ܳܬܳܐ ܣܰܡܶܟ ܐܶܢܶܝܢ ܠܦܰܪ̈ܣܳܬܳܐ ܡܶܢ ܒܶܣܬܰܪܗܶܝܢ. ܘܐܶܣܰܪ ܐܶܢܶܝܢ ܘܰܠܥܶܩܒ̈ܶܐ ܥܰܡܗܶܝܢ ܐܰܟܚܕܳܐ ܒܩܽܘܼܪ̈ܨܠܶܐ ܚܠܺܝܼܡ̈ܶܐ ܘܰܩܒܺܝܼ̈ܥܶܐ. ܡܫܰܪܪ̈ܶܐ ܟܺܝܬ ܘܠܳܐ ܡܶܨܛܰܠܝܳܢ̈ܶܐ ܕܰܠܥܶܠ ܡܶܢܗܶܝܢ. ܥܒܰܕ ܕܶܝܢ ܒܪ̈ܺܝܫܰܝܗܶܝܢ ܕܦܰܪ̈ܣܳܬܳܐ ܬܽܘܒ ܐܳܦ ܨܶܒܥ̈ܳܬܳܐ ܡܦܰܪ̈ܫܳܬܳܐ ܥܣܰܪ. ܠܟܽܠ ܪܶܓܠܳܐ ܚܕܳܐ ܚܰܡܶܫ ܒܡܶܢܝܳܢܳܐ܇ ܠܽܘܼܩܒܰܠ ܡܫܽܘܼܚܬܳܐ ܕܰܦܬܳܝܗܶܝܢ ܕܦܰܪ̈ܣܳܬܳܐ܇ ܐܰܝܟܰܢܳܐ ܕܐܳܦ ܗܶܢܶܝܢ ܟܰܕ ܬܶܓܕܰܫ ܘܰܢܡܽܘܛ ܡܰܓܕܠܳܐ ܠܡܶܨܛܠܳܝܽܘܼ ܢܶܗܽܘ̈ܝܳܢ ܡܥܰܕܪ̈ܳܢܝܳܬܳܐ. ܟܰܕ ܥܰܠ ܐܰܪܥܳܐ ܡܥܰܙܝܳܢܺܝܼܬܳܐ ܣܳܪ̈ܟܳܢ. ܐܰܝܟ ܗܰܘ ܕܪܳܩܥ̈ܳܢ ܠܫܶܬܶܐܣܬܳܐ ܠܬܰܚܬ. ܥܰܠ ܩܽܘܼܪ̈ܨܠܶܐ ܗܳܟܺܝܠ ܗܳܢܽܘܿܢ ܕܰܠܥܶܠ ܡܶܢ ܦܰܪ̈ܣܳܬܳܐ ܐܰܝܟ ܕܥܰܠ ܒܐܶܣܺܝܼܣ ܚܠܺܝܼ̈ܡܳܬܳܐ ܘܠܳܐ ܡܶܙܕܰܥܙܥܳܢܝ̈ܳܬܳܐ ܒܢܳܐ ܘܰܩܒܰܥ ܐܽܘܡܳܢܳܐ ܠܡܶܕܝܳܪܳܐ ܩܰܕܡܳܝܳܐ ܘܬܰܚܬܳܝܳܐ. ܟܰܕ ܒܰܕܡܽܘܼܬܳܐ ܕܰܬܪܶܝܢ ܥܰܡܽܘܕ̈ܶܐ ܡܫܰܪ̈ܪܶܐ ܙܩܰܦ ܘܰܬܪܰܨ ܐܶܢܶܝܢ ܠܫܳܩ̈ܶܐ ܡܰܬܐܡ̈ܳܬܳܐ܇ ܠܰܘ ܦܫܺܝ̈ܛܳܬܳܐ ܟܺܝܬ ܘܰܕܚܰܕ ܓܰܪܡܳܐ. ܐܶܠܳܐ ܕܡܶܢ ܬܰܪܬܶܝܢ ܐܰܒܽܘܼܒܝ̈ܳܬܳܐ ܕܓܰܪܡܳܐ ܡܪ̈ܰܟܒܳܢ. ܐܰܝܟܰܢܳܐ ܕܰܠܟܽܠܶܗ ܝܽܘܼܩܪܳܐ ܕܡܰܓܕܠܳܐ. ܢܶܛܥ̈ܢܳܢ ܦܫܺܝܼܩܳܐܺܝܬ ܘܰܡܫܰܪܪܳܐܺܝܬ. ܘܠܳܐ ܢܶܨܛܰܠ̈ܝܳܢ ܐܰܘ ܢܶܬܦܰܩܥ̈ܳܢ ܬܚܶܝܬ ܩܰܫܝܽܘܼܬܳܐ ܘܣܰܓܺܝܐܽܘܼܬܳܐ ܕܰܛܥܽܘܼܢܬܳܐ. ܗܳܟܰܢܳܐ ܬܰܩܢܶܗ ܐܽܘܡܳܢܳܐ ܠܡܶܕܝܳܪܳܐ ܬܰܚܬܳܝܳܐ ܕܦܰܓܪܳܐ ܐ̱ܢܳܫܳܝܳܐ. ܥܰܠ ܬܰܪܬܶܝܢ ܒܐܰܣܺܝ̈ܣ ܘܰܬܪܶܝܢ ܥܰܡܽܘܼܕ̈ܶܐ ܠܥܶܠ ܡܶܢ ܗܳܠܶܝܢ ܕܝܶܢ. ܟܰܕ ܠܡܰܬܐܡܽܘܼܬܗܶܝܢ ܕܐܰܒܽܘܼܒ̈ܝܳܬܳܐ ܕܫܳܩ̈ܶܐ܇ ܐܳܣܰܪ ܚܠܺܝܡܳܐܺܝܬ ܘܰܡܫܰܪܪܳܐܺܝܬ ܒܙܳܒܽܘܿܪ̈ܶܐ ܕܒܽܘܼܪ̈ܟܶܐ܇ ܒܢܳܐ ܠܥܶܠ ܡܶܢܗܶܝܢ ܡܶܕܝܳܪܳܐ ܬܪܰܝܳܢܳܐ. ܙܰܘܓܳܐ ܕܥܰܛܡ̈ܳܬܳܐ ܒܰܕܡܽܘܼܬܳܐ ܕܰܬܪܶܝܢ ܡܰܓܕ̈ܠܶܐ ܓܠܺܝ̈ܠܶܐ ܘܰܥܫܺܝܢ̈ܶܐ. ܕܩܳܝܡܺܝܼܢ ܚܠܺܝܼܡܳܐܺܝܬ ܬܚܶܝܬ ܐܳܦܰܕܢܳܐ ܡܰܠܟܳܝܳܐ. ܟܰܕ ܠܥܶܠ ܡܶܢ ܗܳܠܶܝܢ ܗܳܟܺܝܠ ܒܢܳܐ ܘܰܩܒܰܥ ܐܽܘܼܡܳܢܳܐ ܘܥܳܒܽܘܿܕܳܐ܇ ܒܶܢܝܳܢܳܐ ܡܫܰܪܪܳܐ ܘܰܚܠܺܝܼܡܳܐ ܕܡܶܢ ܓܰܪ̈ܡܶܐ ܩܫܰܝ̈ܳܐ. ܒܰܕܡܽܘܼܬ ܥܰܪ̈ܩܳܬܳܐ ܕܐܳܣܪ̈ܳܢ ܠܒܶܢܝܳܢܳܐ ܕܠܳܐ ܢܶܬܦܰܠܗܰܕ. ܠܗܳܢܳܐ ܟܺܝܬ ܕܰܥܝܳܕܳܐ ܕܓܰܘܳܐ ܡܫܰܡܰܗ ܠܶܗ ܚܪ̈ܰܘܳܬܳܐ ܘܩܽܘܼܩܣ̈ܳܝܳܬܳܐ. ܘܰܥܠܰܘܗܝ ܬܰܩܶܢ ܘܣܳܡܶܗ ܠܟܽܠܶܗ ܒܶܝܬܓܰܙܳܐ ܡܰܠܟܳܝܳܐ. ܥܒܰܕ ܡܶܕܝܳܪܳܐ ܬܠܺܝܬܳܝܳܐ ܦܰܬܝܳܐ ܘܰܪܘܺܝ̣ܚܳܐ. ܗܳܢܳܐ ܕܡܶܬܩܪܶܐ ܡܶܢ ܥܝܳܕܳܐ ܕܓܰܘܳܐ. ܟܰܪܣܳܐ ܘܐܶܣܛܽܘܡܟܳܐ ܘܚܰܕܝܳܐ. ܘܟܽܠܗܶܝܢ ܗܳܠܶܝܢ ܕܰܒܓܰܘܗܽܘܢ. ܒܐܶܫܬܶܗ ܗܳܟܺܝܠ ܕܒܰܝܬܳܐ ܗܳܢܳܐ ܠܘܳܬ ܐܰܪܥܶܗ ܩܰܪܺܝܼܒܳܐܺܝܬ ܥܒܰܕ ܘܬܰܩܶܢ ܐܽܘܡܳܢܳܐ܇ ܡܳܐܢ̈ܶܐ ܬܪܶܝܢ ܡܩܰܒܠܳܢ̈ܶܐ ܕܟܽܠܳܗ̇ ܬܰܕܟܺܝܼܬܳܐ ܘܰܟܢܳܫܬܳܐ ܕܒܰܝܬܳܐ. ܡܳܐܢܳܐ ܡܰܝܬܝܳܢܳܐ ܕܬܰܕܟܺܝܼܬܳܐ ܗܳܝ ܥܒܺܝܼܬܳܐ. ܘܡܳܐܢܳܐ ܐ̱ܚܪܺܢܳܐ ܡܩܰܒܠܳܢܳܐ ܕܪܰܛܺܝܼܒܽܘܼܬܳܐ ܗܰܘ ܕܡܶܫܬܰܡܰܗ ܫܰܠܦܽܘܼܚܬܳܐ. ܬܚܶܝܬ ܗܳܠܶܝܢ ܕܶܝܢ ܥܒܰܕ ܡܰܦܩܳܢ̈ܶܐ ܬܪܶܝܢ ܠܳܚܡܳܐܺܝܬ. ܡܰܦܩܳܢܳܐ ܪܘܺܝ̣ܚܳܐ ܠܬܰܕܟܺܝܬܳܐ ܥܒܺܝܼܬܳܐ. ܘܡܰܦܩܳܢܳܐ ܐ̱ܚܪܺܢܳܐ ܩܰܛܺܝܼܢܳܐ ܘܐܰܠܺܝܨܳܐ ܠܕܽܘܟܳܝܳܐ ܕܪܰܛܺܝܒܽܘܼܬܳܐ. ܐܰܝܟܰܢܳܐ ܕܢܶܬܕܰܟܶܐ ܒܗܽܘܿܢ ܐܰܡܺܝܼܢܳܐܺܝܬ ܒܝܶܬܓܰܙܳܐ ܡܰܠܟܳܝܳܐ. ܘܠܳܐ ܢܶܗܘܶܐ ܐܺܝܬ ܒܶܗ ܡܶܕܶܡ ܒܰܛܺܝܠܳܐ ܘܠܳܐ ܚܳܫܚܳܐ ܕܠܳܒܶܟ ܕܽܘܼܟܬܳܐ ܣܦܺܝܩܳܐܺܝܬ ܘܰܕܠܳܐ ܝܽܘܼܬܪܳܢ. ܡܰܒܽܘܼܥܳܐ: ܚܙܽܝܼ ܟܬܳܒܳܐ ܕ«ܫܬܳܬ ܝܰܘ̈ܡܶܐ» ܡܺܐܡܪܳܐ ܕܫܰܒܥܳܐ. ܦܰܐܬܳܐ 215-216. ܣܝܳܡܳܐ ܕܡܳܪܝ ܝܰܥܩܽܘܒ ܕܐܽܘܼܪܗܳܝ (633–708). ܛܰܒܥܳܐ ܕܕܰܝܪܳܐ ܕܡܳܪܝ ܐܰܦܪܶܝܡ ܣܽܘܼܪܝܳܝܳܐ ܕܗܽܘܼܠܰܢܕܰܐ. ܫܢܰܬ 1985.