ܒܽܘܼܓܳܢܳܐ ܕܠܶܫܳܢܳܐ ܣܽܘܼܪܝܝܐ

ܒܽܘܼܓܳܢܳܐ ܕܠܶܫܳܢܳܐ ܣܽܘܼܪܝܝܐ

ܚܺܐܪ̈ܶܐ ܒܢܰܝ̈ܳܐ ܩܢܶܐ ܗ̱ܘܺܝܬ ܒܰܙܒܰܢ ܘܣܰܓܺܝ ܠܒܺܝܼܒ̈ܝܼܢ.

ܕܫܰܒܚܽܘܢܝ ܘܦܰܪܣܽܘܢܝ ܒܟܽܠ ܕܽܘܟܝ̈ܳܬܳܐ ܘܰܒܟܽܠ ܥܰܡܡ̈ܺܝܢ.

ܘܥܰܒܕܽܘܢܝ ܪܺܝܼܫܳܐ ܘܬܳܓܳܐ ܡܫܰܡܗܳܐ ܠܟܽܠ ܠܶܫܳܢܺܝ̈ܢ.

ܥܕܰܡܳܐ ܕܟܶܢܫܳܐ ܕܡܰܠܟܘ̈ܳܬܳܐ ܒܺܝܼ ܗܘܰܘ ܪܳܬܡܺܝܼܢ.

ܒܺܝ ܐܶܬܶܥܗܰܕܘ ܫܰܪ̈ܒܰܝ ܥܰܡܡ̈ܶܐ ܕܛܳܒ ܩܰܕ̈ܺܝܼܡܺܝܼܢ.

ܘܢܳܡܽܘܣܰܝ̈ܗܽܘܢ ܕܰܠܦܽܘܬ ܙܰܒܢ̈ܶܐ ܓܒܺܝܼܢܳܐ ܡܪܺܝܼܡܺܝܼܢ.

ܒܺܝܼ ܐܶܬܝܰܒܠܰܬ ܡܕܺܝܼܢܳܝܽܘܼܬܳܐ ܠܟܽܠܗܽܘܿܢ ܓܰܒܺܝܼ̈ܢ.

ܘܬܰܓܳܪܽܘܼܬܳܐ ܘܐܰܡܢ̈ܶܐ ܫܒܺܝܼ̈ܚܶܐ ܠܟܽܠܗܽܘܿܢ ܣܰܘܦ̈ܺܝܼܢ.

ܒܺܝܼ ܐܶܬܡܰܬܚܰܬ ܗܰܝܡܳܢܽܘܼܬܳܐ ܘܟܽܠ ܝܽܘܼܠܦܳܢ̈ܺܝܢ.

ܘܰܡܠܽܘܼܐܳܐ ܗ̱ܘܺܝܬ ܠܐܢ̈ܳܫܳܐ ܟܽܠܗܽܘܢ ܕܟܽܠ ܝܽܘܼܬܪ̈ܳܢܺܝܢ.

ܗܳܫܳܐ ܕܶܝܢ ܒܢ̈ܰܝ ܘܰܛܥܺܝܼ̈ܢܰܝ ܫܶܡܝ ܡܶܢܝ ܡܰܗܡܝܳܢܺܝܢ.

ܘܠܰܓܡܳܪ ܫܰܒܩܽܘܢܝ ܘܰܒܛܺܝܼܠܳܐܺܝܬ ܒܺܝܼ ܠܳܐ ܚܳܝܪܺܝܼܢ.

ܐܽܘܿܗ ܠܶܗ ܠܚܰܫܳܐ ܕܠܳܐ ܡܶܬܒܰܝܰܐ ܕܠܺܝܼ ܒܢ̈ܰܝ ܡܰܣܒܠܺܝܼܢ.

ܠܘܰܝ ܕܶܝܢ ܠܺܝ ܠܚܽܘܕ ܐܶܠܳܐ ܠܢܰܦܫܗܽܘܢ ܝܰܬܺܝܪ ܡܰܣܟܠܺܝܼܢ.

ܕܡܶܢܝܳܢ ܥܰܡܡ̈ܶܐ ܝܳܪܶܒ ܘܣܳܓܶܐ ܘܗܶܢܽܘܢ ܙܳܥܪܺܝܼܢ.

ܘܰܚܠܳܦ ܪ̈ܺܝܼܫܶܐ ܗ̱ܘܰܘ ܠܗܽܘܿܢ ܥܰܒ̈ܕܶܐ ܘܦܳܫܼܘ ܚܰܣܺܝܼܪܺܝܼܢ.

ܠܐܶܡܰܬܝ ܡܳܕܶܝܢ ܡܶܬܬܥܺܝܪܳܐ ܒܗܽܘܼܢ ܪܽܘܼܚ ܓܰܢ̱ܒܳܪ̈ܺܝܼܢ.

ܘܰܒܫܶܪ̈ܝܳܢܶܐ ܕܺܝܠܗܽܘܢ ܪܳܕܶܐ ܕܡܳܐ ܕܙܰܟܳܝ̣̈ܝ̣ܢ.

ܣܰܬܘܳܐ ܕܩܰܪܺܝܪ ܒܝܰܪ̈ܚܶܐ ܬܠܳܬܳܐ ܝܰܘܡ̈ܰܘܗܝ ܥܳܒܪܺܝܼܢ.

ܣܰܬܘܳܐ ܕܶܝܢ ܕܺܝܼܠܝ ܠܳܐ ܫܳܠܶܡ ܘܰܥܕܶܗ ܗܳܐ ܡܶܢ ܕܳܪ̈ܺܝܼܢ.

ܚܰܣܝܳܐ ܡܳܪܝ ܝܘܼܚܰܢܢ ܕܘܼܠܒܰܢܝ (1885-1969)